![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F73%2Fc4%2F73c4a5c01f4fc17f7862e28f85c4412ba2b9baeb%2F73c4a5c01f4fc17f7862e28f85c4412ba2b9baeb.jpeg/full/!250,/0/default)
A Dios a mo Smuld a Chiuosech er a Mederir
Sel dotilii a klaumerang er kid er a Osobel, e Ngii a mo sobecheklid e tokeuid er a ikel ringel e a uriul, eng osebelid er a rengedel a celestial.
A tebedechel a uldesuel a Demad er a Babeluades, e Ngii a milchei a klengit el reng meng soiseb er a klengar kid er a beluulechad.1 Ng uaisei el ringel a kora diak el tabesul el mei er kid el rokui, e ng di ng sebeched el mo oumerang er a telkib er ngii, el kmo kid el rokui el di mora ringel. Nglunguchek me a Chedoal Reng bol longetikaik er kid el mo dmolech a klemedengei er kid el kmo ngera uchul meng kirel uaisei.
Sel domes a meringel el tekoi er a klengar lokiu a osengel a klaumerang er a Kristo, e seikid eng sebeched el mesa el uase ngar ngii a chedaol moktek er a ringel. A roumerang a sebechir el mtebengar a klemrang er sel ultok el tekingel a Petrus, Ng milluches, “Omngara ringel el kirel a llemalt, e bo ngara deureng.”2Sel doruul a “rengud el mo mui er a klemedengei,”3 eng sebeche del oisisii a duch er kid loutekangel e suub a klubeled—e mo mesisiich—er a ikal ringgel. Tial klemedengei a meskid a nger er sel dimla ker er a recheuodel. “Ngera uchul me mekngit a duubech el mo er a rungil chad?”
Bek el chad lorrenges er chelechal sils a di medengei el kirel a klsabisi, kelngit el reng, langel, malechub a chelebuul. A lak a ”klaumerang”4 me a klemedengei er a diak a ulebengelel klemrang, e kede metik el kmo a ringel me a klengit el reng er tial klengar a sebechel tomellii sel diak a ulebengelel deureng el medengei el kirel a uldesuel a Demad er a Babeluades el kmong meral ngar ngii a diak a ulebengelel uldasou el kirel a deureng. Ng diak a ngodech el rael el bo denguu a mui el deureng.5
A Dios a siotai er ngii longer lutiul er a klaumerang aikel ongarm me luchul e bo dengai a klengeltengat e dengai a llomes el diak el sebeched el suub er a ngii di el ngerang. Kede mla mosisechakl el mo oltirakl a llach er a chelsel a bek el teletael, le “ngike el blak a rengul el ngara ringel, a omeksullel a ngarbab el medechel er a rengedel a babeluades.”6 Me a ikel bla donguiu er a chedaol llechukl,”A om ngara klengit el reng, e momekedong er a Rubak el Dios er kau lolengit, me a rengum bo ngara deureng.”7
A Apostol Paulus, a dimlak el cheroid er a ongarm, a ulusbech a teletael dilbech el mo er ngii el olisechakl el kirel a klebekelel a diak a ulebengelel osenged el mei sel doutekangel loba kllou el reng. Ng millekoi, “A kebekakl el ringel el ngar kid, el kmal di telkib el taem, a meskid a lmuut el ngarbab el diak a ulebengelel klebkall.”8 Ng belkul a kmo, ng sebeched el mo medengei el kmo a Dios a mla meskid a diak a ulebengelel omeksulled sel de ngara chelsel ongarm.
