Tumau i le Laau
Saunia e Elder Kevin W. Pearson
O Le Fitugafulu
O le faaaliga ia Liae o le laau o le ola o se faataoto mamana lea e uiga i le tumau e oo i le iuga.
A o tulata ina maliu Peresitene Ipa J. Kurene, sa asiasi atu se tasi o le Pulega Aoao i lona maota. A o lei tuua e ia, sa tatalo Peresitene Kurene, “Le Atua e, faamanuia a’u ina ia le mou atu la’u molimau ma ia tumau le faamaoni seia oo i le iuga!” Ina ua mavae le toeitiiti atoa le 27 tausaga o avea ai ma Peresitene o le Ekalesia, o lana tatalo faatauanau lea. O lana faataitaiga o se faamanatu mamana e leai se tasi, i soo se matua, ua saoloto mai faatosinaga a Satani. O meafaigaluega e lua e sili ona mamana a Satani o le tata’iese ma le taufaasese.
O le tumau e oo i le iuga o se uiga lea o le avea ma soo moni ma e manaomia mo le ola e faavavau. Peitai a oo mai tofotofoga ma luitau ia i tatou, e tele taimi e ta’u mai ai ia i tatou ia tau lava ina “onosai ai iina.” Sei ou faamanino atu lava o le “onosai ai iina” e le o se mataupu faavae o le talalelei. O le tumau e oo i le iuga o lona uiga o le sau pea lava pea ia Keriso ma ia faaatoatoaina ia te Ia.
Afai e manaomia le tumau e oo i le iuga, i le ola e faavavau, aisea tatou te tauivi ai ina ia faamaoni? Tatou te tauivi pe a utia i tatou i faamuamua faatautavā. O le usitai faasamasamanoa ma le tautino atu faavaeluatai e faaumatia ai le faatuatua. O le tumau e oo i le iuga, e manaomia ai le tautino atu atoatoa i le Faaola ma a tatou feagaiga.
O le faaaliga ia Liae o le laau o le ola o se faataoto mamana lea e uiga i le tumau e oo i le iuga. Faamolemole ia suesue ma le agaga tatalo ma mafaufau loloto i le miti a Liae; ona faatatau lea ia te oe lava. A o e faia, ia mafaufau toto’a i mataupu faavae taua e ono ia e fesoasoani tatou te tumau ai e oo i le iuga.
1. Aua Nei Galo Ona Tatalo
Tatou amata ia Liae na o ia “i totonu o se gaogao pogisa ma le pagatia.” Ua tatou tofu oo i ni taimi o le pogisa ma le tuuatoatasi. “Ina ua o’o mala, na e tatalo ai.” Mulimuli i le faataitaiga a Peresitene Ipa J. Kurene. Tatalo mo le malosi e tumau ai e oo i le iuga. Ole atu i le Tama Falelagi, “O le a se isi mea E Te finagalo ou te faia?”
2. O Mai Ia Keriso ma Ia Faaatoatoaina ia te Ia
O le laau o le ola o le taulaiga tutotonu lea o le miti a Liae. E faasino mea uma i le laau o le ola. O le laau e faatusa ia Keriso, o le faaaliga manino o le alofa o le Atua. O le fua o Lana Togiola e le i’u ma o se faamaoniga tele o le alofa o le Atua. O le ola e faavavau ma e pele ia i tatou, e sili atu ona suamalie ma manaomia nai lo se isi lava mea. Ina ia iloaina lenei meaalofa, e tatau ona tatou “o mai ia Keriso, ma ia faaatoatoaina ia te ia.” O Ia “o le ala, le upumoni, ma le ola.” E mafai ona tatou faatumuina o tatou olaga i mea e ausia ma mea lelei, peitai i le iuga, afai tatou te le ulu atu i feagaiga paia e mulimuli ma le faamaoni ia Keriso ma tausia, o le a tatou matuā le malamalama lava i lo tatou faamoemoega moni.
