“Mei he Fakafetuʻutaki ki he Faifekaú ki he Maná,” Ki Hono Fakamālohia ʻo e Toʻu Tupú, ʻOkatopa 2021.
Mei he Fakafetuʻutaki ki he Faifekaú ki he Maná
ʻOfá. Vahevahe. Fakaafe. Pea ʻoku faingofua ange ia he taimí ni ʻi ha toe taimi kimuʻa.
Kuó ke maʻu nai ha loto-toʻa ke vahevahe hoʻo fakamoʻoní mo ha taha? Mahalo naʻá ke maʻu ha ongo ʻoku fie maʻu ʻe ha kāinga pe kaungāmeʻa ke fanongo ki he ongoongoleleí.
ʻOku ʻomi ʻe he moʻui ʻaki e ongoongoleleí ha maama ʻi hotau lotó, pea ʻoku kole mai ʻe Sīsū Kalaisi ke tau vahevahe e maama ko iá mo e māmaní (vakai, Mātiu 5:16). ʻI heʻetau fakahoko iá, te tau lava ʻo maʻu ha taha ʻoku mateuteu ke ako mei he kau faifekaú. Kapau ko ia, ʻoku ʻi ai ha founga ʻi he app Member Tools ʻa e Siasí ʻe lava ʻo tokoni ke fetuʻutaki ʻa e kau faifekaú mo kinautolu. ʻOku fakahā ʻe he ngaahi talanoa ʻi laló ʻa e founga hono fakaʻaongaʻi ʻe he kakaí ʻa e founga ko ʻení—mo e founga ʻe lava ke ne tāpuekina ai ʻa kinautolu ʻokú ke fakaafeʻi ke feʻiloaki mo e kau faifekaú.
ʻOku Tali ʻe Seisoni ha Lotu
Tā fakatātaaʻi ʻe Michael Mullan
Ne ʻikai fuoloa mei heni, ne ʻaʻahi ʻa Seisoni ki Seni Tieko, Kalefōnia, USA, ke faitoʻo kanisā. Neongo ko ha taimi faingataʻa ʻeni kiate ia, ka ʻoku pehē ʻe Seisoni, “Naʻá ku lotu he pongipongi ne u folau aí ke maʻu ha faingamālie ke u vahevahe ai e ongoongoleleí mo ha taha kuo mateuteu.”
Naʻá ne heka tekisī ki he malaʻe vakapuná pea kamata talanoa mo Lōpeti, ko e fakaʻulí. Ne ʻikai fuoloa kuo fakahaaʻi ʻe Seisoni ʻene tui ki he ʻOtuá mo vahevahe ange ko ha mēmipa ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku pehē ʻe Seisoni, “Naʻe fiefia ʻa Lōpeti peá ne talamai naʻá ne sio ki hotau temipalé ofi ki he hala lahí.” “Naʻá ne lotu mo kole ke ʻilo lahi ange ki heʻetau tui fakalotú. Naʻá ku talaange kuo tali ʻene lotú.”
Ne talaange ʻe Seisoni ke ne fakafeʻiloaki ʻa Lōpeti ki he ongo faifekaú, pea naʻá ne loto lelei ki ai. Naʻe fakaʻaongaʻi ʻe Seisoni ʻa e “ʻAve ha Taha ke Fakafetuʻutaki” ʻi he polokalama Member Tools ke ʻave ʻa e fakamatala ʻa Lōpetí. Hili ha ngaahi māhina siʻi mei ai, ne maʻu ʻe Seisoni ha pōpoaki mei he kau faifekau ʻi Seni Tiekó. “Naʻa nau talamai naʻe papitaiso ʻa Lōpeti ʻi he ʻaho kimuʻá. Naʻe fakaofo ʻaupito!”
ʻOku ‘Ave ʻe Kēleni ha Fakafiemālie
Naʻe nofo mavahevahe ʻa Kēleni mo hono kāinga ko ʻEimí ʻi ha maile ʻe 1,200 tupu. Naʻe ʻiloʻi ʻe Kēleni naʻe fie maʻu ʻe ʻEimi ha fakafiemālie, pea neongo naʻe ʻikai ke ne lava ʻo ʻi ai, ka naʻe lava ʻa e kau faifekau ʻi he kolo tupuʻanga ʻo ʻEimí! Naʻe fakaʻaongaʻi ʻe Kēleni ʻa e meʻangāue fakafetuʻutakí ke fakahā ki he kau faifekau ʻi Sōleki Siti, ʻIutā, USA, fekauʻaki mo ʻEimi. ʻOku pehē ʻe Kēleni, “Naʻá na fetuʻutaki mai, peá u fakamatalaʻi ange e anga e tupu hake ʻa ʻEimí mo e tūkunga lolotongá, pea naʻá ne ongoʻi naʻe houhau ʻa e ʻOtuá ʻiate ia.”
