“Kālet ko,” N̄an Kōkajoorļo̧k Jodikdik ro, Jept. 2021, 12–14.
Kālet ko
Pija ko jān Getty Image ko
Elōn̄ iiō ko remo̧otļo̧k, juon iaan Ritōl ro Reutiej ekar kwaļo̧k bwebwenato in epen.
Juon Richerokee elo̧ļe, juon iaan bwij in lukkuun Riamedka ro ilo United States, ekar jiron̄ļo̧k ļaddik eo jibūn kōn juon būrabōļ kōn mour. “Ilowaaō ewōr juon tariņae nana ikōtaan ruo oļip ko,” eo jim̧m̧an ekar ba. “Juon enana: eobrak kōn illu im juunm̧ade, ļōmņak kōn e make im būrom̧ōj, arōk im riab. Eo juon em̧m̧an: obrak kōn jouj im tūriam̧o kake, ettā im m̧ool, iakwe im lan̄lōn̄. Tariņae eo ej wōnm̧aanļo̧k wōt ilo itulowaad kajjojo.
“Ewi wōt oļip eo enaaj wiin?” ļaddik eo jibūn ekar kajjitōk.
“Eo kwoj naajidik,” eo jim̧m̧an elo̧ļe ekar uwaak.1
Būrabōl in kōn oļip kein ruo ej kwaļo̧k juon m̧ool indeeo. Ajri ro nejin Anij ej ļotaktok n̄an kōm̧mani kālet ko ikōtaan em̧m̧an im nana. Jum̧ae ko rej kōtļo̧k bwe jen kōm̧m̧ani kālet ko rejim̧we. Bok in Mormon eo ej katakin kōn m̧ool in ilo kajin eo an jeje ko rekwojarjar: “Bwe emennin aikuj, n̄an an wōr jum̧ae ilo men otemjej.”2
Karōk eo an Jemedwōj Ilan̄ ej letok ruo menin letok ko n̄an jipan̄ ilo kālet kein: (1) E ej letok n̄an kōj Jetōb Kwojarjar eo n̄an tōl kālet ko ad, im (2) E ej letok n̄an kōj juon Rilo̧mo̧o̧r eo eo Pinmuur eo an ej kapidodoik ad ukweļo̧k en kōm̧akūtļo̧k jelet eo an kālet ko renana—n̄e juon armej ej najdik oļip en enana.
I. Ukweļo̧k im Kile
Ilo aō kar ekōnono n̄an jodikdik ro, juon iaan unin kōnono ko emakijkij aer kajjitōk kake ej ukweļo̧k. “Ekōjkan am̧ maron̄ jeļā n̄e eļap jon̄an am̧ kar ukweļo̧k?” “Ekōjkan am̧ maron̄ jeļā n̄e kwoj m̧ool in ukweļo̧k?” Uwaak eo n̄an kajjitōk kein rej itok jān Jetōb Kwojarjar, eo uwaan Doulul in Anij eo ej boktok ennaan ko jān lan̄.
Menin letok eo an ukweļo̧k kar ņaetan “naan eo em̧m̧an an gospel in.”3 Ej kōtļo̧k ad jeereļo̧k ta eo ej waļo̧k jān kālet ko renana me rekar naajdik oļip eo enana im ej kam̧ōjņo̧iki maron̄ eo ad n̄an ron̄ unoojdikdik ko an Jetōb Kwojarjar. Ukweļo̧k ekoba kile bwe jekar kōm̧m̧ane bōd, jako ad bar kōm̧m̧ane nana, im ņamejļan ilo oktakļo̧k būruōd n̄an Anij im kōjparok kien ko An. N̄e jej ukweļo̧k, jej kūr ioon kajoor eo an Pinmuur eo an Jisōs Kraist, eo ej kōļapļo̧k ad kam̧m̧oolol im iakwe n̄an E āinwōt ad Rilo̧mo̧o̧r.
Aikuj eo n̄an ukweļo̧k ejjab wōr jon̄an n̄an jerawiwi ko reļļap me rej aikuj kwaļo̧ki n̄an bisop eo. Ukweļo̧k ej juon men eo aikuji in kōm̧m̧ane aolep raan. Eitōn aolep ro rej ukweļo̧k rej kile bwe jaar kōm̧m̧an bōd, ļōmņak in oktak, im kajjieon̄ kajim̧we ippān ro jaar bōd ņae. Meļeļe eo kōn būrabōļ eo kōn oļip ko ruo, ukweļo̧k ej ekoba in kabōjrak ad kōm̧m̧ani jerawiw ko em̧ool men̄e jerawiwi ko reddik, ko āinwōt n̄e jej kālet n̄an illu ak ebanban. Jej aikuj barāinwōt ukweļo̧k (oktak) n̄e jaar kālet n̄an jerwane iien eo elletok in kar Anij ilo jet iaan elōn̄ m̧akūtkūt ko rej pād me ejjeļo̧k aer aorōk n̄an kōm̧m̧an bwe em̧m̧anļo̧k.
