2010–2019
Le Au Paia o Aso e Gata Ai, Taumafai Pea
Aperila 2015

Le Au Paia o Aso e Gata Ai, Taumafai Pea

Saunia e Elder Dale G. Renlund

O Le Fitugafulu

Former official portrait of Elder Dale G. Renlund of the First Quorum of the Seventy, April 2009. Formerly a member of the Fifth Quorum of the Seventy. Called to the Quorum of the Twelve Apostles and sustained October 2015. Portrait replaced in November 2015.

A tatou taumafai, tutumau, ma fesoasoani i isi ia faia lea lava mea e tasi, o i tatou la o le Au Paia moni o Aso e Gata Ai.

Ou uso e ma tuafafine pele, ia Tesema 2013 na faanoanoa ai le lalolagi i le maliu o Nelson Mandela. I le mavae ai o tausaga e 27 o faalepuipui ai mo lana matafaioi i le tetee atu i faiga faailogalanu i lena taimi, na avea ai Mandela ma uluai peresitene filifilia o le faatemokalasi o Aferika i Saute. Sa ofoofogia lona faamagaloina o i latou na faafalepuipuiina o ia. Sa viia ma faamamaluina o ia e tagata uma. Sa teena soo lava e Mandela ia viiga i le faapea mai, “E le o au o se tagata paia—ae sei vagana lava ua outou manatu o se tagata paia o se tagata agasala o loo taumafai pea.”

O lenei saunoaga—“o se tagata paia o se tagata agasala o loo taumafai pea”—e tatau ona toe faamautinoaina ma faamalosiauina ai tagata o le Ekalesia. E ui o loo ta’ua i tatou o le “Au Paia o Aso e Gata Ai,” ae o nisi taimi tatou te le maua ai le toafimalie i lenei faalagiga. O le faaupuga Au Paia e masani ona faaaoga e faailoga ai i latou ua ausiaina se tulaga siitia o le paia po o le atoatoa. Ma ua tatou iloa lelei tatou te le atoatoa.

E ui i lea, o o tatou talitonuga faalelotu ua tatou aoao ai, e mafai ona faaatoatoaina i tatou e ala i le faateleina o le “faalagolago atoa” e le aunoa i le mataupu faavae a Keriso: faatinoina o le faatuatua ia te Ia, salamo, taumamafa ma feinu i le faamanatuga e faafou ai feagaiga ma faamanuiaga o le papatisoga, ma le mauaina o le Agaga Paia e fai ma soa tumau i se tulaga maualuga atu. A tatou faia lea mea, e avea atili i tatou e faapei o Keriso ma ua mafai ona tumau e oo i le iuga, ma mea uma e aofia ai. I se faaupuga faigofie, e popole tele le Atua po o ai i tatou ma po o a ituaiga tagata e avea ai i tatou, nai lo tagata sa tatou i ai i le tuanai. E popole o Ia ina ia tatou taumafai pea.

O le tala malie o le As You Like It, sa tusia e le tusitala Peretania o Viliamu Siekisipia, o loo faaalia ai se suiga tele i se olaga o se tagata. Na taumafai se uso matua ina ia fasiotia lona uso laitiiti. E ui lava i le iloaina o lenei mea, ae na laveai e le uso laitiiti lona uso leaga mai se oti mautinoa. Ina ua iloa e le uso matua le agaalofa o lona uso laitiiti, na matuai suia atoa ma le tumau o ia ma maua ai le mea na ia ta’ua o se “liua.” Mulimuli ane sa o atu nisi tamaitai i le uso matua ma fesili i ai, “E le o oe ea lea sa taupulepule e fasioti [lou uso]?”

Na tali atu le uso matua, “‘Sa ou faapena; ae ou te le o toe faapena: Ou te le mā e tau atu ia te outou lo’u tagata tuai—, ona ua matagofie tele lo’u liua, ua avea ai nei au ma tagata ua i ai nei.”

