Faasaoina o le Faitalia, Puipuia o le Saolotoga o Tapuaiga
Saunia e Elder Robert D. Hales
O Le Korama a Aposetolo e Toasefululua
O le faaaogaaga faamaoni o lo tatou faitalia e faalagolago i luga o le i ai o lo tatou saolotoga o tapuaiga.
O le Aso Sa o le Eseta lenei: o se aso o le lotofaafetai ma le manatua e faamamaluina le Togiola a lo tatou Faaola o Iesu Keriso ma le Toetu mo tagata uma. Tatou te tapuai ia te Ia, faafetai mo lo tatou saolotoga o tapuaiga, saolotoga o potopotoga, saolotoga o tautalaga, ma lo tatou aia tatau o le faitalia na tuuina mai e le Atua.
E pei ona sa valoia e perofeta nei aso e gata ai lea ua tatou ola ai, e toatele ua fenumiai pe o ai i tatou, ma pe o a mea tatou te talitonu i ai. O nisi o “e faatuaupua… ? [ma] e le alolofa i tagata amio lelei.” O isi ua “fai mai ua lelei mea ua leaga, ae leaga le mea lelei; [ma] ua fai ma malamalama le pouliuli, a e fai foi ma pouliuli le malamalama.”
A o faia e i latou o loo siomiaina i tatou ni filifiliga pe faapefea ona tali mai i o tatou talitonuga, e le tatau ona galo ia i tatou o le faitalia o se vaega taua o le fuafuaga a le Atua mo Ana fanau uma. O lena fuafuaga faavavau, na tuuina mai ia i tatou i le Fono i le muai olaga i le Lagi, na aofia ai ma le meaalofa o le faitalia.
I lena Fono Sili, sa faaaoga ai e Lusifelo, ua lauiloa ia Satani, lona faitalia e tetee ai i le fuafuaga a le Atua. Na fetalai le Atua: “Ona … sa fouvale Satani ia te au, ma saili e faaumatia le faitalia a le tagata, lea na tuu atu e A’u o le Alii le Atua ia te ia, … na Ou faia ai ia lafoina o ia i lalo.”
Na Ia faaauau mai: “Ma sa faaliliu ese foi e ia mai ia te a’u le tasi vaetolu o ‘au o le lagi ona o la latou faitalia.”
O le taunuuga, o fanau agaga a le Tama Faalelagi o e sa filifili e teena Lana fuafuaga ma mulimuli atu ia Lusifelo, ua le maua lo latou taunuuga paia.
O Iesu Keriso, i le faaaogaina o Lana faitalia, na fetalai:
“Ia faia lou finagalo, ma e a oe pea le mamalu e faavavau.”
O Iesu, o le na faaaoga Lana faitalia e lagolagoina ai le fuafuaga a le Tama Faalelagi na iloa ma tofia e le Tama e avea ma o tatou Faaola, ma muai faauuina e faatinoina le taulaga togiola mo tagata uma. E faapena foi, o lo tatou faaaogaina o lo tatou faitalia e tausia poloaiga e mafai ai ona tatou malamalama atoa i lo tatou faasinomaga ma maua ai faamanuiaga uma o loo i ai i lo tatou Tama Faalelagi—e aofia ai le avanoa e maua ai se tino, e alualu ai i luma, e iloa ai le fiafia, e maua ai se aiga, ma fai ai mo tatou tofi le ola e faavavau.
Ina ia tausia poloaiga, e manaomia ona tatou iloa le aoaoga faavae aloaia o le Ekalesia ina ia aua ai nei o tatou o ese mai le taitaiga a Keriso ona o manatu fesuisuiai pea o tagata.
O faamanuiaga o loo tatou sapi ai nei ua mafua ona sa tatou faia le filifiliga e mulimuli i le Faaola a o lei oo mai i lenei olaga. Ia i latou uma o faalogologo mai pe faitauina foi nei upu, po o ai lava oe ma pe o le a lava foi lou tulaga sa i ai, manatua le mea lenei: e lei tuai tele ona e toe faia lena filifiliga ma mulimuli ia te Ia.
E ala i lo tatou faatuatua ia Iesu Keriso, talitonu i Lana Togiola, salamo mai i a tatou agasala, ma papatisoina, e mafai ai ona tatou maua le meaalofa faalelagi o le Agaga Paia. O lenei meaalofa e maua ai le silafia ma le malamalama, taitaiga ma le malosi e aoao ai ma maua se molimau, mana, faamamaina e faatoilalo ai le agasala, ma le faamafanafanaga ma le faamalosiauga ia faamaoni i taimi o faigata. O nei faamanuiaga le mafaatusalia e faateleina ai lo tatou saolotoga ma le mana e fai ai le mea tonu, aua “o le mea o i ai le Agaga o le Alii, o i ai le saolotoga.”
