“Ko e hā ʻa e ʻĀtama-ʻonitai-ʻĀmani? Ko e hā hono mahuʻingá?” Ki Hono Fakamālohia ʻo e Toʻu Tupú, ʻOkatopa 2021.
ʻAi Hangatonu
Ko e hā ʻa e ʻĀtama-ʻonitai-ʻĀmani? Ko e hā hono mahuʻingá?
Better Than Paradise (Lelei Ange ʻi Palataisi), tā ʻe Kendal Ray Johnson
Naʻe ako ʻe Siosefa Sāmita ʻo ʻilo fekauʻaki mo e ʻĀtama-ʻonitai-ʻĀmaní ʻo fakafou ʻi he fakahā mo e tataki fakalaumālie. Ko e hingoa ia ʻo ha feituʻu ofi ki he feituʻu naʻe nofo ai ʻa ʻĀtama, ko e ʻuluaki tangatá, mo hono uaifi ko ʻIví, ʻi ha kiʻi taimi. Ko ha vahaʻataimi ʻeni hili hono kapusi ʻa kinaua mei he Ngoue ko ʻĪtení. ʻI he taʻu ʻe tolu kimuʻa peá ne pekiá, naʻe tānaki fakataha mai ʻe ʻĀtama hono hako angatonú ki ai ʻo tāpuakiʻi kinautolu.
ʻI he ngaahi ʻaho fakaʻosí, ʻe toe haʻu ʻa ʻĀtama, ko ha tokotaha kuo toetuʻu, ki he feituʻu naʻe ui ko ʻĀtama-ʻonitai-ʻĀmaní, ʻa ia ʻoku tuʻu ʻi he fakatokelau ʻo Mīsulí, USA. Te ne toe fakataha ai mo ha niʻihi kehe, kau ai ha niʻihi tokolahi kehe kuo toetuʻu. ʻE foaki ʻe he kau palōfita kuo nau maʻu ʻa e ngaahi kī ʻo e lakanga fakataulaʻeikí ʻenau ngaahi kií kia ʻĀtama, ʻa ia ko e fuofua tokotaha ke ne maʻu ʻa e ngaahi kī ko iá pea mo e tamai ʻa e faʻahinga ʻo e tangatá ʻi he māmaní. Te ne ʻave leva ʻa e ngaahi kií kia Sīsū Kalaisi. ʻE hoko ʻeni ko ha meʻa mahuʻinga ke tokoni ki he teuteu ki he Hāʻele ʻAnga Ua Mai ʻa Sīsū Kalaisi ki he kotoa ʻo e māmaní.