“Ko e Fale ʻo e ʻEikí,” Ki Hono Fakamālohia ʻo e Toʻu Tupú, ʻOkatopa 2021.
Haʻu, ʻo Muimui ʻIate Au
Ko e Fale ʻo e ʻEikí
Naʻe fekau ʻe he ʻEikí e Kāingalotu ʻi Ketilani ʻOhaiō, USA, ʻi Tīsema ʻo e 1832, ke langa ha temipale.
“Fokotuʻu ha fale, ʻio … ko ha fale ʻo e ʻOtuá.”
Naʻe taʻu ʻe tolu pea kakato ʻa e temipalé. Naʻe feilaulauʻi ʻe he Kāingalotú ʻa e taimi mo e paʻanga ke langa ia.
Naʻe ʻosi ia ʻi Māʻasi 1836. Naʻe fakahā ʻe Siosefa Sāmita ki he Kāingalotú ke nau fakataha mai ki hono fakatapuí.
ʻI he pongipongi ʻo e ʻaho 27 ʻo Māʻasi 1836, naʻe kau atu ha kakai ʻe toko 1,000 nai ki hono fakatapui ʻo e temipalé.
Naʻe lea ʻa Sitenei Likitoni ʻo laka ʻi ha houa ʻe ua.
Naʻe lau leva ʻe Siosefa Sāmita e lotu fakatapuí (vakai, Tokāteline mo e Ngaahi Fuakava 109).
“ʻOku mau kole ki hoʻo ʻafió, ʻe ʻEiki, ke ke tali ʻa e falé ni.”
Naʻe hivaʻi ʻe ha kuaea ʻa e “Ko e Laumālie ʻo e ʻOtuá,” ʻa ia naʻe faʻu fakahangatonu pē ki he meʻa ne fakahokó.
Naʻe fakamoʻoni ha tokolahi ki ha ngaahi aʻusia fakalaumālie maʻongoʻonga naʻa nau maʻu ʻi he fakatapuí, kau ai hono lilingi mai ʻo e Laumālie Māʻoniʻoní pea mo e hā mai ʻa e kau ʻāngeló.
ʻI he ʻaho 3 ʻo ʻEpelelí, naʻe hā mai ai ʻa Sīsū Kalaisi ki he Palōfita ko Siosefa Sāmitá mo ʻŌliva Kautele ʻi he temipalé. Naʻá Ne fakahā kiate kinautolu naʻá Ne tali ia ko Hono fale pea ʻoku totonu ke fiefia ʻa e Kāingalotú koeʻuhí ko e ngaahi tāpuaki te nau maʻú.