“Te Bwairati n Ana Taanga ni Buaka te Uea,” Ibukin Kakorakoraia Kairake, Tianuare. 2024.
Te Bwairati n Ana Taanga ni Buaka te Uea
Iai ana kouru ae bubura Lamar. F. mai Midlans Mainiku i Engiran ae kateimatoa, e ngae ngke a aki nakoraoi bwaai.
A katauraoaki tamnei iroun Satomi Folkett
“I konaa n uringnga bwa I a kaman tangiria ni kakibai wanikiba n te tai ae maan,” e taku Lamar F. 17 ana ririki ni maiu. Ngke e tuangnga raraona n tain te kaboo uaia n ana kaintekateka ni mwauku taekan te bwai n tangira mai Buritan are e konaa ni buokiia mwauku ni kakiba te waanikiba, e korakora nanon Lamar ni kataia.
Iango n Tangiran te Kiba i Karawa
E kabaea arana nakon uoua burokuraem man te mwane n buoka. Teuana mai iai ae, te Junior Aspring Pilots Program (JAPP), e kateaki i bukia kairake i marenan te roro ae 12 ao 18. Burokuraem aikai ao tabeua reirei n te kaai temanna a kabirimwaaka teutana riki ni kaania nakon ana kouru ae bubura—karekean ana Raitienti n te Bwairati ae Onoti.
Kaungaana naba a bon roko mairouia ana utu. Taman Lamar ae tabekia bon te moan aomata are e anaa nanona n te kibakiba, ni kakairia nakon taian kamataku n te kiba ni katoa ririki. Imwiina, imwiin manga tabekakina man te utu teuana ngke aua ana ririki, e rikirake nanon Lamar n te kibakiba ngke mamatakuakina tamana are e tabekia n karekea ana raitienti ni bwairati. “Bon ngaia ae anaa nanou n tangiran te kan riki ni bwairati,” e taku Lamar. Ngkai taman Lamar e a kona n toka ma ngaia n waanikiba aika teuana aia burobera, ao nimaua kaintekatekana are e reiakina kakibaana Lamar.
Ana karo Lamar (n tamneia a kaai ni mena i rarikina) bon tabeman taan anga te boutoka ae bubura.
N ana moan kiba Lamar n te waanikiba raoi, e namakina te nakonano ibukin uringakin bwaai ni kabane. “I karaoa au tataro ae uarereke, imwaain ae I buti rake, ao bon akea au kangaanga,” e taku. Ngkai ngkana e korakai n uringa te bwai teuana i karawa, tataro ake a uarereke, are e taekinna i nanona e buokia ni karaoa te bwai ae e kainnanoia bwa e na karaoia. Ngkana akea naba tamana i rarikina n te kaintekateka are mai buki, e ataia Lamar bwa iai Tamana are i Karawa i rarikina n taainako.
Ana Taanga ni Buaka te Uea
Kakibaan te waanikiba tiaki ti te bwai ae kateimatoa nanon Lamar ni waakinako. “E rangi n bwabwaka nanou n taai nako n ana taanga ni buaka Buritan, bwaai ni kabane man aron katabuan te uea nakon te taunimate,” e taku.
“Ibukin aki toamaun rabwatau, I aki kona n kaaina te taanga ni buaka,” e taku Lamar. Ma temanna ana tia kairiiri ngkoa n te Bootaki n Ataeinimwaane are bon te tuatia naba ngkoa e kaungaa nanon Lamar. “E aki toki ni kakauringai bwa I aki riai n rin n ana taanga ni buaka te aonaaba ibukina bwa I a tia n riki bwa kaain ana taanga ni buaka te Uea,” e taku Lamar. “Rikiu bwa kaain ana taanga ni buaka te Uea e karekea nakoiu te namakin bwa tera are e karekea nakoim te maiu aei, e ngae ngkana tera ae karaoia nakoiu temanna, Iai i rarikiu Iesu.”
