2010–2019
Kuhlwacnsap
Ohktohpa 2016
10:58

Kuhlwacnsap

Sel Elder Carl B. Cook

Ke Mwet Itngucul

Mempucr nuh kwewa enenweyuck, ac mempucr nuh kwewa enenuh pacl mwesahs in kuhlwacnsap.

Ke nga tuhlihk mukul srihsrihk se ah nga luhngse orekma weluhl Uncle Lyman ac Aunt Dorothy ke imac lalos ah. Uncle Lyman el kwacna kol orekma lasr, ac Aunt Dorothy el kwacna kahsruh ac wucn mahn stosah Dodge soko. Nga esam rahrah luhk ke kuht srwemlah ke fohk kuh srihke in fanuhkyac soko ohl loalloal: Uncle Lyman el ac fahk, “Sang nuh ke compound, Dorothy!” Pa ingacn pacl se ma nga muhtwacwacack in pruhe. Nga nihkihn lah fuhkah, tuh ke kahsruh luhn Leum ac tukun kuhtuh ngihrngihr luhn kea ah, Aunt Dorothy el konwacack compound uh. Ke wil nuh kwewa lakiyac ac mukwikwi, pikuhp soko an muhtwacwacack in wact nuh met ac orekma lasr uh kalweniyuck.

Kalmacn “Sang nuh ke compound” pa in ahollah nuh ke siena kea ke pihsen kea an oreklac in tuhkweni orekma in oraclah kihfucs yohk. Sie kea compound, wi pac four-wheel drive, lwelah kom in ahkolah, ahkyohkye kuh, ac mukwi.

Kea Compound an

Nga luhngse nuhnkuh ke kais sie sesr oacna ip se ke kea compound an ke kuht tuhkweni kuhlwacnsap ke Alu—ke ward ac pracns, ke u luhn pristut ac u srihsrihk ke alu uh. Oacna ke kea uh tuhkweni in ahkyohkye kuh ke compound uh, ac fokokoi kuh lasr ke kuht tuhkweni. Ke kuht tuhkweni in kuhlwacnsapuh sie sin sie, kuht tuhkweni ahkfalye ma yohk likina ke kuht kuh in muhkwena oruh. Ma pwacr se in tuhkweni ke kuht kuhlwacnsap ac kahsruh ke orekma luhn Leum.

Kuhlwacnsap uh Mwe Insewowo Se

Pacl mwesahs in kuhlwacnsap pa sie sin mwe insewowo yohk luhn mempucr luhn Alu uh. Leum El fahk lah kuht fin luhngse El, kuht ac Kuhlwacnsapuhl, ac kuht Kuhlwacnsapuhl ke kuht kuhlwacnsapuh mwet sahyac uh.

Ke kuht kuhlwacnsap, kuht fototoyang nuh sin God. Kuht muhtwacwacack in etwacl ke ohiyac ma kuht tiac kuh in oruh sahyac. Luhlahlfongi lasr nuh Sel yohkwaclihk. Elyah lasr uh eis kahlwem. Moul uh eklac in engan. Luhngse lasr nuh sin mwet sahyac uh yohkwaclihk, oacyacpac kena lasr in kuhlwacnsap. Nuh ke ohiyac insewowo inge, kuht eklac kais kuhtuh in oacna God, ac kuht ahkolah wo in fohlohk nuh Yohrohl.

Oacna Prestuhn Marion G. Romney el luti: “Kuhlwacnsap tiac sie ma kuht muhtwacnglah ke facluh se inge kuht in muh kuh in eis lwelah in moul ke tohkohsrahi celestial. Kuhlwacnsap pa pwelucng ma oraclah moul ma pahtpaht ke tohkohsrahi celestial.”

Kuhlwacnsap uh Kuh In Upacpacna

Kuhlwacnsap ke Alu, finne ohinge, kuh in upacpacna kuht fin siyuckyuck in oruh ma se ma ahksahngwengye kuht, kuht fin ullac ke kuhlwacnsap, kuh kuht fin pahngonyuck in oruh ma kuht nuhnkuh muh ac tiac pwacr.

Nga tuhfahna eis kunohkohn sasuc se. Nga tuh kuhlwacnsap ke acn Africa Southeast Area. Pwacr in kuhlwacnsap ke acn se ma Alu uh srackna fuhsr ac fahna akwucki we, ac kuht luhngse Mwet Luhlahlfongi we uh. Na nga pahngonyuck in fohlohk nuh ke headquarters luhn Alu uh, ac in fahk ma pwacye, nga tiacna rahrah kac. Eklac luhn kunohkohn uh use ma nihkihnyuck.