A o tatou savalia le ala o le saolotoga faaleagaga i nei aso e gata ai, e tatau ona tatou malamalama o le faaaogaina ma le faamaoni o lo tatou faitalia, e faalagolago lea i le i ai o lo tatou saolotoga o tapuaiga. Ua tatou iloa lava e le manao Satani ia tatou maua lena saolotoga. Sa taumafai o ia e faaumatia le faitalia e iloa ai le tonu i le lagi, ma i le taimi nei ua matua lili o ia e faavaivaia, teena, ma faasalalau le fenumiai e uiga i le saolotoga o tapuaiga—o le a le uiga ma pe aisea e taua ai i lo tatou olaga faaleagaga ma lo tatou lava faaolataga.
E fa maatulimanu o le saolotoga o tapuaiga e tatau ia i tatou o le Au Paia o Aso e Gata Ai ona faalagolago i ai ma puipuia.
Muamua o le saolotoga e talitonu ai. E leai se tasi e tatau ona faitioina, sauaina, pe osofaia e tagata, po o malo foi, mo mea ua ia talitonu i ai e uiga i le Atua. O loo ta’ua i se uluai tautinoga o o tatou talitonuga le saolotoga o tapuaiga:
“E leai se malo e mafai ona ola i le filemu, vagana ua faia ma faamalosia ituaiga tulafono e mautinoa ai le maua e tagata taitoatasi o le faaaoga saoloto o le mafaufaufuatiaifo. …
“… E tatau i taitai faalemalo ona taofi le solitulafono, ae le pulea le mafaufaufuatiaifo; … [pe] taofia le saolotoga o le agaga.”
O lenei saolotoga faavae o le talitonuga sa aloaia e Malo Aufaaatasi i lana Tautinoga Lautele o Aia Faaletagata Soifua ma isi faamaumauga faaleatunuu ma faavaomalo o aia faaletagata soifua.
O le maatulimanu lona lua o le saolotoga o tapuaiga o le saolotoga e faasoa atu lo tatou faatuatuaga ma talitonuga i isi. Ua poloaiina i tatou e le Alii, “Ia outou aoao atu [le talalelei ] ia outou fanau … pe a e nofo i lou fale.” Sa Ia fetalai atu foi i Ona soo, “O atu ia outou i le lalolagi uma, ina ta’u atu ai le tala lelei i tagata uma lava.” I le avea ai o ni matua, o faifeautalai faamisiona, ma faifeautalai o uarota, tatou te faalagolago i le saolotoga o tapuaiga ina ia mafai ai ona aoao atu le aoaoga faavae a le Alii i o tatou aiga ma le lalolagi atoa.
O le maatulimanu lona tolu o le saolotoga o tapuaiga o le saolotoga lea e faatuina ai faalapotopotoga faalelotu, o se ekalesia, ia tapuai filemu ai faatasi ma isi. O le mataupu faavae lona sefulutasi o le faatuatua o loo ta’u mai ai, “Ua ia i matou le aia tatau matou te tapuai atu ai i le Atua Mamana e tusa ai ma o matou lava lotofuatiaifo, ma ua matou tuuina atu foi lea lava aia tatau i tagata uma, e faitalia i latou, pe faapefea, po o fea, po o le a foi le mea latou te tapuai atu i ai.” Ua lagolagoina lenei mataupu faavae e faamaumauga o aia tatau faavaomalo a tagata soifua faapea foi le tele o faavae faalemalo.
O le maatulimanu lona fa o le saolotoga o tapuaiga o le saolotoga lea e ola ai i lo tatou faatuatuaga—faaaogaina saoloto o lo tatou faatuatua e le na o le fale ma le falesa ae faapea foi i nofoaga faitele. Ua poloaiina i tatou e le Alii ia le gata ina tatou tatalo i o tatou afeafe ae ia tatou o atu foi ma “faapupula atu [lo tatou] malamalama i luma o tagata, ina ia latou iloa [a tatou] galuega lelei, ma vivii atu ai i [lo tatou] Tama o i le lagi.”
E i ai nisi e le fiafia pe a tatou avatu la tatou tapuaiga i nofoaga faitele, ae o tagata lava foi nei e tauanau ia talileleia o latou manatu ma faatinoga e tagata, e tele lava ina faifaiaga tele e tuuina mai lena lava talileleia i le au faatuatua faalelotu, o e foi e mananao ia talileleia o latou manatu ma faatinoga. O le tulaga masani o le le lava o le faaaloalo mo manatu faalelotu e vave ona solovi ifo i le le talileleia o tagata lotu ma faalapotopotoga i tulaga faaagafesootai ma faaupufai.
