Ngaahi Tefitoʻi Meʻa Mahuʻinga ʻo e Ongoongoleleí

Ako ke Fakatatau

Fai ʻe David Dickson

ʻŪ Makasini ʻa e Siasí

Vakai ki he founga te ke lava ai ʻo akoʻi ʻa e founga ko ʻeni ʻo hono ʻomi ʻa e folofolá ke ofi ange ki hoʻo moʻuí.

Tā fakatātaaʻi ʻe Gail Armstrong

ʻOku ʻuhinga ki he hā ke “fakatatau” ha meʻá? Naʻe akoʻi ʻe Nīfai, naʻe ʻikai ngata pē ʻi heʻene lau ʻa e folofolá ki hono kakaí, ka naʻá ne “fakatatau ʻa e ngaahi folofola kotoa pē kiate kimautolu, koeʻuhi ke ʻaonga ia kiate kimautolu pea mau poto ai” (1 Nīfai 19:23).

ʻOku ʻi ai ʻa e foʻi lea ko e: fakatatau. Ko ha founga fakafaiako fakakuongamuʻa nai ia kuo mōlia atu ʻi he fakalau ʻa e taimí pea mahalo he ʻikai mahino kiate kitautolu ʻi he ʻahó ni?

ʻIkai. ʻOku ʻuhinga ʻa e “fakatatau” ha meʻá ke fakahoa pea ke fakakaukau ki he founga ʻe lava ke fekauʻaki ai ia mo hoʻo moʻuí. Pea ʻoku kei hoko pē ia ko ha taukei maʻongoʻonga ke te maʻu. Ko ha ngaahi fakakaukau ʻeni ʻe niʻihi te ke lava ʻo fakaʻaongaʻi ke tokoni ki hono akoʻi hoʻo fāmilí mo e ngaahi kaungāmeʻá fekauʻaki mo e tefitoʻi moʻoni ko ʻení.

Taimi ke Akoʻi

• 

  Fakaʻuhingaʻi ʻa e foʻi leá. Te ke lava ʻo fakamatalaʻi ʻi he lea pē ʻaʻau ʻa e ʻuhinga ke fakatataú, pe ko hoʻo akoʻi ʻoku ʻuhinga ia ke fakafehoanaki ʻa e folofolá ki hoʻo moʻuí.

• 

  ʻOange ha sīpinga. Fakakaukau ki ha talanoa mei he folofolá ʻokú ke saiʻia ai. Vahevahe leva ʻa e fekauʻaki ʻa e talanoá ni mo koe ʻi he ʻaho ní. Hangē ko ʻení, ʻi hoʻomou lau ʻi he māhiná ni ʻi he Haʻu, ʻo Muimui ʻIate Aú, naʻe ʻi ai ha ngaahi palopalema lahi ʻa Nīfai mo hono ongo taʻokete ko Leimana mo Lēmiuelá. Naʻá ne tali fēfē nai iá? Ko e hā te ke lava ʻo ako meiate ia fekauʻaki mo ha niʻihi ʻo e ngaahi vā fetuʻutaki faingataʻa ange ʻi hoʻo moʻuí?

• 

  Akoako fakataha. Kole ki ha niʻihi kehe ke tala atu ha niʻihi ʻo e ngaahi potufolofola pe ngaahi talanoa fakafolofola ʻoku nau saiʻia taha aí. Hili iá, vahevahe fakakulupu ‘o fakakaukau ki he founga ʻe lava ke fakaʻaongaʻi ai ʻa e ngaahi potufolofola ko iá ʻi hoʻomou moʻuí ʻi he ʻahó ni.

Tā fakatātaaʻi ʻe Katy Dockrill

ʻI hoʻo ako ke fakatataú, te ke fakatokangaʻi ʻoku ʻi ai ha ngaahi lēsoni fakaofo ʻi he folofolá ki hoʻo moʻuí ʻi heni mo e taimí ni—ʻo hangē pē ko ia naʻe fai kia Nīfaí!