Tuyak ke Kuhiyowos, Tahmtahel fin acn Saion
In eklac mwet liyacacng wuhlwelah, kuht enenuh in lutlutkihn mwe luti yohk srihpac ke wosasuc uh ac eis sie fahkwack luhlahlfongi fokoko ke ma pwacye lalos uh.
Engan se suc se in tuhkweni ke Acn in Toeni Luhlahp se inge wi tuhlihk muhtwacn, muhtwacn fuhsr, ac muhtwacn ke Alu uh. Kuht oacyacpac akihlen lah oasr un tahmtahel tausin sahyac, tuhkweni fin facluh nohfohn, in wi liye ke ma ahkfahsryeyuck inge, ac nga sruikihn ohiyac ac pacl utuckuh nuh sesr in tuhkweni sie sin sie ac ke srihpac luhn ekuh se inge.
Ke Ohktohpa 2006, Prestuhn Gordon B. Hinckley el oruh sifen sramsram se ke “Tuyak, O Mukul nuhtin God,” ituckyang ine an tukun on soko sihmlac ke 1911. Pahng se inge ma nuh sin mukul ke Alu uh in tuyak ac ahkwoyeloslac sifacna. Sramsram se ingacn oan in nuhnak luhk ke nga pruhe in etuh lah mac nga ac akacsruhi nuh suwos uh.
Tahmtahel, kuht muhta ke “pacl ongaiyac luhlahp” se.Ohiyac sikyak ke pacl lasr uh fah tiac mwe lut se nuh sesr. Eltahl fah palyeyuck nuh ke tausin se yac ekihn sie mwe sensenkihnyuck ac mwe kaiyuck pwacnwacng kuht in muh kuh in ahkolah. Sapta ahk 8 ke Mormon use ahkuhtweyac na wowo tuh ahksahngeng kuhtuh ke pacl lasr mihsenge uh. Ke sapta se inge, Moroni el fahk lah el liye pacl lasr mihsenge, ac oasr mweun ac kihsen mweun, ma fohkfohk, mwet suhlallacl, pihsrapasr, ac mwet suc fahk nuh sesr muh wacngihn ma pwacye ac suhtuhuh ye muhtuhn God. El ahkuhtweyac mwet ma sesseslah ke insefuhlwact, elyahi in nuknuk yohklac molo, ac suc ahksruhksruhkye alu. El ahkkahlwemye mwet suc ma lohsrlah ke ma luhn facluh pwacnwacng elos lwelah tuh “mwet masrinsrwacl, ac mwet kwacoh, ac mwet kohflohfohl, ac mwet mas ac mwet kweok in ahlikiyucklac” tiac akihlenyuck.
Moroni el siyuck sie kihsensiyuck ke atacn ohiyacn suwohswohs lasr kais sie—kuht suc moul in pacl inge. El fahk, “Efuh kowos mwekihn in eis nuh fowos inen Kraist?” Mwe nuhnak koluk se inge lihksreni na ahkuhtweyac ke ohiyac sikyak fin facluh uh fahfahlac in yohkwelihk.
Joseph Smith—Matthew el ahkkahlwemye lah ke lwen sahflah uh finne el “suc sollac … nuh ke wuhlweacng” fah kiacpweyucklac. Elos ke wuhlweacng se inge pa tuhlihk muhtwacn, muhtwacn fuhsr, ac tahmtahel ke Alu suc pacptaislac ac oraclah olwelah la nuh sin Pahpah Lucng. Finne kuht oasr ke inkacnek ma kuh in kiacpweyucklac ke mwe luti stuhuh.
Tahmtahel, nga tiac luhlahlfongi lah ohiyac sikyak uh kuh in ahkkweye kuht in fahsr nuh met. Fin yohkwelihk fahsr luhn noa srihsrngiyucki uh, kuht enenuh in ahkolah nuh ke pahkah oan met liki kuht. Ac fihsracsr kuht in sralwack pahosr ke fuhlweack finsrak lasr, tuhsruhk in ekihn mwet wuhlweacng kuht enenuh in tiac fuhlweack finsrak. Oacna Elder Gary E. Stevenson el tuh fahk, “Moulkihn mwe ahkinsewowo Pahpah Lucng El use fal nuh ke pacl elyah uh pa kuht in oacyacpac moul ke fohnlah luhn pacl uh.” Nga luhngse fahk ahkkweyeyuck se inge.
