![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F25%2F12%2F25129ce6bee6a30d58a2ddb202a6413f489c69bd%2F25129ce6bee6a30d58a2ddb202a6413f489c69bd.jpeg/full/!250,/0/default)
Plwacn Wolacna luhn Molwelah
Nga etuh lah ke kuht auliyak pwacyena ke ma koluk lasr uh, wacngihnlac na pwacye—tiac sie akucl likiyucki!
Mahlwem ekahsr met liki Prestuhn Boyd K. Packer el misac ah, oasr pacl sacohk se luhn mwet kol ke jacnuhruhl pristut ac u srihsrihk in sramsram nuh sesr. Nga srwackna tiac kuh in tui ke nuhnkweyacn ma el fahk ah. El akacsruhi lah el fohlohklac suk ma sikyak ke moul lal, liye lah oasr mwe ahkpwacyei ke ma koluk el oraclah ac auliyak kac, ac tuh el tiac kuh in konwacack sie. Ke srihpen iwaclah luhn Mwet Lahngo sacohk lasr, Jisus Kraist, ac ke auliyak pwacye, ma koluk lal lihksreni na wacngihnlac, oacna in muh ma inge tiac sikyak. Na Prestuhn Packer el sap kuht mwet kol ke lwen sac in fahkwelihk lah ma inge pwacye nuh sesr kais sie suc auliyak na pwacye uh.
Nga etuh sie mukul suc wi oruh ma koluk yohk ke yac ekahsr somlah ah. Ke pacl loeloes se, mukul se inge puhlakihn na pwacye mwekihn lal ac sensen in ohsun nuh sin muhtwacn kiyacl ac mwet kol lal ke pristut. El arulacna ke auliyak na pwacye tuh pwacyeiyac ah el ahkkahlwemye kena lal in fuhlweack molwelah sahflah lal sifacna liki na in sang nuh sin muhtwacn kiyacl ac tuhlihk nahtuhl in ahsor, mwekihn, kuh ohiyac sikyak sahyac ke mwe fahkwack lal.
Ke kuht oruh ma koluk, Satan el srihke in ahknuhnakye kuht lah tiac nuhnkuh kac sifacna se pa in karihngihn mwet sahyac liki ma ahkkolukyelah etuh lasr ke ma koluk lasr uh, pa nuh ke in tiac fahk kuht yak nuh sin pisap lasr, suc kuh in ahkinsewowoye moul lasr fal nuh ke el sruok ki luhn pristut ekihn sie mwet nuhnuhnkuh luhn Israel. Ne ohinge, ma pwacye uh pa in tiac nuhnkuh kac sifacna ac in oacna Kraist pa fal kuht in oruh in fahk kuht yak ac auliyak. Pa inge plwacn in molwelah yohk lal Pahpah Lucng.
Sahflahiyac ah, mukul se inge fahkwack ke ma koluk lal nuh sin muhtwacn yohk luhlahlfongi kiyacl ac mwet kol lal ke Alu uh, ahkkahlwemye yohkiyacn ahsor lal. Ne upac ma se el tuhfahna in oruh inge, oasr puhla mwesahslah, mihs, srui, luhngse nuh sin Mwet Lahngo lasr, ac etuh kahlwem se lah Leum el eis ma toasr ac usyacn ma toasr inge oraclah engan se suc tiac kuh in ahkuhtweyucki, macnsiskihn ma ac fah sikyak ac ke pacl lal tok uh.
El etuh na suwohs lah muhtwacn kiyacl ac tuhlihk nahtuhl ac fah ahkkolukyeyuck—ac na sikyak nuh selos; ac lah fah oasr ohiyac in kaiyuck ac itucklac ma kunacl luhkwel—ac na sikyak. El etuh suwohs lah muhtwacn kiyacl ah ac puhla kweok, ngalyak, ac ahngyahng—ac wina el puhlakihn. Ac el luhlahlfongi muh el ac som, us tuhlihk nahtuhltahl ah weluhl—tuhsruhk el tiacna.
Kuhtuh pacl uh tahfonglac uh kuh in kolyucklac nuh ke fahsrelihk luhn pahyuck se, ac wiwi na ma sikyak tok, sahp ma enenuh se. Tuhsruhk ke lut yohk luhn mukul se inge, muhtwacn kiyacl ah sruokilyacna ac olwelah nuh sel sifacna in kahsrwel ke ma nuh kwewa el kuh in oruh. Lwen nuh ke lwen, el kuh in nuhnakmuhnahs nuh sel. El kuh in puhlakihn kuh in onwelah ke Iwaclah luhn Mwet Lahngo nuh sel. Yac ekahsr tohkoh, siyacnyacn se inge ac tuhlihk tolu nahtuhltahl fokoko ac oaru ke luhlahlfongi. Mukul sac ac muhtwacn kiyacl oruh kuhlwacnsap lalos lun tempuhl ac moulkihn sie pahyuck wolacna, luhngse lalos. Loaliyacn luhlahlfongi yohk ac luhngse lal ac tarilacna lal nuh sin Mwet Lahngo arulacna kahlwem ke moul lal.
