![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F25%2F12%2F25129ce6bee6a30d58a2ddb202a6413f489c69bd%2F25129ce6bee6a30d58a2ddb202a6413f489c69bd.jpeg/full/!250,/0/default)
Klou el Moktel a Ngebetel a Klengit
Ak medengei el kmo sel de meral ngar ngii er a rengud e louchel a kengtid, e ng meral mo diak a kengtid—e ng mo diak a ultil!
Kesai el buil uchei er a President Boyd K. Packer a lebol secher, e tirkel general priesthood me a telengtengil a meredel a milsa techall meng milngedecheduch er kemam. Ng kmal diak el sebechek lobes aikel lulekoi. Nguluuchais el kmo ngii ulmedasu aikel rokui el tekoi el blal ruul er a klengar er ngii, losiik a aikel lolechotel a klengit el ngii a riruul e mla ouuchel a kengtil e ng di diak el sebechel metik a tetechelng mla mo diak el ngar ngii. Ngii a mle ouchais el kmo ngokiu sel tngakireng el tenget er a betik er a rengud el Osobel, el Jesus Kristo, e okiu a meral ouuchel er a klengit, ea aikel kengtil a mlo diak, el dil uai a dimlak a tal dilubech. A President Packer milellach er kemam el merredel el kmo sel sils a uluuchais el kmo ngmerang el mo er a ta me a ta er kid el ngar ngii a rengul e ouuchel a kengtil.
Ak medengelii a chad el mle chelsechusem er a klengit er a euid el rak er a mla memong. Mle kemanget el taem e ngikal chad a kmal mle merur e mle bekikl el mo mengedecheduch er a bechil me a mereder er a priesthood. Ng mle soal mo ouuchel a kengtil e ng di milekoi el kmo ng bai kongei el mo choitii sel diak a ulebengellel klengar er a bai lenguu a bechil me a rengelkel el mo soisb er a klengit el reng, terached, malechub e ng bebil er a teletael el mo dubech eleng uchul sel ngii a mo ouchais a kengtil.
Sel deruul a klengit, ea Diablong a blechoel el melasm el mengeluch er kid el kmo ng bai kired el mo mengeluolu er a rebebil meng diak el bo er a klengit el reng sel bo lodengei a kengtid, luldimuk sel bo douchais er a bishop, el ngii a sebechel ngosukid loba sel kiis er a priesthood el ngii a ngerchelel el mo meritel el uaia chad er a omeritel er a Israel. Sel klemerang, a kmo, ng kired el mo rullii el di uai a teletelel a Kristo e bai mo ouchais a kengtid e mo ouuchel a kengtid. Tiang sel klou el moktel a ngebetel a klengit er a Demad er a Babeluades
Meng mocha, ngikal chad a ouchais a kengtil el mo er a kedung el bechil me a mereder er a Ikelesia, el louchais er a dmolech el ouuchel el reng. Malta ng mle kot el meringel omeruul el ngii a mla rulii, e ng di mlo omelechesiu er a budech, beltik el reng, me a omereng el saul er a Osobel, me a klaumedengei el kmo a Rubak a ngilai aikal beraod el mla er ngii e ulngeseu er ngii el luchul a klou el deureng, el dimlak lodengei el kmo ngera mo dubech er a ngar medal el taem.
Ngii a mle medengei el kmo a bechil me a rengelkel a mo er a klengit el reng—me te mle uaisei; e mlo er ngii a omellach e mo mengubet er a okedong er a ikelesia—meng mle uaisei. Ng mle medengei el kmo a bechil a mo chelam a rengul, telemall, e kesib a rengul—meng mle uaisei. E ngii a kmal lulmedasu el kmo a bechil a mo choitii, e ngoititerir a rengelkir lobengkel—e ng di dimlak el uaisei.
Bebil er a taem ea meklou el klengit a mo uchul a dertel a chelebechiil, meng ultuil er a teletael, e ng kirel mo uaisei. E ng di ngkal chad a mlo mechas rengul, sera bechil dil lulbengkel e ulngeseu er ngii er aikel ngidil sebechel remuul. Mlo melai a taem, e ng kal bechil a mlo sebechel lousubes er ngii. Ngkal bechil redil a ulmelchesuar er sel klisichel a omekungil er Tngakireng er a Osobel el mo er ngii. Uriur el rak er a mla me mong, e tirkal obekl me a teru er a rengelkir a mesisiich el oumerang. Ngkal chad me a bechil e ulureor er a templo e mle ungil e oubeltik el reng a chelbechilir. Tial dmolech el testimony er ngikal chad me a beltkil a rengul me a omereng el saul el mo er a Osobel me a Tngakireng er a Osobel a chemolt er a klengar er ngikal chad.
