Ongeua el Chellibel, Ulebongel el Chesimer
A Dios a “meluked er tirkel meral blak a rengrir losiik er Ngii,” me molemolem el melengod. Rodos, lak ko mkimer. Mosiik er a Dios loba rengum el rokir.
Rodos er ngak, me a resechelik, kede ngeltengat el kuk mocha kldibel er tial ongdibel er a beluulechad el rokir el ngara cheungel a dereder er a mengetekled el profet Thomas S. Monson. President, ng betik a rengmam e oldubech er kau! A ki medengei el kmo ng betik a rengum er a rodos er a Ikelesia.
Ng kmal dmeu a renguk el ngar tia el klebokel el tokubets el ongdibel el mo er a rodos er a Ikelesia.
Rodos, sel tal kisekemiu, e ak meral di mo melbedebek er tirkel redil el mla ngodechii a klengar ngak: a delak el mechas me a delak, el mle kot el kongei er a ongit el me omes a teletael er a chelsel a Ikelesia. Ngarngii a bechik er a, Harriet, el kmal kngilanged er ngii er a kot el taem el kisang. E ngarngii a delal a Harriet, el mlo chedal a Ikelesia ruriul er a lemad a bechil er a kasinoma. E ngarngii ochedak, ngelekek el redil, me a ngelekel a ngelekek el redil, me a ngelekel a ngelekel a ngelekek el redil—tir el rokui el kmal mla sumecheklii a klengar ngak. Te meral ungil okesiu er a klengar ngak. Te rullak el mo ungil chad e bekerurau el mengeteklel a Ikelesia. Omko ng diak tir e a klengar ngak a meral ngodech!
Sel kma meskak a klengariou el reng a sel kudengei el kmo a omerellir a mocholt el chachisois a iidisel er a chelsel a Ikelesia lokiu a duch, kldachelbai er tir, llemesir, me a klaumera e tir el redil el uai kemiu.
Chelechang, e a rebebil er kemiu a locha omelchesiu el ngesonges er tial kmal ngarbab el chetengakl. Kom locha omdasou el diak a kmal ultuteliu er a rebebil. Kom locha dirrek el diak momes er kemiu el uase kom “redil el mesisiich a klaumera er kemiu” le bebil er a taem e kom ngara chelsel a ringel er a rraureng me a dakt.
Chelecha el sils, e ng soak el mengedecheduch el mo er a ngii di el chad el mla omelchesiu el uaisei—e tia locha melutk er kid el rokui el mla ta el domelchesiu el uaisei. Ng soak el mengedecheduch el kirel a klaumerang—tia ngerang, ngera sebechel me a diak el sebechel rullii, e ngera ikel kired el meruul el smisichii a klisichel a klaumerang er a chelsel a klengar kid.
Ngera Klaumerang
A klaumerang a mesisiich el beltel a reng er a kmo ngerang el doumera er ngii—ng kmal iimis el mesisiich me ng rullid el mo meruul aikel tekoi el diak de blechoel meruul. “A klaumerang a sel sekum ke de kmal ungil medengei a urunguled e oumerang a tekoi el diak de ues.”
Ng uaisei el tial tekoi a bleketakl el mo er a roumerang el chad, e ng di ng uaia le rraureng el mo er a re diak loumerang. Te melmesim a bdellir e oker, “Ng mekera chad e mo oumerang a tekoi el diak el ues?” Te omdasou el kmo, tiaikid a uchul e ng diak el bleketakl a klechelid.
Sel diak lodengelii a kmo ng betok a rolel e ke de mes a tekoi el diak dolab a medad, e betok a rolel e ke de omelchesiu el diak dolab a chimad, e orrenges el diak dolab a dingad.
Ng kmeed el uaia teletael el dilubech el mo er a kekerei el ngalek el redil er a lororael lobengkel a delal mechas. A cheliteklel a charm a kmal mle klebokel el mo er ngika el ngalek, me ng miltelutk a bek el oto er a ngerel a charm el mo er ngika el delal mechas.
“Ke rongesii sei?” ngika el ngalek a ulemelekel loker. E ng di ngika el delal mechas a mle mekngit oderngesel me ng dimlak el rrenges oto er a ngerel a charm.
Ng mocha, outubaruach ngika el mechas e dula el kmo, “Komeng, e rungalek. Ng diak kungil lorrenges.”
Me ng uaia le seselk a rengul, ngika el ngalek e mocha orkedii a medal a delal mechas, e kmal longeng a chelsul a medal, e dula el kmo, “Chedil, merengum lorrenges!”
