![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Feb%2Fd4%2Febd4c8cb374f6f58e994c2087a8bf3caa808f5f4%2Febd4c8cb374f6f58e994c2087a8bf3caa808f5f4.jpeg/full/!250,/0/default)
“Ak Mo Okisii a Ngellitel el Chad er a Ulaoch”
A Joseph el ngii a mle profet a uchul, e kede olab a lmuut el betok er a di blok el mado er a babeluades—sel chesimer el kirel a diak a ulebengelel klengar a blok el kired.
A Moroni er a lekot el mo duum er a Joseph Smith, eng mle omeklatk er a Joseph el kmo a ngklel a mo medung el kirel a ungil me a mekngit er a chelsel a rokui el beluu.”1 Kid a mla mesang tial ulaoch el mekedmokl. Sel mekemad er a ungil me a mekngit, e a Olutel ebangkelio lokiu a Prophet Joseph Smith a mla rulterir a roumerang el mo oltirakl er ngii e dirrek el mla ongasech a rengir tirkel loldechelakl er a Zion e omtok er a Joseph. Tial odechelakl a diak el beches. Ng ulemuchel ruriul er a ngeasek el Joseph er a lorael soiseb er a Chedaol Chereomel e melemolem el me lmuut er chelechal sils e mla lmuut el medechel lokiu a internet.
A Rubak a millekoi er a Joseph Smith el kmo:
A beluulechad el rokir a mo okerker er a ngklel, e a remekebelung a mo oltuub e omtelub er ngii, me a beluu er a ngau a mo omtok er ngii.
“Ng di a reklikiid a rengrir, remellomes, rechetengakl,,me a reklikiid a mo osiik a suobel me a ngerachel me a klengeltengat er Ngii.”2
Chelechal sils e a kudersii a klaumera er ngak el mo er tirkel rokui el losiik a mui el klemedengei el kirel a chedaol urerel a Joseph Smith Jr., el Profet er a Oluut.
Ng diak el kired el merur louchais a urerel a Joseph el profet, chad er a ues, me a ocholt, le Rubak a di mla oureor lokiu a reprofet.3 Ngokiu a mla moluut el klemerang loiak er a Joseph Smith, e kede mla mo medengei a betok el kirel a Chedam er a Babeluades me a Osobel el Jesus Kristo. Kede mla mo medengei a chedaol el Blekerdelir, a delongelir el terung el mei er kid, me a klebokel el uldasou er a mo suobel el uchul e kede lmuut el mo soiseb er a Rengedir.
A President Brigham Young a millekoi el kirel a Joseph el kmo: “Ng milkemdokl er sel miting ruchei er a uchelel a beluulechad, el kmo ngii a ngike el chad, er chelechal uriul taem er tial beluulechad, el mo okisii a tekingel a Dios el mo er a rechad e ngmai ikel rokui el kiis me a klisiich e ra Priesthood er a Ngelekel a Dios. A osengel a Rubak a mla er ngii … [le ngii] a mloterekokl ruchei el mo mengeteklel tial ulebongel el sils.”4
A mle kedmeklel er tial klou el ureor, e a Joseph Smith a mlechell er a chelsel a ungil telungalek el dirrek el mla er a chelsel a betok el berraod me a ongarm er a klengar. A Joseph er a lorael mo klou, e ng mle dmolech a uldesuel me a rengul bedul a Dios,”5 eng di ng mlara rraureng er a betok el kautok el uldasou er a klechelid el mlosisechakl er tirkel chedal a chelid er sel taem. Ng klengeltengat, le ngeasek el Joseph a dimlak el bechei a keril mel oitechetur a klaumera er ngii. Ng mle osiik a nger er a Biblia e miltik er tiakid el tekoi: “A le ngarngii ousbech a llomes, e lolengit er a Dios, el mimokl el mesterir a rokui el chad, e diak longreos; me bol ngai.”6
A Joseph a millekoi: “Ng dimlak a bades er a chedaol llehcukl el kmal mle mesisiich a klisichel er a rengul el uai tiang. Ng kmal mle mesisiich el subechii er a renguk. A Joseph a mle melbedebek er tial bades.”7
Ng mle oba beot el klaumerang, a Joseph e mlo oltirakl aikel chedaol lomelchesiu. Ng miltik e ra mocheuekl el basio, e mlo outubaruach, mocha oldars a ngara rengul el mo er a Dios.”8 Ngar ngii a mesisiich el tekingel a Joseph er a dilubech ruriul:
A Joseph a millekoi el kmo ak milsang a llomes er bebul a bdeluk, el kuk mellomes er a dichel a sils, el mekekokil metengel el mei er ngak.
