![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fea%2F31%2Fea31fa27acbee6b3621bd380d8d8f02a52bdbb64%2Fea31fa27acbee6b3621bd380d8d8f02a52bdbb64.jpeg/full/!250,/0/default)
El in Muh Fokokoi Pac
Nga pruhe tuh kuht fah tuyak nuh ke pahng lasr in sruhkwack mwet sahyac uh in ahkoeloslac nuh ke kuhlwacnsap wolacna lalos.
Nga puhla insewowo in oasr ke miting se inge yurin mwet suc sruok pristut luhn God. Luhngse fokoko, luhlahlfongi, ac kuhlwacnsap kuhlwacng luhn u in mukul ac mukul fuhsr se inge pa sie ma usrnguck in pacl inge. Oyekuh nga sramsram nuh sin mwet sruok pristut, mahtuh ac fuhsr, fahsrweni ke kuhlwacnsap oaru nuh sin Leum Jisus Kraist.
Leum El sang kuh Lal nuh selos ke ohfohs luhn pristut nuhkwewa suc nwacsnwacs ke kuhlwacnsap ke kunohkohn in pristut lalos uh.
Wilford Woodruff, ke Prestuhn luhn Alu uh, el ahkkahlwemye mukwikwi lal ke ohfohs luhn pristut ah:
“Nga lohng sramsram se emet nga lohng ke Alu se inge. Lwen se tokoh ah nga pacptaislac. … Nga akmuhsralah sie Mwet Luti. Misin luhk ah sana muhtwacwacack. … Nga oruh misin na fohn sacn oacna Mwet Luti se. … Ke kanfracns ah nga akmuhsralah nuh ke Prist. … Tukun nga akmuhsralah nuh ke Prist nga suhpweyucklac … nuh ke misin ke muhtuhnfacl nuh epang uh. Pacl sacn pa fall ke1834. Oasr companion se luhk wiyuc, ac kuht muhtwacwacack ke wacngihn mani kuh ma suhmuhslah. Nga sifacna fuhfahsryucsr ke mael pucspucs ac luti Wosasuc uh, ac nga pacptaiselac mwet ekahsr ma nga tiac kuh in ahkkweyelah nuh ke Alu uh, ke srihpen nga Prist se muhkwena. … Nga fuhfahsryucsr kuhtuh puhlan pacl uh in luti wosasuc uh met liki nga akmuhsralah nuh ke Elder se. …
“[Ingena] nga mempucr ke Mwet Sap Singucul Luo ke lusacn yac luhmngaul ahkosr. Nga fuhfahsryucsr ke u sacn ac u sahyac uh ke yac onngoul; ac nga kena fahk nuh sin walihl se inge lah nga ahkkweyeyucklac ke kuh luhn God ke nga sruok office luhn sie Mwet Luti, ac pwacyena ke nga orekmakihnyuck ke imac uh ke nga sie Prist, oacna ke nga Mwet Sap se. Wacngihn eklac ke ma inge ke kuht oruh kunohkohn lasr uh.1
Ma kuh luhn nguhn wolacna sacn wacngihn eklac ahkuhtweyucklac nuh sesr ke kahs luhn Leum ke Aaronic Pristut oacna sie “appendage” luhn Melchizedek Pristut.2 Kahs se appendage kalmac lah ma luo kapsriyucki. Kuhpahsr se inge yohk srihpac nuh ke pristut in eis kuh ac mwe insewowo kac, fin facluh ac ne tok ma pahtpaht, ke srihpen “wacngihn muhtwacwacyacn lwen la ac sahflahiyacn yac la.”3
Kuhpahsr se kac an ma fihsrwacsr se. Aaronic Pristut ahkolah mukul fuhsr nuh ke luhlahlfongi muhtahl ma yohk liki.
Melchizedek Pristut sruok ki luhn mwe insewowo luhn nguhn nuhkwewa ke Alu uh.