A Amulek a uluchais, “Ng soak a cho mei e lak mongemangel el melcherecher a rengmiu; … e alsekum ko mo mekngit a rengmiu el kirel a kengtmiu … , e ng di mereched ea klou el tekoi er a rolel a osobeliu a me er kemiu.”1
Sera kusiou lobengkel a bechik se er a loungerachel er a mission, ea ki mlo er a airport el mo oltak er a re missionary er a tal tutau. A chimo er tirkal ngeasek el buik a kmal ngilai a osengam. Ng kora mle mekngit a rengul, e ngara meringel luldasu. Ma ki dimlak ki mochib a osengam er ngii. Ng mocha kebesengei, e ngika el buik a mocha ouchais aikel teletelel, me a tirkel meredellel a dilu ng kirir lodureklii el mo remei. Malta ngmle mekngit a rengmam el kmo dimlak louchais a klemerang e dimalk louuchel a kengtil er a uchei er a lebora mission er ngii, e ng di kemam a mle ungil mengedecheduch er ngii e outkeu er ngii el mlo sebechel louchais a klemerang e mlo yaksok el melemolem el mengedecheduch er ngii sel borei.
Ngikal buik a kmal mle ngeltengat el mla er ngii a ungil el demal me a delal, meredel er ngii er a priesthood, me a rechad er a ward er ngii lulngeseu er ngii. Uriul er a tal rak el blel meringel loureor louuchel a rengul e melai ser sel Tngakireng er a Osobel, ngii a mlo sebechel lemuut el mo er a mission er ngii. Ng meringel er ngak a ouchais er sel deureng el kimulchesuar er ngii er a kibo moltak er ngii er a airport. Ng mle mui er a Edaol Reng, e ungil a rengul, e oba klaumerang er a Rubak, e semeriar el mo meruul er a urerel el mission er ngii. Ngii a mlo kot lungil el missionary, ea uriur e ngak me a bechik a mla er ngii a techellam el mo mesang sera lebol mouak a chelebechilel er a templo.
Ngkuk ngodech er tiang, ak mle medengelii a ta er a missionary el ngii, a mle medengei el dirkak louuchel a kengtil er a uchei er a mission er ngii eleng medengei el kmo a louchais e te odureklii el mo remei, e tilbir el kmo ng mo blak a rengul loureor sel ngara mission er ngii e mo ouchais a kengtil el mo er a mission president er a chelsel a sesei el klebesei ucher a lebol merek a mission er ngii. Ng dimlak a klengit el reng er ngii e milasm el diak loruul er sel teletelel a ouuchel er reng el betik er a rengud el Osobel a mla ochotii el merkid.
Sera kidirk ngara mission er kemam, ea kulbengkel a bechik sera lebol interview er a chad el kirel a techolbechelid. Me sera bechik a bol interview er ngii, e ngak a mla er rikl el mengiil lobengterir a re sister missionari el lulsisechakl er ngikal chad. Sera lebol merek tial interview, ea bechik a uluchais er tirkal missionary el kmo ngikal chad a sebechel mo metecholb. Ngikal chad a meral di lilangel sera louchais el kmo ngkmal lulmedasu el kmo aikel klengit el blal ruul er tial klengar er ngii a mo tomer er ngii meng diak el sebechel mo metecholb. Ng kesai el taem el blak sioning er a deureng me a ungil reng el mlara chad el chemoit a tekoi er a beluulechad e mo chemau a klengar er a chedaol, klemeriar reng, ma klaumerang el osisisu ngii maikel blak sioning er a chelechal sils.
A Elder D. Todd Christofferson a uluchais:
“Loba klaumerang el ngara klechubechub el Osobeled me a Klisichel, ea telemall el tekoi a sebechel mo ungil. Sel rengum me aikel soam a mo obult, ea klengit el mle tal soam el meruul a bai mocholt el kmal mekngit. …
“… Meng uangerang sel telkelel a ouchel el reng, e ng mo diak lokiu a deureng me a klausubes.”2
Aikal okesiu a rulak el mo melakt er a Enos el ngar sel Babier er Mormon, el “lilangel el mo er a [Rubak] el loba mesisiich el nglunguuch” e rirengesii a ngor el uase, “Enos, a kengtim a mla mengubet. …
“Ngak, el Enos, a medengei el kmo a Dios a diak lomulak; me a berredel a kengtik a mlo dibus.
