Leum Jisus Kraist El Luti Kuht in Pruhe
Ke kowos pruhe, yac kowos pruhe na pwacye kuh fahk na pruhe uh?
Ke 1977 ah, nga tuh kuhlwacnsap oacna sie full-time misineri fin acn Cusco, Peru. Companion se luhk ah ac nga eis lwelah in us misineri nuhkwewa ke acn Cusco nuh ke insahruh wolacna Machu Picchu uh.
Nuh ke sahflahiyacn muhtwacta se lasr insahruh ah, kuhtuh sin misineri ah ke som nuh ke Sohs Inca, ip ke inkacnek luhn finohl uh. Kihtin pacl ah na, nga puhla Nguhn tulokihnyuc ke insiyuck in tiac som nuh we. Inkacnek soko ah oan oasr siskacn finohl soko ah ke sie fuhluh feet 2,000 (610m). Ke kuhtuh acn kac an mwet se na ke pacl se kuh in fahsr fac ahluhkwelah. Companion se luhk ah ac nga fahk nuh selos lah kuht tiac enenuh in som nuh ke Sohs Inca soko ah.
Tuhsruhk, misineri ah ngihsre na upac tuh kuht in som. Nguhsr lalos ah upaclah, ac finne ke ma Nguhn fahk nuh sihk ah, nga fuhlwelah nuh ke nguhsr lalos ac fahk nuh selos lah kuht ac muhtwacta ke sohs soko ah muhkwena kuht fin taran arlac ahkwoyac.
Kuht utyak nuh ke innek soko ma som nuh ke Sohs Inca ke nga fahsr e tok ke u sacn, ac ke muhtwacwacackiyac ah mwet nuh kwewa kahkahsrihk fahsr, oacna ke inseselac uh. Na misineri ah muhtwacwacack in fahsr pihsrpihsr ac finne kahsruhsr. Elos macnsiskihn nguhsr luhk in kahkahsrihk uh. Nga puhla lah ma kunuck in sonolos, in fahk nuh selos kuht in fohlohk. Nga loes luhkwelos ac nga enenuh in kahsruhsr muhi in sonolos.
Ke nga ahluhkwelah kuhruh se, ke innek soko ma arlac ohsrihksrihklaclac in mwet luo fahsr kac, nga konwacack misineri se tu insac ke fintohkohl funglac ke yot ah. Nga siyuck sel lah efuh el tu insac. El fahk nuh sihk muh Nguhn fahk nuh sel in tu na insac ke kihtihn pacl ac lah nga enenuh in fahsr na.
Nga puhla silahklahk in sun mwet ma oasr met liki kuht ah, oruh el kahsreyuc in ahluhkwellah, ac nga kuh in som kuhtuh ke innek soko ah. Nga akihlen lah infohk an sesseslah ke mah folfolsra. Nga sang niyuck nuh infohk ah, ac akihlen, ke nga puhtatlac, lah wacngihn infohk ye mah folfolsra ah. Nga sang kuhiyuck srihke in sruok kuhtuh lah ye innek soko ah. Ke kihtin pacl nga tuh liye nuh ten, ke feet 2,000 ye niyuck, Infacl Urubamba, ma sahslah Infahlfahl Muhtahl luhn mwet Inca. Nga puhla oacna fin kuh luhk som likiyuc, ac e kihtin pacl na ngwac tiac kuh in sruok. Ke pacl sacn, nga pruhe ke kuhiyuck. Pa sie pruhe na fototo. Nga ikucslah inwaclihk ac fahk, “Pahpah, kahsreyuc!”
Lah ah tiac fokoko fal in sruok toasriyen monuk nohfohn. Nga etuh lah ngwac apkuhran in misac. Pacl sacn pacna ke nga apkuhran in puhtatlac ah, nga puhla paho na fokoko se sruokyac pouk ac ulyucyak. Ke kahsruh sacn nga kuh in kampare srihke in sifacna usyuclac nuh ke innek soko ah. Misineri se ma sanweyuc ah pa moliyuclac ah.
Tuh ke ma pwacye uh Pahpah tuhmwacsr Inkuhsrao pa moliyuclac ah. El lohng puhsrwek. Nga tuh lohng puhsren Nguhn pacl tolu, fahk nuh sihk in tiac som nuh ke Sohs Inca, tuh nga tiacna ahkos puhsra sac. Nga langihrngihryak, muhtuhk fasrfasrlah, ac nihkihn ma ngwac fahk. Na nga esam lah oasr misineri sahyac met liki kuht, ac kuht som sokolos nwe ke na kuht konwaclosyak ac fahk nuh selos ma sikyak nuh sihk ah.
Kuht fohlohklac nuh ke Machu Picchu taran na pwacye, ac ke mihslac. Ke kuht fohlohk nuh lohm ah, nga srackna mihslac, ac nuhnak se tuhkuh nuh sihk lah El lohacng nuh ke puhsrwek tuh nga tiacna lohacng nuh ke puhsrwacl. Oasr kweok upac insiuck ke tiacna ahkos puhsrwacl ac ke pacl sacn pacna nga puhla srui na pwacye ke pahkotwen Lal. El tiacna sang nuhnuhnkuh Lal feik, tuh ke pahkotwen yohk lal, El moliyuclac (liye Alma 26:20).