Mwe insewowo luhn nguhn ke Alu uh wi kuh in eis ma lukmac luhn tohkohsrahi luhn inkuhsrao, oruh inkuhsrao in ikacklah nuh sesr, in aetuhilac yurin un mwet luhlahp se ac alu luhn Wen Kuloh, ac engankihn ke aetuhi ac oasr luhn God Pahpah, ac Jisus mwet tuhtahf luhn wuhlweacng sasuc.4
Ki luhn pristut inge orekmakihnyuck ke fohnlah la sin mwet sefanna ke pacl se, Prestuhn ac prist fuhlwact emet ke Alu luhn Leum. Na, ke sang lal Prestuhn, mukul nuhkwewa suc sruok Melchizedek Pristut kuh in eis wal ac kuh in sramsram ac orekma ke inen El suc Kuhlwacna. Kuh se inge wacngihn sahflah la. Ma inge ma ke moul ac misac, ke sucu ac Alu uh, ke ohiyac fuhlwact luhn God Sifacna ac orekma ma pahtpaht Lal.
Leum El ahkolah mwet sruok Aaronic Pristut in ekihn elder suc kuhlwacnsap ke luhlahlfongi, kuh, ac tarilacna ke Melchizedek Pristut wolacna sacn.
Ke elder uh, inse kuloh fah yohk srihpac nuh suwos in oruh ip lowos nuh ke kuhlwacnsap nohfohn luhn pristut. Kowos ac fah esam lwen in tikin, titsucr, kuh prist lowos ke mwet suc sruok pristut fuhlwact uh saplakwot in sruhkwack ac ahkkweye kowos ke fuhfahsryucsr ke pristut lowos an.
Mwet nuhkwewa ma sruok Melchizedek Pristut uh esam ma inge, tuhsruhktuh puhla tarilacna uh sahp srihkeni ke yac pucs fahlac. Finsrak luhk pa in sifil ahkosack puhla sacn ac oacyacpac nuhnak kuh se in oruh ma nuhkwewa kowos kuh in kahsruh kais sie oacna kowos eis tari.
Nga srwackna esam pisap se suc oruh nuh sik oacna fin oasr kuh luhk tari ke kuh luhn pristut. El pahngonyuc sie sacnri ah ke nga sie prist. El fahk lah el enenweyuc in companion lal in muhtwacta yurin kuhtuh mempucr ke ward lasr ah. El oruh oacna in muh nga pa finsrak sefanna lal nuh kac. El tiacna enenweyuc. Oasr mwet in kahsruh na wowo lal ke pisaprik.
Kuht muhtwacta yurin katinmas suhkahsruhp ac masrinsracl se. El kena nga in kahsrwel ahkkweye insiyacl, kwacfwell in oraclah ac orekmakihn budget se, ac olwelah nuh sel lah el kuh in tuyak nuh ke acn se ma elac tiac karuhnganuhl sifacna tuhsruhk in kahsruh pac mwet sahyac uh.
Kuht som tohkoh in ahkenganye tuhlihk muhtwacn luo suc puhlakihn sie ohiyac na upac. Ke kuht som ah, pisap el mahmah nuh sihk, “Tuhlihk ingoh fah tiac muhlkuhnlah lah kuht tuhkuh nuh yohrohlos.”
Ke lohm se tok ah, nga liye ohiyac in suli sie mempucr suhkwac wi alu in fohlohk nuh sin Leum ke ahkpwacye nuh sel lah mempucr ke ward ah enenwacl.
Pisap sac sruok Melchizedek Pristut uh suc kahsrweyuc in ke oruh wo liki met ac oruh nga in fokokoi ke srihkasrak wowo. El lutiyuc in oasr kuh ac luhlahlfongi in som nuh ke kuhtwena acn in kuhlwacnsapuh Leum. El misac tari ac fohlohk nuh inkuhsrao, tuhsruhk nga srwackna esamuhl ke srihpen el saplakme in sruhkyucyak ke nga sasuc in sruok Aaronic Pristut uh. Nga etwaclah tok lah el liyeyuc ke inkacnek se ma ac kolyuc nuh ke kunohkohn yohk ke inkacnek luhn pristut uh, yohk likina liye luhk sifacna uh.
