God El Ac Fah Elah Sronin Muhta Nuh Kwewa
Ke kuht orekmakihn luhlahlfongi lasr in El, El ac fah sruhkkuhtyak ac uskuhtlac ke mwe elyah lasr nuh kwewa ac, sahflah, molikuhtlac in tohkohsrahi celestial.
Oacna sie ip in plwacn luhn Pahpah tuhmasr Inkuhsrao, El lwelah mwe elyah in wi moul suhkawihl lasr.Oacna liyeyuck muh pacl srihkeyuck tiacna oacna sie nuh sesr, ahkpwacyeiyuck nuh sesr muh ke ohiyac fuhkah na, kuht nuhkwewa kweok ac oasr elyah lasr. Pruhe luhk tuh Nguhn Muhtahl el ac fah kol kuht in kahlwem yohk liki met ah ke ip se inge.
Ke kuht liye pacl upac luhn moul ke muhta luhlahlfongi ke Kraist, kuht kuh in liye lah ac kuh in oasr srihpac luhn God ke mwe kweok lasr. Mwet luhlahlfongi kuh in moulkihn ma pwacye luhn kahs in kahsruh lal Peter. El sihmihslah, “Kowos finnekeokke kowos oru ma wo, kowos insewowo na.” Ke kuht orekmakihn “insiacsr in etuh,” kuht kuh in ahkyohkye kuh lasr in muhtweng wo ke pacl srihkeyuck lasr ac eis etwacack—ac ahkwoyeyuck—kac. Kain etwacack inge use top nuh ke kihsen siyuck mah se “Kuh efuh ma koluk uh sikyak nuh sin mwet wo uh?”
Mwet nuhkwewa suc lohng mihsenge elos etuh kuhtuh ke muhkahimtacl, suhpwacr, mwe ahsor, kuh mwe elyah. Fin wacngihn “muhta luhn luhlahlfongi” ac kahlwem ke ma pwacye ma pahtpaht, kuht kwacna konwacack muh ma suhpwacr ac mwe kweok puhlakihnyuck in moul suhkawihl uh ac kuh in okanlah kuh afuhnlah ke lohsr mwe engan ma pahtpaht in etuh lah plwacn wolacna luhn Pahpah Lucng pwacyena sie plwacn in engan ma pahtpaht. Wacngihn inkacnek sahyac in eis fohnlah luhn engan.
God El suli kuht in oruh wo ke luhlahlfongi nuh ke mwe srihfweyuck lasr sifacna kuht in kuh in eis mwe insewowo kac ac eis etwacack muh tiac kuh in lutiyuck ke kuhtwena ohiyac sahyac. Kuht lutiyuck in ahkos masap uh ke ohiyac ac pacl nuhkwewa, ke “srihpen ke kuht luhlahlfongi in pacl upac uh, kuht ac fah eis mwe insewowo yohk liki ke tohkohsrahi inkuhsrao.” Ac ke kuht riti ke ma suhmuhslah uh, Doctrine ac Covenants el luti lah kuht fin srihkeyuck, kuht enenuh pahngon Leum God lasr ke kahsruh, tuh nguhnasr in ahkenganyeyuck.
Mwet Sap Paul, suc el kweok ke ma yohk, luti ke moul sifacna lal ke ma loal ac kahto luhn ngwet ma pahtpaht ma tuhkuh ke kuht kampare ac muhtweng wo. El fahk, “Ac mwe lokoalok srisrik ma kut keok kac inge, su ma nu ke kitin pacl na, ac fah pwanma wolana lulap ac kawil, su yohk liki na mwe lokoalok nu sesr uh.” Ke kahs sahyac, kuht kuh in etuh inmahsrlon mwe elyah lasr lah God El tuh use nuh sesr mwe insewowo ma pahtpaht fal nuh kac.
Kuh lal Paul in sramsram ke ma srihkeyuck, ahkkolukyeyuck, ac mwe elyah luhn moul lal oacna mwe kweok “srihsrihk” okanlah ma upac luhn mwe kweok lal, ma tuh tiac yohk nuh sel ke srihpacn ngwet ma pahtpaht uh luhn wosasuc. Luhlahlfongi lal ke Jisus Kraist oruh ma nuhkwewa in fihsrwacsrlah. Srihngsrihng el pacl limekohsr, pacl tolu puohpoh el ke sahk, pacl se tatngal el ke yot; pacl tolu el wi oak muhsahllah meoa; pacl pucs el apkuhran in misac ke walomlah, ke mwet pihsrapasr, ac finne sin mwet wiyacl; el kweokkihn ma toasr ac tiac mutul, el masrinsrwacl ac maluh, ac kapihr in presin mihsrihsr wacngihn nuknuk lal.