3. Fetaomi Atu i Luma ma le Faatuatua
E i ai le ala e tau atu i le laau o le ola, ia Keriso. O se ala sa’o ma le vaapiapi, e tāmau ma sa’onoa. O poloaiga a le Atua e tāmau ae le faatapulaaina. E puipuia ai i tatou mai tulaga matautia faaleagaga ma faaletino ma puipuia ai foi i tatou mai le leiloloa.
O le usitai e fausia ai le faatuatua ia Keriso. O le faatuatua o se mataupu faavae o faatinoga ma le mana. O le mulimuli pea lava pea i le faataitaiga a le Faaola, e maua mai ai le mana ma le gafatia faaleagaga. A aunoa ma le mana faamalosi ma gafatia o le Togiola, e le mafai ona nofomau i luga o le ala ma tumau ai.
4. O Le Tusi a Mamona o le Ki i le Ola Ai Faaleagaga
E faigata le malaga o le olaga. E faigofie ona faalavefauina, ma see ese ai mai le ala ma leiloa ai. O puapuaga o se vaega e le maalofia ma e tatau ai o lo tatou alualu i luma e faavavau. A oo mai mafatiaga, aua nei e faatagaina se mea e te le malamalama atoa i ai e talatalaina mea ua e iloa. Ia e onosai, pipiimau i le upumoni; o le a oo mai le malamalama. O tofotofoga e pei o puaoa o le pogisa e mafai ona faatauasoina o tatou mata ma faamaaaina o tatou loto. Vagana ua tatou “piimau pea” i le afioga a le Atua ma ola ai, o le a oo ina tatou tauaso faaleagaga nai lo le mafaufau faaleagaga. Sailiili i le Tusi a Mamona ma upu a perofeta soifua i aso uma, i aso uma, i aso uma! O le ki lea i le ola faaleagaga ma aloese ai mai le faaseseina. A aunoa ma lena, ua tatou leiloloa faaleagaga.
5. Aua Nei Tata’ieseina ma Faaseseina Outou
O le ua’i atu o le avatu lea i ai o se gauai toto’a. O le ua’i atu ia i latou e le talitonu ia Keriso o le a le fesoasoani ia te oe e maua ai o Ia. O le sailia o le fale ateatea, mo se malamalama o le a taitai atu ai oe i le upumoni. E le maua ai iina. E na o le Faaola o loo i ai “upu o le ola e faavavau.” O isi mea uma ua na o ni upu. O le faletele ma le ateatea ua faatusa i “mafaufauga le aoga ma le faamaualuga” o le lalolagi—i se isi faaupuga, o le tata’iese ma le taufaasese. E tumu i tagata laei lelei o e foliga mai e maua mea uma. Peitai, latou te aamu i le Faaola ma i latou o e mulimuli ia te Ia. Ua latou “aoaoina e le aunoa, a e le au mafai ona oo ina iloa lelei o le upumoni.” Atonu e sa’o lava i latou i mea faaupufai, ae ua leiloloa faaleagaga i latou.
6. Tumau i le Laau
O le savali a Liae o le tumau i le laau. Tatou te tutu ai aua ua liua i tatou i le Alii. Na aoao mai e Alema, “Faauta, sa ia liua o latou loto; ioe, sa ia fafagu i latou mai se moe gase, ma sa latou ala mai i le Atua.” A o tatou faamatuu atu o tatou loto i le Atua, e suia e le Agaga Paia o tatou lava natura, ma tatou liua loloto ai i le Alii, ma tatou le toe saili atu ai i le fale ateatea. Afai e tuu lo tatou faia o na mea ia e aumaia ai le liua loloto, e faavaivaia faaleagaga i tatou. O le liliuese o le faafeagai o le liua.
I faifeautalai uma o taimi ua tuanai ma le taimi nei: Alii ma tuafafine, e le mafai ona e foi mai lau misiona, ma toe tofu atu i Papelonia, ma faaalu ai itula e le mafaitaulia e te sikoa ai ma maua ni ‘ai e leai se uiga o taaloga faavitio e aunoa ma se pa’ū atu i se moegase faaleagaga. E le mafai foi ona e nopia’i i ponokalafi i le initoneti ma lē amanaia ai le amioatua ma le legavia e aunoa ma ni taunuuga matuia faaleagaga. A e le maua le Agaga, ua e se. Aua ne’i tata’ieseina ma faaseseina oe.