Ngar er ngii a suobel er tial cheldecheduch el mo er a diak loumerang me a dirrek ngike loumerang. Ng diak el belkul a kmo ng diak derenges a ngerang me ng diak a ngera el morenges. A teru el chad a sebechir rongesii osisiu el klumech malechub e te menguiu er a osisiu el bades er a chedaol llechukl, e a tang a sebechel melchesuar a Chedaol Reng, e a tang a diak.
E ng di, a kuk domes er sel blakelreng er kid lolngeseu er a rebetik er a regnud el rongesii Chedaol Reng me a obdois, e diak a ulebengelel, e dmolech el klebekelel a ebangkelio er a Jesus Kristo, e a omko ke de dmu er tir el kmo “merengum lorrenges” e ng locha diak a kmal ngera el rellii el teletael.
A locha ungil tekoi—el mdu er a ngii di el chad el soal mengisois er a klaumera er ngii—a kirel kuk ngodechii oderngesel. A Apostol Paulus a mengelechel er kid el mo osiik er sel ngor el ngii a mengedecheduch el mei er a rengud ng diak di le dingad. Ngii a ulisechakl el kmo, “A chad el diak loba Reng a diak el kengei a tekoi el ngara Reng er a Dios le ng omdasou el kmo ng klebelung, e diak el sebechel mo medengei le ika kirel mutab lokiu a Reng.” A lechub e domtab a tekingel ngike el Saint Exupery Little Prince, el dilu el kmo: “A chad a di mo ungil lomes a lultuil er a reng. E ngii di el ngera el klou a ultutelel a diak el ues a mad.”
Sel Klisichel me a Telkelel a Klaumerang
Bebil er a taem, e ng diak el beot a dongederoder er a klaumerang er kid er a chedaol tekoi er chelecha el de ngar tia el beluulechad. E ng di ng kmal lultuil er a blakelreng er kid, le klisichel a klaumerang er a chelsel a klengar kid a sebechel kmal mo mesisiich. Chedaol llechukl osischeklid el kmo ngokiu a klaumerang e a beluulechad a ulebeob, me a daob a ulebii, redelekull a mlekiis, e a omeuachel me a risois a mlengukl er a ikel le ngarngii.
E ng di a rebebil a locha mo oker, “Alsekum a klaumerang a kmal mesisiich, e ngera me ng diak nguu a nger er a meral ngara renguk el nglunguuch? Ng diak kuusbech el mesa daob lobii malechub a risois el mengukl. A kmal di ousbech el mo ungil er a secherek malechub a rechad er a blik bo el kangunguuch el kausubes malechub ngike el mo bechik el mo er a ulebongel el duum er a medal a tuangel loba ulechull el bung er a bita el chimal me a kabkab er a bitang. Ngera uchul me a klaumera er a ngak a diak el kedmeklii tiang?”
A klaumerang a mesisiich, e blechoel diak lolchotel a ongasireng el teletael. E ng di ng diak el iior er a delchel a klaumerang el dobang, le ngarngii eru el tekoi el klaumerang a diak el sebechel remuul. A kot, ng diak el sebechel tomellii sel techellel a chad el mimokl el melilt.
A tal redil a mla mela rak le ngara nglunguuch me a cherida er a ebangkelio el ngelekel redil bo el sebechel muut el mei er a ikelesia er a Kristo e mlo moualech a rengul er a ko er a di lak el mo nger a nglunguchel. Tia kmal mle meringel le ng dirrek el rirenges a bebil er a cheldecheduch er a re mla touchakl el ngalek el mlo ouchel a rengrir er a kngterir e obult.
A mondai a diak lak a nglunguuch malechub el ngelsengesel a klaumerang. Ng di kirel mo medengei el kmo, ng uaisei el dirrek el kmal meringel er a Chedam er a Babeluades, e ng di Ngii a diak bo lorrimel er a ngii di el chad el mo melilt er a rael er a llemalt. A Dios a dimlakl lorrimel er a Rengelekel el mo oltirakl er Ngii er sel klengar ruchei. E Ngii a dirrek el diak bo lorrimel er kid er tial klengar er a beluulechad?
A Dios a di mo siotai e mengesuseu. A Dios a diak el meterob lolngeseu er kid loba beltik el reng me a ulekrael me a omelisiich. E ng di Dios a kmal diak bo lorrimel—le tia mo choudur sel klou el uldesuel el kirel a diak a ulebengelel el ulekeruled.
A ongeru el tekoi el klaumerang a diak el sebechel kudmeklii a orremelii sel soad er a Dios. Ng diak el sebeched el orremelii a Dios el mo oltirakl er a soad—el diak el iior er a kmo ng melemalt a uldesued malechub e ng kmal blak a rengud el meluluuch. Ka momtab er a teletael dilubech el mo er a Paulus, el betok el taem lolengit er a Rubak me lengeseuir er a ongarm le mla er ngii—el ngii omekedong er ngii el kmo ng “tochedulik er a tech.” E ng di tia dimlak el ngii a soal a Dios. A uriul, e a Paulus a mlo medengei el kmo tia longarm a bai klengeltengat, me ng ulureng a sulel a Dios el dimlak longer a nglunguchel er sel ngii a mle urungulel.