Prestuhn Russell M. Nelson el fahk nuh sesr ke yac tari ah: “Ma lain Alu uh, mwe luti la, ac ohiyacn moul lasr uh ac fah yohkwelihk. Ke srihpac se inge, kuht enenuh muhtwacn ma oasr kahlwem na kuh se la ke mwe luti luhn Kraist ac suc fah orekmakihn kahlwem se inge in luti ac kahsruh ahkkapyeack fihl in mwet ma lain ma koluk. Kuht enenuh muhtwacn ma kuh in sirapei ma tahfonglac ke luhmah nuh kwewa. Kuht enenuh muhtwacn ma kuh in orekmakihn kuh se ma God El sackuhnlah nuh sin mwet liyacacng wuhlweacng ac suc ahkkahlwemye luhlahlfongi lalos ke inse pwacye ac luhngse pwacye. Kuht enenuh muhtwacn suc oasr puhlaik ac kahlwem la ke ninac kiyacsr Ninac Eve.”
Pweng se inge ahkkweyeyuc lah sahyacn ohiyac sikyak ke pacl lasr uh, oasr srihpac puhkantwen lasr in engan ac in sruikihn ma wo emet uh. Nga luhlahlfongi ke insiyuck nohfohn lah kuht tahmtahel uh oasr na kuh fokoko oan in kuht ac luhlahlfongi se ma ac fah lwelah nuh sesr in kuhtanglah ma upac luhn moul ke lwen sahflah uh. Tahmtahel Sheri Dew el suhmuhslah, “Nga luhlahlfongi lah ke pacl se kuht lotwelah in fuhlwelah nohfohn muhtwacn mokleyuck in eklac ac liyacacng wuhlweacng uh, tohkohsrahi luhn God fah eklac arlac sa.”
Ac enenuh kuh yohk in eklac ac in liyacacng olwelah lasr uh. In oruh oacna, kuht enenuh in tuhlihk muhtwacn ac muhtwacn suc lutlutkihn yohk srihpaciyacn mwe luti luhn wosasuc uh ac in oasr fahkwack luhlahlfongi fokoko lasr ke ma pwacye. Oasr ip tolu nga luhlahlfongi muh pa pwelucng nuh ke luhlahlfongi fokoko ac kac nga nuhnkuh muh yohk srihpac nuh ke kahlwem lasr uh.
Ma se met, kuht enenuh in akihlen srihpac yohk luhn God Pahpah Ma Pahtpaht tuhmwacsr ac Wen Nahtuhl, Jisus Kraist, nuh ke luhlahlfongi ac molwelah lasr uh. Jisus Kraist pa Mwet Lahngo ac Mwet in Molwelah lasr. Kuht enenuh in lutlutkihn ac kahlwem ke Iwaclah Lal ac in moulkihn fuhkah pengana lwen; auliyak pa sie sin mwe insewowo yohk kuht kais sie enenuh in fahsr kac. Kuht enenuh in liyacl Jisus Kraist oacna mwet se ma kuht enenuh in etahin ac mwe srihkasrak se suc kuht srihke kuht nuh kac. Kuht enenuh in kwacfweacng in luti sucu lasr uh ac kuhlahs uh ke plwacn wolacna ke molwelah luhn Pahpah tuhmwacsr, wi pacna mwe luti luhn Kraist.
Ahkluo, kuht enenuh in kahlwem ke mwe enenuh nuh ke fohlohkyak luhn mwe luti, un mwet, ac ki luhn wal ke lwen sahflah inge. Kuht enenuh in oasr mwet loh se lasr lah Mwet Pahluh Joseph Smith el fal lacna in sollac ac srihsrngiyucki sin Leum in use fohlohkyak se inge ac akihlen lah el oakiyac muhtwacn ke Alu uh oacna tukun un mwet se ma akwucki met ke Alu luhn Kraist pacl mahtuh somlah.
Ac ahktolu, kuht enenuh in lutlut ac kahlwem ke akwuck ac wuhlweacng ke tempuhl uh. Tempuhl el oakiyac acn se inmahsrlon luhlahlfongi sacohk lasr uh, ac Leum El siyuck tuh kuht in wi, porongo, ac lutlutkihn, ac konwacack srihpac ac ohiyacn orekma lasr sifacna. Kuht ac fah kahlwem kac lah ke akwuck luhn tempuhl uh, kuh fuhlwactlacna fah ahkkahlwemyeyuck ke moul lasr uh ac ke srihpen akwuck luhn tempuhl uh, kuht kuh in langweyucklac ke kuh luhn God, ac Inel fah oan facsr, wolacna Lal fah rauni kuhtlac, ac lihpufacn Lal fah karihngihn kuht. Nga ke etuh fin kuht sang nuh fac in orekmakihn kwewa kuh ma uliyuckme ingacn.
