Mwe Luti luhn Kraist

Sel Brian K. Ashton

Mwet in Kahsruh Ahkluo ke Prestuhnsi Luhlahp luhn Sacnri Skul

Mwe luti luhn Kraist lwelah kuht in eis kuh ke ma luhn nguhn ma kuh in sruhkkuhtyak likina ohiyacn nguhn lasr ingena nuh ke acn ma kuht kuh in ahksuwohswohsyeyucklac.

Jisus El muhtwacta yurin Mwet Nephi tukun Sifilpac Moulyak Lal oreklac arlac wo in luti kuht ma yohk srihpac emet uh. Muhtwacwacack ke Pahpah El fahkwack nuh sin mwet uh lah Jisus El “Wen Kuloh nuhtihk, suc [El] engan na pwacye se.” Na Jisus Sifacna El oactui ac fahkwack ke kihsac in iwaclah Lal, ac suli mwet uh in “etuh na pwacye” tuh El pa Kraist ke elos tuhkuh ac puhla kihnet ke Mahnol ac puhla iken osra ke Pahol ac Niyacl. Fahkwack luhlahlfongi inge ahkkahlwemyeyuck ke tiac ahlohloh lah Iwaclah luhn Jisus ahkfalyeyucklac ac Pahpah El ahkfalye wuhlweacng Lal in sang sie Mwet Lahngo. Na Jisus El luti Mwet Nephi ohiyac in eis mwe insewowo nohfohn ke plwacn in engan luhn Pahpah, tuh kuht kuh in eis ke srihpen Iwaclah luhn Mwet Lahngo, ke luti nuh selos mwe luti luhn Kraist.

Pweng luhk mihsenge ac lohacng yohk nuh ke mwe luti luhn Kraist. Ma suhmuhslah uh ahkuhtweyac lah mwe luti luhn Kraist pa in ahkyohkye luhlahlfongi ke Jisus Kraist ac Iwaclah Lal, auliyak, pacptaislac, eis mwe sang luhn Nguhn Muhtahl, ac kampare nuh ke sahflah.

Mwe Luti luhn Kraist Lwelah Kuht in Eis Mwe Insewowo ke Iwaclah luhn Kraist

Iwaclah se luhn Kraist ah oraclah inkacnek ma kuht kuh in luhlahlfongi ke “ohiyac wo, ac pahkotwen, ac luhng kuhlwacng luhn Messiah Muhtahl,” “ahksuwohsyeyucklac [sin Kraist],” eis ma wo nuh kwewa, ac eis moul ma pahtpaht.

Mwe luti luhn Kraist ke ohiyac se sahyac an pa inkacnek—inkacnek sefanna—ma kuht kuh in eis mwe insewowo nohfohn ma oasr nuh sesr ke srihpen Iwaclah luhn Jisus. Mwe luti luhn Kraist pa lwelah kuht in eis kuh luhn nguhn ma kuh in sruhkkuhtyak likina nguhn suhfal lasr ingena nuh ke nguhn ma kuht kuh in ahksuwohswohsyeyucklac kac oacna Mwet Lahngo. Ohiyacn sifil isus se inge, Elder D. Todd Christofferson el luti lah: “In sifilpac isuslac, tiac oacna isuslac in ikoac, pa sie ohiyac yohk likina ma sikyak se. Ac in wi ohiyac se inge pa ma yohk srihpac emet ke moul uh.”

Lwelah kuht in suk kais sie ip ke mwe luti luhn Kraist.

Ma se met, luhlahlfongi ke Jisus Kraist ac Iwaclah Lal. Mwet pahluh uh luti tari lah luhlahlfongi muhtwacwacack ke lohng kahs luhn Kraist. Kahs luhn Kraist fahkwack ke kihsac in iwaclah Lal ac sruhmuhn nuh sesr ohiyac kuht kuh in eis nuhnak muhnahs, mwe insewowo, ac moul ma pahtpaht yurin God.

