Ia Manatua Pea o Ia
Saunia e Elder Gerrit W. Gong
O Le Au Peresitene o Fitugafulu
Ou te molimau atu ma le agaga maualalo, ma tatalo, o le a tatou manatua pea o Ia—i taimi uma, i mea uma, ma nofoaga uma atonu tatou te i ai.
Uso e ma tuafafine pele, a o ou galue i Asia, e masani ona fesili mai ia tagata, “Elder Gong, e toa fia le toatele o tagata e nonofo i Eria o le Ekalesia i Asia?”
Sa ou fai atu, “O le afa o le faitau aofai o le lalolagi—3.6 piliona tagata.”
Sa fesili se tasi, “Mata e faigata ona manatua igoa uma o i latou?”
O le manatuaina—ma le faagaloina—o ni vaega o le olaga o aso uma. Mo se faataitaiga, i se tasi o taimi, i le maea ai o le sailia solo mo lana telefoni feaveai fou, sa filifili mulimuli ane lou toalua e vili mai se isi telefoni. Ina ua ia faalogoina le tatagi o lana telefoni, sa mafaufau lou toalua, “O ai o loo vili mai ia te au? Ou te lei avatua i se tasi lena numera!”
O le manatuaina—ma le faagaloina—o ni vaega foi o lo tatou malaga i le faavavau. O le taimi, faitalia, ma manatuaga e fesoasoani tatou te aoao ai, tuputupu ae ai, ma faateleina i le faatuatua.
I upu o se viiga e sili ona fiafia i ai:
O vaiaso taitasi, i le aai ma feinu ai i le faamanatuga, tatou te osi feagaiga ai e manatua pea o Ia. I le faaaogaina o le toeitiiti lava 400 o mau faasino i le upu manatua, o ni auala nei se ono e mafai ai ona tatou manatua pea o Ia.
Muamua, e mafai ona tatou manatua pea o Ia e ala i le mauaina o le mautinoa i Ana feagaiga, folafolaga, ma faamautinoaga.
E manatua e le Alii Lana feagaiga tumau faavavau—mai le taimi o Atamu i le aso o fanau a Atamu “pe a talia e au fanau le upumoni, ma vaai a’e i luga, ona vaai ifo ai lea o Siona i lalo, ma e lūlūina ai lagi uma lava i le fiafia.”
E manatua e le Alii Ana folafolaga, e aofia ai folafolaga e faapotopoto Isaraelu ua faataapeapeina e ala i le Tusi a Mamona: O Se Tasi Molimau ia Iesu Keriso ma folafolaga na tuuina atu i tagata uma o le ekalesia ma faifeautalai o ē manatua le aoga o agaga.
E manatua e le Alii ma faamautinoa atu i malo ma tagata. I nei aso o le fepisiai ma le vavaō, “o loo ta’uta’u nisi i kariota, ma nisi i solofanua: a o i tatou ua tatou ta’uta’u le suafa o Ieova lo tatou Atua,” o Lē e taialaina “le lumanai e pei ona ia faia i le tuanai.” I “aso faigata,” tatou te “manatua e lē o le galuega a le Atua e taofia, ae o le galuega a tagata.”
Lua, e mafai ona tatou manatua pea o Ia e ala i le faailoaina o Lona aao i o tatou olaga atoa.
O le aao o le Alii i o tatou olaga e masani ona faigofie le iloaina a o tatou manatua le tutupu ai o mea pe a maea. E pei ona saunoa mai se faifilosofia Kerisiano o Soren Kierkegaard: “E mafai ona tatou malamalama i mea e tutupu pe a maea ona tutupu. Ae … e tatau ona tatou ola e taulimaina mea o loo tutupu i le taimi nei.”
Sa faamanatu talu ai nei e lou tina pele lona 90 tausaga. Sa ia molimau ma le agaga faafetai i faamanuiaga a le Atua i mea taitasi na tutupu i lona olaga. Talafaasolopito o aiga, o tu ma aga faaleaiga, ma sootaga faaleaiga e fesoasoani ia i tatou ia manatua ma le faapelepele mea ua tuanai, a o saunia mamanu ma faamoemoega mo le lumanai. O laina o le pule o le Perisitua ma faamanuiaga faapeteriaka e molimau mai i le aao o le Atua i augatupulaga e tele.
Pe ua e mafaufau ea ia te oe lava o lau oe lava tusi faamanatu o loo soifua—ma mafaufau i le a ma pe faapefea ona e filifili e manatua?
Mo se faataitaiga, a o ou laitiiti, sa ou manao lava e taalo i le au pasiketipolo a le aoga. Sa ou toleni ma toleni. I se tasi aso sa faasino le faiaoga i lo matou 6-futu-4-inisi (1.93 m) o se tagata taalo lauiloa i le center i le setete atoa ma lo matou 6-futu-2-inisi (1.88 m) o se tagata taalo maoae ma faapea mai ia te au, “E mafai ona ou tuuina oe i le au, ae e mautinoa lava e te le taalo lava.” Ou te manatua lona uunaia ma le agalelei o au, “Ae a pe a e auai atu i le au soka? O le a e lelei.” Sa tapuai lou aiga ina ua sikoa lou ai muamua.