Pahpah tuhmuhk ah oruh oacpacna nuh sihk. El mwet fokoko ac lahlmwetmwet se suc sruok Melchizedek Pristut uh. Sie pacl ah siyuckyuck sel sin sie Mwet Sap in suhmuhslah kuhtuh kahs ke mwe ahkpwacye luhn science nuh ke matwacn facluh. El suhmuhslah ahkwoyac, etuh lah kuhtuh mwet ac riti uh ac puhla fokoko lah facluh fuhsr likina mwe ahkpwacye luhn science fwack ingacn.
Nga srwackna ke esam pahpah tuhmuhk ah use nuh sihk kahs ma el suhmuhslah ah ac fahk nuh sihk, “Hal, oasr lom lahlmwetmwet in nguhn lom in etuh fin nga enenuh in suhpwaclah ma inge nuh sin mwet sap ac mwet pahluh uh.” Nga tiac kuh in esam ma pwepuh sac fahk, tuhsruhk ngwac esam us wiyuc ne tok ma pahtpaht tarilacna nga puhla nuh sin sie suc sruok Melchizedek Pristut suc liye keik lahlmwetmwet in nguhn ma nga tiac kuh in liye ah.
Sie fong ah, yac ekahsr tohkoh, tukun nga akmuhsralah nuh ke Mwet Sap se, mwet pahluh se luhn God pahngonyuc ac siyuck sihk in riti sie ma sihmlac ke mwe luti luhn Alu uh. El orekma fong na fohn se in riti sapta ekahsr ke puk sac. El fahk ke sie isrwacsr, “Nga tiac kuh in riti nohfohn ma inge. Kom tiac kuh in monglac ke nga orekma.” Ac na el orekmakihn kahs apkuhran in oacna nuh ke kahs luhn pahpah tuhmuhk: “Hal, kom pa mwet se enenuh in riti ma inge. Kom fah etuh fin pwacye in oreklac ma inge.”
Pactuhn se pacna ingacn ke sie mwet suc sruok Melchizedek Pristut ma kahsruh on oruh wo liki met ah ac sang luhlahlfongi tuhkuh sie fong ke toeni in sramsram orek ke Alu uh. Ke yac 17 matwac, Nga siyucklah in sramsram nuh sin mwet pucspucs. Wacngihn etuh luhk ke ma elos kena sihk. Wacngihn sifac in sramsram kac utuckuh nuh sihk, na oruh nga ahkolah sramsram soko ma srihklac etuh luhk kac ke wosasuc uh. Ke nga sramsram, nga akihlen lah nga oraclah tahfonglac se. Nga srwackna kuh in esam lah tukun nga sramsram ah, oasr puhla koluk se luhk lah nga tiac oraclah wo.
Mwet sramsram se tok ac sahflah an pa Elder Matthew Cowley ke U luhn Mwet Sap Singucul Luo ah. El mwet na suhmaht ke sramsram se—luhngseyuck ke Alu uh nohfohn. Nga srwackna esam ke nga ngwetack nuh sel ke siyah se luhk sisken acn in sramsram sac.
El muhtwacwacack ke sie puhsra fokoko. El fahk lah sramsram luhk ah oruh el in puhla lah el oasr ke sie toeni luhlahp. El isracsr ke el fahk ma inge. Puhla ke tiac oraclah wo luhk ah wacngihnlac ac tuhkuh puhla ke luhlahlfongi lah sie lwen nga kuh in oruh oacna el nuhnkuh muh nga oruh tari ingacn.
