“Kalōk Kwe eo Em̧m̧antata,” N̄an Kōkajoorļo̧k Jodikdik ro, Jept. 2021, 6–7.
Itok, Ļoor Eō
Kalōk Kwe eo Em̧m̧antata
Jekjek ko ļalem n̄an kalōk juon mour em̧ōņōņō im elan̄lōn̄.
Kōmeļeļe ko jān Juliet Percival
Ke Irooj ekar kakien Josep Smith n̄an kalōk Kirtland Tam̧peļ, E ekar jab kōtļo̧k bwe en make pukot kilen wāween an kalōke kōn e make. Ekar kwaļo̧k juon karōk me enaaj kar tōl e n̄an tōprak.
“M̧weo en ekkal, jab ilo̧kan jekjek eo an laļ,” Irooj ekar ba. “En ekkal ilo̧kan jekjek eo me Inaaj kwaļo̧k” (Katak im Bujen Ko 95:13–14). Innām Irooj ekar leļo̧k naan in kōmeļeļe ko kōn ekōjkan kalōk tam̧peļ eo (lale Katak im Bujen Ko 95:15–17).
Kam̧m̧oolol, Irooj ekar kwaļo̧k eļapļo̧k n̄an kōj jān baj ekōjkan kalōk tampeļ ko. E ekar barāinwōt letok n̄an kōj naan in kōmeļeļe ko n̄an jipan̄ kōj erom armej eo em̧m̧an tata eo jemaron̄ erom. Ilo ad ļoori, jenaaj kalōk mour ko ad “jab ilo̧kan jekjek eo an laļ” ak ālkin jekjek eo Irooj ekar karōke.
Erkein wāween ko ļalem n̄an kalōk juon mour em̧ōņōņō im elan̄lōn̄ ej pedped ioon Jisōs Kraist.
Kalōk Juon Pedped Em̧ool
Juon rijin̄n̄a em̧ ak rikkal enaaj ba n̄an eok bwe juon pedped eo epen ej menin aorōk n̄an jabdewōt em̧. Hilamōn ekar katakin bwe pedped eo em̧m̧antata n̄an mour ko ad ej “ejm̧aan in ad Ripinmur, eo ej Kraist, eo Nejin Anij.” (Hilamōn 5:12). Jemaron̄ kōm̧m̧an bwe Kraist en pedped eo ad ilo ad itok n̄an E im ļoor katak ko An. Ekōjkan am̧ en̄jake kōn ijo koņaam ilo am̧ kōm̧m̧an bwe Kraist en pedped in mour eo am̧?
Jerbal n̄an ro Jet
Bar juon jekjek eļap an em̧m̧an n̄an kalōk mour ko ad, ekkar n̄an Būreejtōn Dieter F Uchtdorf, eo ekar Rikakpilōklōk eo Kein Karuo ilo Būreejtōnji eo Kein Kajuon, ej itok n̄e “jej jutak kōn need im jerbal n̄an Irooj im jerbal n̄an ro ipeļaakid.”1 N̄e kwoj jerbal n̄an ro jet, kwoj kōm̧m̧ane ta eo Jisōs ekar kōm̧m̧ane im kwoj ekkatak n̄an erom̧ eļapļo̧k āinwōt E. Im koban wōt kōjeraam̧m̧an mour ko an armej ro kwoj jerbal n̄an er, ak kwonaaj barāinwōt jeraam̧m̧an.
Kōm̧mane juon Imminene in Jar im Ekkatak jān Jeje ko Rekwojarjar Aolep Raan
Bar juon jekjek n̄an kalōk juon mour em̧ōņōņō ej n̄an kalōk juon jemjerā ippān Jemedwōj Ilan̄ im Jisōs Kraist. Juon jekjek eļap an em̧m̧an n̄an kōmmane men eo ej ilo jar im ekkatak jān jeje ko rekwojarjar.
Būreejtōn Uchtdorf ekar ba: “N̄an kōkajoorļļo̧k jemjerā eo ad ippān Anij, jej aikuji jet iien ko eļap meļeļeier makeļo̧k Ippān. Ilo ikōņ kejekļo̧kjeņ ioon jar eo im ekkatak jeje ko rekwojrajar an juon make… renaaj jet men ko julo̧k n̄ani relo̧e an iien eo ad im kijejeto ko n̄an epaakeļo̧k Jemedwōj Ilan̄.”2
Jar ej juon iien em̧m̧an n̄an kōm̧m̧ao ippān Jemed ilo Lan̄. Ejeļā kajjieed, E ej iakwe kōj, im E ekōņaan roņ jān kōj! N̄e jej jar ilo m̧ool, leļo̧k ad kam̧m̧oolol, im kajjitōk men ko jej aikuji, E ej ron̄jake im aolepen E ej uaak ilo wāween im iien eo An make.
N̄e ej itok n̄an ekkatak jān jeje ko rekwojarjar, ejjeļo̧k juon jekjek eo ejim̧we n̄an kōm̧m̧ane. Men eo eaorōk ej bwe kwoj kōm̧m̧ane! Būreejtōn Russell M. Nelson ekar katakin, “Lin̄ūri naan ko an Anij aolep raan eaorōk n̄an mour ilo jetōb.”3 Joļo̧k iien kajjojo raan ilo jeje ko rekwojarjar enaaj, ilo ejjeļo̧k pere, jipan̄ eok kalōk juon mour in tōmak im kajoor.
Jepooļ Eok Make ippān Ro Rej kōketak Eok n̄an Kōm̧m̧an Em̧m̧an
Jemedwōj Ilan̄ ekōņaan bwe jān ekkeijel ippān im kalōk jemjerā ko ippān ro jet—eļaptata ippān baam̧le im ro m̧ōttad. Emakijkij ad ļōme mour ko ad ippān ro jej joļo̧k ad iien ippāer. Men̄e rej ro uwaan Kabun̄ in ak jaab, kwoj aikuj jepooļ eok make ippān ro rej jipan̄ eok mour kōn gospel eo, kōjparok jon̄ak ko an Irooj, im erom̧ juon armej em̧m̧anļo̧k. Komaron̄ barāinwōt jipan̄ ro ipeļaakūm̧ kōm̧m̧ane ejja in wōt. Wōn iaan ro m̧ottam̧ rej jipan̄ eok kalōk ejm̧aan eo am̧ ilo jim̧we?
Kappukot Lan̄lōn̄ ilo Am̧ Kalōk Pedped eo Am̧
Elōn̄ jekjek ko komaron̄ kalōk mour eo am̧ n̄an kajoor ilo jetōb im wōr lan̄lōn̄, ekoba etal n̄an jar im bōk m̧ōttan kwojkwoj eo, kōm̧m̧an im kōjparok bujen ko, im ļoor kapilōk eo an rikanaan ro remour.
Ej aorōk n̄an keememej bwe aolepān men kein rej aikuji jerbal im iien. Aolep iien ewōr ekkal im ekkatak n̄an kōm̧m̧ani, ak kwojjab aikuj kōm̧m̧ane make. Irooj enaaj jipan̄ eok kajjojo raan ilo am̧ kajjieon̄ ijo koņaam̧ em̧m̧antata n̄an kalōk juon mour me kwe im E emaron̄ m̧ōņōņō kake im bwe enaaj boktok n̄an eok lan̄lōn̄.