“ʻŌʻōfaki ʻe he ʻOfá,” Ki Hono Fakamālohia ʻo e Toʻu Tupú, Fēpueli 2024.
Haʻu, ʻo Muimui ʻIate Au
ʻŌʻōfaki ʻe he ʻOfá
ʻOku ʻikai ha meʻa te ne fakatataua ʻa e ʻofa ʻoku maʻu ʻe hotau Fakamoʻuí kiate kitautolu takitahá.
ʻŪ tā fakatātā ʻa Corey Egbert
Kuó ke ongoʻi nai ʻoku ʻikai ha taha ʻe mahino kakato kiate ia hoʻo fiemaʻú? Mahalo ʻokú ke ongoʻi ʻoku makehe hoʻo ngaahi faingataʻaʻiá—ʻoku mātuʻaki makehe ia, ʻo aʻu ki ha tuʻunga kapau ʻe pehē ʻe ha niʻihi ʻoku nau ʻilo ʻa e meʻa ʻokú ke fouá, he ʻikai lava ke mahino moʻoni mo kakato ki ha taha ʻa e meʻa ʻokú ke fouá. Ka ʻe lava ia ʻe he Fakamoʻuí.
ʻOku ʻofa lahi ʻa e Fakamoʻui ko Sīsū Kalaisí ʻiate koe naʻá Ne fakahoko ai ʻEne Fakaleleí ke tokoniʻi koe ke ke ikunaʻi ʻa e ngaahi meʻa ʻokú ke fouá ʻi ha ngaahi founga he ʻikai lava ʻe ha toe taha kehe. Ko e meʻa pē ia ʻaʻau ke ke fekumi kiate Ia, falala kiate Ia, ongoʻi ʻEne ʻofá, fakatomala, fakahoko mo tauhi ʻa e ngaahi fuakavá, pea kātaki ki he ngataʻangá.
ʻOku fakamafao mai ʻe Sīsū Kalaisi hono ongo toʻukupú ke ʻōʻōfaki koe ʻi he ʻofá. Ko e meʻa ia naʻe ako ʻe Līhaí, pea ko e meʻa ia naʻá ne fiemaʻu ke akoʻi ki heʻene fānaú (vakai, 2 Nīfai 1). Ko ha lēsoni mahuʻinga ia te tau lava foki mo kitautolu ʻo ako!