Te Tari Bayliss, ana tia kairiiri Lamar n te Bootaki n Ataeinimwaane, e kaunga nanona bwa e na kaaina ana “Taanga ni Buaka te Uea”
N aia reirei mwauku are e reirei iai, e kataia Lamar n buokia aomata tabeman ake rorona n kaaina ana taanga ni buaka te Uea ngke e tibwaa te euangkerio ma ngaiia. “A mwaiti taai” ae I katinanikuaki,” e taku, “ma taai tabetai, I a manga nanonaki. I bukin tabeua kainnanou n te tai aei, karaoan au mwakuri ni mitinare n te tai ae waekoa e bon nakon au rinerine. Ma I nooria n aron aio: I aki kainnanoa te ara iaou bwa te mitinare.”
Ma kairake aika a karako n ana uoote, angiin raoraon Lamar bon tiaki kaain Ana Ekaretia Iesu Kristo ibukiia Aika Itiaki ni Boong aika Kaitira. E aki bebete anne n te reirei, riki ngkana iai aika, n aron ae atongnga Lamar, “bon rawawata raoi” n te kaririaki. A mwaiti ataein te reirei ake a taekina taekan bwaai aika aki riai ao n ongora nakon anene aika aki riai. Ma, n te tai are e riki te aro anne, I teirake n nakon te ruu are e aki tataekinaki aekan taeka akanne iai.”’
Tiku ni Matoatoa
Ngkana a roko kaririaki ke ngkana a aki kan ongora taekan te euangkerio tabeman, e taua i eta ana kibu ae mamate nanona iai Lamar: “Ao ngai ma kaini batau, ti na toro i roun te Uea” (Iotua 24:15).
“E buokai ni kateimatoaai n te onimaki iroun Iesu Kristo te kibu aei,” e taku. Aio e rangi ni kakawaki nakon Lamar ao ana utu. Ngke 10 ana ririki Lamar, e toki rorokon tamana n te taromauri. “I uarereke n te tai anne, ao I aki rangi n oota raoi,” e taku. “I kataia n anaa nanona bwa e na oki. Ma I a tia n reiakinna bwa tiaki arona anne. Ko na anganiia aia tai.”
E teimatoa ni kaan ana reitaki Lamar ma tamana ao e kaota ana tangira nakoina n angaa aika a bati ni katoa tai, n aron e kaongoa bwaai ake a riki n te taromauri ke ni kabanean ana tai ma ngaia. “E reireinai n taainako bwa tera are ko rinanona, ko na teimatoa n korakora.” Nakoia kairake ake aia utu aki kakaonimaki n te Ekaretia, e taku, “Teimatoa. Kamatoaa ami onimaki. Tai bwara n nano, e ngae ngkana tera ae riki.”
Ukoukoran Kristo Ngkana Aki Nakoraoi Bwaai
E kunea naba te unga n nano Lamar iroun Kristo n arona i bon irouna. “I rootaki n te nakonano ae buakaka n tabetai,” e taku Lamar. “I taku bwa te aomata ae anganai te unga n nano bwa N na waaki nako bon Iesu Kristo. E rinanon bwaai aika a mwaiti, ma E bon waaki nako ni karaoa Ana mwakuri.”
Ngkana e rinanon ana bong ae aki nakoraoi Lamar, e teimatoa n katamneia te Tia Kamaiu ae kakorakora, ni kangai, “Ko konaa ni karaoa aio. Ko konaa n rinanon bwaai nako.”
E karekea naba te korakora mairoun tinana ao tamana, raoraona, ao tabeman aomata ake a kaan nakoina. “Iai te tai teuana ngke I kuri karekea touan te kawai ae aki eti,” e taku Lamar. Ma e rabwa te waaki n boutoka, e kona ni kaeta kawaina ao n kakorakora ana koaua iroun Kristo.
“I bon teimatoa n kakorakora au koaua,” e taku, “ma e tamaroa kaainakin ana taanga ni buaka te Uea ao kaainakin Ana Ekaretia Iesu Kristo ibukiia Aika Itiaki ni Boong aika Kaitira. Bon te bwai ae I tangiria.”
Tao iai bwaai aika aki nakoraoi ni maiuna, ma e ataa te bwai ae e kakorakora Lamar. “Tao tera karawawata ke kangaanga are ko rinanona, E na mena i rarikim Tamam are i Karawa ibukina bwa E tabe iroum ao e tangiriko.”