“Anij Enaaj Tariņaik Pata ko Am̧—ilo Wāween eo An Make,” N̄an Kōkajoorļo̧k Jodikdik ro, Jept. 2021, 15–17.
Itok Ļoor Eō
Anij Enaaj Tariņaik Pata ko Am̧—ilo Wāween eo An Make
Armej ro Rekwojarjar m̧oktata rekar ekkatak juon ak ruo wāween ko an Anij.
Zaion Kāām jān Judith Mehr
Kōn juon jarlepju in riko̧kkure elōn̄ļo̧k jān 300 armej rej kallim̧ūr n̄an ko̧kkure er ilo jibbon̄ eo, kurup eo an Armej ro Rekwojarjar ro rekar ejake Zaion Kāām rekar kōjatdikdik im jar kōn juon kabwilōn̄lōn̄.
Ium̧win tōl eo an Josep Smith, Zaion Kāām ekar m̧aajļo̧k ium̧win wiik ko jān Ohio n̄an Missouri. Membōr rein an Kabun̄ in rekar kōjadikdik n̄an jipan̄ Armej ro Rekwojarjar ro rekar kadiwōjļo̧k er jān Jackson County, Missouri, USA, n̄an aer bar bōk bwidej ko aer. Bōtaab raar jelm̧ae kaamjak ko im jum̧ae ilo aolepān etal eo aer. Im kiiō, bar juon jarlepju in riko̧kkure ekar kaamjak er.
Kabwilōn̄lōn̄ eo ekar bwe Zaion Kāām eo raar jar kake ejjab to ekar itok. Ekar itok ilo jekjek in kedo ko rej aindoon ilo ettoļo̧k. Juon jourur enana ekar eddōbļo̧k ilo aolep rejete ko im kar kotlo̧k eļap wōt dekā ko. Lan̄ eo ekar kabōjrak jarlepju in rikakkure ro ilo iaļ ko aer.
“Ekar āinwōt eļan̄n̄e emenin aikuj kaje eo ekar itok jān Anij in tariņae ko n̄an kōjparok ro rikarejeran jān kakkure an rikōjdat ro aer,” Bwebwenato eo an Josep Smith ej kōmeļeļeik. “Wōt dekā ko rej wōtļo̧k ioer, im ejjab ioom, im kōm kar jab jorrāān ijjello̧k ekar kookjak jet iaan em̧ nuknuk ko im̧ōm im katutu jet, ilo an rikōjdat ro am kar wōr ro̧n̄ ko ilo at ko aer im kar bar jorrāān, em̧ool ekar būļo̧k ejjor in bu ko aer im o̧o̧j ko waer.”1
Wōt dekā ko raar baj juon iaan m̧ōttan lan̄ eo. Ekar lukkuun wōt leplep jon̄an Reba in En̄o̧d eo, reba eo me ej kōjepeļļo̧k kurup kein ruo ekar walōn̄ļo̧k n̄an enan̄in 40 ne (12 mita) m̧wilaļ in. Ke ekar jibbon̄ ekar m̧wilaļ in wōt epād ilo kolele in nee.
Irooj ekar kallim̧ūri ro uwaan Zaion Kāām eo, “I naaj tariņae pata ko ami” (Katak im Bujen Ko 105:14). N̄e menin ej waļo̧k, ejjeļo̧k pere ilo jait ta eo enaaj anjo̧.
Menin bwilōn̄ ko Raan-Kein
Jet iien jej aikuj in riiti bwebwenato ko āinwōt in, kwomaron̄ ļōmņak etke kain mennin bwilōn̄ kein reļļap rejjab waļo̧k n̄an kwe ilo apan̄ ko am̧.
Elder Jeffrey R. Holland jān Doulul eo an Jon̄oulruo Rijilōk ro ekar kwaļo̧k jet ļōmņak ko me remaron̄ jipan̄. Ekar ba: “Jouj im meļeļe bwe Eo jāmin mejki ak kiki ej kea kōn m̧ōņōņō eo im mour indeeo an ro Nejin ilōn̄in men otemjej me juon armej eo ekwojarjar ej aikuj kōm̧m̧ane. E em̧ool an iakwe, piktokin aiboojoj, im Jemān Tūriam̧o ej et eo Etan.
“Eļan̄n̄e, un eo in,’ kwomaron̄ ba, ’ejjab aikuj bwe ke iakwe eo im tūriam̧o eo An en kar pidodo an kōjjepeļo̧k Loṃaḷo Ekilmūr ko ad make im kōtļo̧k bwe jen etetal ibuļōn ļōkapokpok ko ad ilo ioon ene em̧ōrā?’”
Ilo bar jet naan ko, eļan̄n̄e Anij em̧ōj an kar tariņae kain pata rōt in n̄an ajri ro Nejin m̧okta, etke Ejjab kōm̧m̧ane kiiō? Etke ejjab joļo̧k aolep nan̄inmej ko? Etke ejjab kabōjrak tariņae im kwole im en̄taan ilo aolepān laļ in?
Ak etke ejjab baj kabōjrak rikakkure (bully) eo me ejjab kōmakeļo̧k eok? Ak jipan̄ baam̧le eo am̧ jeļā jerbal ippān doon?
