“Ko e Teuteu ki Hoʻo ʻEnitaumení,” Ki Hono Fakamālohia ʻo e Toʻu Tupú, ‘Okatopa 2021.
Ko e Teuteu ki Hoʻo ʻEnitaumení
ʻOku vahevahe ʻe ha kakai lalahi kei talavou ʻenau ngaahi aʻusia ʻi he founga ne nau teuteu ai mo maʻu honau ʻenitaumení ʻi he temipalé.
Ko e ʻalu ko ia ki he temipalé ke maʻu ho ʻenitaumení ko ha aʻusia foʻou ia ki he tokotaha kotoa pē. Kapau ʻoku ʻikai ke ke ʻilo e meʻa ke ʻamanaki ki aí, ʻoku fakanatula pē ke ke fie ʻilo pe kiʻi manavasiʻi. Ko e lahi ange ʻetau teuteuʻi kitautolú, ko e lahi ange ia ʻetau lava ʻo ongoʻi ʻa e Laumālie Māʻoniʻoní ʻi heʻetau fuofua aʻusia ʻa e ouau toputapu ko ʻeni ʻo e temipalé—pea ʻi he taimi kotoa pē hili iá.
Kapau kuo teʻeki ai ke ke maʻu ho ʻenitaumení, mahalo ʻoku ʻi ai haʻo ngaahi fehuʻi—pea ʻoku sai pē ke ʻeke kiate kinautolu! Ko e ongoongo fakafiefiá he te ke lava ʻo ako ha konga lahi ʻo e ngaahi talí kimuʻa peá ke ʻalú. (Ko e niʻihi kuo pau ke tatali kae ʻoua kuó ke ʻi he temipalé, pea ko e niʻihi ʻe hokohoko atu ʻa e akó ʻi he toutou ʻalu ki he temipalé he kotoa ʻo e moʻuí.)
Naʻa mau kole ki he kakai lalahi kei talavou ʻi he funga ʻo e māmaní ke nau tali ha niʻihi ʻo e ngaahi fehuʻi ʻokú ke manavasiʻi ke ʻeké—pea mo ha niʻihi naʻe ʻikai ke ke fakakaukau ki ai!
Naʻá ke ongoʻi fēfē ʻi hoʻo ʻalu ki he temipalé ke maʻu ho ʻenitaumení? Ko e hā e ongo ʻokú ke maʻu ʻi hoʻo ʻalu he taimi ní?
Kiate au, naʻe faingataʻa ke u fakatokangaʻi ʻa e Laumālié koeʻuhí he naʻá ku fuʻu tokanga taha ki he meʻa kotoa pē naʻe hokó. Ka ko e taimi kotoa pē kuó u ʻalu ai ki he temipalé talu mei ai, kuó u ongoʻi fiemālie ange ʻi he ouaú, pea kuó u ako fekauʻaki mo e fakataipé pea mo e mahuʻinga ʻo e ngaahi fuakavá.
Soana A., 21, ʻAositulia
Naʻá ku ʻohovale ʻi he fakafiemālie ʻa e ʻenitaumení. Naʻe ʻi ai ha ngaahi konga ʻo e sēsini ʻenitaumení naʻe kehe ia mei he founga ʻo ʻetau moihū ʻi he Siasí, ka naʻe ʻi ai kotoa hono ʻuhinga. ʻOku ou ongoʻi he taimí ni, hangē ʻoku faingofua pē ʻeku tokanga ki he Laumālié. ʻOku lōngonoa pea ʻikai ke ʻi ai ha fakahohaʻa, ko ia ʻoku ou fakaʻaongaʻi ai ha taimi ke nofo mo e ʻOtuá.
Luke E., 21, ʻAlapeta, Kānata
Luke E.: Temipale Provo City Center
Tā fakatātā ʻa Kahee Shin
Ko e hā naʻá ne tokoniʻi koe ke ke ongoʻi mateuteu ke maʻu ho ʻenitaumení?
Ko e meʻa naʻe tokoni ke mahino lahi ange kiate au ʻa e temipalé ko ʻeku toe foki ki he temipalé. Kapau te ke lava, ʻalu mo e kakai ʻokú ke falala mo ʻofa ai. ʻI hoʻo ʻi he loki silesitialé hili e sēsiní, te ke lava ʻo tangutu fakataha mo kinautolu pea talanoa ʻi he loto ʻapasia fekauʻaki mo e ngaahi fehuʻi ʻokú ke maʻú mo e ngaahi meʻa ʻokú ke akó.
Hena S., 21, ʻAlapeta, Kānata
Hena S.: Temipale Cardston Alberta
Naʻá ku kumi e ngaahi vitiō mo e tohi tufa kotoa pē fekauʻaki mo e temipalé ʻi he uepisaiti ʻa e Siasí. ʻOku ʻi ai ha ngaahi vitiō fekauʻaki mo e teunga temipalé, kāmení, mo e fōtunga ʻo e ngaahi loki ʻenitaumení mo e silesitialé. Naʻe tokoni foki e kiʻi tohi Teuteu ke Hū ki he Temipale Māʻoniʻoní ke u ongoʻi mateuteu ange.