Pucs sesr ngihsre God El in eislah srihpacn mwe kweok lasr, ac ke mwe kahsruh kuht suk tiacna tuhkuh, kuht srihkeyuck in nuhnkuh muh El tiacna lohng. Nga fahkwack lah, finne ke kain pacl ingacn, El lohng pruhe lasr, oasr srihpac se El in tiac eislah mwe kweok lasr, ac El fah kahsruh kuht in muhtweng kac.
Ke pohloh kahs moklweyuck, Paul el luti kuht ke sie “mwe muhnahs” nuh in mahnol, ma ahkngalye el yohk ac oruh el in sikuck muhtuhnte pacl tolu, siyuck sin Leum El in eislah luhkwel. Top nuh ke pruhe lal Paul, Leum el tiacna eislah mwe muhnahs sac ac El sramsram sang mihs ac etwacack nuh insiacl, fahk, “Pwayena ma kom enenu pa kulang luk, tuh ku luk uh arulana yohk ke pacl kom munas.” Ke kahlwem sasuc, Paul el tuh kuh in insese kac ac sruikihn mwe muhnahs ma utuckuh nuh sel ah. El fahk, “Ke ma inge, nga arulana engan in konkin ke munas luk, tuh ku lun Christ in oan in nga.”
Ke kuht eis ngwet ma pahtpaht inge in moul lasr, yohkwelihk kuh lasr in muhtweng, kuht luti ohiyac fuhkah in kahsruh mwet suc enenuh, ac kuht kwacna kuloh ac finne ahkkahlwemye tarilacna lasr ke pacl ma God El lwelah kuht in moulkihn oacna mwet luti ke inkacnek luhn moul.
Ke kuht konwekuhtyak sifacna puhlakihn ma toasr uh, ac kuh in upac in liye ma toasr lasr oacna akucl uh ke fuhfahsryucsr lasr in mwet tuhma lutlut. Tuhsruhk finne kuht konwekuhtyak ke pacl arulacna suhpwacr kuh ke inkacnek fuhlwact luhn engan, lutiyuck sin ac puhla luhngse ke mwe kweok luhn mwet sahyac ac kuh in mwe insewowo se.
Ke sie pahng luhk ah in wi toeni luhn stek se fin acn Philippines, muhsahllah insiyuck ke nga lotwelah ke pacl arulacna suhpwacr lal Tamuhlwel Daniel Apilado. Tamuhlwel Apilado ac muhtwacn kiacl elos pacptaislac yac 1974. Elos eis wosasuc fohlohkyuck ac siliyak lun tempuhl. Tohkoh, elos ahkinsewowoyeyuck ke tuhlihk limekohsr. Ke July 7, 1997, ke Tamuhlwel Apilado el kuhlwacnsapuh oacna prestuhn luhn stek, fihrihryak lohm srihsrihk selos. Tuhlihk mukul mahtuh emet nahtuhl Tamuhlwel Apilado, Michael, molwelah pahpah tuhmwacl, oluhllah liki lohm fihrihr sac, ac na kahsruhsr fohlohk nuh lun lohm ah in molwelah mwet sahyac ah. Pacl sahflah se inge pa Tamuhlwel Apilado el liye mukul nahtuhl moul. Misac in fihrihr sac pa muhtwacn kiyacl , Dominga, ac nohfohn na tuhlihk limekohsr nahtuhlos.
Ma pwacye se muh Tamuhlwel Apilado el moulkihn sie moul luhngseyuck nuh sin God ke pacl se muh ma koluk se inge sikyak ah, ac tiacna oruh fihrihr sac in tiac sikyak ac tiac pac oruh el in tiac puhla ke mwe elyah ma tuhkuh tok. Tuh luhlahlfongi lal in liyacacng olweacng lal ac orekmakihn luhlahlfongi lal in Kraist sang nuh sel kahlwem suwohs ke olwelah se muh el ac fah fohlohkihnyuck nuh yurun muhtwacn kiyacl ac sucu lal. Finsrak se inge oracllah sie kawuck ke nguhnal.
Ke muhtwacta luhk, Tamuhlwel Apilado, ingena el stek patriarch, ahkkahlwemye nuh srihk muhtwacn sasuc kiyacl, Simonette, ac tuhlihk luo nahtuhlos, Raphael ac Daniel. Pwacyena, Jisus Kraist El kuh ac El fah “akkeyala insien mwet su munasla finsrak la.”