Sie fong ke nga motko ke eklac ma ac sikyak uh, nga mwemwe ke pahpah mahtuh tuhman pahpah tuhmuhk Joseph Skeen. Nga etuh ke srihpen journal nahtuhl an lah el ac muhtwacn kiyacl an, Maria, som nuh fin acn Nauvoo, el kena in kuhlwacnsap, pa oruh el som sokol Mwet Pahluh Joseph Smith ac siyuck lah el kuh in kuhlwacnsap fuhkah. Mwet Pahluh el suhpwacllah in orekma ke acn tuhpahsrpahsr se ac fahk nuh sel in oruh kuhiyacl, ac el oruh.

Nga motko ke pacl wo ma Joseph Skeen el eis ke el insesekihn pahng se ingacn. Nga sa in akihlen lah oasr pac luhk pacl wo sacn pacna, oacna kuht nohfohn. Pahng nuh kwewa ke Alu uh tuhkuh sin God—sin mwet kuhlwacnsap Lal.

Nga puhla sie nguhn in ahkkweye lah pahng sasuc luhk uh ma moklweyuck se. Yohk srihpac kuht in kahlwem ke kuhpahsr ingacn—lah pahng lasr uh pwacyena tuhkuh nuh sesr yurin God sin mwet kol pristut lasr uh. Tukun ma sikyak inge, ohiyac luhk uh eklac, ac nga puhla sesseslah ke sie kena loal in kuhlwacnsap. Nga sruikihn mwe insewowo luhn auliyak ac ke insiyac eklac luhk. Nga luhngse pahng sasuc luhk uh.

Finne kuht nuhnkuh lah pahng lasr ke Alu uh pa nuhnak sifacna luhn mwet kol pristut lasr uh kuh tuhkuh nuh sesr ke srihpen wacngihn mwet sahyac ke oruh, kuht ac ahkinsewowoyeyucklac ke kuht kuhlwacnsap uh. Tuhsruhktuh ke kuht akihlen poun God ke pahng lasr ac kuhlwacnsap ke insiyacsr nohfohn, kuh yohk ac tuhkuh nuh ke kuhlwacnsap lasr, ac kuht ac eklac mwet kuhlwacnsap pwacye luhn Jisus Kraist.

Kuhlwacnsap Enenuh Luhlahlfongi

Ahkfalye kunohkohn uh enenuh luhlahlfongi. Tiac paht tukun Joseph el muhtwacwacack orekma ke imac sac, el ac Maria masack na upac. Wacngihn mani lalos ac elos oasr inmahsrlon mwet sac. Pacl na upac se nuh selos. Ke journal nahtuhl an, Joseph el suhmuhslah, “Kuht orekma kac [ac] sruokyac na Alu ke kihtin luhlahlfongi lasr, finne Devil el srihke ahkkolukye kuht ac oruh kuht in fohlohk.”

Nga, ac wi pac fihlin mwet siofok sahyac, ac fah sruikihn yohk lah Joseph ac Maria tiacna forlah fohlohk. Mwe insewowo tuhkuh ke kuht oaru nuh ke pahng ac kunohkohn lasr ac sruokyacna luhlahlfongi nohfohn ma oasr yohrohsr.

Nga etuh sie mwet luti ke Gospel Doctrine suc ahkkweye mempucr ke kuhlahs lal an ke el luti, tuhsruhktuh ma inge tiac sikyak met. Tukun el welah Alu uh, el eis pahng se in luti ke U luhn Tuhlihk Srihsrihk uh. El puhla muh wacngihn etuh in luti sel, tuhsruhktuh ke srihpen el etuh muh yohk srihpac kuhlwacnsap uh, el insese. Sahngweng uh sana tuhkuh nuh yohrohl, ac el tui tilac wi alu el in muh tiac luti. Ke kuloh, mwet forfor luti lal ah akihlen lah el wacngihn, som muhtwacta yohrohl, ac solwacl in fohlohk. Pisap ac mempucr ke ward sac kahsrwel. Tiac paht, ke luhlahlfongi yohk likina met ah, el muhtwacwacack luti tuhlihk an. Ke el orekmakihn ip yohk ma lutiyuck ke Teaching in the Savior’s Way, Leum El ahkinsewowoye orekma lal an, ac el eklac in sie mwet luti insewowo.

