“Ko e hā ʻoku totonu ke u faí ʻo kapau kuó u fakatomala ka ʻoku ʻikai lava mataʻofi ʻa e fakakaukau ki heʻeku fehalākí?” Ki Hono Fakamālohia ʻo e Toʻu Tupú, ʻOkatopa 2021.
Ngaahi Fehuʻi mo e Talí
“Ko e hā ʻoku totonu ke u faí ʻo kapau kuó u fakatomala ka ʻoku ʻikai lava mataʻofi ʻa e fakakaukau ki heʻeku fehalākí?”
ʻIloʻi Hoʻo Fakalakalaká
ʻOku ʻikai ʻamanaki mai e Tamai Hēvaní ke tau haohaoa, ko ia ʻoku ou fakaʻaongaʻi ʻeku ngaahi fehalākí ko ha aʻusia ke ako mei ai. ʻOku feinga ʻa Sētane ke tukuhifo kitautolu ʻaki ʻene lōmekina kitautolu ʻaki ʻa e ongoʻi halaiá, ka ʻoku ʻikai ke ne toe maʻu ha mālohi makehe mei ai. ʻI heʻeku ʻiloʻi ia he taimi ní, ʻoku ou feinga ke vakai ki heʻeku fakalakalaká kae ʻoua ʻe tokanga taha ki heʻeku ngaahi angahalá.
Luke M., 14, ʻIutā, USA
Fakamolemoleʻi Koe
ʻI he taimi ʻokú ke fakamolemoleʻi ai koé, te ke ongoʻi ʻa e ʻofa ʻa e Fakamoʻuí maʻaú, koeʻuhí he kuó Ne ʻosi fakamolemoleʻi koe. ʻOku loto ʻa Sētane ke ne fakahū atu ha ngaahi fakakaukau fakalotosiʻi, ka ʻokú ke mālohi ange. ʻOku ʻikai haʻu e ngaahi fakakaukau ko iá mei he Tamai Hēvaní, ko ia ai tukunoaʻi ia!
Kamila A., 18, Lepapulika Tominikení
Hiva Langaki Moʻuí
ʻOku ou saiʻia ke fanongo ki ha ngaahi hiva fakalaumālie ke tokoni ke langaki hake mo fakalotolahiʻi au. ʻI he taimi ʻoku ou lotu ai ki he Tamai Hēvaní ke kole ʻEne tokoní, peá u fanongo leva ki ha ngaahi hiva langaki moʻuí, ʻoku ou ongoʻi mālohi ʻa e Laumālié pea ʻoku tokoni ia ke u hoko atu.
ʻElemā P., 18, Nekolosi ʻOkisitenitolo, Filipaini
Nonga ʻi he Folofolá
Kapau ʻokú ke ongoʻi kuó ke ʻosi fakatomala, fekumi ki ha nonga ʻi he folofolá. Naʻe ʻomi e folofola ʻa e ʻEikí ke tau lava ʻo ongoʻi ʻa e nongá ʻi heʻetau moʻuí. Kapau te ke lotua ke nofoʻia koe ʻe he Laumālie Māʻoniʻoní ʻi hoʻo laukongá, te Ne tataki koe.
ʻEma M., 19, Sipeini
ʻE Lava ʻo Tokoni hono Manatuʻí
Naʻe fakamatalaʻi ʻe he palōfita ko ʻAlamaá ʻi he ʻAlamā 36:17–19, ʻa hono manatuʻi ʻene ngaahi angahalá, ka naʻe hoko pē ia ke ne toe fiefia ange ʻi he liliu lahi mo e fakalakalaka kuo hoko kiate iá. Hangē ko ʻAlamaá, ʻoku tokoni hono manatuʻi ʻetau ngaahi fehālaaki he kuohilí ke ʻoua naʻa tau toe fakahoko ia.
Sūlia M,. 18, Pahia, Palāsila
ʻOku ʻIkai Toe Manatuʻi ʻe he ʻOtuá ʻEtau Ngaahi Angahalá
ʻOku talamai ʻe he folofolá ko e hili ko ia hoʻo fakatomala mei he angahalá, ʻoku ʻikai toe manatuʻi ʻe he ʻOtuá ʻa e angahala ko iá (vakai, Tokāteline mo e Ngaahi Fuakava 58:42). Neongo ʻoku ʻikai toe manatuʻi ia ʻe he ʻOtuá, ka ʻoku ʻikai pehē mo kitautolu. ʻE lava ke fakamamahi ʻa e manatu ki he ngaahi fehalaaki ʻo e kuohilí, kae ʻoua te ke fakakaukau ko ha kavenga ʻa e loto-halaia he kuohilí, ka ke fakakaukau ki ai ko ha fakamanatu ia ke fai ho lelei tahá.
ʻIlaisiā W., 17, ʻIutā, USA
Fakalelei ʻa Kalaisí—Maʻau
ʻI he taimi ʻoku ou fakakaukau ai ki heʻeku ngaahi angahala he kuohilí, ʻoku faingofua ke u ongoʻi hangē ʻoku teʻeki ai ke u fakatomala kakató pe ʻoku ʻikai taau ke u maʻu e fakamolemole ʻa e ʻOtuá. Ka ʻoku mahuʻinga ke manatuʻi ʻoku finangalo e Tamai Hēvaní ke tau fakalakalaka. ʻOku ʻikai ke Ne finangalo ke tau nofo ʻi he kuohilí pe tukulotoʻi e ongoʻi halaiá ʻo taʻengata. Naʻe foaki ʻe he Tamai Hēvaní Hono ʻAlo ko Sīsū Kalaisí, ko ha Fakamoʻui, ke tau lava ʻo fakatomala pea toe fakamaʻa kitautolu ʻo fakafou ʻi Heʻene Fakaleleí.
Kolouī W., 16, ʻAlesona, USA
Tokoni ki he Niʻihi Kehé
Te ke pehē ko hoʻo fakatomalá pē, ʻe taʻofi leva hoʻo ngaahi palopalemá mo e fakakaukau ki hoʻo ngaahi fehalākí. Ka ʻoku ʻikai ke moʻoni maʻu pē ia. ʻI he taimi ʻe niʻihi ʻoku pukepuke ʻe he ʻOtuá ʻa e ngaahi ongo ko iá koeʻuhí ke ke lava ʻo ako ke ikunaʻi kinautolu. Kapau kuó ke fakatomala fakamātoato ka ʻoku hangē ʻoku ʻikai lava ke ngalo ʻiate koe hoʻo ngaahi fehalākí, ʻahiʻahi tokoni ki he niʻihi kehé, ʻo hangē ko ia ne mei fai ʻe Kalaisí, ʻaki haʻo tokoniʻi kinautolu ʻoku mou feohí mo vahevahe hoʻo fakamoʻoní. ʻE tokoni ia ke toʻo hoʻo fakakaukaú mei hoʻo ngaahi tōnounoú, pea te ke tokoniʻi ai ha taha kehe.
Sēkope W., 21, ʻIutā, USA