Ke nga akacsruhi sramsram lal Tamuhlwel Apilado, nga sensenkihn ma yohk ke mwe kweok lal sahp ac fah oruh pucs mwet in nuhnkuh muh mwe elyah ac kweok lalos sifacna ac tiacna yohk srihpac oacna ma lal. Nuhnak muhnahs nimet kapsra, tuh suk in lutlut ac orekmakihn ip ma pahtpaht ke kowos fahsr inmahsrlon e luhn kweok lowos sifacna.
Nga fin kuh in sramsram nuh suwos kais sie—“kowos su orekma ac totola”—lwelah nga in fahk muh ma upac lowos—mwe elyah lowos sifacna, mwe ngal, pacl srihkeyuck, ac mwe muhnahs nuhkwewa lowos—nohfohn na etweyuck sin Pahpah tuhmasr Inkuhsrao ac Wen Nahtuhl. Kowos in luhlahlfongi! Kowos in puhlaik! Ac kowos in luhlahlfongi ke olwelah luhn God!
Srihpac se ac misin luhn Jisus Kraist nein muh El ac fah “eis nuh Facl kweok ac mas luhn mwet Lal,” “eis nuh Facl mas lalos,” ac “in etuh fal nuh ke mahno lah El ac kahsruh fuhkah mwet Lal fal nuh ke mas lalos.”
In eis fohnlah luhn mwe sang inge ma Mwet Lahngo lasr El tuh sukohsohk use ah, kuht nuhkwewa enenuh in etuh lah mwe kweoksifacna uhtiacna luti kuh use ma yohk srihpac sahyacn kuht sifacna sulaclah in wi ke ohiyac se in lotwelah sin mwe kweok lasr ke orekmakihn luhlahlfongi.
Elder Neal A. Maxwell el akacsruhi ma el lotwelah ke srihpacn mwe kweok ke kahs inge:
“Kain in mwe kweok, fin muhtweng wo kac, ac kuh in ahkwoyekuht. …
“…Ip in muhtweng wo pa in fakpacp, inmahsrlon mwe kweok lasr, in luti kac pacl sikyak lasr. Tiac moulkihn muhkwena ke ma inge, tuh kuht in moulkihn …ke ohiyac ma ac fah ahkmuhtahlye [kuht].”
Nga tuh liye ke moul ac mwe srihkasrak luhn mwet sahyac lah orekmakihn luhlahlfongi yohk ac ma pahtpaht ke Jisus Kraist ac olwelah Lal use nuh sesr finsrak pwacye ke ma wo ma ac fah tuhkuh. Luhlahlfongi pwacye se inge ahkkweye kuht, use nuh sesr kuh ma kuht enenuh in kampare. Ke kuht kahlwem ke kuhpahsr se luhn mwe kweok lasr nuh ke srihpac pwacye in moul suhkawihl lasr ac yohk nuh ke mwe insewowo se lasr tok inkuhsrao, luhlahlfongi lasr in Kraist yohkwelihk ac kuht eis mihs nuh in nguhnasr.
Na tok kuht kuh in liye kahlwem ke sahflahiyacn inkacnek ye infohk. Elder Jeffrey R. Holland el luti: Pwacyena oasr kahlwem ke sahflahiyacn inkacnek ye infohk. Pa Kahlwem luhn Facluh, Itu Sahromrom in Lututacng, ‘kahlwem ma wacngihn sahflahiyac, ma tiac kuh in lohsrlah’ [Mosiah 16:9]. Ac pa luhman Wen nuhtin God Sifacna.”
Kuht kuh in eis kuh in etuh lah mukwikwi upac nohfohn ke moul se inge fah somlac sie lwen; finne fong upac fah eklac nuh ke lututacng in kahlwem.
Ke ma nuhkwewa sahflah ah ac kuht tuh kampare ke ma nuhkwewa ke luhlahlfongi ke Jisus Kraist, olwelah nuh sesr muh “God El ac fah eela [sroninmutacsr].”
Nga fahkwack lah God Pahpah tuhmacsr, Jisus Kraist, moul ac lah Elos pa karihngihn olwelah uh. Nga fahkwack lah Mwet Lahngo El suli kuht nuhkwewa in tuhkuh ipeis ke Iwaclah Lal. Ke kuht orekmakihn luhlahlfongi lasr in El, El ac fah sruhkkuhtyak ac uskuhtlac liki mwe elyah lasr nuhkwewa ac, sahflah, molikuhtlac in tohkohsrahi celestial. Tuh nga in suli kowos in tuhkuh nuh yurun Kraist, muhtweng wo ke luhlahlfongi, ac ahksuwohsyeyuck Sel. Ke inen Jisus Kraist, amen.