“Ko ha Tuʻunga Moʻui Māʻolunga ki Hoʻo Moʻuí,” Ki Hono Fakamālohia ʻo e Toʻu Tupú, ʻOkatopa 2021.
Ko ha Tuʻunga Moʻui Māʻolunga ki Hoʻo Moʻuí
Tuku ke hoko e kaveinga ʻa e Kau Finemuí ko ha fakahinohino mo ha kāpasa ki he kotoa hoʻo moʻuí.
Ko e kaveinga ʻo e Kau Finemuí ko ha fakamanatu ia ho tuʻunga totonú mo e taumuʻá. ʻOku ʻi ai ha ivi lahi ʻoku maʻu ʻi he taimi ʻoku hanga ai ʻe he ngaahi lea hangē ko e “ʻofefine ʻofeiná,” “ākonga ʻa Sīsū Kalaisí,” mo e “fakamoʻoni ʻa e ʻOtuá” ʻo fakamatalaʻi hotau tuʻunga moʻoní. ʻOku fakafonu kitautolu ʻe he ngaahi kupuʻi leá ni ʻaki ʻa e ʻofá mo ʻomi ha loto-falala ki heʻetau malava ke fehangahangai mo e ngaahi faingataʻá pea maʻu ʻa e fiefiá. Ko e meʻa tatau pē, ʻoku hanga ʻe he ngaahi talaʻofa ʻo e “ikuʻanga taʻengatá,” “fakahā fakatāutahá,” mo e “hakeakiʻí” ʻo fakamanatu mai ʻoku ʻi ai ha ʻuhinga mo ha taumuʻa ʻo ʻetau moʻuí ʻoku ope atu ʻi he ʻaho faingataʻa pē ʻe tahá. ʻI hoʻo lau maʻuloto ʻa e kaveinga ko ʻení, ʻokú ke fakahaaʻi ai ʻa e ʻuhinga ʻo e hoko ko ha ʻofefine ʻo ha mātuʻa fakalangí, ʻo teuteuʻi koe pea mo e māmaní ki he toe hāʻele mai hotau Fakamoʻui ko Sīsū Kalaisí.
ʻOku vahevahe heni ʻe ha kau finemui mei he funga ʻo e māmaní ʻa e ʻuhinga ʻo e kaveingá kiate kinautolú.
“ʻOku ou saiʻia ʻi he ʻasi he fakamatala kotoa pē ʻa e ʻoku ou.ʼ ʻOku fakamanatu mai ʻe he fakaleá ni ko ʻeku fakamoʻoní ko ʻeku fakamoʻoni pea kuo pau ke u ngāue mālohi ange ke hoko ʻo hangē ko hoku Fakamoʻuí.”
Kalolaine F., 15, Veisinia, USA
“Ko e meʻa ʻe taha ʻoku akoʻi mahino mai ʻe he kaveingá ko e lahi e ʻofa ʻetau mātuʻa fakalangí ʻiate kitautolú. Kuo fekauʻi mai kitautolu ʻe heʻetau Tamai Hēvaní ki he māmaní ka naʻe ʻikai ke Ne tuku ke tau tuenoa. ʻOku tau takitaha maʻu ha ivi fakaofo, pea koeʻuhí ʻoku ʻofa lahi ʻa e ʻOtuá ʻiate kitautolu, naʻá Ne faʻu ai ha palani ke tau lava ʻo aʻusia e tuʻunga ko iá. ʻOku fakafiemālie moʻoni ke ʻiloʻi naʻa mo e ngaahi ʻaho faingataʻa tahá, ʻoku ʻi ai ʻetau mātuʻa fakalangi ʻokú na poupouʻi kitautolu.
Lepeka S., 16, mo Meikeni S., 14, Tekisisi, USA
“ʻOku makehe ʻaupito kiate au e kaveinga ʻa e Kau Finemuí koeʻuhí he ʻokú ne fakamanatu mai ke u hoko maʻu pē ko ha faifekau ʻi he feituʻu kotoa pē ʻoku ou ʻi ai mo ʻalu ki aí: ʻi ʻapiako pe lotú pe ʻi ʻapi.”
