Ākonga ki he Ākonga

ʻOku ʻikai faingataʻa ʻa e hoko ko ha ākonga ʻa Kalaisí ʻo hangē ko e meʻa ʻokú ke fakakaukau ki aí.

Vakaiʻi ʻa e sīpinga ko ʻeni ʻoku vahevahe ʻe ha talavou ʻe taha fekauʻaki mo ha ākonga ʻa Kalaisi ʻi heʻene moʻuí.

Siaki (toʻohemá) mo Peleiteni (toʻomataʻú)

Peleiteni K., taʻu 12

Mei he Vahefonua Tokelaú, ʻAositelēlia. Saiʻia ʻi he vaʻinga ʻakapulú pea fakaʻehiʻehi mei he fanga kalokatailé.

ʻI he ngaahi taʻu siʻi kuohilí, naʻe lahi ʻaupito ʻa e lea taʻefeʻunga hoku kaungāmeʻa ko Siakí. Naʻá ku ʻiloʻi naʻe ʻikai hōifua ki ai ʻa Sīsū mo e ʻOtuá. Naʻá ku kole ange pe ʻe lava ke tuku ʻene lea taʻefeʻungá, pea naʻá ne maʻu ha anga fakaʻapaʻapa feʻunga ke tuku. ʻOkú ma kaungāmeʻa lelei ʻaupito ʻi he taimí ni.

Ko e taimi pē ʻokú ne fanongo ai ki ha lea taʻefeʻunga ʻa ha taha ʻi ha feituʻu ʻoku ou ʻi ai, te ne kole fakamolemole mai peá ne kole ki he taha ko iá ke tuku. ʻOku ou pehē ko ha meʻa lelei aʻupito ia. Kuo tuʻo lahi ʻene haʻu ki he lotú pea kuó ne fakahoko mo ha lotu. Naʻá ku kole ki he ongo faifekaú ha Tohi ʻa Molomona peá u ʻoange ia maʻana.

ʻOku ou pehē ʻoku lelei ke taukaveʻi ʻe ha taha hoku toʻú ʻa e meʻa ʻoku totonú. Tautautefito ki ha taha ʻoku ou ʻiloʻi.

ʻOku ou ʻilo ʻoku moʻui ʻa Sīsū. Ko Ia ʻa e ʻĀlifá mo e ʻŌmeká (hangē ko e lau ʻa e kaungāmeʻa Kalisi ʻo ʻeku tangataʻeikí), ko e ʻuluakí mo e fakaʻosí. Ko Ia hoku Fakamoʻuí mo hoku Huhuʻí. Naʻá Ne pekia maʻaku ka u lava ʻo toe moʻui. Koeʻuhí ko Ia, ʻoku ou ʻilo ʻoku malava ke u hū ki he puleʻanga fakasilesitialé. ʻOku ou ʻilo ʻokú Ne ʻofa ʻiate au.