“Ko Hoʻo Fuka ʻo e Tauʻatāiná,” Ki Hono Fakamālohia ʻo e Toʻu Tupú, ʻOkatopa 2021.
KoHoʻo Fuka ʻo e Tauʻatāiná
ʻE lava e ngaahi lea fakalaumālie ʻo e Kaveinga foʻou ʻa e Kōlomu ʻo e Lakanga Taulaʻeiki Faka-ʻĒloné ʻo hoko ko ha mālohinga kiate koe ʻi ha māmani faingataʻa.
ʻI ha taimi ʻo e tau mo e fekeʻikeʻí, naʻe hanga ʻe he palōfita fakakuongamuʻa ko e ʻEikitau ko Molonaí ʻo hiki hake e fuka ʻo e tauʻatāiná pea ui ʻa hono kāinga Nīfaí ke maluʻi ʻenau tui fakalotú, tauʻatāiná, melinó, mo e ngaahi fāmilí (vakai, ʻAlamā 46:12). Naʻe fakamanatu ʻe he fuka ʻo e tauʻatāiná ki he kakaí ʻa honau fatongia ki he ʻOtuá pea mo e ngaahi meʻa ko ia ne mahuʻinga hono tauʻí.
Hangē pē ko e kuonga ʻo Molonaí, ʻoku tokolahi ha kakai he ʻahó ni ʻoku nau tafoki mei he ngaahi akonaki ʻa Sīsū Kalaisí. Ke tokoniʻi e kau talavoú ke nau tuʻu maʻu hangē ko Molonaí, kuo fokotuʻu ai ʻe he kau taki ʻo e Siasí ha kaveinga, ko ha fuka fakaonopooni ʻo e tauʻatāiná, ke tokoniʻi kimoutolu ko e kau talavou ke mou fehangahangai mo e ngaahi faingataʻa ʻo e kuonga ní.
ʻI hoʻomou ako mo moʻui ʻaki e ngaahi lea ʻo e Kaveinga ʻo e Kōlomu ʻo e Lakanga Taulaʻeiki Faka-ʻĒloné, te mou lava ʻo tuʻu ʻaliʻaliaki fakataha mo e kau talavou kehe ʻi he funga ʻo e māmaní ke maluʻi ʻa e moʻoní. Lau ʻa e founga kuo ueʻi fakalaumālie ai ʻe he Kaveinga ʻo e Kōlomu ʻo e Lakanga Taulaʻeiki Faka-ʻĒloné ha niʻihi ke nau hoko ko ha ngaahi foha lelei ange ʻo e ʻOtuá ʻi heʻenau feinga ke teuteuʻi ʻa e māmaní ki he toe hāʻele mai ʻa e Fakamoʻuí ki māmaní.
“ʻOku tokoniʻi au ʻe he Kaveinga foʻou ʻo e Kōlomu ʻo e Lakanga Taulaʻeiki Faka-ʻĒloné ke u manatuʻi ko hai au pea mo e tuʻunga ʻoku fie maʻu ke u aʻusia ke u nofo ai mo Kalaisí. ʻOkú ne fakamanatu mai ko ha foha ʻofeina au ʻo e Tamai Hēvaní pea kuo pau ke u ngāue faivelenga mo ngāue mālohi ke lava ʻo faitāpuekina au pea mo kinautolu ʻoku mau feohí. ʻOkú Ne ʻamanaki mai ke u fakahoko hoku lelei tahá, pea te u fakahoko ia. ʻOkú Ne ʻamanaki mai ke u tokoni ke teuteuʻi ʻa e māmaní ki he toe hāʻele mai ʻa e Fakamoʻuí ʻaki hono fakamafola ʻo e ongoongoleleí ʻi he feituʻu kotoa pē.”
ʻEnitasoni E., 14, Palāsila
“Kuó u fokotuʻu ha taumuʻa ke kamata ako maʻuloto ʻa e kaveingá koeʻuhí ke ʻoua naʻa hoko ia ko ha meʻa pē ʻoku ou lau ʻi he Sāpaté. ʻOku ou loto ke fakatō ia ki hoku lotó ke hoko ia ko ha konga ʻo ʻeku moʻuí.”
ʻAnitelū., 17, ʻIutā, USA
“ʻOku ou saiʻia ʻaupito ʻi he kaveingá. ʻI hono lea ʻaki ʻa e ngaahi meʻa hangē ko e ʻTe u teuteu ke hoko ko ha faifekauʼ mo e hoko ko ha ʻhusepāniti mateakiʼ ʻoku poupouʻi ai e tokotaha kotoa pē, naʻa mo kinautolu ʻoku ʻikai ke nau fakahoko iá, ke nau hoko ko ha kau faifekau mo ha ngaahi husepāniti lelei. ʻOkú ne tokoniʻi au ʻi heʻeku feinga fakaʻaho ke hoko ko ha taha moʻui mateaki ange ki he ongoongolelei ʻo Sīsū Kalaisí.”
Likato P., 15, Palāsila
“ʻOku ou saiʻia ʻi he fakamamafa ʻoku fakahoko ʻe he Kaveinga ʻo e Kōlomu ʻo e Lakanga Taulaʻeiki Faka-ʻĒloné ʻi he ʻapí mo e mahuʻinga ʻo e ngāue ʻi ʻapí. ʻOku tokoni ʻeni ke fakamanatu mai kiate au ko e taha ʻo e ngaahi feituʻu mahuʻinga taha ke tokoni aí ko hoku ʻapí mo e fāmilí.”
Misaeli B., 16, ʻAositelēlia
“ʻKo ha foha ʻofeina au ʻo e ʻOtuá, pea ʻoku ʻi ai Haʻane ngāue ke u fakahoko.ʼ ʻOku tau faʻa toʻo maʻamaʻa e ngaahi lea peheé, ka ʻi he taimi ne u tangi ai ʻi he fakapoʻulí, kuó u ongoʻi e toʻukupu māfana ʻo e ʻOtuá ʻi hoku umá pea mo ʻEne ʻofá ʻi hoku lotó. ʻI he taimi kuó u hē ai ʻo molé, ʻoku mafao mai ʻe he ʻOtuá Hono toʻukupú ʻo taʻalo mai ke u foki mai. Ko ʻEne fānau au, pea ʻokú Ne fie maʻu ʻa e lelei tahá maʻaku. ʻOku ʻi ai ha ngāue ʻokú Ne finangalo ke u fakahoko.”
ʻĪlai S., 18, Niu Sēsī, USA
“ʻOku tokoni ʻa e kaveinga foʻoú ke u fakakaukau ki he ngaahi meʻa te u lava ʻo fai ʻi he ngāue ʻa e ʻEikí. ʻOkú ne akoʻi mai ʻoku fiemaʻu pea mahuʻinga foki e fanga kiʻi meʻa īkí.”
Mataiasi S., 14, Palāsila