“… A Joseph a millekoi el kmo sera lemei er ngii tial llomes eng milsterir a teru el chad, el llemesir me a klebkellir a diak a ngii el ngerang el smodii, el dechor er a melaongel. A chimo er tir a milngedecheuch er ngii, loleker ngii er a ngklel e dilu el k mo, e melutk er ngika el chimong—Ngika Betik er a Renguk el Ngelekel. Mrengesii!”9
A Joseph Smith a milsa Dios, el Diak a Ulebengelel Chedam, me a Jesus Kristo, el Osobelel e Olsobel er a beluulechad. Tia mle Kot el Ues er a Joseph. Aikel rak ruriul, e a Joseph a mle oleiuid er a Babier er a Mormon lokiu a sengk me a klisichel a Dios. Betok el chad er a babeluades a mle oldingel er ngii, loluut a klemerang me a ngerachel el ngii a meketeketang er a riid. Aikal chedaol cheldecheduch er a Joseph Smith a milok a chesimer er a babeluades me a klebkellel a diak a ulebengelel klengar el mei er kid. A klengar er a Joseph a sioning el kmo a le ngar ngii er kid olngesonges er a llomes, eng sebeched lolengit er a Dios loba klaumerang e ngmai a nger—er a rechad er a babeluades eng di oumesingd el mei lokiu a klisichel Chedaol Reng, el mengedecheduch er kid lokiu a uldasou me a domelchesiu.10 Ngokiu a Chedaol Reng e kid a mo “medengei a klemerang er a rokui el tekoi.”11
Betok er kid, a nguu a sioning er a Profet Joseph Smith sel domuchel el menguiu er a Babier er a Mormon. Ak mle kot el menguiu er a Babier er a Mormon er a uchelel el mora ulebongel er a kngeasek e kumkokl el tutau el mo er a seminary. A kmal mle sekutab, me ak milnguiu er ngii el uaia oleko ak Joseph Smith, e miltik a klemerang er a chelsel a Babier er a Mormon er a kot el kunguiu er ngii. Ng kmal mle klou a rellii er a klengar ngak me ak dirk melemolem ra omengiuel a Babier er a Mormon. Ak blechoel metik el sel kunguiu el uaisei e ng oisisii a omereng el saul er a renguk el kirel a Profet Joseph me a klemerang el mloluut el ngara chelsel tial mekreos el hong.
Okesiul tiang, ka momtab aikel lulmelchesiu a Joseph er sera loleiuid aikel tekoi el kirel a techolbechelid er a ngebetel a klengit. A Joseph, le dilu er ngii ruchei meng diak bol chedal a ngii dil ikelesia, a mla er ngii a keril kirel tial chedaol ruoll er a mo suobel. Tial keril a mle uchul, e ngii a liluut, el meluluuch, e tial nglunguchel a milkrolii odngelel a Johanes el Techolb, el ngii a ulutii a Aaronic Priesthood me a ngerachel el kirel a techolbechelid.12
A lechub a momtab a blo lomelchesiu a Joseph er sera le kot elm o medengei el kmo a Jesus Kristo a uleldingel er a rechad er a Beluu er a Merikel e Ngii a ulisechakl er tir, miluluuch lobengterir, e ulemekungil er a rsmecher er tir, ulmekngeltengat er a rengelekir, e milsterir a ngerachel er a priesthood, e kildmeklii a sakrament el kirir.13 A Joseph a locha dimlak lodengelii er sel taem, e ng di sera bo lodengei aikel chedaol ruoll me a cheldellel a Ikelesia er a Kristo er a uchelel a kildmeklii el uriul taem e ng mlo olngeseu er a Rubak lolutii osisiu el Ikelesia el mei er a beluulechad.
Sera loleiuid er a Babier er a Mormon, e a Joseph Smith me a bechil er a Emma a lilangel er a kodellel a tolechoi el ngelekir el sechal. Seikid el taem er a remelkingel a klechelid a ulisechakl el kmo a rengalek el dimlak el nguu a techolbechelid e mad a di mo remiid el mora ulebongel. Sel domtab er tiang, e molatk el kirel a lulmelchesiu er ngii a Joseph er sera loleiuid a tekingel a profet Mormon: “A remekekerei el ngalek a diak loubsech el mo ouchel a rengrir, malechub e lousbech er a techolbechelid. … [Le] a remekekerei el ngalek a di ngar lokiu a Kristo, lulemuchel er a uchelel a beluulechad.”14
Sel locha kmal mle mengasireng el bliongel er a chelsel a Babier er a Mormon el mora ngeasek el Joseph a locha sel ongedei el bliongel er a 2 Nephi. Tial bliongel a mesaod el kirel a ulaoch er a recheuodel el kirel a “ngellitel el chad er a ues” el Rubak a mo okisii er a uriul klebesei— el chad er a ues el ngklel a Joseph, el di ua ngklel a demal. Ngkal profet er medad el taem a kmal mo kuoll a mo meruul er a kmal klou a belkul el ureor el kirir a rechedal. Ng kmal “di mo uaia Moses” e mo er ngii a “klisichel lokisii a tekingel a [Dios.”15 Ka momtab a blo lomelchesiu a Joseph Smith er a bo lodengei el kmo tial ulaoch a melutk el kirel! Ngii a dimlak di loleiuid a reksi, ngii a uleliuid er a ues el kirel a uriul klebesei, er a mengasireng el Olutel ebangkelio er a Jesus Kristo—e a Joseph a mo olngeseu el kudmeklii!