A dechal a Paulus el melekoi el kirel a ongarm, odechelakl, me a klengit el reng le blar ngii el uase ng “mekebekakl” el ringel a diak el sodii sel meral teletelel a ringel, el ngii a mlar ngii a lak lultuil er a ebangkelio.A klaumera er Paulus er a Jesus Kristo a remuul a rokui el tekoi el mo sebeched lotekau. Ng eim el taem el milchellebed er a lechet, e edei el mechelebed er a kerrekar; e mle tal obetech er a bad; edei el metemall a bilsengel; e kilong remos el mad er a remekngit el chad, mekngit el odam; ng mlo chemau a ringel, klengerenger me a chedelreng, e mlo mekelebus el mlara kelekolt e di meau.9
Betok er kid olengit er Dios el choridii a uchul a ringel el de ngara chelsel, e a lak el mei a ngesou, e kede mo omdasou el kmo Ngii a diak el rengesid. A kuchais el kmo, chelsel aikaikid el taem, e Ngii a remenges a nglunguched, e ngar ngii a uchul meng mechei ongarm er kid meng mellemolem,10 e mo ngosukid lotekau.11
Chelsel a tekingel, e a Paulus a melekoi el kirel a “techodulik” er a tech, el mle uchul a klou el ringel er ngii el rirellii me ngedei el taem el bo loutubaruach, lolengit er a Rubak me lecheridii tial ringel. A mle nger er a nglunguchel a Paulus, e a Rubak a dimlak el cheridii a ringel ng di milsang a budech me a klemedengei er a rengul, el kmo, “A chubechub er ngak a medeel el kirem: le klisichek a churrengelii a mechitechut.” Tial beches el klemedengei, e a Paulus a mlo seebchel kongei e mereng a saul er a ringel el mlar ngii. Ng millekoi el kmo, “Ng meral dmeu a renguk … er a ringel el ngak a ngar ngii, me a klisichel a Kristo bo lobengkek.”12
Sel bo dobang tial diak a ulebengelel osenged er a klengar kid, e a duch er kid loutekangel a mo mesisiich, e kid a mo meduch lolngeseu er tirkel lousbech a ngeseu,13 e mo ngara omereng el saul er a tekoi el Dios a meskid el osischeklid er a rael el mora diak a ulebengelel klengar.
Sel debetik er kid el ngara chelsel a ringel, e ng sebechel kmal mo meringel er kid el mesa el kmo a ringel a sebechel olangch er a roltirakl. E ng di, a debetik er kid el ngara chelsel a iilkolk er a klengit el reng malechub e kede kuk ngara deureng, a dosuub e doba chubechub el reng el kirir a rebebil el ngara ringel a sebechel uchul a klengeltengat.
Sera kngara stake conference er a Huriping, eng mlo mekngit a renguk er a krenges a chisel a Brother Daniel H. Apilado. A Brother Apilado me a bechil a miltecholb er sera 1974. Tem le semeriar er a mla moluut el ebangkelio e mlo bechiil er a chelsel a templo er a eru el rak ruriul. Uriul, e te ngeltengat el mlo er ngii a teim el ngelekir. Sera July 7, 1997, el Brother Apilado a mle stake president, eng tilaut a ngau er tial kekerei el blirir. A kot el klou el ngelekel a Brother Apilado, er a Michael, a ulsebelii a demal lultemetii lotebedii er tial mla meseseb el blai, e liluut el remurt el mo er a blai el mo olngeseu er a rebebil. Tiaikid a mle ulebongel el Brother Apilado a milsa ngelekel chad. A mlad er tial seseb a bechil a Brother Apilado er a Dominga, me a reteim el ngelekir.
Ng klmerang el Brother Apilado a kiliei er a ungil klengar el mle soal a Dios eng di ng dimlak el terbengii a ongarm el mlo e rngii malechub el blel cheridii er a klengit el reng luleak uriul. E ng di a klaumerang er ngii loltirakl a telbiil e ultuil er a klaumerang er a Kristo a milsang a klaumerang er a yaksok el kmo ng mol muut el mo obengkel a bechil me a telungalek er ngii. Tial urungulel a mlo otil a rengiul.14
Sera kuldingel, er a Brother Apilado, el chelchang eng stake patriarch, eng ulechotii a beches el bechil er ngak, er a Simonette, me a teru el ngelekir el sechal, el Raphael me a Daniel. Ng klemerang, a Jesus Kristo a mlei el “omekungil a telemall el reng” e meskid a “deureng ruriul er a kodall.”15
Sel kuchais er tial cheldecheduch er a Brother Apilado, ak melbedebek el kmo a klungel tial kerior el mlo er ngii a rulterir a rebebil el mo melatk a kuk kerior er tir me a ringel a locha diak el sal oberaod. A kulengit me lak momekesiu, e bai mosiik el mesuub e mongisois er a klemedengei er kau e moltirakl a diak a ulebengelel osisechakl sel mngara chelsel a kerior.
