Katoka te Kabootau! Ko Bon Tau,” Ibukin Kakorakoraia Kairake, Tianuare. 2024.
Nakomai, Iriirai
Katoka te Kabootau! Ko Bon Tau
Aikai aua bwaai ae ti reiakinna mairoun tarin Nibwaai temanna ake a ikawai.
Kamataataan korotamnei iroun Corey Egbert
Iai ataein te reirei temanna n te kiraati are n taainako e ata etin te reke. Te ataei are e kaaina te tiim ni bwatiketibooro are e raoiroi riki ana kare nakoim. Te aomata are ni kabane aomata a tangiria n iraorao ma ngaia. N te aonnaba ae kakabootau, taraan ae iai n taainako temanna ae tamaroa riki.
Te kakabootau e kona ni kangaanga ngkana e roko ni maiuakinan te euangkerio. Tao ko na iangoia bwa tabeman a raoiroi riki, a matoatoa riki aia koaua, ke a namakina riki te Tamnei nakoim. Ma kabotauam n aron aei e aki ibuobuoki.
Man ana Boki Moomon, ko bon ataia bwa Nibwaai bon te tia kairiiri ao te burabeti ae korakora. Ma mwaitira ae ko ataia ibukin ana onimaki tarin Nibwaai ae ikawai, ae Taam? Tiaki te tia kairiiri ke te burabeti n aron Nibwaai, ma e aki riai n riki n ai aron Nibwaai bwa e na tamaroa iai.
1. Taam E Kakoaua
E tataro Nibwaai ao e karekea te kaeka ibukina bwa te Uea e tua nakon aia utu bwa a na nako nakon te rereua. Ao Taam e “kakoauai ana taeka [Nibwaai] ” (taraa 1 Nibwaai 2:16–17). Tao e aki rangi ni kororaoi ana koaua Taam. Tao iai ana titiraki. Ma e a tia n rineia bwa e na kakoaua ana taeka tarina, ao imwiina e mwakuria ana koaua. Tai kabootaua am onimaki ke am koaua ma aia onimaki aomata tabeman. Ngkai ko mwakuria am onimaki n aron Taam, am kakoaua iroun te tia Kamaiu e na rikirake teutana imwiin teutana. (Taraa naba Reirei ao Berita aika Tabu 46:13–14; Aramwa 32.)
2. E Nanorinano Taam
Reimwan ao Remuera a aki kukurei bwa taria ae uarereke ae, Nibwaai, e riki bwa te tia kairiiri iaoia. Ma Taam, are tarin Nibwaai ae ikawai naba, e bon nanorinano. E kakauongo nakon Nibwaai ao n iriira ana kairiiri (taraa 2 Nibwaai 5:3–6). Ngkana aomata ake i rarikim a tuangaki bwa a na kairiiri ao ngkoe ko aki, nanorinano, ao tai kakabootau. Boutokaia, reiakiniko mairouia, ao karaoa am kabanea ni konaa n rinea ae eeti.
3. E Taotaonakinnano Taam
Tao e taraa n ae aomata ake i irarikim a maiuakina te maiu ae kororaoi, ma aomata ni kabane a rinanon te kangaanga ni maiuia. Ai aron naba Taam. Reimwan ao Remuera a kaaitara Taam, n ai aroia ni kaitara nakon Nibwaai. A bon orea naba Taam n te kaii, n aroia ngke a orea naba Nibwaai! (Taraa 1 Nibwaai 3:28; 1 Nibwaai 7:6.) Ma e tataona nanona Taam n rinanon ana kangaanga. Tiaki nanona bwa ngkana ko a rinanon te kangaanga ao e rang mwaiti te kaairua ae ko a tia ni karaoia. Tai kabotaua am kangaanga ma aia kangaanga aomata tabeman. Taotaona nanom, ao onimaki iroun te Uea. E na buokiko i nanon am kangaanga nako.
4. E Kakabwaiaaki Taam
Taman Taam, Riaai, e tuanga Taam, “Ko na kakabwaiaki ni kabanea am bong” (2 Nibwaai 4:11). Tao tiaki te tia kairiiri ke te burabeti Taam, ma e bon teimatoa ma te onimaki n iriira Iesu Kristo, ao e kakabwaiaaki iai. Ma ana ibuobuoki te Tia Kamaiu, e bon tau. Ao ko konaa naba ngkoe.