Tahmtahel, finne mwet fuhsr emet ke walihl se inge kuh in tuyak ke luhlahlfongi ac eis kunac in muhsahi tohkohsrahi luhn God. Tuhlihk srihsrihk uh muhtwacwacack in ahkkapye luhlahlfongi lalos sifacna ke rit ac lohacng nuh ke ma suhmuhslah, pruhe penganalwen, ac ipeis ke kuhfa luhn Leum ke ohiyac na yohk kalmeyac se. Tuhlihk srihsrihk ac muhtwacn fuhsr nuh kwewa kuh in ahkkweye ekuh in toeni luhn sucu ac in wi na tahkuhnlah. Kom kuh in pa mwet se emet ma sikuck muhtuhnteyak ke pacl se sucu lom an tuhkweni in pruhe uh. Finne lohm sum an tiac apkuhran nuh ke lohm kahto se, srihkasrak ke luhlahlfongi lom sifacna ke kom moulkihn wosasuc uh kuh in ekuhllah kuhtuh moul luhn sucu ac kawuck lom an.
Muhtwacn fuhsr ke Alu uh enenuh in liyaclos sifacna oacna ip yohk srihpac in wi nuh ke orekma suwohs luhn pristut ke molwelah ac tiac ekihn mwet inte ac mwet in ahkkweye muhkwena. Kowos sruok kunohkohn uh ac suleyucklac sin mwet sruok ki luhn pristut ekihn mwet kol suc oasr kuh ac wal la ke orekma se inge. Ke kowos ahkyohkye kunohkohn lowos lun kuhlahs ke prestuhnsi uh ac ahkolah in nguhn, tuhkweni kahsruh sie sin sie, kahsruh in kol mempucr ke kuhlahs lowos an, ac luti sie sin sie ke wosasuc uh, kowos ahkfahsrye ip kunowos ke orekma se inge ac kowos ac mwet lutlut wiyowos an kwewana fah ahkinsewowoyeyuck.
Muhtwacn nuh kwewa enenuh in sifacna liyaclos oacna ip yohk srihpac nuh ke orekma luhn pristut. Muhtwacn ke Alu se inge pa prestuhn, mwet in kahsruh, mwet luti, mempucr in sang kahsruh, tahmtahel, ac ninac uh, ac tohkohsrahi luhn God tiac kuh in orekma wo fin kuht tiac tuyak ac ahkfalye ma kunacsr ke luhlahlfongi. Kuhtuh pacl uh enenuh in oasr kahlwem yohk lasr ke ma fal uh.
Nga tuhfahna ohsun nuh sin sie tahmtahel fin acn Mexico suc kahlwem kac lah mac kalmac in ahkyohkye kunohkohn la ke luhlahlfongi. Marffissa Maldonado el kuneyucki in luti kuhlahs luhn tuhlihk fuhsr ke Sacnri Skul ke yac tolu somlah ah. Oasr tuhlihk lutlut 7 kac ke el tuh kuneyucki ah, tuhsruhk ingena oasr tuhlihk 20 suc tahkuhnlah na wi. Nga siyuck sel, ke lut luhk, lah mac el oruh in use pihsac se suc yohkwelihk ah. El kuhlwacng in fahk, “O, tiac nga muhkwena. Nohfohn na mempucr ke kuhlahs sac wi kahsruh.” Tuhkweni, elos liye inen mwet tiac oaru ke tahk soko ah ac elos muhtwacwacack in tuhkweni som ac solwacltahl in fohlohk nuh ke alu uh. Oasr pac pacptais se oreklac ke srihpen kampare lalos.
Tahmtahel Maldonado el oraclah sie site ke internet uh nuh sin tuhlihk ke kuhlahs sacn ma pahngpahng “Nga Tuhlihk nuhtin God,” ac el fihliyac mwe nuhnak yohk ac ma suhmuhslah kais kuhtuh pacl ke wik se. El kwacna text nuh sin tuhlihk lutlut lal ke ma kunaclos uh ac kahs in ahkkweye. El puhla muh yohk srihpac in sramsram ke ohiyac ma el liye muh fal nuh seltahl, ac wina orekma. El fahk nuh sihk, “Nga luhngse tuhlihk lutlut luhk.” Nga kuh in puhla luhngse sacn ke el fahk nuh sihk ke kampare lalos, ac srihkasrak wowo lal ahkacsmakihnyeyuc lah mac luhlahlfongi ac ohiyac luhn mwet se kuh in ahkfahsryelah orekma se inge ke kahsruh luhn Leum.