Ke lohng kahs luhn Kraist, kuht orekmakihn luhlahlfongi ke kuht sulaclah in ukwe mwe luti ac srihkasrak luhn Mwet Lahngo an. In oruh ohinge, Nephi el luti lah kuht enenuh in “fungyang nohfohn nuh ke ohiyac wo [luhn Kraist] suc kuh in molwelah.” Ke srihpen Jisus pa God ke moul se met liki moul se inge, moulkihn sie moul suwohswohs, ac ke Iwaclah Lal ahkfalye mwe enenuh nuh kwewa ke suwohswohs keiwos ac nga, oasr kuh ac ki Lal in oruh mwet nuh kwewa in sifilpac moulyak, ac El oraclah kuh nuh sin lucng kuhlwacng in kuhtanglah suwohswohs nuh ke enenuh luhn auliyak. Ke kuht etuh lah kuht kuh in eis lucng kuhlwacng nuh ke ohiyac wo luhn Kraist, kuht kuh in “luhlahlfongi in auliyak.” In muhngnguh fal nuh ke ohiyac wo luhn Kraist pa in luhlahlfongi tuh El oruh ma enenweyuck in molikuhtlac ac na in fahsr ke luhlahlfongi lasr.

Luhlahlfongi oacyacpac oruh kuht in tiac elyah yohk ke ma mwet sahyac nuhnkuh kacsr ac muhtwacwacack elyah yohk likina ke ma God El nuhnkuh kacsr.

Ahkluo, auliyak. Samuel Mwet Laman el luti, “Ac kowos fin luhlahlfongi ke [inen Kraist] kowos fah auliyak ke ma koluk lowos nuhkwewa.” Auliyak pa sie mwe sang sacohk sin Pahpah tuhmasr Inkuhsrao ma kuh in sikyak ke srihpen kihsaclah luhn Wen Kuloh Nahtuhl. Pa inkacnek se ma Pahpah El use nuh sesr ma lwelah kuht in ekuhllah, kuh furohklah, nuhnak lasr, mukwikwi lasr, ac nguhnasr nohfohn kuht in muh kuh in oacna Mwet Lahngo yohk likina met ah. Tiac ke ma koluk yohk muhkwena tuhsruhktuh pa sie ohiyac ke sifacna liyacacng lwen nuh kwewa ac oraclah wo ma kuh in kahsrwe kuht kuhtanglah ma koluk lasr, sesuwohs lasr, ac ma suhfal lasr. Auliyak oruh kuht in “fahsr na pwacye tukun” Kraist, ma nwek kuhtlac ke luhngse ac eslah sahngweng lasr. Auliyak tiac pa plwacn sahflah fin plwacn lasr ke moul suwohs uh tiac orekma. Auliyak pacl nuh kwewa pa inkacnek se muhkwena ma kuh in use engan ma pahtpaht nuh sesr ac lwelah kuht in fohlohk in moul yurin Pahpah tuhmasr Inkuhsrao.

Ke auliyak kuht kena in ukwe ac ahkos ma luhngse luhn God. Tuh, ma inge tiac sikyak muhkwena. In akihlen ma wo luhn God ac ma wacngihn sesr, orekweni ke kuhiyacsr nohfohn in falseni mukwikwi lasr nuh ke ma luhngse luhn God, use lucng kuhlwacng nuh ke moul lasr. Luhng kuhlwacng “pa kahsruh kuh kuh ma tuhkuh lucng me, utuckuh ke srihpen pahkotwen ac luhngse yohk luhn Jisus Kraist … in oruh orekma wo ma [kuht] sahyac ac tiac kuh in oreklac fin oruh ke kuh sifacna [lasr].” Ke srihpen auliyak pwacye pa in eklac oacna Mwet Lahngo, suc ma kuht sifacna tiac kuh in oruh, kuht enenuh yohk luhng kuhlwacng luhn Mwet Lahngo in kuh in oraclah eklac enenweyuck ke moul lasr uh.

Ke kuht auliyak, kuht ahollah ohiyac mahtuh, sesuwohs, muhnahs, suhfal, ac sahngweng nuh ke ohiyac ac luhlahlfongi sasuc ma ahkfototoye kuht nuh sin Mwet Lahngo ac kahsrwe kuht in oacna El.