Amulek el fahkwack, “Nga kena tuh kowos in tuhkuh ac tiac sifilpac ahkkwekweye insiowos; … kowos fin auliyak … , kihtinmisenge fah plwacn wolacna luhn molwelah fah utuhkoht nuh suwos.”1
Ke nga wi mukul tuhmuhk kuhlwacnsap ke el karihngihn kol misin se, kuht som nuh ke yen aksohk in sruhkwack un misineri na mahtol se ke sie lututacng. Sie sin mukul fuhsr ah liye kuhtyak. Suhpwacr atacl, nuhnkwacl toasrlah, apkuhran in foloyak. Kuht liyacl ahkwoyac ke tahfuhn lwen tok sac. Ekwelac, tuhlihk mukul fuhsr se inge el taltal ke ma koluk, ac mwet kol lal sulaclah tuh elan fohlohk nuh acn sel. Kuht ne suhpwacrlac ke sesuwohs lal ac ke el tiac auliyak met liki el tuhkuh nuh ke misin lal, kuht inse pwacye ac luhngse in wi som ne yen aksohk ah in kaksyakuhnuhl ke puhlaik lal in fahsruh nuh met ac akihlen ma suhfal lal, kuht olwelah tuh kuht in pahnglol ac sramsram nuh sel pac.
Tuhlihk mukul fuhsr se inge ahkinsewowoyeyuck ke oasr ninac ac pahpah wowo lal, mwet kol wowo ke pristut, ac ward in kahsruh luhngse se. Tukun yac se el kampare orekma in ahkfalye kwewa auliyak lal ac ipeis ke Iwaclah luhn Leum, el kuh lac in fohlohk nuh ke misin lal. Upac nuh sihk in ahkuhtweyac ke luhpan engan kuht puhlakihn ke kuht som in sruohkuhl yen aksohk ah. El sesseslah ke Nguhn, engan, tu kuh ke luhlahlfongi ke Leum, ac rahrah lac in ahksahfyelah misin lal ke luhlahlfongi. El eklac misineri na akihlenyuck se, ac tohkohyang nga ac mukul tuhmuhk srui kaksyakihn pacl lasr in wi nuh ke sil lal ke tempuhl.
Sahyac na, nga etuh ke misineri se suc, etuh ke ma suhfal se lal el soenna fahkwack kac met liki misin lal fah pwacnwacng el fah sa suhpweyucklac nuh lohm sel, oraclah plwacn lal sifacna in yohk pacl in orekma lal ke misin ac fahna in fahkwack nuh sin misin prestuhn met liki el ahksahfye misin lal. Srihklac ahsor suc God el orekmakihn oan kacl ac el srihke in tiac ahkfahsryelah plwacn lal suc Mwet Lahngo lasr el use nuh sesr kwewa.
Ke misin lasr, nga tuh wi mukul tuhmuhk uh ke el som in oruh kihsen siyuck in lohlngohk nuh sin sie mukul ac pacptais. Ke mukul tuhmuhk el ahkfahsrye lohlngohk lal, nga muhta lihkac sanel wi misineri muhtwacn luo suc luti mukul se inge. Ke tari kihsen lohlngohk sac, mukul tuhmuhk ah fahk nuh sin misineri ah lah mukul sac kuh in pacptais. Mukul se inge tiac tui ke tuhng uh ke el ahkuhtweyac lah el luhlahlfongi na pwacye lah ma koluk na upac el oraclah ke moul lal uh ac fah oruh el in tiac kuh in pacptaislac uh. Nga suhkwac liye pwacr ac engan sikyak nuh sin mwet suc tuhkuh liki lohsr nuh ke kahlwem oacna nuh ke ma nga liye sikyak ke lwen sac.
Elder D. Todd Christofferson el fahkwack:
“Ke luhlahlfongi ke Mwet Molwelah [lasr] ac kuh Lal, puhla suhfal fah eklac nuh ke finsrak. Sie ohiyac ac kena pwacye luhn sie mwet eklac, ac ma koluk kenakihnyuck uh ac eklac mwe wohtwoht se. …
“… Finne fuhkah luhpan ngal kac uh, ac wacngihnlac ke srihpen engan ke nuhnak muhnahs.”2
Ohiyac sikyak inge ahkacsmakihnyeyuc kacl Enos ke Puk luhn Mormon, suc “wowoyak nuh [sin Leum] ke pruhe,” na lohng sie puhsra fahk, “Enos, ma koluk lom nuhnakmuhnahs nuh sum. …
“Ac nga, Enos, etuh lah God el tiac kuh in kikiacp; ohinge, mwacta luhn ma koluk luhk wacngihnlac.