E mafai ona tatou manatua i latou e aumaia ia i tatou se avanoa, ma se avanoa lona lua, ma le faamaoni, agalelei, onosai, ma le faamalosiauga. Ma e mafai ona tatou avea ma se tasi e manatua e isi pe a sili ona manaomia le fesoasoani. O le manatuaina ma le agaga faafetai o le fesoasoani a isi ma le uunaiga taiala a le Agaga o se auala tatou te manatua ai o Ia. O se auala tatou te mafaufau ai i faamanuiaga uma a se tasi ma vaai i le mea ua faia e le Atua.
Tolu, e mafai ona tatou manatua pea o Ia e ala i le faatuatua pe a faamautinoa mai i tatou e le Alii “o ia o lē ua salamo i ana agasala, o ia lava lea ua faamagaloina, ma o A’u, o le Alii, e lē toe manatuaina lava i latou.”
Pe a tatou salamo atoatoa, e aofia ai le tautau atu ma lafoai a tatou agasala, tatou te fesili lava e tasi na fesili ai Enosa, a o aveesea mai ia i tatou le tausalaina, “Le Alii e, ua faapefea ea ona faia lenei mea?” ma faafofoga i le tali “Ona o lou faatuatua ia Keriso” ma o Lana valaaulia ia “faamanatu mai ia te au.”
O le taimi lava tatou te salamo ai ma ua folafola mai e taitai perisitua ua tatou agavaa, e lē manaomia ona faaauau ona tautau atu ma tautau atu nei agasala ua tea. Ina ia agavaa e lē o le uiga ina ia atoatoa. O le fuafuaga a le Tama Faalelagi o le fiafia ua valaaulia ai i tatou ina ia faamaualaloina le filemu i le malaga o le olaga i le faaatoatoaina i se aso ia Keriso, e lē o le popole pea, ita, po o le lē fiafia i o tatou lē atoatoa o le asō. Manatua, Na te silafia mea uma tatou te le manao e iloa e se tasi e uiga ia i tatou—ma sili atu ona alofa pea ia i tatou.
O nisi taimi e suesueina e le olaga lo tatou faalagolago i le alofa mutimutivale, faamasinotonu, ma le faamasinoga a Keriso, ma i Lana valaaulia faasaoloto e faamatuu mai Lana Togiola e faamalolo ai i tatou a o tatou faamagalo atu i isi ma i tatou lava.
O se tamaitai talavou i se isi atunuu sa talosaga e galue o se tusitala, ae o le taitai e atofaina galuega sa leai se alofa. Sa ia fai atu ia te ia, “I la’u saini, ou te faamautinoa atu o le a e le avea o se tusitala ae o le a eli lapisi lafoai.” Sa na o ia le tamaitai sa eliina lapisi lafoai i se vaega o alii.
I ni tausaga mulimuli ane, sa avea lenei tamaitai ma se taitai. I se tasi aso, sa sau ai se alii e manaomia lana saini mo se galuega.
Sa ia fesili atu, “E te manatua au?” Na te lei manatua.
Sa ia faapea atu, “E te le manatua au, ae ou te manatua oe. Faatasi ai ma lau saini, sa e mautinoa o le a ou le avea lava ma se tusitala. Ma o lau saini, sa e auina atu ai au e eli lapisi lafoai, le tamaitai e toatasi i se vaega o alii.”
Sa ia tau mai ia te au, “Sa ou lagona e tatau ona ou taulimaina lena alii ia sili atu nai lona taulimaina o au—ae e leai sea malosi o ia te au.” O nisi taimi o lena malosi o loo i totonu o i tatou, ae e mafai ona maua i le manatuaina o le Togiola a lo tatou Faaola o Iesu Keriso.
Pe a faalataina le faatuatuaga, e le ausia miti, e nutimomoia loto, ma toe nutimomoia, pe a tatou mananao i le faamasinotonu ma manaomia le alofa mutimutivale, pe a tatou feita ma faanoanoa, pe a tatou manaomia mea e faaauau ona uumau i ai ma mea e lafoai, e mafai pea ona tatou manatua o Ia. E le agaleaga le olaga e pei ona foliga mai ai i nisi taimi. O Lona agaalofa e lē iu e mafai ona fesoasoani ia i tatou ia maua lo tatou ala, upumoni, ma le ola.
Pe a tatou manatua Ana afioga ma faataitaiga, tatou te le faatiga i isi tagata.
Sa galue le tama o lau uo o se enisinia. O Lana galue faamaoni na faaalia e oo lava i ona lima ua faamamaina ma le faaeteete. I se tasi aso, sa tau atu e se tasi i se malumalu i le tama o lau uo e tatau ona ia faamamaina ona lima ao lei auauna atu iina. Nai lo le ita, sa amata e lenei alii lelei le faamamaina o ipu o le aiga ma se vai sili atu ona ‘oā a o lei auai atu i le malumalu. Sa ia faataitaia i latou o e “alu ae i le mauga o Ieova” ma “tumau i lona nofoaga paia” ma lima sili ona mama ma loto sili ona mama.