Ahktolu, pacptais ac kuhfa luhn Leum. Mwet pahluh Mormon el luti lah “fahko se emet luhn auliyak uh pa pacptais.” In nwacsnwacslah, auliyak enenuh in wi akwuck ke pacptais ac oreklac sin mwet se suc sruok wal ke pristut luhn God. Nuh sin mempucr ke Alu uh, wuhlweacng ma oreklac ke pacptais ac ma sahyac uh ahksasucyeyucklac ke kuht ipeis ke kuhfa luhn Leum.

Ke akwuck luhn pacptais ac kuhfa luhn Leum, kuht olwelah in karihngihn masap luhn Pahpah ac Wen, in esam Kraist pacl nuh kwewa, ac kena in eis inen Kraist (kuh orekma ac ohiyacl) nuh facsr. Mwet Lahngo, ke fohlohkoh, olwelah in use nuhnak muhnahs, kuh eslah, ma koluk lasr ac “okwaclah Nguhnal in yohk nuh [facsr].” Kraist El oacyacpac olwelah in ahkoekuhtlac nuh ke moul ma pahtpaht ke kahsrwe kuht in oacna El.

Doughlas D. Holmes, Mwet in Kahsruh Se Met ke Prestuhnsi Luhlahp luhn Mukul Fuhsr, tuh suhmuhslah: “Akwuck ke pacptais ac akucl ke kuhfa luhn Leum kwewana pa ma sikyak ac ohiyac sahflah ke in sifil isuslac uh. Ke pacptais, kuht pihkihnyac ikoac mahtuh luhn sie mwet ac otyak ke sie moul na sasuc. Ke kuhfa luhn Leum, kuht lotwelah lah eklac se inge el soe ohiyac ke step-nuhke-step, [ma] ac kahkahsrihk na, wik nuhke wik, kuht eklac ke kuht auliyak, wuhlwelah, ac ke ahkyohkyaclihk luhn mwe sang ke Nguhn [in oacna Mwet Lahngo].”

Akwuck ac wuhlweacng uh pa yohk srihpac emet ke mwe luti luhn Kraist. Ke kuht eis akwuck luhn pristut ke nwacsnwacs ac karihngihn wuhlweacng oasr kac, kuh ke ohiyac luhn God fah ahkkahlwemyeyuck nuh ke moul lasr uh. Elder D. Todd Christofferson el ahkuhtweyac lah “‘kuh ke ohiyac luhn God’ se inge tuhkuh ke mwet se ke moklweyuck luhn Nguhn Muhtahl.”

Ahkahkosr, mwe sang luhn Nguhn Muhtahl. Tukun pacptais utuckuh nuh sesr mwe sang luhn Nguhn Muhtahl ke akwuck in ahkkweyeyucklac. Mwe sang se inge, kuht fin eis, lwelah nuh sesr wi luhn God pacl nuh kwewa ac kalweni in eis kuhlwacng ma tuhkuh ke srihpen moklweyuck Lal.

Ke kampihni lasr pacl nuh kwewa, Nguhn Muhtahl use nuh sesr kuh yohk in karihngihn wuhlweacng lasr uh. El oacyacpac ahknwacsnwacsye kuhtlac, kalmac pa in oruh kuht “sukohsohk likina ma koluk, nwacsnwacs, ac muhtahl nuh ke iwaclah luhn Jisus Kraist.” Inkacnek in ahknwacsnwacsyeyucklac tiac ahknwacsnwacsye kuhtlac muhkwena, tuhsruhk use pac nuh sesr enenuh nuh ke mwe sang luhn nguhn kuh ohiyac wolacna luhn Mwet Lahngo ac ekuhllah ohiyac lasr uh, kuht in muh kuh in “wacngihnlac ke lasr in oruh ma koluk.” Kais sie pacl kuht eis Nguhn Muhtahl nuh ke moul lasr ke luhlahlfongi, auliyak, akwuck, kuhlwacnsap oacna Kraist, ac orekma suwohs, kuht eklac ip nuh ke ip, kais kuhtuhnan kuht in oacna Kraist.