“Mak dilung: Rubak, ng mekerang e mo uaisei?
“Meng dilur ngak el kmo: Leng klaumerang er kau er a Kristo. … Me morael, ea klaumerang er kau a mla rullau el mo cherrungel.”3
Sera kuruul er tial cheldecheduch, e ng mle soak el mo medengei el kmo ng mekerang tirkal rengelkel a rengelkek a mo medengelii a ouuchel reng e ngera a uldesuir el kirel a Osobel, me a kulengit er a rengelkek el mo oker aikal nger. Ng mlo ungil a renguk er a aikal nger er a rengelkel a rengelkek.
Ngera ouchel er a klengit? “Sel om subechii er a chad, e ng sebechem el kmul uase ‘komeng’ e ngusuterir el mekiis.”
Ngera komelchesiu sel bo mouchel a kengtim? “Ng sebechem el lomelchesuar er a Osobel; ng sebechem lomelchesiu er a beltkil a rengul, e aikel mekngit el ngara rengum a di remiid.”
Ngera uldesuem el kirel a Jesus me a Demad er a Babeluades sel mouchel a kengtim? “Ak omdasu el kmo a Jesus a omdasu el uase e ng kmal ngar ngii a belkul er a rellii sel Tngakireng, e Ngii a ungil a rengul eleng sebeched el lemuut el mo kiei e lobengkel.”
Ngera uchul me a Jesus Kristo me a Demad er a Babeluades a sorir ngak el mo ouchel a kengtik? Tekingel ngkel ngeasek el ngelekel a ngelekek: “Eleng betik a rengul er ngak! Mesel kirek el mo uai Tir, e ng kired el mo ouchel a kengtid. Kid a dirrek el soad a Chedaol Reng bol blechoel lobengked, sei a uchul e ng kired louchel a kengtid er a bek el sils meng sebechel lobengked. Meral diak el sebechek el metechei a Sulir.”
Ngkel mochu eua a rekil Brynlee a renges aikal nger, e ng dilu, “Ng diak kudengei, e Chedam. Mosisecheklak.”
Tial dirk mlo merek el general conference, ea Elder Jeffrey R. Holland a milekoi: “Malta ke omdasu el mlo meioud, malta komdasu el betok el techall a blam iiu, malta ngbetok el chelbirukl a blam made … , malechub eke cheroid er a blim me a telungalek me a Dios el bla morael, ak ouchais el kmo kau a dirkak morael el morsel telekael er a chedaol beltik el reng. Ng diak el sebechem el mo er sel ilekolk ea llemesel a Tngakireng er a Kristo a diak el sebechel mo er kau.”4
Ng kmal soak sel rebek el rengelkek, rengelkel a rengelkek, me a ta me a ta er kemiu,el rodam me a rodos, el mo omelchesuar er sel deureng el kmeed er a Demad er a Babeluades me a Osobeled sel de blechoel ouchel a kengtid me a chelitechetud. Tirkel ngelekel a Demad er a Babeluades a kirir mo ouchel a kengterir. Ngeral klengit a kired el mo ouchel. Ngera oreked er kau er a ouchel el reng? Ngera el teletael a sebeched el meruul mebo dungil?
Ak medengei, sera President Packer louchais, el kmo sel kid a ouuchel a kengtid, ea kengtid a mo diak—e diak a util! Ak mla omelchesuar a deureng, oldosb, me a klaumerang er a rubak ele ngak a kmal mla rengii a renguk el mo ouuchel a kengtik.
Denguu er ngak, sel klou el ongasireng er tial klengar a diak el sera lobii a Red Sea , melukl a rois, me a lechub e ng omekungil a bedenged. Sel klou el ongasireng a dubech sel dengariou a rengud e mo er a Demad er a Babeluades e meluluuch, lolengit mel lousubes er kid, e debo decheroid er a klengit lokiu sel tngakireng lodars er a Osobeled. Loba chedaol ngklel a Jesus Kristo, amen.