Ne ʻikai fuoloa mei ai, kuo fetuʻutaki e ongo sisitaá kia ʻEimi. Lolotonga ʻenau talanoa he telefoní, naʻá na lotua ia. ʻI he pō ko iá, naʻe tā telefoni ʻa ʻEimi kia Kēleni mo ʻene tangí ʻo talaange fekauʻaki mo e ongo faifekau naʻá na lotua iá. ʻOku pehē ʻe ʻEimi, “Naʻe ongo moʻoni kiate ia ʻena angaʻofá.”
Neongo kuo teʻeki ke kamata maʻulotu ʻa ʻEimi, ka kuo kamata ke ne lotu fakaʻaho ki he Tamai Hēvaní. ʻOku ʻikai ʻilo ʻe Kēleni pe ko e hā ʻe hoko ʻi he kahaʻú, ka ʻokú ne pehē, “ʻOku ʻunuʻunu ofi ange ʻa ʻEimi kia Kalaisi.”
Ko e Vahevahe ʻe ʻEtuata ʻEne Māmá
Naʻe pehē ʻe ʻEtuata, “ʻI he kamataʻangá, naʻe ʻikai ke u teitei ʻiloʻi e founga ke vahevahe ai e ongoongoleleí mo ha taha pe ko e founga ke fakafeʻiloaki ai e kau faifekaú ki hoku ngaahi kaungāmeʻá.” ʻOku haʻu ʻa ʻEtuata mei Palāsila, pea neongo ʻoku ʻikai ke tokolahi e kāingalotu ʻo e Siasí ʻi hono ʻātakaí, ka ʻokú ne ʻiloʻi “ʻoku teuteuʻi maʻu pē ʻe he ʻEikí ha founga ke ʻilo ai ʻe Heʻene fānaú ʻa e moʻoní.”
Naʻe vahevahe ʻe ʻEtuata ha vitiō ʻa e Siasí mo ha kaungāmeʻa, ʻa ia naʻá ne saiʻia he meʻa naʻá ne mamata aí. ʻI he fakaʻau ke saiʻia ange e kaungāmeʻa ʻo ʻEtuatá ʻi he Siasí, naʻá ne fakaafeʻi ia ke talanoa mo e kau faifekaú pea fakaʻaongaʻi e polokalama fakafetuʻutaki ki he kau faifekaú ʻi he uepisaiti ʻa e Siasí. Naʻe tānaki atu ʻe ʻEtuata ha fakamatala ʻo pehē naʻá ne fie kau ʻi he fakalakalaka hono kaungāmeʻá ʻi hono ako e ongoongoleleí. Naʻe tali fiefia ia ʻe he ongo faifekaú. Naʻe kau foki ʻa ʻEtuata ki he papitaisó.
ʻOku pehē ʻe ʻEtuata naʻá ne ongoʻi e ʻofa ʻa e ʻOtuá ki Heʻene fānaú ʻi he momeniti ko iá. ʻOkú ne toe pehē foki, “ʻOku tau maʻu kotoa pē ha taha ʻoku mamata ki he Maama ʻa Kalaisí ʻiate kitautolu. ʻOku fie maʻu pē ke tau fakaafeʻi kinautolu ke nau sio ki he maama ko iá!”
Fakaafe ki he Kakai Kotoa Pē
ʻI he taimi te ke toe maʻu ai ha ongo ʻe lava ʻo tokoni ki ha taha ke fanongo ki he kau faifekaú, ʻoua te ke momou ke fakaʻaongaʻi e meʻangāue ko ʻení ke tokoni ʻi hono fakafetuʻutaki ho ngaahi kaungāmeʻá mo e kau faifekaú. ʻE fiefia ʻa e kau faifekaú ke fakaafeʻi koe ke ke kau mai ʻi he taimi te nau fetaulaki ai mo ho ngaahi kaungāmeʻá. Pea ko hai te ne ʻilo? Mahalo te ke mamata foki ʻi ha mana he fonongá.