Elder Holland ekar katakin ļak wōt: “Uwaak eo n̄an kajjitōk rōt in ej ‘Aaet, Anij emaron̄ letok kabwilōn̄lōn̄ ko ilo juon wōt iien, ak ejjab to jān kiiō ak tokālik jej ekkatak bwe iien ko im season ko ilo iaļ in mour in ad ilo mour in rej An im An make n̄an kōjebwebweik.’ Ej letok kōļōnta eo n̄an aolepād kajjojo emakeļo̧k.”2
N̄e kwoj ļoor kien ko an Anij, kwoj bōk jipan̄ eo an Anij. Bōtaab ejjeļo̧k iaad emaron̄ kālet ekōjkan ak n̄āāt eo jipan̄ eo ej itok.
Kōjeraam̧m̧an ko Jab Kōtmeni
Jen bar roolļo̧k n̄an Zaion Kāām eo bar jidik. Mennin bwilōn̄ eo ilo Reba in En̄o̧d eo ekar ļap. Im ekar jab mennin bwilōn̄ eo de eo wōt ro uwaan Zaion Kāām eo raar loe ilo iien em̧m̧akūt eo aer. Bōtaab ilo am̧ naaj riiti ilo Itok, Ļoor Eō im ekkatak ilo jemenere allōn̄ in, men ko raar jab waļo̧k ilo wāween eo Armej ro Rekwojarjar raar karōke.
Rekar ļōmņak bwe unleplep in Ziaon Kāām eo ekar n̄an jipan̄ bar bōk bwidej ko aer ilo Jackson County me kar ko̧o̧ti jān Armej ro Rekwojarjar jān jarlepju in rikakkure ro rellu.
Armej ro Rekwojarjar rekar ke bar bōk bwidej ko aer? Jaab.
Armej ro Rekwojarjar rekar ke en̄taan ilo em̧m̧akūtļo̧k eo aer enan̄in 900 m̧aiļ ko (1,448 kilomita) n̄an Missouri? Ekwe, aaet. Jet iien eļap. Ilo tu nana in tata, juon nan̄inmej in koļera ekar m̧okaj an jelet ro ilo kāām eo im m̧an 13.
Ilo laleļo̧k, aolepān kijejeto eo eaar āinwōt emaron̄ kar juon likjab. Bōtaab ekar jab wāween eo elōn̄ wōt iaan ro raar em̧m̧akūt ilo kāām eo kar loe. Brigham Young ekar ba kōn en̄jake in, “kar kōļļāik eō kōn wōnāān eo eļap—aaet … jon̄an ke jeraam̧m̧an eo ikar bōk ekar lukkuun ļap kōn jeļāļo̧kjeņ eo me ikar bōk ilo aō kar ito itak ippān Rikanaan [Josep Smith].”3
Elōn̄ ro jet uwaan Zaion Kāām eo raar barāinwōt kōnono kōn katak ko kar ekkatak im aorōk eo an em̧m̧akūt eo. Rikanaan eo Josep Smith ekar ba kōn make: “M̧aan ro jeiū im jatū, jet iaami rej illu ippa, kōnke kom̧ kar jab tariņae ilo Missouri; ak ij ba n̄an kom̧, Anij ekar jab kōņaan bwe kom̧ en tariņae. Ejjab maron̄ karōk aelōn̄ in Anij eo An … ijello̧kin ekar bōk [ritōl ro an] jān juon kumi in em̧m̧aan ro me raar ajeļo̧k mour ko aer, im raar kōm̧m̧ane juon kaarmejete eļap āinwōt Ebream ekar kōm̧m̧ane.”4
Zaion Kāām jān C.C.A. Christensen
Tiljek eo aer emaron̄ in kar jab an bwidej ko aer bar ro̧o̧lļo̧k. Bōtaab raar lukkuun in jeraam̧m̧an ilo wāween ko jet. En̄in ej jon̄ak eo kwomaron̄ kile ilo mour eo am̧ barāinwōt. Im ta eo Anij ej jipan̄ kōj ej erom̧ kōn māllijon̄ ko ad ekkā an mennin bwilōn̄ eo eļap jān An kōtļo̧k kōj jān māllijon̄ ko ad.
Anjo̧ an Anij Ejjeļo̧k Pere
Ilo am̧ ekkatak kōn mour ko an Armej ro Rekwojarjar m̧oktata, kwomaron̄ kile kareel eo an Anij jān iien n̄an iien. Kwoj riit kōn kōjeraam̧m̧an ko reļļap. Kwoj barāinwōt lo iien ko kōn apan̄ ko rem̧wilaļ. Bōtaab ro me raar lōke Anij n̄an jem̧ļo̧kin, jinekjej eo aer indeeo ekar m̧ool.
N̄e kwoj ļoor Anij im lōke ilo E, Enaaj tariņaik pata ko am̧ im lewaj mennin bwilōn̄ ko kwoj aikuji! Mennin bwilōn̄ kein renaaj itok ilo wāween im iien eo An make, bōtaab tōprak eo ej m̧ool. Āliktata jabdewōt mālijjon̄ naaj ņamejļaer—ilo mour in ak eo tok juon. Āin juon ilo an aurōk, ilo am̧ ļoor E, koban etetal make iaam̧. “Kōn menin, kom̧in tiljek, im lo, im lo, N̄aij pād ippemi em̧ool n̄an jem̧ļo̧kin.” (Katak im Bujen Ko 105:41).