Pe a Faatasia le Faamasino Tonu, Alofa ma le Alofa Mutimutivale
Saunia e Elder Jeffrey R. Holland
O Le Korama a Aposetolo e Toasefululua
Na mafatia Iesu Keriso, maliu, ma toetu mai le oti ina ia mafai ai ona Ia sii ae i tatou i le ola e faavavau.
E leai ni maea, fusi, po o soo se mea e faaaoga e fe’a’ei ai mo le saogalemu, ae sa taumafai pea Simi e 14 tausaga ma Sione e 19 tausaga (e ui e le o ni o la igoa moni na)—e a’ea se pa tifatō o le Snow Canyon State Park i lo’u nuu o Iuta i saute. I le latalata atu i le tumutumu o la la’ua fe’aeiga faigata, sa la iloa e i ai se fatapapa e ‘oso mai i luma e le mafai ai ona la a’ea nai futu o totoe agai i luga. Sa le mafai ona a’ea ae sa le mafai foi ona la toe solomuli ai nei. Sa noatia ai i la’ua. Ina ua uma se feliuliua’iga ma le toto’a, sa maua e Sione se avanoa e tutu ai ona vae ae tulei i luga lona uso laitiiti ma le saogalemu i luga atu o le fatapapa. Ae e leai se auala e lifi ai o ia lava. O le tele o lona taumafai e sue se mea e pipii ai ona lima po o vae, o le tele foi lena na amata migi ai ona uaua. Sa amata ona ufitia o ia i le gatete, ma sa amata ona popole mo lona ola.
O le le mafai ai ona toe pipii, sa tonu loa ia Sione e na o le pau lava le mea o totoe o le taumafai lea e puna faatu i se taumafaiga e pu’e ai le tumutumu faataumata o le fatapapa. Afai e manuia, atonu e mafai e le malosiaga tele o lona lima, ona tosoina o ia ia saogalemu.
I ana lava upu na ia fai mai ai:
“Ae ou te lei puna, sa ou fai ia Simi e alu e sue ane se lala laau e lava le malosi e tuutuu mai i lalo ia te au, e ui ina sa ou iloa e leai se na mea i luga o le tumutumu papa. Sa na o sa’u taumafaiga faanatinati. Afai e le manuia la’u puna, na pau le mea sa mafai ona ou faia o le mautinoa lea e le vaai lo’u uso laitiiti o o’u pa’ū atu i lo’u oti.
“O le tuuina atu o ia ia lava se taimi ia alu ese atu ai, sa ou faia ai la’u tatalo faaiu—ou te manao ia iloa e lo’u aiga ou te alofa ia i latou ma e mafai ona toe foi saogalemu atu Simi na o ia—ona ou puna ai lea. Na lava le malosi na ou tuleia ai au, ma sa ou oso ai ma oo atu o’u lima i luga atu o le fatapapa toeitiiti oo i o’u tulilima. Peitai a o pa’i ifo o’u lima i le pito i luga o le fatapapa, sa leai se mea na ou lagonaina ae na o le oneone pefu i luga o le papa mafolafola. E mafai lava ona lagonaina le talatala o le oneone a o tāūpe ai iina ma le leai o se mea e pipii i ai—leai se augutu, leai se papatū, leai se mea e mau ai pe u’u mau. Sa ou faalogoina o’u tamatamailima ua amata ona se’e ese atu i le tumutumu oneonea. Sa ou iloa ua uma lo’u ola.
“Ona faafuasei ai lea, e pei o se uila ua pa i se matagi o le taumafanafana, sa togi mai ni lima se lua mai se mea i luga atu o le faatausiusiuga o le tifatō, pu’e o’u tapulima ma se malosi ma se naunautaiga mausali e ui i le laiti. E lei alu si o’u uso faamaoni e sue se lala laau e le moni. I le taumateina o le mea moni sa ou fuafua e fai, na te lei tuua ai lava au. Sa na ona ia faatalitali lava—le leoa, tau lē mānava—ma le iloaina lelei, o le a lava lo’u faavalevalea e taumafai ai e puna. Ina ua ou puna, sa ia pueina au, taofi mau au, ma sa lei manao e tuu au ou te pa’u. O na lima malolosi faaleuso na laveaiina ai lo’u ola i lena aso, a o ou tautau i se tulaga matua mamao ese mai le eleele semanu e mautinoa lava lo’u oti.”