Mwet luhngse ma luhn facluh lun kais sie sesr uh kena kuht in som liki kain kuhlwacnsap ke srihpac ma oacna “Nga soenna ahkolah in kuhlwacnsap; oasr ma yohk nga enenuh lotwelah,” “Nga ullac ac enenuh monglac,” “Nga mahtuhlaclac—enenuh in mwet sahyac,” kuh “Nga kahfofo ac tiac kuh in oruh.”

Tamuhlwel ac tahmtahel, insese nuh kac ac ahkfalye sie pahng pa orekma luhn luhlahlfongi. Kuht kuh in luhlahlfongi ma mwet pahluh lasr, Prestuhn Thomas S. Monson, el luti pacl puhkantwen: “Elos suc Leum El pahngon, Leum El ahkfalye,” ac “Ke kuht oasr ke orekma luhn Leum, kuht suliyuck in eis kahsruh luhn Leum.” Finne kuht puhla kuf kuh tiac luhngseyuck, finne kuht sahngweng nuh upac kuh suhpwacr, Leum El kena kuht in ahkolah, ahkyohkye kuh, ac kuhlwacnsap.

Nga tiac liye kuhtwena akucl ma ahkkahlwemye lah Prestuhn Monson ac mwet kahsruh lal ke Prestuhnsi Se Met ac U luhn Mwet Sap Singucul Luo uh lah elos kahfofolaclac kuh ullac. Elos srihkasrak wo ke ohiyac moklweyuck in eis kuh ke moul lasr ke kuht orekmakihn luhlahlfongi, insese nuh ke pahng, ac ahkfalye ke oaru. Elos “sang [finpihsaclos] nuh ke wheel” yac pucspucs somlah ah, ac elos kalweni in fahsr nuh met, fahsr na, ac nuh lucng.

Ahok, elos kuhlwacnsap ke pahng yohk srihpac, tuhsruhktuh pahng ac kunohkohn nuh kwewa uh yohk srihpac. Prestuhn Gordon B. Hinckley, mwet pahluh ac Prestuhn luhn Alu uh ke pacl somlah ah, el fahk: “Kuht nuh kwewa tuhkweni oasr ke fuhfahsryucsr se inge. … Ma kunowos ke acn in orekma lowos an yohk srihpac oacpacna nuh ke ma kunuck ke acn in orekma luhk uh. Wacngihn pahng ke alu se inge ma srihk kuh wacngihn srihpac.” Pahng nuh kwewa yohk srihpac.

Lwelah Kuht In Kuhlwacnsap

Lwelah kuht in tuyak ke luhlahlfongi, “sang [finpihsacsr] nuh ke wil uh,” ac oruh “orekma se inge in fahsr nuh met.” Lwelah kuht in “sang nuh ke compound,” in weluhl Aunt Dorothy. In tamuhlwel ac tahmtahel, lwelah kuht in kuhlwacnsap.

Kowos fin luhngse in ahkenganye pisap kuh prestuhn luhn pracns lowos an, siyuck selos kihsensiyuck “Nga kuh in kahsruh fuhkah?” “Leum El kena tuh nga in kuhlwacnsap oyac?” Ke el pruhe ac motko ke kunokohn lowos sifacna, nuh ke sucu, ac orekma, el ac moklweyuck in sang kunohkohn fal nuh suwos. Ke kowos itucklac nuh ke kunohkohn, kowos ac eis mwe insewowo luhn pristut in ahkfalye. Kowos ac fah ahkinsewowoyeyucklac! Mempucr nuh kwewa enenweyuck, mempucr nuh kwewa enenuh pacl mwesahs in kuhlwacnsap.

Jisus Kraist Pa Srihkasrak Lasr

Jisus Kraist, Mwet Srihkasrak wolacna lasr, El sang moul Lal nuh ke orekma luhn Pahpah Tuhmwacl. Ke Miting Luhlahp se met liki facluh oreklac ah, Jisus, suc suleyucklac ac ahkkweyeyucklac e met me na, siyuck sin Pahpah elan suhpwacllah. Ke ma inge, El eklac na pwacye in mwet kuhlwacnsap se lasr nohfohn. Ke Jisus Kraist ac ke kuh ma kuht eis ke Iwaclah Lal, kuht kuh pac in kuhlwacnsap. El ac fah kahsrwe kuht.