O soo moni e faaauau pea ona alafa’i mai i le Atua i aso taitasi i le tatalo anoa faaletagata lava ia, o le suesue faamaoni i tusitusiga paia, usiusitai patino, ma le auauna atu ma le le manatu faapito. Tumau i le laau ma mataala.
I ni tausaga ua mavae, sa valaauina ai ma’ua ma Sister Pearson e pulefaamalumalu i le Misiona a Washington Tacoma. O se mea na matua’i faateia lenei valaauga. Faatasi ai ma sina atuatuvale, sa ma fono ma le taitaifono ma le Pule Sili o le kamupani sa ou faigaluega ai, ma sa faailoa atu ai ia i laua lo’u valaauga faamisiona. Sa manino lava lo laua le fiafia i la’u faaiuga e tuua le kamupani. “O anafea na e faia ai lenei faaiuga, ae aisea na e le talanoa vave mai ai?” sa la ina’inā mai ai.
I se minute o le manino, sa oo mai ai se tali maoae i lo’u mafaufau. Sa ou fai atu, “Sa ou faia lenei faaiuga ina ua 19 o’u tausaga, ina ua ou faia ni feagaiga paia ma le Atua i totonu o le malumalu e mulumuli i le Faaola. Sa ou fauina lo’u olaga atoa i luga o na feagaiga, ma ua ou matuai aga atu e tausia atoatoa na feagaiga i le taimi nei.”
O le taimi lava tatou te osifeagaiga ai ma le Atua, e le toe i ai se foi i tua. O le fetuunai, togi le solo, ma le faamaumau o le malosi, e le o ni filifiliga ia. I le malo o le Atua, e i ai se tagavai o le lelei atoatoa mo le faaeaga. E manaomia ai le avea ma soo lototoa! E leai se avanoa mo ni soo faasamasamanoa pe faafia-amiotonu. O le faasamasamanoa o le fili lea o le lelei silisili, ma o le tautinoga faasamasamanoa o le a taofia ai oe mai le tumau e oo i le iuga.
Afai o e tauivi, fenumiai, pe ua leiloa faaleagaga, ou te uunaia oe e fai le mea e tasi lea ou te iloa o le a toe faafoi ai oe i luga o le ala. Toe amata ona suesue ma le agaga tatalo le Tusi a Mamona ma ola ai i ona aoaoga i aso uma, i aso uma, i aso uma! Ou te molimau atu i le maoae o le mana o le Tusi a Mamona o le a suia ai lou olaga ma faamalosia ai lau faaiuga e mulimuli ia Keriso. O le a suia e le Agaga Paia lou olaga ma fesoasoani e te iloa ai “mea e pei ona i ai moni.” O le a Ia faaali atu ia te oe le isi mea e sosoo e tatau ona e faia. O le folafolaga lenei a Nifae ia te oe:
“Ma sa ou fai atu ia te i latou … ai se faalogo i le afioga a le Atua, ma pipiimau i ai, e le fano lava i latou; pe mafai foi e faaosoosoga ma ufanafana mu a le fili ona faatoilaloina i latou i le faatauasoina, e taitai ese atu ai i latou i le faafanoga.
“O le mea lea, o a’u … sa ou apoapoai atu ia te i latou … ia ua’i atu i le afioga a le Atua ma manatua ia tausi pea i ana poloaiga uma.”
Uso e ma tuafafine, o le tumau e oo i le iuga o le suega sili lea o le avea ai ma soo. O le avea ai o i tatou ma soo i aso taitasi, o le a fuafua ai lo tatou taunuuga e faavavau. Ala maia i le Atua, pipiimau i le upumoni, ia tausia a outou feagaiga paia i le malumalu, ma tumau i le laau!
Ou te molimau atu i le Keriso toetu soifua. Ou te iloa o loo soifua o Ia. O lo’u naunauga aupito sili ia ou faamaoni ma faatuatua e oo i le iuga i le mulimuli ai i Lana faataitaiga ofoofogia. I le suafa paia o Iesu Keriso, amene.