Esam se luhk ke fong sac srwackna kolyuc in lohng ahkwoyac ke mukul fuhsr sruok Aaronic Pristut uh sramsram. Ke srihpen ma Elder Cowley el oruh nuh sihk, nga finsrak pacl nuhkwewa tuh ngan lohng kahs luhn God. Nga suhkwac suhpwacrlac ac puhs pacl nga engan, ac nga tiac kuh in tilac isracsr oacna Elder Cowley el oruh.
Ma pucspucs kuh in kahsruh ahkfokokoye mukul fuhsr wiyacsr uh in tuyak ke pristut, tuhsruhktuh wacngihn ma kuh liki kahsruh lasr in ahkkweye luhlahlfongi ac kuh ma elos kuh in luhlahlfongi ke kuh luhn God ke kuhlwacnsap luhn pristut lalos.
Luhlahlfongi ac kuh se inge fah tiac muhtana yohrohlos ke puhlakihn sefanna ke kahsruh sin mwet sruok Melchizedek Pristut suhmaht emet uh. Oruh in orekmakihn kuh ingacn enenuh in ahkyohkyeyuck ke puhlakihnyuck pucspucs ke luhlahlfongi sin mwet suc yohk etuh la ke pristut.
Mwet sruok Aaronic Pristut uh fah enenuh pac lwen nuh kwewa ac finne ao nuhkwewa in ahkkweyeyuck ac kaiyuck sin Leum Sifacna sin Nguhn Muhtahl. Ma inge kuh nuh selos ke elos sulaclah in muhta suwohswohs na ke ma inge. Ma inge wiwina sulaclah elos fah oraclah.
Pa oruh kuht enenuh in luti ke srihkasrak ac ke fahkwack luhlahlfongi lah kahs luhn mwet kol luhn Melchizedek Pristut wowo Tohkohsra Benjamin uh pwacye.5 Kahs inge ma ke luhngse sramsramkihnyuck ke inen Leum, suc ma la pa pristut inge. Tohkohsra Benjamin el luti ma enenuh kacsr in muhta nwacsnwacs na fal in eis ahkkweye ac kaiyuck sin Leum:
“Ac sahflah, nga tiac kuh in sruhmuhn nuh suwos ke ma nuhkwewa ma kowos ac muh oraclah koluk; tuh oasr kain in inkacnek ac ohiyac, finne puhkantwen pwacnwacng nga tiac kuh in oacklah nohfohn.
“Tuhsruhk nga kuh in fahk nuh suwos ma inge, lah kowos fin tiac karihngihn kowos sifacna, ac nuhnak lowos, ac kahs lowos, ac orekma lowos, ac liyacacng masap luhn God, ac tahfwelah in luhlahlfongi ke ma suc kowos lohng ke tuhkuh luhn Leum, finne nuh ke sahflahiyacn moul lowos, kowos fah misac. Ac inge, O mwet, esam, ac tiac misac.”6
Kuht nuhkwewa etuh ke mwe pihsr fihrihr luhn mwet lokoalok luhn suwohswohs ma tuhkuh oacna pahkah upac lain mwet sruok pristut fuhsr kuht luhngse yohk uh. Nuh sesr, elos oacna mwet mweun fuhsr, suc pahnglolos sifacna tuhlihk mukul nahtuhl Helaman. Elos kuh in kuhtanglah, oacna mwet mweun fuhsr ah tuh oruh, elos fin karuhngannuhlosyang sifacna in sef, oacna Tohkohsrah Benjamin el tuh kwacfwelos in oruh ah.