Mo i tatou, ona o le alofa mutimutivale ma le Togiola a Iesu Keriso, o sea suiga e le o se talafatu tusitusia: E ala mai ia Esekielu, na tautino mai ai le Alii:

“E le pa’ū foi le ua amio leaga i lana amio leaga i le aso e liliu ese ai o ia i lana amio leaga. …

“… Afai e liliu ese ia i lana agasala, ma ua fai e ia le amio tatau ma le amiotonu;

“… Faafoi … le mea e tuu faafaatau, ma toe avane le mea na ia fao, ma ia savali i sauniga e ola ai, ma ua le fai le amio leaga; e ola lava ia. …

“O ana agasala ua ia faia e le ta’uta’ua ia te ia; ua ia fai le amio tatau ma le tonu.”

I Lona alofa mutimutivale, ua folafola mai e le Atua le faamagaloga pe a tatou salamo ma liliu ese ma le amio leaga—o lea tulaga o le a le ta’uta’ua mai ai a tatou agasala ia i tatou. Mo i tatou, ona o le Togiola a Keriso ma lo tatou salamo, e mafai ai ona tatou tepa atu i a tatou amioga o le tuanai ma faapea, “Sa ou faapena, ae ou te le o toe faapena.” Po o le a lava lo tatou amioleaga, e mafai lava ona tatou faapea, “Sa ou faapena. Ae o lena tagata amioleaga i le tuanai ua le o toe avea ai au.”

Sa aoao mai Peresitene Thomas S. Monson, “O se tasi o meaalofa aupito silisili a le Atua mo i tatou o le olioli lea o le taumafai pea lava pea, aua e le manaomia ona faamuta i se toilalo.” E tusa lava foi pe tatou te faia ma le mautinoa le agasala pe feagai soo foi ma le toilalo ma le le fiafia, ae o le taimi lava tatou te filifili ai e toe taumafai, o le a mafai ona fesoasoani mai le Togiola a Keriso ia i tatou. Ma e ao ona tatou manatuaina e le o le Agaga Paia lena e tau maia ia i tatou ua matua tatou leaga lava ma ua sili ai loa ona tatou faavaivai.

O le finagalo o le Atua ina ia taumafai pea le Au Paia o Aso e Gata Ai ua oo atu foi i tala atu o le faatoilaloina o le agasala. Pe o tatou mafatia ona o faafitauli o mafutaga, luitau faaletamaoaiga, po o faamai po o se taunuuga o agasala a nisi tagata, e mafai lava e le Togiola le i’u a le Faaola ona faamaloloina—ma e masalo aemaise lava—i latou ua mafatia fua. E malamalama atoatoa o Ia i le mea e taua o le mafatia fua ona o se taunuuga o le solitulafono a le isi tagata. E pei ona sa valoia, o le Faaola o le a “fufusi i e loto momomo, … [faa]fiafia i e faanoanoa; … foaiina atu … le matagofie e sui a’i le lefulefu, o le uu o le olioli e sui a’i le faanoanoa, [ma le] ofu e fai a’i viiga e sui a’i le loto faavaivai.” Po o le a lava le tulaga e i ai, faatasi ai ma Lana fesoasoani, ua faamoemoeina e le Atua le Au Paia o Aso e Gata Ai ina ia taumafai pea.