Chelechal sils, el kmeed el eru el dart el rak ruriul, e ng beot a desa tial ulaoch el mla tmaut. Kid a medengei a betok el ungil tekoi el riruul a Joseph el profet er a Rubak. Ng di molatk el kmo a Joseph er sera loleiuid er tial ulaoch, e ng mla remuul a bebil er a tekoi el re profet a ulemlaoch el kirel. Ngkang a dirk mle kekerei el chad el ngara lluich a rekil. A Ikelesia a dirrekak el mechederoder. Ng dimlak a wards me a branches, diak a re misionari, e diak a templo. Ng dirkak a kmal chad el remenges chisel a Joseph Smith, e a rebebil a tirkel kmal mle ouketui er ngii. E chelechang e ka momes er tial klou el ureor el Rubak a kildmeklii lokiu a chimal a Mesiungel er a Joseph, el diak el iior er a ultok el kirel. A olchotel tial ulaoch ng diak el bleketakl louchais el kirel chedaol okedongel a Joseph Smith?
Ngii di el chad el rrau a rengul er a klaumerang er a Joseph Smith malechub e te ngara ringel er a cheleuid, diak el merang, malechub e ng diak el bleketakl el tekoi el kirel a klengar me a urerel, e ak siotai er kemiu el mo omes a redechel a urerel—aikel betok el klengeltengat el mla mei er kid lokiu ongasireng el urerel a Joseph Smith, el Profet er a Oluut.
Le Joseph el mle profet a uchul, e a ocholt me a reprofet a dikea el tekoi er a ngara mong. A “sils er a ongasireng”—ues, omekungil, me a odngelir a re anghel—a dirkak el ngemed.16
Le Joseph el mle profet a uchul, e a dersta er kid a sebeched el ngmai a klisiich me a klengeltengat er a chedaol priesthood, luldimukl er a techolbechelid, sengk er a Chedaol Reng, me a sakrament
Le Joseph el mle profet a uchul, e kid olab a klengeltengat me a chedaol ruoll er a templo el omak er kid el mo er a Dios, e rullid el mo chedal, e ochotii er kid a klisichel a kledios, e rullii me a ta er a klebesei e ng sebeched el mo mesa Dios, el ngii a Chedam, e mo kiei lobengkel.”17
A Joseph el mle pofet a uchul, e kid a medengei el kmo a chebechiil me a telungalek a meklou a belkul telengtengil a uldesuel a Dios el kirel a deureng er kid. Kede medengei el kmo ngokiu chedaol ruoll er a templo me a telbiil, e a telungalek er kid a melemolem el mora diak a ulebengelel.
Le Joseph el mle profet, a uchul e kid olab a betok er a ikel beskid a babeluades lolab aikel rokui el klengeltengat er a diak a ulebengelel klengar. Ng sebeched el mo medengelii a “di chimol meral Dios, me a Jesus Kristo, el [Ngii a] luldureklii.”18 A diak a ulebengelel klengar a sebeched el nguu.
E a kmal klou a belkul, a kmo le ngii a Joseph el mle profet, e ngar ngii a re sioning er kid, me a olchotel a klaumerang, el kmo a Jesus Kristo a Ngelekel a Dios e Osobelel a beluuelchad. Ng diak el meloched a iidisir a re tokubets el sioning er a Jesus Kristo, luldimukl er a profet er kid er chelechal sils, el President Thomas S. Monson, me a re counselor er a First Presidency, me a rechedal a Chelechad er a Teruich me a terung el Apostol. Obengkel a sioning er tir, e ak dochelii a klemerang el sioning er ngak: a Jesus Kristo a ngar e omekrael er a Ikelesia er Ngii. A Joseph Smith a mle Profet er a Oluut. A priesthood me a ngerachel er a Dios a mla lemuut el mei er a beluulechad. Mei e lak de medakt e douchais a sioning er kid me a omereng el saul el kirel ngika el meang el profet, chad er a ues, me a ocholt er a Rubak a ngii a nglunguchek el ngara chedaol ngklel a Jesus Kristo, amen