Mwet fuhsr lasr uh sun kihsensiyuck upac ke kais sie lwen uh, ac inkaiyacsr oasr mwet sacohk la suc upac nuh selos in sokwack top nuh kac. Pweng wowo se kac an pa oasr top nuh ke kihsensiyuck siyuckyuck ah. Lohacng nuh ke pweng sruhmuhnyuck sin mwet kol lasr uh. Kwacfeyuck kuht in lutlut ac kahlwem ke plwacn in engan luhn Pahpah tuhmasr Inkuhsrao. Kuht ahkacsmakihnyeyuck ke ip yohk ke mwe fahkwack luhn sucu. Kuht ahkkweyeyuck in luti ac orekmakihn mwe kahsruh inge in sruhluhkihn mwe srihkasrak nuh sesr in fahsr na ke inkacnek suwohs ac ohsrihksrihk sac.
Ke yac ekahsr somlah ah, nga muhtwacta yurin sie ninac kiyacn tuhlihk fuhsr suc sulaclah in oruh sie inkacnek in kosrwaclah tuhlihk nahtuhl liki ma suhfal puhkantwen suc elos puhtatyang nuh kac ke online ac ke inkucl in lutlut. Kais sie wik el sulaclah sifac se, wacna sie ma sruhmuhnyuck yohk ke online, ac ke wik sac el oruh ahkuhtweyac na yohk kalmac ke tuhlihk nahtuhl ah kuh in oruh kihsen siyuck lalos ac ke el kuh in liye lah oasr na pwacye ngwetngwet fal ac suwohs lalos nuh ke elyah upac sac. El oruh lohm sel uh acn sef se in kihsensiyuck ac in oasr kalmeyacn mwe lutlut ke wosasuc uh.
Nga sensen kuht in muhta ke sie acn ma lusrongyuck ke mwe ahkkoluk lah kuhtuh pacl uh kuht tuhkweni kahingkihn mwe luti pwacye uh. Kuht tahfonglac in luti muhtwacn fuhsr nahtuhsr inge lah ahkolah in ekihn ninac se pa yohk srihpac emet uh ke srihpen kuht sruhnga ahkkolukye elos suc tiac pahyuck kuh elos suc tiac kuh in orek tuhlihk, kuh in liyeyuck oacna sie sulaclah upac ke pacl fahsruh uh. Sahyacna, sahp kuht oacyacpac tahfonglac in ahkuhtweyac yohk srihpaciyacn eis etwacack ke srihpen kuht tiac luhngse suhpwaclah pweng se ma ac yohk srihpac likina macruht uh. Kuht kahingkihn in fahk lah Pahpah Lucng El ahkuhtweyac macruht uh in pa inmahsrlon mukul se ac muhtwacn se mweyen kuht tiac ke ahkkolukye elos suc moulkihn ohiyac ke kuhpahsr inmahsrlon mukul se mukul se ac muhtwacn se muhtwacn se. Ac sahp kuht ac etwacack lah ac ake in sramsramkihnyuck elyah nuh ke ip luhn muhtwacn ac mukul kuh ohiyac fal in ahko.
Pwacyena, tahmtahel, kuht enenuh in taran fahk kuh mukwikwi lasr uh, tuhsruhk lwelah kuht in oacyacpac orekmakihn nuhnak pwacye lasr uh ac kahlwem lasr ke plwacn in molwelah in kuh ac suwohsoht nuh met ke pacl se tuhkuh nuh sesr in luti tuhlihk nahtuhsr ac mwet fuhsr ke yohk srihpaciyacn ip yohk ke wosasuc uh elos in kahlwem in fuhfahsryucsr ke facluh se elos muhta kac uh. Fin kuht tiac luti tuhlihk nahtuhsr ac mwet fuhsr ke mwe luti pwacye—ac luti in kahlwem—facluh fah lotwelos ke kikiacp lal Setuhn.
Nga luhngse wosasuc luhn Jisus Kraist, ac nga tarilac ma luhlahp ke kolyuck, kuh, ac kahsruh nga eis lwen nuh ke lwen ekihn sie tuhlihk muhtwacn wuhlweacng nuhtin God. Nga fahkwack luhlahlfongi lah Leum El ahkinsewowoye kuht, oacna muhtwacn suc moul ke pacl upac se inge, ke kuh nuh kwewa, mwe sang, ac kuh enenweyuck in ahkolah facluh nuh ke Tuhkuh Ahk Luo luhn Leum Jisus Kraist. Nga pruhe tuh kuht nuh kwewa fah liye kuh pwacye lasr ac tuyak in ekihn muhtwacn luhlahlfongi ac puhlaik suc Pahpah tuhmwacsr Inkuhsrao El enenwekuht nuh kac. Ke inen Jisus Kraist, amen.