Tuhlihk mukul nahtuhl Helaman ah tiac tahfuhluo. Elos mweun ke puhlaik ac kuhtanglah mweyen elos luhlahlfongi kahs luhn ninac kiyaclos.7 Kuht etuh ke kuh luhn luhlahlfongi luhn sie ninac luhngse. Ninac uh sang kuh fokoko nuh sin tuhlihk mukul nahtuhlos uh mihsenge. Kuht mwet sruok pristut uh kuh ac enenuh in sang pac nuh ke ahkkweye se ingacn ke nuhnak lasr in topuk pweng se in eklac nuh ke wosasuc, kuht enenuh in saplakyang in ahkfokokoye tamuhlwel wiyacsr uh.8
Pruhe luhk uh pa elos suc sruok Melchizedek Priesthood an fah insese nuh ke pahng se ma tuhkuh sin Leum:
El fahk lah fin kuhtwena mwet ma kuh in nguhn, lwelah el in usacl suc muhnahs, el in kuh in ahksuwohsyeyucklac ke inse puhsisacl, tuh el in muh kuh in fokokoi pac.
El fahk kuht in us yohrohsr mwet suc oasr ke pristut puhsisacl, ac suhpwacloslac met liki kuht in oraclah pacl in muhtwacta, ac ahkolah inkacnek uh, ac ahkfalye pacl in muhtwacta ma kuht tiac kuht in ahkfalye.
El fahk pa inge inkacnek lah mwet sap Lal, ke lwen met ah, muhsahiyuck Alu Lal nuh Sel.9
Kowos mwet kol luhn pristut ac pahpah tuhmwacn mukul fuhsr sruok Aaronic Pristut uh kuh in orek ma usrnguck. Kowos kuh in kahsruh Leum nwacklah wal luhn mwet elder luhlahlfongi yurin mukul fuhsr suc eis pahng sacn in luti wosasuc ac oruh ohinge ke luhlahlfongi. Kowos ac fah liye mwet pucs kowos sruhkwack ac kwacfe in muhta ke luhlahlfongi, pahyuckyak ke suwohswohs lun tempuhl, ac in fohlohk, sruhkwack ac ahkolah mwet sahyac uh.
Ac tiac enenuh in mukwikwi sasuc, kuhfa in luti wo likina, kuh social media wo liki. Ac tiac enenuh in pahng sasuc liki pahng lom ingena. Fuhlahk ac olweacng luhn pristut usot nuh suwos kuh, wal, ac inkacnek. Nga pruhe kowos ac fohlohk nuh lohm ah ac lutlut ahkwoyac ke fuhlahk ac olweacng luhn pristut, konweyuckyak ke Doctrine and Covenants section 84.
Kuht nuhkwewa finsrak tuh puhs mukul fuhsr ac fah puhlakihn oacna Wilford Woodruff, suc oasr Aaronic Pristut la luti wosasuc luhn Jisus Kraist ke kuh fokoko.
Nga pruhe tuh kuht fah tuyak nuh ke pahng lasr in sruhkwack mwet sahyac uh in ahkoeloslac nuh ke kuhlwacnsap wolacna lalos. Nga sang kuloh ke insiyuck nohfohn nuh sin mwet wolacna suc sruhkyucyak ac ahkkahlwemye nuh sihk ohiyacn luhngse ac in sruhkwack mwet sahyac uh.
Nga fahkwack luhlahlfongi lah Prestuhn Thomas S. Monson el sruok ki nuhkwewa luhn pristut fin facluh ke pacl se inge. Nga fahkwack mwe loh lah el, ke moul in kuhlwacnsap, pa sie srihkasrak wowo nuh sesr in saplaklac in sruhkwack mwet sahyac ke mwet suc sruohk Melchizedek Pristut. Nga sifacna sang kuloh ke ohiyac se ma el sruhkyucyak ac ahkkahlwemye nuh sihk ohiyac in sruhkwack mwet sahyac uh.
God Pahpah El moul. Jisus El pa Kraist. Pa inge Alu ac Tohkohsrahi Lal. Pa inge pristut Lal. Nga etuh ma inge sifacna ke kuh luhn Nguhn Muhtahl. Ke inen Leum Jisus Kraist, amen.