Ahklimekohsr, kampare nuh ke sahflah. Mwet pahluh Nephi el luti lah tukun kuht eis mwe sang luhn Nguhn Muhtahl, kuht enenuh in “muhtweng ne ke sahflah, ke mwe srihkasrak tahklac luhn Wen nuhtin God moul.” Elder Dale G. Renlund el ahkuhtweyac ohiyacn kampare nuh ke sahflah ke fahk inge: “Kuht kuh in ahksuwohsyeyuck ke kalweni ac kais kuhtuh … fahsr ke luhlahlfongi nuh sin [Kraist], auliyak, ipeis kuhfa luhn Leum in ahksasucyeyuck wuhlweacng ac mwe insewowo luhn pacptais, ac eis Nguhn Muhtahl in wi kuht pacl nuh kwewa. Ke kuht oruh, kuht eklac in oacna Kraist yohk likina met ah ac kuh in kampare nuh ke sahflah, ke ma nuh kwewa ma enenweyuck.”

Ke kahs sahyac, eisyacn Nguhn Muhtahl ac eklac ke eisyac sacn oruh kuht in ahkfokokoye luhlahlfongi lasr. Luhlahlfongi yohkwaclihk kol nuh ke sifilpac auliyak. Ke kuht kihsacacng insiyacsr ke akucl ac ma koluk lasr fin mwe loang ke kuhfa luhn Leum, kuht eis Nguhn Muhtahl yohk likina met ah. In eis Nguhn Muhtahl yohk likina met ah pahtok kuht nuh ke inkacnek in sifilpac isuslac. Ke kuht kalweni ke ohiyac se inge ac eis akwuck ac wuhlweacng in molwelah nohfohn ke wosasuc uh, kuht eis “kuhlwacng nuh ke kuhlwacng” nuh ke kuht eis fohnlah la uh.

Kuht Enenuh in Orekmakihn Mwe Luti luhn Kraist nuh ke Moul Lasr uh

Tamuhlwel ac tahmtahel, ke kuht moulkihn mwe luti luhn Kraist nuh ke moul lasr uh, kuht ac ahkinsewowoyeyucklac ke ma luhn ikoac ac nguhn kwewana, finne ke pacl upac uh. Tukun kuhtuh pacl kuht kuh in “sruokyac ma wo nuhkwewa.” Nga fahkwack lah ohiyac se inge tuh sikyak ac kalweni in sikyak ke moul luhk sifacna uh, ip nuh ke ip, kais kuhtuh na.

Tuh yohk likina, kuht enenuh in orekmakihn mwe luti luhn Kraist ke moul lasr ke srihpen ac use inkacnek sefanna in fohlohk nuh yurin Pahpah tuhmasr Inkuhsrao. Pa ohiyac sefanna in eis Mwet Lahngo ac ekihn tuhlihk mukul ac muhtwacn Nahtuhl. Pwacyena, ohiyac sefanna in moliyucklac liki ma koluk ac kapwack ke nguhn sikyak ke kuht orekmakihn mwe luti luhn Kraist ke moul lasr. Ke ohiyac sahyac, Mwet Sap John el luti lah “kutena mwet su tia sruokyana mwe luti lun Christ a el som alukela, God El wangin yorol.” Ac Jisus El sifacna fahk nuh sin Mwet Nephi Singucul Luo ah lah kuht fin tiac mukwikwi ke luhlahlfongi ke Kraist, auliyak, pacptaislac, ac kampare nuh ke sahflah, kuht ac “pakpucki ac sisiyang nuh ke e uh, acn ma [kuht] wacngihn fohlohkoh we.”

Kuht ac kuh in orekmakihn mwe luti luhn Kraist yohk likina met ah ke moul lasr uh fuhkah? Sie ohiyac an pa ke kuht sulaclah kais sie wik in ahkolah nuh ke kuhfa luhn Leum ke kuht eis kuhtuh pacl in pruhe ac motko ke ma kuht enenuh in ahkywoye. Na kuht ac kuh in us sie mwe kihsac ke sie ma ikolkuht in oacna Jisus Kraist ke mwe loang luhn kuhfa luhn Leum, siyuck yohk ke luhlahlfongi in eis kahsruh, siyuck ke mwe sang luhn nguhn ma enenweyuck, ac olwelah in eklac wo likina met ke wik se fahsruh. Ke kuht oruh ohinge, Nguhn Muhtahl ac fah tuhkuh nuh ke moul lasr yohk likina met ah, na kuht ac eis kuh sahyac in kuhtanglah ma sesuwohs lasr uh.