Ou uso e ma tuafafine pele, o le asō o le Aso Sa o le Eseta. E ui e ao ina tatou manatua pea (tatou te folafola atu i la tatou tatalo faamanatuga o vaiaso taitasi o le a tatou faia), ae ui o lea o le aso aupito paia lenei o le tausaga mo le manatuaina faapitoa o lima faaleuso [o Iesu] ia sa aapa mai ia i tatou o e ua mafai ona oti faaleagaga ma faaletino e laveai i tatou mai o tatou toilalo ma vaivaiga ma mai o tatou faanoanoaga ma agasala. I le faaaogaina o lenei tala na faamatalaina e le aiga o Sione ma Simi e fai ma matalalaga, ou te momoli ai lo’u lotofaafetai mo le Togiola ma le Toetu o le Alii o Iesu Keriso ma faailoa atu mea na tutupu i le fuafuaga paia a le Atua ia na tau atu ai ma aumaia se uiga i “le alofa o Iesu na ia alofa ai ia i [tatou].”
I o tatou malo ua faateleina le faalelalolagi, e le masani ai e pei ona le tausaafia ai le talanoa e uiga ia Atamu ma Eva po o le Faatoaga o Etena po o le “lelei o lo la’ua pa’ū” ua maua ai le ola faaletino. Ae ui o lea, o le upumoni faigofie o le le mafai ona tatou malamalama atoatoa i le Togiola ma le Toetu o Keriso ma o le a le lava ai le talisapaia o le faamoemoega uiga ese o Lona soifua mai ma Lona maliu—i se isi faaupuga, e leai se ala e matua faamanatu moni ai le Kerisimasi po o le Eseta—e aunoa ma le malamalama sa i ai moni lava se Atamu ma Eva sa pa’ū’ū mai se Etena mo’i faatasi ai ma taunuuga uma sa tauaveina e lena pa’ū.
Ou te le iloa auiliiliga o le mea na tupu i lenei paneta i luma atu o lena mea, ae ou te iloa o le toalua lena sa foafoaina i lalo o le aao paia o le Atua, ma sa la nonofo mo se taimi i se tulaga faaparataiso, lea sa leai se oti faaletagata po o se aiga i le lumanai, ma e ala mai i se faasologa o filifiliga sa la solia ai se poloaiga a le Atua lea sa manaomia ina ia la tuua ai le faatoaga, ae sa faatagaina ai i la’ua ia maua fanau a o lei feagai ma le oti faaletino. Ina ia faaopoopo atu se isi faanoanoaga ma le lavelave i lo la’ua tulaga ua i ai, o la la’ua solitulafono sa i ai foi ni taunuuga faaleagaga, na vavae ese ai i la’ua mai le afioaga o le Atua e faavavau. Talu ai la ua tatou fananau mai i lena lalolagi pa’ū ma talu ai o le a tatou solia foi tulafono a le Atua, o lea sa faasalaina ai foi i tatou i na lava faasalaga na feagai ma atamu ma Eva.
Oka se mala! Ua pa’ū’ū tagata uma ua leai se mea e taofi mai ai—o alii uma, tamaitai, ma tamaiti ua lalata uma atu i le oti tumau faaletino, ua lalata atu pea foi i le lototiga e faavavau. Pe o le mea ea lena na tatau ona i ai le olaga? Pe o le taualuga ea lea o le aafiaga faaletagata soifua? Pe ua na ona tatou tāūpeūpe ea i se tifatō malulu i se vaimea o se atulaulau e leai se isi e manatu mai, o loo tofu saili e i tatou sina mea e mapu i ai, ua tofu saili e i tatou se mea e pipii ai—ae leai se mea ua na o le oneone o se’e i o tatou vailima, leai se mea e laveaiina i tatou, leai se mea e mau ai, ma e matua leai lava se mea e pipii mai ia i tatou? Pe na o le pau ea lo tatou faamoemoega i le olaga ua na o se suesuega o se olaga e leai se uiga—tau lava o le puna i le maualuga tatou te mafaia, ma tāupeupe ai mo le tusa ma le fitusefulu tausaga, ona toilalo lea ma pa’ū, ma pa’ū ai pea e faavavau?
O le tali i na fesili o se leai manino ma le faavavau! Faatasi ai ma perofeta anamua ma ona po nei, ou te molimau atu “ua faia mea uma e tusa ma le poto o ia o le ua silafia mea uma.” O le mea lea, o le taimi lava na laa ese mai ai na uluai matua mai le Faatoaga o Etena, ma i le muaisilafia ai o le faaiuga a Atamu ma Eva, na auina mai ai e le Atua ma le Tama o i tatou uma, ia agelu o le lagi e ta’u atu ia te i laua—ma pasi mai ai i tupulaga seia oo mai ia te i tatou—e faapea o lenei faasologa atoa lava sa mamanuina mo lo tatou fiafia e faavavau. O se vaega o Lana fuafuaga paia lea e saunia ai se Faaola, le Alo o le Atua lava Ia—se isi “Atamu,” lea o le a faaigoa ai o Ia e Paulo—o lē o le a afio mai i le taulotoaiga o taimi e togiolaina le uluai solitulafono a Atamu. O lena Togiola o le a ausia ai le manumalo atoa i le oti faaletino, e leai ni tuutuuga e maua ai le toetu o tagata uma sa fananau mai ai pe o le a fananau mai i lenei lalolagi. Ma le alofa mutimutivale o le a aumaia ai foi le faamagaloga o agasala patino a tagata uma, mai ia Atamu seia oo atu i le tuluiga o le lalolagi, e fuafua i le salamo ma le usiusitai i poloaiga paia.
