“Ko e hā ʻa e ngāue fakataulaʻeiki kākā? Ko ha meʻa nai ia ʻoku fiemaʻu ke u tokanga ki ai?,” Ki Hono Fakamālohia ʻo e Toʻu Tupú, Fēpueli 2024.
ʻAi Hangatonu
Ko e hā ʻa e ngāue fakataulaʻeiki kākā? Ko ha meʻa nai ia ʻoku fiemaʻu ke u tokanga ki ai?
Fakaikiiki ʻo e Tangata Fālesí mei he Ngaahi Talanoa Fakatātaá, tā fakatātaaʻi ʻe James C. Christensen
ʻOku talamai ʻe Nīfai ʻoku fekauʻi kitautolu ʻe he ʻEikí ke tau fakaʻehiʻehi mei he “ngāue fakataulaʻeiki kākaá,” peá ne fakaʻuhingaʻi leva ia:
“Ko e ngāue fakataulaʻeiki kākaá ʻa hono malanga ʻaki mo hono fokotuʻu ʻe ha kau tangata ʻa kinautolu ko ha maama ki māmani, koeʻuhi ke nau maʻu ha totongi mo e fakamālō ʻa e māmaní; ka ʻoku ʻikai te nau feinga ki he lelei ʻa Saioné” (2 Nīfai 26:29).
ʻOku ʻomi ʻe Nīfai ha ngaahi tefitoʻi ʻulungaanga ʻe nima ʻo e ngāue fakataulaʻeiki kākaá. ʻA ia ʻoku fakahoko ʻe he kakaí ʻa e:
Malanga. ʻOku nau tala ki he kakaí ʻa e meʻa ke nau tui ki aí mo e founga ke nau moʻui aí.
Fokotuʻu kinautolu ko ha maama ki māmani. ʻOku nau talaange ki he kakaí ke sio kiate kinautolu (kae ʻikai ko Sīsū Kalaisi) ki he ngaahi akonaki mo e sīpinga ke muimui ki aí.
Fiemaʻu ke maʻu ha meʻa. ʻOku nau malanga ke maʻu ha paʻanga.
Loto ke maʻu ʻa e fakahīkihiki ʻa e māmaní. ʻOku nau malanga koeʻuhí ke talaange ʻe he kakaí ʻoku nau maʻongoʻonga kae ʻikai fakahoko ia ke fakahōifua ki he ʻOtuá.
ʻIkai fekumi ki he lelei ʻo Saioné. ʻOku ʻikai ke nau fiemaʻu ʻa e puleʻanga ʻo e ʻOtuá ʻi he māmaní (ʻoku toe ui foki ko Saione pe ko e Siasi ʻo Sīsū Kalaisí) ke tupulaki. Ko hono moʻoní, mahalo ʻoku nau fiemaʻu ʻa e fehangahangaí.
Tokanga telia ʻa kinautolu ʻoku fai ʻa e ngaahi meʻá ni. Muimui ʻi he ʻEikí mo ʻEne kau palōfitá. ʻE tokoniʻi koe ʻe he Laumālie Māʻoniʻoní.