A tatou feagai ma uunaiga faateleina ia tatou gauai atu i tulaga faalelalolagi, ma lafoai o tatou saolotoga e tapuai ai, ma fetuunai lo tatou faitalia, mafaufau i le mea ua aoao mai e le Tusi a Mamona ia i tatou e uiga i o tatou tiutetauave. I le tusi a Alema ua tatou faitau ai e uiga ia Amiliki, “o se tagata faitogafiti tele” mo se “tagata amioleaga” o le sa saili ia fai ma tupu i le nuu ma “aveeseina mai ia te i latou a latou aia ma avanoa,” lea “sa popole ai tagata o le ekalesia.” Sa aoaoina i latou e le Tupu o Mosaea e sii ae o latou leo i le mea latou te manatu e sa’o. O lea sa latou “faapotopoto faatasi ai e tagata i latou lava i le laueleele atoa, e taitasi le tagata e tusa ma lona manatu, pe mo Amiliki pe tetee ia te ia, i tino potopoto eseese, i le finau tele … o le tasi ma le isi.”
I nei talanoaga, sa maua ai e tagata o le Ekalesia ma isi le avanoa e tutu faatasi ai, maua le agaga o le lotogatasi, ma faatosinaina e le Agaga Paia. “Ma sa oo ina tetee le leo o le nuu ia Amiliki, ma le faia ai o ia ma tupu i le nuu.”
I le avea ai ma soo o Iesu Keriso ua ia te i tatou se tiutetauave e galulue faatasi ai ma le au faatuatua e tutusa mafaufau, e faaali o tatou manatu i le mea e sa’o. E ui e le tatau i tagata o le ekalesia ona faapea pe faaataata atu o loo latou tautatala atu mo le Ekalesia, ae ua valaaulia i tatou uma, i o tatou tulaga o ni tagatanuu, e faasoa atu la tatou molimau patino faatasi ai ma le talitonuga maumaututu ma le alofa—“e taitasi le tagata [alii ma le tamaitai] e tusa ma lona [lava] manatu.”
Na saunoa le Perofeta o Iosefa Samita:
“Ou te toa e folafola atu i luma o le Lagi ua tutusa lava ma lo’u saunia ou te oti i le puipuia o aia tatau a se Peresipetiriane, o se Papatiso, po o se tagata lelei o soo se ituaiga lotu [e faapei foi o se Mamona]; mo le mataupu faavae lava e tasi lea e solia ai aia tatau a le Au Paia o Aso e Gata Ai lea foi e solia ai aia tatau a le Katoliko Roma, po o soo se isi lava ekalesia o e atonu e le ta’uta’ua pe e vaivai tele foi e puipuia i latou lava.
“O le alofa o le saolotoga lea e musuia lo’u agaga—o saolotoga faaletagata ma le faalelotu o tagata uma lava.”
Uso e ma tuafafine, o i tatou ua nafa ma le malupuipuia o nei saolotoga paia ma aia tatau mo i tatou lava ma a tatou fanau. O le a se mea e mafai ona e faia ma ou faia?
Muamua, e mafai ona tatou iloa. Ia nofouta i faafitauli i lou nuu ia e ono i ai se aafiaga o le saolotoga o tapuaiga.
Lua, i lou lava tulaga, ia aufaatasi ma isi o e tutusa lo tatou naunau i le saolotoga o tapuaiga. Galulue soosootauau e puipuia le saolotoga o tapuaiga.
Tolu, ia e ola i lou olaga ia avea o se faataitaiga o mea ua e talitonu i ai—i upu ma galuega. O le ala tatou te ola ai i la tatou tapuaiga, e sili atu ona taua nai lo mea e mafai ona tatou tautatala atu ai e uiga i la tatou tapuaiga.
Ua lalata mai lava le Afio Mai Faalua o lo tatou Faaola. Ia aua nei tatou faatuai i lenei galuega tele. Manatua Kapeteni Moronae, o le sa faaagiagiaina le fu’a o le saolotoga na tusia ai upu: “Mo le manatuaina o lo tatou Atua, ma la tatou tapuaiga, ma le saolotoga, ma lo tatou filemu, a tatou avā, ma a tatou fanau.” Ia tatou manatua le tali a tagata na faaaoga ai la latou faitalia: sa latou “taufetuli faatasi mai” ma se feagaiga e faatino.
O’u uso e ma tuafafine pele, aua le savalivali! Taufetuli! Taufetuli ia maua faamanuiga o le faitalia e ala i le mulimuli i le Agaga Paia ma faaaoga ia saolotoga ua tuuina mai e le Atua ia te i tatou e fai ai Lona finagalo.
Ou te tuuina atu la’u molimau faapitoa i lenei aso faapitoa o le Eseta sa faaaoga e Iesu Keriso Lona faitalia e faia ai le finagalo o lo tatou Tama Faalelagi.
Tatou te pepese i lo tatou Faaola, “O Lona toto sa faamasaa: Ma ofo mai Lona soifua.” Ma talu ai sa Ia faia, ua tatou maua ai le avanoa e le mafaatauina e “filifili ai le saolotoga ma le ola faavavau” e ala i le mana ma faamanuiaga o Lana Togiola. Ina tatou filifili saoloto ia e mulimuli ia te Ia i le asō ma aso uma, ou te tatalo atu ai i Lona suafa paia, o Iesu Keriso, amene.