Oumerang me a Klaumerang
Ng diak, a moktek er a klauemrang a diak bo le ngedechii sel soal a Dios ng bai smisichid el mo meruul er sel ngii a soal a Dios. A klaumerang a oumerang—oumerang el kmo a Dios a mes aike el diak de ues e Ngii a medengei aike el diak dodengei. Bebil er a taem, e a klaumera er kid er a osenged me a uldesued a diak el klebech a klungel.
Tia ksilubii er a kumekall a skoki, er a ikel taem el ksebek er a chelsel a okrokr el chetechat me a eabed el di telkib a kisa er medak. Ng mle kirek lultuil a dongu louchais el kmo ak ngar ker e merael bedul ker. Ng mle kirek lorrenges er ngike el chad el ngara chutem louchais er a teletelel a skoki. Ng mle kirek loltirakl a ikel bleketakl e mera el tekoi el kngai; ng mle kirek loumera er a chad el ngii a mes aikel diak ues. Chad el diak kisang e ng di ak mla mo oumera er ngii. Chad el mes aikel diak ues.Ng mle kirrek loumerang e meruul el ngara ungil rolel, me ak mo kmerd er sel kbo er ngii.
A belkul a klaumerang a kmo ng kirel diak di doumerang er a llemesel a Dios ng dirrek el beltkil a Rengul. Ng belkul a kmo ke de oumerang el uase a Dios a kmal cherrungel a beltkil a rengul kired, ea rokui el tekoi el Ngii a meruul—bek el klengeltengat el Ngii odars, me a bek el klengeltengat el bebil er a taem e ngoreked, a kmal—di melutk el kirel a diak a ulebengelel deureng er kid.
Tiaikid el teletael er a klaumerang, a uaisei el locha diak bo dodengei el kmo ngera me a bebil er a tekoi a duubech el uaisei malechub e ngera me a bebil er a nglunguuch a diak el monger, e ng di sebeched el mo medengei el kmo a uriul e a rokui el tekoi a mo bleketakl er kid. “A rokui el tekoi a [di] mo mekedmokl el mo klungiolir tirkel tir a betik a rengrir er a Dios.”
A rokui el tekoi a di mo ungil besul. A rokui a di mo ungil.
Ng sebeched el mo oumera el kmo a nger a mei, e sebeched el mo ansing el kmo ng diak di bo lungil a rengud er a nger el de ngai, ke de dirrek el mo mui er a krasia, chubechub, blekerurau, me a beltik el reng loba Chedam er a Babeluades el kired, a Rengelekel.
Di Molemolem el Melengod
Mo el muut risei el taem, e ng kired el melemolem el ngar sel klaumerang el dobang, e osiik rolel mengisois er a klaumera er kid. Bebil er a taem, e tia diak el beot. Tirkel mereched el mo mesaul a rengrir, kedeb a rengrir, diak el blak a rengrir, malechub e te meterekakl a locha mo metik el meringel a bo loba klaumerang. Tirkel mereched el mo mouachel a rengrir malechub e ng metetuchakl osengir a meringel el metik er a klaumerang. A klaumerang a mo er a rengariou a rengrir, re blak a rengrir, me a routekangel.
Ng mo er tirkel blak a rengrir el melemolem el ngara klaumerang.
Tia el klemerang a mocholt er a reteru el ngeasek el misionari el mla er a beluu er a Europe, er a basio el kmal kesai el chad obult lokiu a techolbechelid. A kumtab er ngii e ng locha mle ungil a bo lodengei el kmo aikel riruul a dimlak a kmal ngera el rellii.
E ng di tirka el teru el misionari a uleba klaumerang, me tiaikid a milkroleterir el mo oureor. Te uleba sel tekoi el kmo alsekum e ng kmal diak orrenges a klemechir, e ng diak el belkul a kmo ng mle beot a rengrir.
A ta er a klebesei, e te omdesua el mo er tia el kmal klebokel el eua el chellibel lengiil blai. Te ulemuchel er sel kot el chellibel el melengod a bek el chesimer, louchais el kirel olsobel el klemechir er a Jesus Kristo me a mla Moluut el Ikelesia er Ngii.
Ng dimlak a chad er sel kot el chellibel lorrenges er tir.
Ng locha mle beot er tir el uase, “Kede mesikang. Mereko dolengull er tiang. Dorael kuk mo er a ta er a basio.
E ng di tirka el teru el misionari a mle blak a rengrir e semeriari el oureor, me te mocha melengod a bek el chesimer er a ongeru el chellibel.
