Pyetje dhe Përgjigje

“Zhvillimi i sakramentit në shtëpi ishte i mrekullueshëm. Përse Zoti do të donte që të shkonim sërish në kishë?”

“Frekuentimi i Kishës na jep forcën dhe shtimin e besimit që vjen nga shoqërimi me besimtarë të tjerë dhe adhurimi së bashku me ata që po përpiqen fort gjithashtu të qëndrojnë në shtegun e besëlidhjeve dhe të jenë dishepuj më të mirë të Krishtit.”

Presidenti Dallin H. Ouks, Këshilltar i Parë në Presidencën e Parë, konferenca e përgjithshme e tetorit 2021 (Liahona, nëntor 2021, f. 26).

Shih Doktrina e Besëlidhje 59:9–10.

Të Jemi të Bashkuar

“Zoti do që të shkojmë sërish në kishë, sepse Ai do që të afrohemi më shumë me Të. Ai do edhe që ne të jemi të bashkuar si vëllezër dhe motra. Duke shkuar në kishë, ne bëhemi të bashkuar, e ndihmojmë njëri-tjetrin dhe i tregojmë Atij mirënjohjen tonë për gjithçka që Ai ka bërë për ne. Ne gjithashtu e thellojmë besimin tonë dhe marrim mësime të reja.”

Melania M., 13 vjeçe, Meksikë

Forcë me Anë të Numrave

“Sakramenti në shtëpi ishte i mrekullueshëm ngaqë e solli Shpirtin në shtëpitë tona dhe na ndihmoi të kuptonim se duhet ta sjellim kishën në shtëpitë tona, në vend që të përqendrohemi tek ajo vetëm një herë në javë. Sidoqoftë, nganjëherë kisha në shtëpi mund t’ju bëjë të ndiheni të izoluar. Kisha me pjesëmarrje fizike është e rëndësishme, sepse ajo krijon forcë me anë të numrave.”

Nejthën G., 15 vjeç, Arizonë, SHBA

Të Ndërtojmë Marrëdhënie

“Në kishë ka një mjedis dashamirës. Atje mund të ndërtosh marrëdhënie dhe të bekosh jetën e të tjerëve, ndërkohë që bekohesh edhe vetë. Kisha është e rëndësishme gjithashtu për të ndërtuar njohurinë tënde për ungjillin. Zoti do që ne t’ua predikojmë ungjillin njerëzve përreth nesh dhe të ndërtojmë Sionin.”

Amelia W., 16 vjeçe, Jutë, SHBA

Të Jemi Aty për të Tjerët

“Kur filloi pandemia, u shqetësova për faktin se nuk do të ishim në gjendje të merrnim sakramentin, por pastaj peshkopi na lejoi ta merrnim në shtëpi. Disa njerëz pyesin veten përse duhet të shkojmë sërish në kishë, por mendoj se duhet të shkojmë sërish për të ndriçuar mendërisht të tjerët – për të folur me dikë ose për ta ndihmuar. Duhet të shkojmë në kishë për të dhënë dashurinë tonë dhe për të treguar përvojat tona.”

Tamara M., 17 vjeçe, Meksikë

Të Përtërijmë Besëlidhjet

“Zoti do që ne të shkojmë sërish në kishë, sepse jo gjithkush ka qenë në gjendje ta marrë sakramentin në shtëpinë e vet. Gjyshi më tha se, si mbajtës i priftërisë, duhet të sigurohem që çdo njeri ta ketë këtë mundësi. Është e rëndësishme të shkojmë në kishë që të gjithë ne të mund t’i përtërijmë besëlidhjet tona.”

Estevan M., 16 vjeç, Argjentinë

Përgjigjet synojnë të japin ndihmë dhe këndvështrim, nuk jepen si deklarime zyrtare të doktrinës së Kishës.

Çfarë Mendon Ti?

“Dëgjoj njerëz të tjerë që flasin për përvojat e tyre shpirtërore. Çfarë mund të bëj nëse nuk e ndiej që kam përvoja të tilla?”

Dërgoje përgjigjen dhe fotografinë tënde deri më 15 tetor 2022.

Na dërgo mesazh elektronik në adresën [e-mail]. Ose shko te ftsoy.ChurchofJesusChrist.org dhe kliko te “Submit Your Work” [“Dorëzoni Punimin Tuaj”]. Nënshkruaje hyrjen në Llogarinë tënde të Kishës dhe më pas përzgjidh “For the Strength of Youth” [“Për Forcën e Rinisë”] nën “Choose Magazine” [“Zgjidhni Revistën”]. Kliko tek “Add File” [“Shtoni një Material”] që të përzgjedhësh materialin dhe fotografitë e tua dhe më pas kliko te “Submit” [“Dorëzoni”] për ta ngarkuar dhe për të na e dërguar materialin tënd.

Përgjigjet mund të redaktohen lidhur me gjatësinë apo qartësinë.