E pei lava ona olioli le Atua pe a tatou tutumau, e faapena foi ona le fiafia o Ia pe afai tatou te le faamamaluina le taumafai pea o isi. Sa faasoa mai e le ma uo pele o Topa le auala sa ia aoaoina ai lenei lesona mai lona tina, o Iulia. O Iulia ma Topa o nisi ia o uluai tagata uli na liliu mai i Aferika i Saute. Ina ua faamutaina faiga faailogalanu, sa faatagaina loa tagata uli ma papae o le Ekalesia e auai faatasi i le lotu. Mo le toatele, o le tulaga tutusa o fegalegaleaiga i le va o ituaiga ia e lua sa fou ma faigata. I se tasi taimi, a o auai Iulia ma Topa i le lotu, sa la lagonaina e le o taulimaina i laua i le agalelei e nisi o tagata papae o le ekalesia. Ina ua la o ese atu, sa faitio atu Topa ma le le fiafia i lona tina. Sa faalogo ma le totoa Iulia seia oo ina sasaa atu e Topa lona le fiafia. Ona faapea atu lea o Iulia: “Oi, Topa, o le Ekalesia e pei lava o se falemai tele, ma o loo tatou taufai mamai uma i o tatou lava tulaga. Ua tatou o mai i le lotu ina ia maua se fesoasoani.”

O le faamatalaga a Iulia ua atagia mai ai se malamalamaaga taua tele. E le gata e tatau ona tatou onosai a o taumafai isi e foia o latou gasegase faaletagata lava ia; ae e tatau foi ona tatou agalelei atu, faapalepale, lagolago atu, ma ia loto malamalama. E pei ona uunaia i tatou e le Atua ia taumafai pea, ua Ia faamoemoeina foi i tatou ia tuu atu foi i isi le avanoa e faia ai lea lava mea e tasi, i la latou lava fua faatatau. O le a oo mai le Togiola i o tatou olaga i fuataga tetele atu. O le a tatou iloaina ai e faapea po o a lava ni eseesega ua iloagofie, o loo manaomiaina e i tatou uma le Togiola le iu lava e tasi.

I ni nai tausaga ua mavae sa valaauina ai se alii talavou lelei e igoa ia Curtis e auauna atu i se misiona. O ia o se ituaiga o faifeautalai e tatalo uma peresitene o misiona ia latou maua. Sa gauai o ia ma galue malosi. I se tasi taimi, sa tofia ai o ia e soa ma se faifeautalai sa faatamaitiiti lava, faigata ona fegalegaleai ma tagata, ma sa lei naunau patino ia faataunuu le galuega.

I se tasi aso a o la tietie atu i a la uila vilivae, sa tepa atu i tua Curtis ma vaai atu i lana soa ua oso ese mai lana uila e leai ma se tala ma savali. Sa faailoa atu lemu e Curtis lona faanoanoa i le Atua; o se galuega mamafa le tofia i se soa e matua manaomia ona toe tau faamalosi ina ia faataunuu le galuega. I ni nai minute mulimuli ane, sa maua e Curtis se uunaiga loloto, e peiseai na fetalai i ai le Atua, “E te iloa, faatusatusa mai ia te au, o oulua e le telē lava se eseesega.” Sa aoaoina e Curtis e manaomia ona ia onosai i se soa le atoatoa sa taumafai foi i lana lava ala.

O la’u valaaulia ia i tatou uma ia iloilo o tatou olaga, salamo, ma taumafai pea. Afai tatou te le taumafai, ua na o i tatou lava la o le au agasala o aso e gata ai; afai tatou te le tutumau, o i tatou o le au faavaivai o aso e gata ai; ma afai tatou te le faatagaina isi e taumafai, ua nao i tatou o le au pepelo o aso e gata ai. Ae a tatou taumafai, tutumau, ma fesoasoani i isi ia faia lea lava mea e tasi, o i tatou la o le Au Paia moni o Aso e Gata Ai. A tatou suia, o le a tatou iloaina e popole tele le Atua po o ai i tatou ma po o a ituaiga tagata e avea ai i tatou, nai lo tagata sa tatou i ai i le tuanai.

Ou te matua faafetai lava mo le Faaola, mo Lana Togiola le iu, ma mo perofeta o aso e gata ai o loo uunaia i tatou ia avea ma Au Paia o Aso e Gata Ai, ia taumafai pea. Ou te molimau atu e moni o loo soifua le Faaola, i le suafa o Iesu Keriso, amene.