I le avea ai o se tasi o Ana molimau faauuina, ou te tautino atu i le taeao o lenei Eseta o Iesu le Nasareta o le Faaola lena ma o loo i ai lava o le lalolagi, o le “Atamu mulimuli,” o Le Na te taitaia ma Le Na te faaatoatoaina le faatuatua o le Alefa ma le Omeka o le ola e faavavau. “Aua e faapei ona oti uma ia Atamu, e faapea foi ona ola uma ia Keriso,” o la Paulo lea. Na faapea foi ona faia e le perofeta-peteriaka o Liae: “Na pa’ū Atamu ina ia i ai tagata. … Ma e afio mai le Mesia i le atoatoaga o taimi, ina ia mafai ona ia togiolaina le fanauga a tagata mai le pa’ū.” O le aupito auiliili o mea uma, sa aoao mai e le perofeta o Iakopo o le Tusi a Mamona o se vaega o se lauga i le lua aso e uiga i le Togiola a Iesu Keriso e faapea “e tatau ona oo mai le toetu … ona o le pa’ū.”
O le asō la ua tatou faamanatuina ai le meaalofa o le manumalo mai pa’ū uma ua tatou oo i ai, o faanoanoaga uma ua tatou iloa, o lotovaivai uma ua tatou maua, o atuatuvalega uma ua tatou feagai—ma e tatou te faamanatuina ai foi lena manumalo mai le oti ma le faamagaloga o a tatou agasala. O loo maua lena manumalo mo i tatou ona o mea na tutupu i se faaiuga tonu lava o se vaiaso faapenei i le silia ma le lua afe tausaga talu ai i Ierusalema.
Na amata i le tiga faaleagaga i le Faatoaga o Ketesemane, ma oo atu ai i le Faasatauroga i luga o se satauro i Kalevaria, ma faaiu ai i se taeao matagofie o se Aso Sa i totonu o se tuugamau na foai fua atu, na faia ai e se tamalii e leai se agasala, e mama a’ia’i, ma le paia, le Alo o le Atua lava Ia, le mea e leai se isi tagata ua oti na na faia pe faia i le talafaasolopito o le lalolagi. I lalo o Lona lava mana, sa Ia toetu mai ai nai e ua oti, e le toe tuueseesea lava lona tino mai Lona agaga. O Lana lava filifiliga, na Ia aveesea ai le ie na ufi a’i o Ia, ma tuu ese foi ma le faaeteete le solosolo sa tuu i Ona fofoga “i se tasi mea,” o loo fai mai ai le mau.
I lena uluai Eseta o le faasologa o le Togiola ma le Toetu e aofia ai taimi e aupito sili ona taua, le meaalofa tulaga ese, le tiga aupito ogaoga, ma le faaaliga aupito taua o le alofa mama na faatino i le talafaasolopito o lenei lalolagi. Na mafatia Iesu Keriso, le Alo e Toatasi na Fanaua a le Atua, maliu, ma toetu mai le oti ina ia mafai ai e Ia, e faapei o se uila i se matagi o le taumafanafana, ona aapa mai ia i tatou a o tatou pauu, taofimau ia i tatou i Lona malosi atoa, ma e ala atu i lo tatou usiusitai i Ana poloaiga, e sii ae ai i tatou i le ola e faavavau.
O lenei Eseta, ou te faafetai atu ia te Ia ma le Tama na tuuina mai o Ia ia te i tatou ma o loo tu manumalo pea Iesu i le oti, e ui ina tu o Ia i luga o vae manu’anu’a. O lenei Eseta ou te faafetai atu ia te Ia o le na tuuina mai o Ia ia te i tatou, o loo Ia tuuina mai pea ia i tatou le alofa tunoa e le uma, e ui ina Ia tuuina mai ma alofilima ua pūpū ma tapulima manu’anu’a. O lenei Eseta ou te faafetai atu ia te Ia o le na tuuina mai o Ia ia te i tatou ua mafai ai ona tatou pepese ma le manatu i se faatoaga na afutoto ai, o se satauro na tutui ai fao, ma se tuugamau ua gaogao:
I le suafa paia o le Iesu Keriso toetu, amene.