“Ukora te Ota!,” Ibukin Kakorakoraia Kairake, Tianuare 2024.
Nakomai, Iriirai
Iteraniba n Atuun Rongrongo n Ana Boki Moomon; Kabwarabwaraan Ana Boki Moomon
Ukora te Ota!
Ana Boki Moomon e uota te ota ao te mwaaka nako nanon maium bwa kairam i nanon boong ni kangaanga ao ni kakukurei ake i mwaaim.
Kamataata n te tamnei iroun Gabriele Cracolici
Ngke te ataeinimwaane ngai I tatangira karakinan tarin Iareta n ana Boki Moomon. I kona n noori bwaai are e rinanona bwa kanga ai aron te taamnei n au iango. E taraa n ae e bon kona n riki ngke I wareka rongorongona.
E tuangaki tarin Iareta iroun te Uea bwa e na kabaa te bwaati bwa e aonga ngaia ao ana utu n borau i nanon te marawa nakon “te aba ni berita” (Ita 2:9). Ma a rotongtong taian bwaati. E aki tangiria bwa a na mwananga i nanon te rootongitong, e ukora ana buoka te Uea tarin Iareta. E titiraki te Uea nakoina, “Tera ae ko tangiria bwa N na karaoia?” (Ita 2:23).
Ma te onimaki ae korakora, e anai 16 atiibu mai taberan te maunga tarin Iareta ao n tataro. E butiia te Uea bwa e na ringii atiibu “bwa aonga n oota nako i nanon te roo” (Ita 3:4). Te Uea ngkanne e arora Baina ao n ringi atibu akekei teuana imwiin teuana n tabon Baina, n anganiia te ota. Inanon maiu, I a tia n katamneia te Uea ngke e riingi atiibu akekei.
N ai aron tarin Iareta ngke e anganaki te ota, e na uota naba te ota nakoim Iesu Kristo. Bon ngaia “te oota ao maiun te aonaaba” (3 Nibwaai 11:11). I kaoko bwa ko na ukoura te ota! E na kakorakoraa am onimaki Iesu Kristo man kamatebwaian ana Boki Moomon ao ni buokiko n tiku n toma nakon Otana.
Te Kairi ao te Ota
I a tia ni wareka ana Boki Moomon ao n namakina te kakoaua n taai aika a mwaiti bwa e bon koaua. Akea au nanokokoraki iai. Ngkana I aki namakina te Tamnei, Ngkana I mwaawa teutana n maiun n taamneiu, I namakina te roo. Ma ngkana I wareka Ana Boki Moomon, e oki rikaaki te ota. N tabetai e anganai warekan ti teuana te kibu bwa N na manga namakina te ota, ma n taainako I namakina te beebete ngkana I warekia.
Te Ota ae taona te rootongitong e bon koaua irou. E a tia n taekinna Beretitenti Russell M. Nelson, “Ngkana ko tataromwaaka n kamatebwaia ana Boki Moomon ni katoabong, ko na karaoi babaire aika a tamaroa riki—ni katoabong.”1 E riki aio bukina e karikirakea am onimaki iroun Iesu Kristo ana Boki Moomon. E uota te ota ao te mwaaka. E na kairiko ana reirei i nanon boong ni kaangaanga ao kakukurei ake imwaaim.
Namakinan te Ota
I karekea te kakabwaia ni beku irarikin Beretitenti Nelson. Ngkana e nakonako te burabeti inanon te ruu, e rikirake n ota nanon te ruu n te tai ae waekoa. E uouota Otan Kristo ma ngaia.
N tabetai e karekea te kakorakora ni koaua raoi bwa ko namakina Otan Kristo. Ko aki kona n nooria ni matam. E roko bwa te namakin n tamnei. Bon namakinana bwa tera ae eti ao e kaairua ao tera ae koaua ao e aki koaua (taraa Moronaai 7:13–19).
N te tai are ko rineia bwa ko na riki ai aron Iesu Kristo, ko nakonako n Otan Kristo. Warekan ana Boki Moomon e kakorakoraa te Ota anne.
“Eng, E bon Koaua”
I bon kakoauaa raoi bwa ngkana e kangai koroboki aika a tabu, “Uringnga, uringnga” (Ereman 5:12), a kananonaa bwa ti riai n aki ti uringa Iesu Kristo ke n uringnga bwa n te taina ti a tia n namakina Otana. Ti riai n namakina Otana ngkai ao n namakina riki ao n namakinna n taainako. Anne ae kunea te ataeinimwaane, ae Eric, ngke e moan wareka ana Boki Moomon.
Imwiin mwaingina nakon te tabo ae boou ao n reirei n te kauarinan iai, E korakai Eric n ana kiraati ao e kunea bwa e kangaanga n nakoraoi. E tabe naba n iangoia ngkana bon iai irouna ana koaua.
“I moana wareken raoi ana Boki Moomon te moan tai inanon maiu,” E taku Eric. “I wareware ao n tataro ni katoa bong.”
Ngke e tataro Eric ao n butiia Tamara are i Karawa ngkana e bon koaua ana Boki Moomon, e bon koaua bwa e na karekea te kaeka, ma akea te bwai ae e riki.
Tabeua te tai imwiina, ngke e tabe n nakonako n te buakonikai i akuun ana auti, e a manga bubuti riki Eric. N te tai aei, e reke irouna te namakin, ae titebo ma e titirakinaki iroun Tamana are i Karawa, “Eric, tera ae e a tia n riki ni maiun mai imwiin moanakin warekan ana Boki Moomon ao tatarom ni katoabong?”
E iangoa aron reken raraona aika a tamaroa Eric ao raoiroin ana bwii n te reirei. N akean ana iango iai, e a tia ana Boki Moomon ni uota te ota ao te mwaaka i nanon maiuna.
Imwiina e a riki.
“I aki ongo te bwanaa,” e taku Eric, “ma e kaona nanou te tamnei ngke a roko taeka aikai n au iango: ‘Eng, e bon koaua!” I taonaki n namakinan te rau, te kimwareirei, ao e roko i aou te kamatoa. I ataia bwa I a tibwa kunea kaekaau.”2
Waaki Rake inanon te Ota
Man moan baana ni karokoa kabaneana, e kakoauaa ana Boki Moomon bwa “Iesu bon te Kristo”3 ao e reireinira bwa tera ae [ti] riai ni karaoia ni karekea te rau n te maiu aei ao te kamaiuaki n te maiu ae akea tokina ae na roko.”4
Ngkai ko kamatebwaia ana Boki Moomon, Au kaantaninga bwa ko na namakinna bwa e koreaki i bukim. Reirei n ana Boki Moomon ao katooton te nanomatoa n aron Nibwaai, Riaai ao Tiera, Abinataai, Aramwa, Amureki, Abiti, natin Motiaea mwaane, ao tabeman riki a na tabekiko, kairiko, ao ni kakorakorako bwa ana reirei Iesu Kristo ae tamaroa riki ao n kairiko bwa ko na nakonako n nanomatoa n Otana.
I kakoauaa bwa ana Boki Moomon bon te bwai ni kakoaua bwa e maiu Iesu Kristo ao bon ngaia ae reke irouna te mwengaraoi, kaantaninga, rau, te kimwareirei, ao te ota. I tataro ma nanou ni kabane bwa ko na ukora te Ota kunea n ana Boki Moomon, kaan riki nakon Iesu Kristo, ao n namakina abueen Otana ao ana tangira riki nakon are ko a tia ni karekea mai imwaaina.