Msall e kungedecheduch el mo er a dertsa er kemiu—“kemiu el ngara beraod me a ringel”16—msall e kuchais el kmo a ringel el mngara chelsel—a klengit el reng, ringel, ongarm, me a klengit ngii di el ngerang, a kmal di lodengei a Chedam er a Babeluades me a Ngelekel. Multuil er a klaumerang! Bol meisiich a rengmiu! E moumerang a yaksok er a Dios!
A moktek me a urerel a Jesus Kristo a uldimukl er Ngii a ngmai a “ringel me a secherir a rechedal,” me a rokui el kngterir,” e ngosuterir a rechedal lultuil er a ikel ringel le ngarngii.”17
A mui el ngeiul a sengk e ra Osobel el blal beskid el tada, eng kired el momedengei el kmo a ringel er a chelsel me a ikrel a diak losischeklid er a ngerang alskeum e kid a diak desubii a kmo ngerang er a chelsel aikal ringel e dultuil er a klaumerang.
A Elder Neal A. Maxwell a mle ouchais er a le silubii el moktek er a ongarm lolab aikakid el tekoi:
“A bebil er a ongarm, a bo dungil el outekangel, a sebechel rullid el mo ungil. …
“… A tebedechel a dirrek el mo mui el medemdemk a rengud, er a chelsel a ongarm, e subii a teletael er a chelsel. E diak kuk di desiseb er detobed er a chelsel, le ika kirel mei er kid … el mengikiid er [kid].”18
Ak mla mes er a klengar er a rebebil el tir ochotii a mesisiich e urrekodel er a klaumerang er a Jesus Kristo me a yaksok er Ngii el mesterir a urungulir el kirel a ungil tekoi el mei e ruriul. Tial urunguled a smisichid, e meskid a klisiich el kid ousbech loutekangel.19 Sel dokur a ringel el de ngara chelsel el mo er sel moktek er a klengar er a beluulechad e lmuut el mo er sel omeksulled el mengiil el medechel er a babeluades, e a klaumerang er kid er a Krisro a mo klou e kid a ngmai ongelaod el mei er a rengud.
E sebeched el mesa llomes er a ulebongel er a rael. A Elder Jeffrey R. Holland a ulsisechakl: “A mera er ngiiadiak a llomes er a ulebongel er a rael. Ng Llomes er a Beluulechad, el Dmiich el Btuch er a Tutau, el ‘diak a ulebengelel llomes, el diak bol milkolk.’ [Mosiah 16:9]. Ngike el Dios er a Dios.”20
Ng sebeched el mo mesisiich el medengei el kmo a rokui el meringel tekoi er tial klengar a di telkib el taem a ikel kmal okrokr el iilkolk a sebechel mo llomes.
Sel bol merek a rokui el tekoi e bla dotekangel a rokui loba klaumerang er a Jesus Kristo, e kede nguu sel yaksok el “Dios a mo smuld a rokui [el] chiuosech er a [medad].”21
A kuchais el kmo a Dios el Demad me a Ngelekel Sechal, el Jesus Kristo, a ngar e Tir oltirakl a telbiil. A kuchais el kmo a Osobel a siotai er kid el rokui el mei e bo dultuil er a Tngakireng er Ngii. Sel dultuil er a klaumerang er kid er Ngii, e Ngii a mo tikeuid e sobecheklid er a ikel ringel, sebechel, osebelid er a rengedel a celestial. Ak siotai er kemiu el mei er a Kristo, moutekangel el ngara klaumerang, e bom cherrungel er Ngii, me bo mnguu a cherrungel el deureng er Ngii. El ngara chedaol ngklel a Jesus Kristo, amen.