II. Kile juon Oktak eo Eaorōk
Juon tōprak aiboojoj an ukweļo̧k ej n̄an bar ejaake erreo eo ad n̄an bōk unjoojdikdik ko jān Jetōb Kwojarjar eo, eo ej jipan̄ kōj kōm̧m̧ani kālet ko rōlo̧ļe im ej kobrak kōj kōn lan̄lōn̄. Elōn̄ jodikdik ro rej barāinwōt ļōmņak: “Ekōjkan aō jeļā eļan̄n̄e unoojdikdik eo ak uwaak eo me ikar bōke ej lukkuun jān Irooj im ejjab wōt ta eo ij kōņaan?”
N̄an kile eļan̄n̄e juon unoojdikdik ej juon ennaan jān Jetōb Kwojarjar ak ej baj juon ikdeelel an juon make, jej aikuj kōjerbal jilu m̧ool ko.
-
Ilo kain̄i eo an kwojkwoj eo, kallim̧ur eo ej bwe “Jetōb eo An en maron̄ pād [ippād] iien otemjej ” ļoor kallim̧ūr eo ad ej bwe jenaaj bōk iood Etan, im keememej E iien otemjej, im kōjparok kien ko An.4 N̄e jej likjab n̄an kōjparok kallim̧ur kein, epidodo ad tarpok kōn unin jipan̄ eo kōn unoojdikdik ko jej en̄jaki.
-
Unoojdikdik ko jān Irooj ekke kar bōki ilo iien ko relūr ak ilo ioļap in iien kabun̄jar, ekkatak jān jeje ko rekwojarjar, ak jar ak ilo iien ad kōm̧m̧ane kūr ko ad, ak ilo kōttōpar ko kōn ļōmņak kōn juon make ak n̄e jej jepooļ jān m̧akūtkūt ko an laļ in.
-
Āliktata, jej aikuj eļaptata pidodo ad en̄jake n̄an tōl n̄an ukōt iaļ eo em̧ōj kadede ad kōttōpar. Juon im̧we n̄an ukōt iaļ eo emaron̄ in erom ļapļap pedped ioon jān juon im̧we n̄an kōttōpar juon men em̧ōj ad kadede kōņaan.
III. Jim̧we Ej Jim̧we Wōt
Ro m̧ōtta reddik, kom̧ naaj rūttoļo̧k im kekemo̧o̧j ilo juon laļ eo ekanooj apan̄ jān eo an ro jinemi im jemāmi im ro jibūmi im jim̧m̧ami. Ekōm̧m̧an bwe en kanooj aorōk n̄an kom̧ n̄an keememej bwe aorōk ko etto im kien ko rej pād wōt. Kōj jej ro nejin Anij, im kien ko An rej aorōk wōt, men̄e jej itok itak kōn wagon ak spaceship ko im men̄e jej kōnono kōn ainikien ak jeje im leto letak ennaan ko ilo cell phone ko.
Jim̧we ej jim̧we wōt, im bōd ej bōd wōt, men̄e kōn ta eo kar ba ak kōm̧m̧an jān rikōm̧m̧an pija ro, rijerbal ro ilo TV, ak ribun̄bun̄ ro ilo ikkure. Jon̄ak ko ilo jeje ko rekwojarjar, katak ko an rikanaan ro rej mour, im aorōk ko ilo N̄an Kōkajoorļo̧k Jodikdik ro bok jidikdik eo rej kein bōk tōl eo am̧ em̧m̧antata n̄an kālet ko am̧ make ilo erreo ilo ānbwin, ājmour, m̧ool, im nuknuk im paaktokim im aolepān unin kōnono ko jet ie. Tiljek ilo am̧ ļoori, im kwonaaj jeraam̧m̧an. Bok jidikdik in ņae etan N̄an Kōkajoorļo̧k Jodikdik ro ej aikuj jon̄ak eo am̧,” Būreejtōn Russell M. Nelson ekar katakin kōj. “Ej jon̄ak eo me Irooj ej kōtmene aolep jodikdik ro An bwe ren dāpiji.”5
Ilo youth devotional eo an ekajoor, rikanaan eo ad ekar kallim̧ūr:
“Eļan̄n̄e kwonaaj lukkuun m̧ool im kijejeto ilo am̧ kōm̧m̧ane jerbal eo ilo jetōb eo emenin aikuj, kapeel eo in jerbal kōn wāween n̄an ron̄ unoojdikdik ko an Jetōb Kwojarjar, naaj lewaj aolep iaļ ko kwonaaj aikuji ilo mour eo am̧. Naaj lewaj n̄an kom̧ uwaak ko ilo wāween eo an Irooj make im ilo iien eo An make.”6
Ij kobaik kallim̧ūr eo aō n̄an ippān, ilo aō kam̧ool kōn ad Rilo̧mo̧o̧r Jisōs Kraist, eo katak ko An im Pinmuur eo An rej kōm̧m̧an bwe en pidodo aolep men, ilo etan Jisōs Kraist, amen.