Faamatalaga

  1. Tagai Nelson Rolihlahla Mandela, Long Walk to Freedom (1994); “Biography of Nelson Mandela,” nelsonmandela.org/content/page/biography; and President Barack Obama’s Dec. 10, 2013, eulogy for Nelson Mandela, at whitehouse.gov/the-press-office/2013/12/10/remarks-president-obama-memorial-service-former-south-african-president-. The diversity of the awards is indicated by Mandela receiving the Nobel Peace Prize, the United States Presidential Medal of Freedom, and the Soviet Order of Lenin.

  2. Tagai, mo se faataitaiga, i le saunoaga a Nelson Mandela i le Rice University’s Baker Institute i le aso 26 Oke., 1999, bakerinstitute.org/events/1221. Na foliga mai sa ia toe faaupuina le faamatalaga lauiloa e faatatau ia Ropati Lui Sitivisone: “The saints are the sinners who keep on trying.” Ua faaalia mai e le toatele i le faagasologa o tausaga ni lagona talitutusa. Mo se faataitaiga, na fai mai foi Confucius, “Our greatest glory lies not in never falling but in getting up every time we fall.”

  3. Tagai, mo se faataitaiga, 2 Nifae 31:2–21; 3 Nifae 11:23–31; 27:13–21; Moronae 6:6; Mataupu Faavae ma Feagaiga 20:77, 79; 59:8–9; Tusitaulima 2: Taitaiina o le Ekalesia (2010), 2.1.2.

  4. O le fai mai e popole tele le Atua po o ai i tatou ma po o a ituaiga tagata e avea ai i tatou, nai lo tagata sa tatou i ai i le tuanai e le o faapea mai e le o popole le Atua i taunuuga o agasala a se tagata po o isi. O le mea moni, e popole tele le Faaola e uiga ia i latou o e mafatia i tiga, puapuaga, ma faanoanoaga ona o agasala a isi. O le a “ave [e le Faaola] i ona luga … vaivaiga [a Lona nuu], ina ia mafai ona faatumuina lona loto i le alofa mutimutivale, … ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga” (Alema 7:12).

  5. William Shakespeare, As You Like It, act 4, scene 3, lines 134–37.

  6. Esekielu 33:12, 14–16.

  7. O le faaaogaina o faaupuga veape i le taimi nei ua iloagofie i le tele o mau e faatatau i le Faamasinoga Mulimuli. Tagai, mo se faataitaiga, 2 Nifae 9:16; Mamona 9:14; Mataupu Faavae ma Feagaigas 58:42–43.

  8. Thomas S. Monson, “The Will Within,” Ensign, May 1987, 68.

  9. Isaia 61:1–3; tagai foi Luka 4:16–21.

  10. O le faaupuga tagata pepelo e pei ona faaaogaina i le Feagaiga Fou e mafai ona faaliliuina mai le gagana Eleni o se “tagata faafoliga”; “o le uiga o le upu Eleni ‘o se tagata e faatinoa ni tala po o ata,’ po o ‘se tasi e faafoliga, fai ma sui, pe faatēlēina se vaega’” (Mataio 6:2, vaefaamatalaga a). Afai tatou te le tuuina atu i isi le avanoa e sui ai i lo latou lava ala, ua na o i tatou o ni Au Paia o Aso e Gata Ai pepelo.

  11. Tagai i le faamatalaga 4, o i luga.

  12. O le aofia o taimi o loo faaali mai ai lenei savali i sauniga a le Au Peresitene Sili ma le Korama a Aposetolo e Sefululua e ofoofogia. Na saunoa mai Peresitene Dieter F. Uchtdorf faapea, “Mai mataupu faavae uma na aoaoina e perofeta i le aluga o seneturi, o le tasi ua faamamafa pea lava pea o le savali faamalosiau o loo i ai se faamoemoe e faapea e mafai ona salamo tagata, suia auala, ma toe foi atu i luga o le ala moni o le avea ma soo” (“E Mafai ona E Faia Nei Lava!” Liahona, Nov. 2013, 56).