Kuinisī E, Konetikati, USA
“ʻOku fakamanatu mai ʻe he kaveingá kuo pau ke u fekumi ki ha ngaahi faingamālie ke u hoko ai ko ha tokotaha lelei ange. ʻOku ou loto mamahi he taimi ʻe niʻihi ʻi he taimi ʻoku ʻikai ke u lava ai ʻo fai ha meʻa ʻoku ou ʻiloʻi ʻoku totonu ke u faí. Ka ʻi he taimi ʻoku ou tōnounou aí, ʻoku ou ʻiloʻi ʻoku ou maʻu foki ha faingamālie ke hoko ʻo lelei ange. Mahalo ko e meʻaʻofa ʻo e fakatomalá, ʻa e meʻa lelei taha ʻi he māmaní.”
ʻAnasitāsia S., 12, Mosikou, Lūsia
“ʻOku faingataʻa ʻete hoko ko ha mēmipa ʻo e Siasí ʻi he taʻu ko ʻení. ʻOku mau faʻa ilifia ʻi hono tohoakiʻi mai e tokangá mo talamai ʻoku mau kehé. Ka ʻoku fakamanatu mai ʻe he kaveingá ʻoku ou fāifeinga ke hoko ʻo hangē ko Sīsū Kalaisí. ʻOku tokoni ʻa e kaveingá ke ngalo ʻiate au ʻa e meʻa ʻe ala lea ʻaki ʻe he niʻihi kehé kae tokanga taha pē ki he meʻa ʻoku ou fie maʻu moʻoní.”
Souī V., 16, ʻĀsenitina
“ʻOku hanga ʻe he sētesi ʻʻI heʻeku fāifeinga ke feʻunga mo e hakeakiʻí, ʻoku ou mataʻikoloa ʻaki e meʻaʻofa ʻo e fakatomalá pea feinga ke fakalakalaka ʻi he ʻaho takitahaʼ ʻo fakamanatu mai ʻoku ʻikai ke kovi ʻa e fakatomalá. Ko ha faingamālie fakaʻofoʻofa ia ke tau fakafoʻou ai kitautolu pea fakafenāpasi mo e ʻOtuá. ʻOku ou houngaʻia ʻaupito ʻi he nonga mo e fiefia ʻoku ʻomi ʻe he fakatomalá!”
Heili, S. 17, ʻAlesona, USA
“ʻOku tokoniʻi au ʻi heʻeku muimui ki he kaveingá ke u hoko ko e tuʻunga lelei tahá.”
ʻEivi N., 11, ʻIutā, USA
“ʻOku ʻomi ʻe he kaveingá ʻa e ʻilo ko ia ko ha ʻofefine au ʻo ha ongomātuʻa fakalangi. ʻOku tokoni hono ʻiloʻi ʻení ke ʻoua naʻá ku ongoʻi tuenoa ʻi he ngaahi taimi ʻo e faingataʻá. ʻI he taimi ʻoku faingataʻa ai ke u aʻusia ʻeku ngaahi taumuʻá, ʻoku ou fakakaukau ki hoku natula faka-ʻOtuá mo e ikuʻanga taʻengatá. ʻOkú ne ueʻi au ke u mālohi pea ʻoua ʻe foʻi.”
Lisa B., 12, Kievi, ʻIukuleini
“ʻOku makehe kiate au ʻa e kaveinga ʻo e Kau Finemuí koeʻuhí he ʻoku tokoni ia ke mahino kiate au ʻa hoku mahuʻinga ko ha finemui mo ha ʻofefine ʻo e ʻOtuá. ʻOku ou mataʻikoloa ʻaki e foʻi laine kotoa pē. ʻOkú ne talamai ʻa e ngaahi meʻa ʻoku totonu ke u fai ke u toe ofi ange ai kiate Iá. ʻOku toe tokoniʻi foki au ai ke u ʻiloʻi ʻeku taumuʻa ʻi he moʻuí.”
Selaia D., 14, Seni Katalina, Samaika