Nga ahkkahlwemye luhngse luhk nuh suwos suc ke pacl se inge ma tiac kuh in kuhlwacnsap ke Alu ke ohiyac etweyuck ke srihpen ohiyac lowos sifacna tuhsruhktuh moulkihn moul lowos ke sie kuhlwacnsap in nguhn. Nga pruhe tuh kowos in ahkinsewowoyeyucklac ke orekma lowos. Nga oacyacpac sang kuloh nuh selos suc ahkfalye pahng lalos wik nuh ke wik, oacyacpac elos suc sa in wi pahng in kuhlwacnsap uh. Mwe sang ac kihsac nuh kwewa sruikihnyuck, yohk sin El suc kuht kuhlwacnsapuh. Mwet nuh kwewa suc kuhlwacnsap uh ac fah eis kuhlwacng luhn God.

Finne matwac kuh ohiyac fuhkah lasr, lwelah kuhlwacnsap in pa facsin lasr. Kuhlwacnsap ke pahng lowos. Kuhlwacnsap ke sie misin. Kuhlwacnsapuh ninac kiowos. Kuhlwacnsapuh sie mwet sahyac. Kuhlwacnsapuh mwet tuhlan lowos. Kuhlwacnsap na.

Lwelah Leum elan ahkinsewowoye kais sie sesr ke orekma lasr in kuhlwacnsap ac in eklac mwet fahsr na pwacye tukun Jisus Kraist. Nga fahkwack lah El moul ac kol orekma se inge. Ke inen Jisus Kraist, amen.

Mwe Kahsruh

  1. Liye “Compound Gears,” technologystudent.com/gears1/gears3.htm; “Compound Gear Reduction,” curriculum.vexrobotics.com.

  2. Liye Preach My Gospel: A Guide to Missionary Service (2004), 87.

  3. Doctrine and Covenants 42:29; liye pac Doctrine and Covenants 59:5.

  4. Liye Matthew 25:40; Mosiah 2:17.

  5. Liye John 12:26.

  6. Liye Doctrine and Covenants 81:4–6.

  7. Marion G. Romney, “The Celestial Nature of Self-Reliance,” Ensign, Nohfuhmpuh 1982, 93.

  8. Liye Joseph Skeen, reminiscences and diary, 7, Church History Library, Salt Lake City; liye pac The Journal and History of Joseph Skeen ed. Greg S. Montgomery and Mark R. Montgomery (1996), 23.

  9. Liye Doctrine and Covenants 1:38; Ip Yohk an ke Luhlahlfongi 1:5.

  10. Skeen, Reminiscences and Diary, 8, spacl ac punctuation sasuc ituckyang; liye pac Journal and History of Joseph Skeen, 23; Luke 22:31; 2 Nephi 28:19–24; Alma 30:60; Doctrine and Covenants 10:22–27.

  11. Liye Teaching in the Savior’s Way (2016), 37–38; Handbook 2: Administering the Church (2010), 5.3, 5.5.4.

  12. Thomas S. Monson, “Duty Calls,” Ensign, Mei 1996, 44.

  13. “Put Your Shoulder to the Wheel,” Hymns, no. 252.

  14. Gordon B. Hinckley, “This Is the Work of the Master,” Ensign, Mei 1995, 71.

    Prestuhn Hinckley el oacyacpac fahk: “Oasr pacl wo suwos in puhla engan ke ohiyacn mukwikwi ke ma kunowos oacna nga oruh. Kapkapwack ke orekma se inge wiwina tuhkweni orekma lasr. Finne meac kunohkohn lowos, sesseslah ke pacl wo in oraclah ma wo oacna ma luhk. Ma yohk srihpac emet pa tuh orekma inge pa orekma luhn Mwet Kol an. Orekma lasr pa in oruh wo oacna El oruh” (“This Is the Work of the Master,” 71).

    Prestuhn Thomas S. Monson el fahk, “Mwet se kuh in ahkfalye kunohkohn lal fuhkah? Fihsrwacsr ke el ahkfalye kuhlwacnsap ma oasr kac” (“Duty Calls,” 43).

  15. Liye Alma 37:6.

  16. “Put Your Shoulder to the Wheel,” Hymns, no. 252.

  17. Liye Handbook 2, 3.3.1, 3.3.3, 19.1.1, 19.4. “Ke kuhlwacnsap luhn mukul ac muhtwacn mahtuh … ac fuhsr, orekma luhn God uh fahsr.” (Gospel Principles [2009], 163).

  18. Liye Abraham 3:27.

  19. Liye Doctrine and Covenants 76:5.

  20. Liye Mosiah 18:26.

  21. Liye “They, the Builders of the Nation,” Hymns, no. 36.

  22. Liye Moroni 7:48.