Nga fahkwack lah Jisus Kraist pa Mwet Lahngo luhn facluh ac El pa ine sefanna ma kuht kuh in moliyucklac kac. Ma nuhkwewa ma wo uh orweyucklac ke srihpacl. Tuhsruhktuh in “sruokyac ma wo nuhkwewa,” wi pac moul ma pahtpaht, kuh enenuh in kalweni in orekmakihn mwe luti luhn Kraist ke moul lasr. Ke ine muhtahl luhn Jisus Kraist, amen.

Mwe Kahsruh

1. 3 Nephi 11:7.

2. Liye 3 Nephi 11:10–11.

3. Liye 3 Nephi 11:14–15.

4. Liye 3 Nephi 11:21–39.

5. Liye 2 Nephi 31; 3 Nephi 27:16–20. Oasr mwe luti luhn Kraist sukokyak ke ma suhmuhslah nuh kwewa tuhsruhktuh oasr yohk ke Puk luhn Mormon.

6. 2 Nephi 2:8.

7. Moroni 10:32.

8. Liye Moroni 7:22–24.

9. Liye Doctrine and Covenants 132:23.

10. Iwaclah luhn Kraist ac mwe luti luhn Kraist tuhkweni pa wosasuc luhn Kraist (liye 3 Nephi 27:13–21).

11. D. Todd Christofferson, “Born Again,” Liahona, Mei 2008, 78.

12. Liye Rome 10:17; 2 Nephi 31:19; Alma 32:27–29; Moroni 7:25.

13. Liye 2 Nephi 32:3.

14. Liye 2 Nephi 31:10, 13.

15. 2 Nephi 31:19.

16. Liye John 1:1–3; Moses 7:47; Abraham 3:24–27.

17. Liye Hebrew 4:15; Doctrine and Covenants 45:4.

18. Liye Alma 34:16.

19. Liye 2 Nephi 9:21–22; Dallin H. Oaks, “The Keys and Authority of the Priesthood,” Liahona, Mei 2014, 49–52.

20. Liye Alma 34:15–16.

21. Alma 34:15.

22. In luhlahlfongi ke ohiyacn Kraist wi in akihlen lah Jisus Kraist pa inkacnek sefanna in moliyucklac (liye Mosiah 4:7–8). Oacyacpac kuht enenuh in luhlahlfongi lah Kraist El kuh in molikuhtlac kais sie. Pa inge sie srihpac efuh ke Doctrine and Covenants 27:2 sapkihnyuck kuht in ipeis ke kuhfa luhn Leum, kuht enenuh in esam lah Kraist El tiacna kweok na tuhsruhktuh El oruh kacsr kais sie.

23. Helaman 14:13.

24. Liye Russell M. Nelson, “Repentance and Conversion,” Liahona, Mei 2007, 102–5.

25. Liye Neil L. Andersen, “Repent … That I May Heal You,” Liahona, Nohfuhmpuh 2009, 40–43.

26. Liye Jeffrey R. Holland, “Broken Things to Mend,” Liahona, Mei 2006, 69–71; Anthony D. Perkins, “The Great and Wonderful Love,” Liahona, Nohfuhmpuh 2006, 76–78.

27. Moroni 7:48.

28. Liye Moroni 8:16. Pwacye auliyak lasr pa sie mwe ahkpwacye yohk srihpac lah kuht pa mwet tuhma lutlut luhn Mwet Lahngo. Yac kuht kuh in fahklah kuht ukwe Kraist kuht fin tiac kalweni in auliyak kuh srihke in ekuhllah insiyacsr ac mukwikwi lasr nuh Sel?