Afai e i ai ni a tatou lagona le lelei, ita, po o ni le fiafia pe ua manaomia ona tatou talosagaina le faamagaloga a isi, o le taimi lenei e faia ai.
Lona fa, e valaaulia e Ia i tatou ia manatua e Na te faafeiloai pea i tatou i le aiga.
Tatou te aoao e ala i le fesili ma le suesue. Ae faamolemole aua le taofia le suesueina seia e taunuu—i upu a T. S. Eliot—“i le mea na [e] amata ai ma lagona ai e pei ua e i ai iina mo le taimi muamua.” Afai ua e sauni, faamolemole saili ou lagona e uiga i le Tusi a Mamona, ma toe saili, e pei o le taimi muamua. Faamolemole tatalo ma le manatu moni i ai, toe tatalo, e pei o le taimi muamua.
Faalagolago i lena manatuaga vaivai ua leva. Faataga e na te faalautele lou faatuatua. Faatasi ma le Atua, e leai se taimi tatou te faia ai le leaga ma lē mafai ona salamo.
O perofeta anamua ma perofeta o aso nei, ua talosagaina i tatou ia aua nei faatagaina ni lē atoatoa faaletagata soifua, o mea sese, po o ni vaivaiga—a isi po o a tatou lava—e mafua ai ona tatou misia upumoni, feagaiga, ma le mana togiola i Lana talalelei toefuataiga. E sili ona taua lenei mea i se ekalesia lea tatou te tuputupu ae taitoatasi e ala i o tatou auai, e ui e le atoatoa. Sa saunoa mai le Perofeta o Iosefa, “Ou te le i tauina atu lava ia te outou ua atoatoa ona ou lelei; ae e leai lava se mea sese o i faaaliga na ou aoaoina atu ia te outou.”
Lima, e mafai ona tatou manatua pea o Ia i le Sapati e ala i le faamanatuga. I le taimi mulimuli o Lana galuega faaletino ma le amataga o Lana galuega toetu—i taimi uma e lua—sa ave e le Faaola le areto ma le uaina ma talosaga ia tatou manatua Lona tino ma le toto, “aua o taimi uma tou te faia ai lenei mea tou te manatua ai lenei itula na ou faatasi ai ma outou.”
I le sauniga o le faamanatuga, tatou te molimau atu i le Atua le Tama tatou te naunau e ave i o tatou luga le suafa o Lona Alo ma manatua pea o Ia ma tausia Ana poloaiga, ua Ia tuuina mai ia te i latou, ina ia tatou maua Lona Agaga e faatasi ma i tatou.
E pei ona aoao Amuleka, tatou te manatua o Ia pe a tatou tatalo i o tatou fanua, mo a outou lafu, ma mo a outou au aiga ma pe a tatou manaomia e lē tagolima, ma lē lavalavā, e ua mamai, ma puapuagatia.
Ma le mea mulimuli, lona ono, ua valaaulia i tatou e lo tatou Faaola ia manatua pea o Ia e pei ona Ia manatua pea i tatou.
I Amerika Tutotonu ma Saute, sa valaaulia ai e lo tatou Faaola i latou na i ai e o mai, taitoatasi, e tuu atu o latou lima i Lona itu ma tagotago i tulaga o fao i Ona aao.
Ua faamatalaina e tusitusiga paia le toetu o “o le a toefuataia vae ma lima ma sooga uma i … autino tatau ai ma atoatoa,” ma “e oo lava i se lauulu o le ulu o le a le leiloa.” O le moni ai o lena mea, faamolemole mafaufau i le auala o loo i ai pea manua i Lona itu ma tulaga o fao i Ona aao i le tino toetu atoatoa o le Faaola.
E i ai taimi i le talafaasolopito, na fasiotia ai tagata e ala i le faasatauroina. Ae ua na o lo tatou Faaola, o Iesu Keriso, e opomauina i tatou a o i ai pea faailoga o Lona alofa mama. Ua na o Ia e faataunuu ai le valoaga o le a sii ae i luga o le satauro ina ia mafai ona Ia aumai o tagata uma, e ala i igoa, ia te Ia.
Ua tautino mai lo tatou Faaola:
“Ioe, atonu e galo ia te i latou, ae o le a le galo ia te a’u oe.
“Faauta, ua Ou togitogia oe i luga o alofilima o o’u lima.”
Ua ia molimau mai: “O A’u o lē na sii a’e i luga. O A’u o Iesu o lē na faasatauroina. O A’u o le Atalii o le Atua.”
Ou te molimau atu ma le agaga maualalo, ma tatalo, o le a tatou manatua pea o Ia—i taimi uma, i mea uma, ma nofoaga uma atonu tatou te i ai. I le suafa o Iesu Keriso, amene.