Soana A., 21, ʻAositulia
Soana A.: Temipale Freiberg Germany
Kuó u saiʻia maʻu pē ʻi he 2 Nīfai 2 ʻi heʻene fekauʻaki mo e mahino e ngaahi ouau ʻo e temipalé. ʻOkú ne fakamahinoʻi e ngaahi konga ʻo e palani ʻo e fakamoʻuí naʻe teʻeki ke mahino kiate au kimuʻa.
Sakalia M., 21, ʻAlapeta, Kānata
Sakalia M.: Temipale Los Angeles California
Ko e hā naʻe mei tokoni atu ke ke maʻu ha aʻusia lelei ange he kamatá?
Naʻe ʻikai ke u ʻilo te u ako ha meʻa lahi pehē ʻi he ʻenitaumení! Ne u fakaʻamu naʻá ku mateuteu ange ki he aʻusia ako ʻi loto ʻi he temipalé ʻaki ʻeku feinga ke ako lahi ange fekauʻaki mo e ngaahi fakaʻilonga ʻi he ngaahi ouau ne u ʻosi maheni mo iá.
Luke E., 21, ʻAlapeta, Kānata
Ne u fakaʻamu naʻá ku ʻiloʻi ʻe ʻi ai ha kakai pau ʻi loto he temipalé ke tokoniʻi au ʻi heʻeku fuofua sēsini ʻenitaumení. Naʻa nau fakaofo moʻoni! Naʻa nau ʻomai ha pine hingoa ke tui ʻi hoku soté koeʻuhí ke lava e tokotaha kotoa ʻo sio ko hoku fuofua taimí ia, pea naʻe ʻai ʻe he kakaí ke u ongoʻi ʻoku talitali lelei au ʻi heʻenau sio ki he pine hingoa ko iá. Naʻe mei tokoni hono ʻiloʻi ʻeni kimuʻa angé ke u ongoʻi loto-fiemālie ange.
ʻAna G., 24, Île-de-France, France
ʻAna G.: Temipale London England
Ko e hā te ke lea ʻaki ki ha taha ʻoku hohaʻa fekauʻaki mo ʻene hū ʻi he temipalé ke maʻu hono ʻenitaumení?
Ko e fale ʻo e ʻEikí koha fale fakaʻofoʻofa ia. Kuo faitāpuekina lahi au, pea te u loto ke maʻu kotoa ʻe he kau mēmipa hoku fāmilí ʻa e tāpuaki maʻongoʻongá ni.
Vita G., 29, ʻAkalā Lahi Ange, Kana
Vita G.: Temipale Accra Ghana
Te u poupouʻi kinautolu ke nau ako e ngaahi lea ʻo e konifelenisí mo e ngaahi potufolofola fekauʻaki mo e temipalé, fai ha ngaahi fehuʻi, mo fakahā e ngaahi meʻa ʻoku nau hohaʻa ki aí. ʻOku fakamahinoʻi mai foki ʻe he vitiō ʻoupeni hausi ʻa e Temipale Rome Italy ha meʻa lahi kiate au. Naʻá ku mamata ai hili hono maʻu hoku ʻenitaumení.
Soana A., 21, ʻAositulia
Teuteuʻi fakalaumālie koe kimuʻa peá ke hū he temipalé. Naʻá ku lotua ke u maʻu ha fakahā lolotonga e ʻenitaumení, ke maʻu ha ʻatamai tauʻatāina, mo vakai ʻaki e mata fakalaumālié. Naʻá ku ʻiloʻi naʻá ku mateuteu ʻi he taimi naʻá ku fie hū ai ʻi he temipalé ke ofi ange ki he Tamai Hēvaní, kae ʻikai ko e fie ʻilo pē.
ʻAna G., 24, Île-de-France, France
Ko e hā kuó ne fakalahi hoʻo mahino fekauʻaki mo e ʻenitaumení?
ʻOku tokoni ʻeku toutou ʻaʻahi ki he temipalé ke mahino lelei ange ia kiate au. Ko e taimi kotoa pē ʻoku ou mavahe ai mei he temipalé, ʻoku ou fakaʻaongaʻi ha kiʻi taimi ke u fakalaulauloto mo lotua ai e ngaahi meʻa foʻou ne u ako lolotonga e sēsini ko iá.
Miseli L., 24, ʻEkuatoa
Miseli L.: Temipale Guayaquil Ecuador
Kuo tokoni hono manatuʻi ko e meʻa kotoa pē ʻi he ouau fakatemipalé ʻoku fakataumuʻa kia Kalaisí, ke mahino lelei ange kiate au ʻa e ʻenitaumení. Talu mei hono maʻu hoku ʻenitaumení, kuó u lau ha ngaahi malanga, ako e folofolá, mo fai ha ngaahi fehuʻi lahi.
Soana A., 21, ʻAositulia
ʻOku fekauʻaki ʻa e Temipalé mo e Melinó
Ko e temipalé ko e fale ia ʻo e ʻOtuá, pea ʻokú Ne hōifua ʻi hoʻo ʻi aí. Mahalo ʻe ʻi ai haʻo ngaahi fehuʻi hili hono fakahoko ha ngaahi sēsini ʻenitaumeni ʻe niʻihi, pea ʻoku sai pē ia! Ko e meʻa mahuʻingá ke kei ʻalu maʻu pē ki he temipalé mo ha ʻatamai tauʻatāina, laumālie fakatōkilalo, mo ha loto fiemālie ke ako ha meʻa foʻou.