Ng dirrek, el dimlak orrenges er tir.
A ongedei el chellibel me ng di mle osisiu. Me a ongeuang—el uaisei, e te mocha melengod er a ulebongel el chesimer er tia el ongeua el chellibel.
A lobok a chesimer, e a ngeasek el redil a mlo klikmechur e dilu er tir me longiil e bo longedecheduch er a delal.
A delal el dirk okedei me a elolem a rekil, a kmal dirk dileklii a bechil. Ng dimlak er a rengul a mengedecheduch er a remisionari er a Mormon. Me ng dilu er ngii me le du er tir me lorael.
E ng di ngika el ngalek a milngeluch er ngii. Tirka el ngeasek el chad a kmal ungil, ng millekoi. E kmal di telkib el taem.
Me ng di chetil, ngika el delal, e mocha kongei. Tirka el misionari ulechais er a klemechir e mocha mesa hong ngika el chedil el bo longuiu er ngii— el Babier er a Mormon.
Uriul er a lorael, e ngika el chedil a omdesua el di mo chemuiu a sesei el llel tial hong.
Ng chiliuii tial rokir el hong er a di chelsel a sesei el klebesei.
Kesai el taem ruriul, e tial klebokel el telungalek a ngiluu a techolbechelid.
Tia el kekerei el telungalek er a le bocha er a ikelesia er tir er a Frankfurt, Germany, e a ngeasek el deacon a tilab osengel er a klebekelel a ta er tirkal el ngalek el redil e omdesua el kmo, ‘Tirka el misionari a kmal meduch er a urerir!”
A ngklel ngika el deacon a Dieter Uchtdorf. E ngika el klebokel el ngeasek el dil—ngike el ulelengit er a delal me lorrenges er a remisionari—a ulengakl er a klebokel el ngakl el Harriet. Ng kmal klou a blal relii er a beluulechad e mla obengkek er a betok el omerollek. Ng mla omekngeltengat a klengar er a rebetok el chad lokiu a beltkil a rengul er a ebangkelio me a ungil blekerdelel. Ng meral dichel a sils er a klengar ngak.
Ak blechoel ngara omereng el saul er a renguk el kirir tirke el teru el misionari el dimlak el meterob a urerir er sel kot el chellibel! Ak blechoel mereng a saul el kirel aklaumerang me a urerir. Ak blechoel mereng a saul me te millmeolem el mo el muut—er a ongeua el chellibel, er a ulebongel el chesimer.
Ng Mo Obok el Kiriu
A sked er a diak a ulebengelel klemerang, a blak el reng er kid lolekeed er kid er a Dios me a moktek er Ngii, e lak dobes er sel yaksok er a Rubak: “Molengod, me bo lobok el kiriru.”
Ke de locha kimer ruirul er a dolengod er a kot el chesimer malechub a ongerung? A kot el chellibel malechub a ongerung?
A lechub e kede melemolem losiik el di merekmo de bo er a ongeua el chellibel, er a ulebongel el chesimer?
A Dios a “meluked er tirkel meral blak a rengrir losiik er ngii,” e ng di tia el nguked a diak el blechoel ngar sel kot el chesimer. A leuaisei e molemolem el melengod. Rodos, lak kom kimer. Mosiik er a Dios loba rengum el rokir. Multuil er a klaumerang. Morael el ngara llemalt
Ak yaksok el kmo sel bo moruul el uaisei—el mo el muut er a ongeua el chellibel, er a ulebongel—el chesimer e ko mo ngmai a llomes el mosiik. Ko mo metik er a klaumerang. E a ta er a klebesei e ko mo metik er a llomes el di merael mo klou a “dichel el di merekmo bom cherrungel.”
Rodos er ngak er a Kristo, a Dios a merang.
Ngii a ngar.
Ng betik a rengul er kemiu.
Ng medengelkemiu.
Ng medengei om ngara chelsel teletael.
Ng medengei aikel berrotel el nglunguchiu.
Ngii a dirkak lechitemiu.
E Ngii a diak bo likremiu.
Tiaikid a klaumera me a klengeltengat er ngak el apostol el mo er a dertsa er kemiu me bo molchesuar er a rengmiu me a uldesuiu tial bleketakl el klemerang. Bom kiei el ngara klaumerang, e resechelei, me a rodos, e a “Rubak er [kid] el Dios a [mo] omekngeltengat er kemiu el kmal obdois el uaia ikel ngii a mla yaksok!”
A kuchotii er kemiu a mesisiich el klaumera er ngak, me a mesisiich e diak el mesim el sioning er ngak, el kmo tia urerel a Dios. El ngara chedaol ngklel a betik er a rengud el Osobel, el Jesus Kristo, amen.