“Ac nga fahk: Leum, fuhkah tuh in ohinge?
“Ac el fahk nuh sihk: Ke srihpen luhlahlfongi lom ke Kraist. … Som, luhlahlfongi lom oruh kom nwacsnwacslah.”3
Ke nga ahkoo sramsram se inge, nga ke kahlwem lah fuhkah kahlwem luhn tuhlihk nuhtin tuhlihk nahtuhsr uh ke auliyak ac lah fuhkah puhla laltahl ke Mwet Lahngo, pwacnwacng nga siyuck tuhlihk nahtuhsr in siyuck seltahl kihsensiyuck inge. Top luhn tuhlihk nuhtin tuhlihk nahtuhsr fakihsyucwi.
Meac auliyak? “Ke kom puokyac mwet se, kom kuh in fahk ‘sislah koluk’ ac kahsrwel tuyak.”
Fuhkah puhla lom ke kom auliyak? “Kom kuh in Puhsraluhl; kom kuh in puhla fucsrfucsr Lal ac puhla koluk somlac.”
Fuhkah puhla lom kacl Jisus ac Pahpah Lucng ke kom auliyak? “Nga puhla lah Jisus el puhla muh oasr srihpac in oruh Iwaclah lal, ac El engan lah kuht kuh in sifil Weluhl muhta.”
Efuh Jisus ac Pahpah Lucng kena ngan auliyak? Ke kahs luhn granddaughter fuhsr nuhtihk: “Ke srihpen Elos luhngse nga! In kuh in oruh wo ac eklac oacna Elos, nga enenuh in auliyak. Nga oacyacpac kena Nguhn in wi yuc, oruh nga enenuh in auliyak in eis wi wolacna Lal lwen nuh kwewa. Nga ac koflah kuh in sang kuloh fal nuh Selos.”
Ke Brynlee suc yac-ahkosr el lohng ke kihsensiyuck inge, el fahk, “Nga nihkihn, Pahpah. Kom luti yuc.”
Ke toeni luhlahp se tari ah, Elder Jeffrey R. Holland el fahk: “Wacngihn elyah kom ac nuhnkuh ke pahtlac lom, wacngihn elyah kom ac nuhnkuh ke ma kom tiac oraclah, wacngihn elyah kom ac puhla ke ma tahfonglac lom … , kuh lah fuhkah loeslaciyac nuh lohm sum ac sucu lom ac God ke kom forfor, nga fahkwack lah kom tiac oruh forfor lom ahluhkwelah in sun luhngse wolacna se. Tiac na fihsrwacsr nuh sum in puhtatyang nuh ke nguhn lohsr fohkfohk tuh kahlwem ma pahtpaht ke Iwaclah luhn Kraist tiac kuh in sun kom.”4
O, nga kena yohk tuh kais sie tuhlihk nuhtihk, tuhlihk nuhtin tuhlihk nuhtihk, ac kais sie suwos—tamuhlwel ac tahmtahel wiyuck, in puhla engan ac fototo nuh sin Pahpah Lucng ac nuh sin Mwet Lahngo lasr ke kuht kwacna auliyak ke ma koluk ac mwe muhnahs lasr. Kais sie tuhlihk nahtuhl Pahpah Lucng enenuh auliyak. Nuhnkuh meac ma suhfal kuht enenuh in auliyak kac. Meac ikolkuhti uh? Ohiyac fuhkah kuht enenuh in ahkwoye?
Nga etuh, ke Prestuhn Packer el sun tari ac fahkwack, lah ke kuht auliyak pwacyena ke ma koluk lasr uh, wacngihnlac na pwacye—tiac sie akucl likiyucki! Nga sifacna puhla luhngse sac, engan sac, mwesahslah sac, ac luhlahlfongi yohk kacl Leum ke nga auliyak ke insiyuck nohfohn.
Nuh sihk, ma usrnguck yohk emet ke moul uh pa tiac ke maelihk luhn Meoa Sruhsrah, mukwikwi luhn finohl uh, kuh finne nuh ke onweyucklac luhn mahno. Ma usrnguck yohk se pa sikyak ke kuht ahkpuhsisaclye kuht in pruhe nuh sin Pahpah Lucng ke pruhe, sikalweni siyuck tuh in oasr nuhnakmuhnahs, ac in nwacsnwacslah liki ma koluk ingacn ke iwen kihsackuhnlah luhn Mwet Lahngo. Ke ine muhtahl luhn Jisus Kraist, amen.