29. See Adjusting to Missionary Life (booklet, 2013), 46.

30. Liye Mosiah 4:5–7.

31. See 2 Nephi 10:24; 25:23.

32. Liye Helaman 5:11; Ether 12:27; Moroni 10:32–33.

33. Bible Dictionary ke LDS English version luhn Bible, “Grace.”

34. Moroni 8:25.

35. Ke kuht nwacsnwacs in ipeis ke kuhfa luhn Leum, kuht ahksasucye wuhlweacng nnuh kwewa lasr yurin God (liye Delbert L. Stapley, ke Conference Report, Ohktohpa 1965, 14; L. Tom Perry, “As Now We take the Sacrament,” Liahona, Mei 2006, 41).

36. Liye Dallin H. Oaks, “Testimony” (sramsram orek ke toeni in lutlut nuh sin prestuhn sasuc luhn misin, Jun 25, 2014), 1–2.

37. Liye Moroni 4:3; liye pac Mosiah 18:8–10; Doctrine and Covenants 20:37 nuh ke wuhlweacng sahyac kuht oraclah ke kuht pacptaislac.

38. Liye Moroni 8:25.

39. Mosiah 18:10.

40. Liye Luo Corinth 3:18; Ether 12:27; Doctrine and Covenants 35:2; Moses 1:39.

41. Liye Rome 6:4.

42. Douglas D. Holmes, “Come unto Christ—the Doctrine of Christ,” ma sihmlac sonna oreklac.

43. Liye Doctrine and Covenants 84:19–21.

44. D. Todd Christofferson, “The Power of Covenants,” Liahona, Mei 2009, 22.

45. Ahkkweyeyucklac uh sikyak ke fihliyucki luhn paho fin sifac uh (liye, nuh ke srihkasrak, Orekma 8:17).

46. Liye Doctrine and Covenants 20:28; Guide to the Scriptures, “Holy Ghost,” scriptures.lds.org.

47. Liye Luo Corinth 3:18; 1 Nephi 14:14; Doctrine and Covenants 93:20.

48. Liye 3 Nephi 27:20.

49. Guide to the Scriptures, “Sanctification.” scriptures.lds.org.

50. Liye Moroni 7:48; 8:26; 10:8–18.

51. Liye Mosiah 4:14; Doctrine and Covenants 84:33; Bruce R. McConkie, “The Ten Blessings of the Priesthood,” Ensign, Nohfuhmpuh 1977, 33–35.

52. Mosiah 5:2.

53. Nguhn Muhtahl oacyacpac kol kuht in fohlohk nuh yurin Pahpah tuhmasr Inkuhsrao (liye 2 Nephi 32:5; Doctrine and Covenants 45:57) ke El kahsrwe kuht in etuh ma kuht enenuh oruh in oacna Kraist (liye Luo Corinth 3:18; Ether 12:27; Doctrine and Covenants 84:46–48).

54. 2 Nephi 31:16. Kampare nuh ke sahflah pa ine fal se, mweyen enenuh kwewana pacl ac oaru (liye James 1:2–4). Ma pwacye uh pa kuht tiac kuh in oraclah ohiyacn Kraist kuht fin tiac sun kihsrucngyacn ma uh ac ma upac uh. Nuh ke srihkasrak, kuht ac kuh in eis muhtweng fuhkah kuht fin wacngihn pacl enenweyuck nuh sesr in kweok ke pacl loes?

55. Dale G. Renlund, “Latter-day Saints Keep on Trying,” Liahona, Mei 2015, 56.

56. Liye Doctrine and Covenants 93:12, 19.

57. Moroni 7:25; liye pac Mosiah 2:41.

58. Liye Doctrine and Covenants 39:4–6.

59. Liye 2 Nephi 9:24.

60. Luo John 1:9.

61. 3 Nephi 27:17.

62. Mwet se kuh in us kihsac oacna sie ke lusen wik puhs nuh pacl se, ke kahsruh luhn Mwet Lahngo, ac oacna Elder Neal A. Maxwell el luti, el pa kanglah “It [is] consumed” (“Deny Yourselves of All Ungodliness,” Ensign, Mei 1995, 68).

63. Liye 2 Nephi 25:20.

64. Liye Moroni 7:24.

65. Moroni 7:25.