Ke sahflahiyacn lwen sac, ke pacl in pruhe luhk sifacna, nga sang insiuck in pruhe nuh sin “Papa su arulacna pakoten, ac God su kasrekut ac akwoyekut” (Luo Corinth 1:3) . Nga pruhe “ke inse pwacye, kena in etuh na pwacye, luhlahlfongi Kraist” (Moroni 10:4).
Ke lututacng ke lwen sac na, nga tuh pruhe ke inngoasrok, ac ke nga apkuhran in misac, nga pruhe ke insiuck nuh Sel. Nga motko ke moul luhk nwe ke pacl sacn. Nga liye tuh ke pacl pucspucs, Pahpah tuhmwacsr Inkuhsrao El pahkotwen na pwacye nuh sihk. El lutiyuc mwe luti puhkantwen ke lwen sacn ke Machu Picchu ac fin acn Cusco, Peru. Sie sin mwe luti yohk emet an pa nga enenuh in pruhe pacl nuhkwewa “ke inse pwacye, kena in etuh na pwacye, [orekmakihn] luhlahlfongi ke Kraist.”
Ke sie pacl Leum Jisus Kraist El “pre in sie acn” ac “ke el tari, sie sin mwet tumal lutlut fahk nu sel, Leum, luti kut in pre” (Luke 11:1). Na El luti mwet tuhma lutlut Lal in pruhe. Ac mihsenge El luti kowos ac nga in pruhe oacna kuht liyacl ke nuhnak lasr pruhe fin acn Gethsemane ac fahk, “Tusruktu, in tia ou lungse luk, a lela ma lungse lom in orek” (Luke 22:42). Ke kowos pruhe, kuh kowos pwacye, luhngse lah “in tia ou lungse luk, a lela ma lungse lom in orek”?
Paul el ahkuhtweyac ohiyacn pruhe luhn Jisus ke “el moul muta faclu,” yohkna fin acn Gethsemane: “el pre ac siyuk ke pusra lulap ac tung nu sin God, su ku in molella liki misa.” (Hebrew 5:7). Ke kowos pruhe, yac kowos pruhe na pwacye kuh fahk na pruhe uh? Yac kowos tiacna sang insiowos in pruhe?
Jisus El sang kuhiyacl in pruhe ac sramsram nuh sin Pahpah Tuhmwacl. “Tukun mwet nukewa baptaisla tari Jesus el oayapa baptaisla, ke pacl se el pre ah, kusrao ikakla” (Luke 3:21). Ke kowos pruhe, yac kowos puhla inkuhsrao ikacklah? Yac piyac pacl sahflah se ma kowos puhla kuhpahsr se ingacn ke inkuhsrao?
Jisus El sifacna ahkolah in oraclah sulaclah yohk srihpac ke pruhe nuh sin Pahpah Tuhmwacl.
“El utyak nu fin eol soko in pre, ac el sisla fong nufon se we in pre nu sin God.
“Ke lenelik el pangon mwet tumal lutlut yorol ac sulela singoul luo selos” (Luke 6:12–13).
Kuh kowos sifacna ahkolah in oraclah sulaclah yohk srihpac ke pruhe nuh sin Pahpah tuhmowos Inkuhsrao? Kuh kowos sifacna ahkolah ke pacl in pruhe uh?
Ke Jisus El tuhkuh nuh fin acn Macrike e met ah, El luti mwet ah in pruhe: “Ac Jisus El fahk nuh selos: Pruhe na; ne ohinge elos tiacna tui in pruhe” (3 Nephi 19:26).
Jisus El suli kuht in pruhe pacl nuhkwewa (liye D&C 10:5). Jisus El etuh lah Pahpah tuhmwacsr Inkuhsrao El lohng ac use nuh sesr ma wo emet nuh sesr. Efuh oasr pacl kuht tiacna luhngse in eis? Efuh?
Ke pacl se na ma kuht fahk, “Pahpah Lucng,” El lohng pruhe lasr ac akihlen kuht ac enenuh lasr uh. Ac Muhtahl ac Insrwacl lohacng nuh sum. El etuh nuhnak lasr uh, ac El puhla insiacsr. Kowos koflah okanlah kuhtwena ma Luhkwel. Na, ma wolacna pa lah El fah liye kowos ke muhta in luhngse ac pahkotwen—luhngse ac pahkotwen ma tiac kuh in luhmweyuck sesr. Tuhsruhk luhngse ac pahkotwen oasr Yohrohl ke pacl se ma kowos fahk, “Pahpah Lucng.”
Na oruh sie pacl in pruhe uh arulacna, arulacna pacl muhtahl se. El tiac kain mwet suc fahk, “Moh, nga fah tiac lohng kom ingena mweyen kom tuhkuh na nuh sihk ke pacl elyah lom.” Mwet uh muhkwena oruh angwacn. El tiac kain mwet suc fahk, “O, kom nihkihn luhpan kahfofo luhk ingena.” Mwet uh muhkwena fahk angwacn.
Lah kuht nuhkwewa kuh in pruhe oacna Jisus El luti kuht in pruhe pa finsrak luhk ac pruhe luhk, ke inen Leum Jisus Christ, amen.