![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F82%2Fef%2F82ef838e721089c8f050a1b1d5879accad203c78%2F82ef838e721089c8f050a1b1d5879accad203c78.jpeg/full/!250,/0/default)
Auliyak: Sie Sulwaclah Engan
Auliyak uh tiacna ma kuh se na tuhsruhk ma engan se pac ke srihpen Mwet Lahngo lasr.
Tamuhlwel ac tahmtahel sacohk wiyuck, ke nga tuh yac 12 ah, sucu luhk ah tuh muhta fin acn Göteborg, sie mura pe kof ah ma oasr fin acn Sweden. In kahsruh ahkuhtweyac acn sacn, pa sie mura srihsrihk sin sie mwet sacohk kuht etuh Elder Per G. Malm,1 suc misac ke summer se inge. Kuht ahsrellah. Kuht tarilacna ke wo lal ac kuhlwacnsap wolacna ac ke srihksrak luhn sucu kahto se lal uh. Ac pwacyena kuht pruhe ke mwe insewowo puhkantwen luhn God in ma lalos.
Yac limekohsr somlah ah, kuht wi alu ke sie lohm luhlahp ahksasucyeyucklac. Sie sacnri ah, kawuck se luhk Steffan,2 tikin sefanna sahyac ke pracns sac, painyuc ke alu ah ke enganwack. Kuht som nuh ke sie infuhkihl mwesahs se lun lohm sacnri sac, ac el eislah firecracker luhlahp se liki pakiht se lal ah wi kuhtuh mactsis. Ke puhlaik luhn mwet fuhsr se, nga sruhkwack firecracker sac ac ahkoswack fuse loeloes soko kac an. Srihke luhk uh pa in konwelah met liki fokwelihk. Tuhsruhk ke nga esuhkwack kufun pouk ke srihke in oruh ma ingacn, nga tuh fuhlwelah firecracker sac. Steffan ac nga liye ke sahngweng luhlahp ke fuse ke firecracker sac kalweni in fihrihr.
Firecracker sac fokwelihk, ac fofosr na pwacye infuhkihl sac wi pac lohm sacnri ah. Kuht suhlahklahk in oracni ipin ma luhlah okarelihk ke firecracker sac ac ikacslah winto ah in srihke in eislah fohloh kac ah, finsrak ke lahlfon tuh wacngihn mwet ac akihlen. Ke wo ohiyac, wacngihn mwet ongaiyac ac wacngihn ma kuhnausyucklac.
Ke mempucr uh tuhkuh nuh ke miting uh, elos kuh in ngok fohloh na fokoko kac uh. Koflah in tiac akihlenyuck fohloh sac. Fohloh kac ah arlac wakre muhtahliyacn miting sac. Ke srihpen suhpuhs mwet sruok Aaronic Pristut—ac ke ma kuh in ahkuhtweyucki oacna fohs luhn nuhnak—nga kihtaclihk kuhfa luhn Leum, tuhsruhk nga tiacna puhla fal in ipeis kac. Ke pacl ma kuhfa luhn Leum tuhkuh nuh sihk, nga tiac ipeis puhret kuh kof. Nga tuh puhla koluk na pwacye. Nga mwekihn na pwacye, ac nga etuh lah ma nga oraclah ah ahksuhpwacrye God.
Tukun alu ah, prestuhn luhn pracns sac, Frank Lindberg, sie mukul mahtuh ahkfuhlwactyeyuck suc insifacl fiyacyac, siyuck sihk in tuhkuh nuh ke ohfohs lal ah. Tukun nga muhta, el ngwetma nuh sihk ke kuhlwacng ac fahk muh el liye lah nga tiacna wi ipeis ke kuhfa luhn Leum. El siyuck lah efuh. Nga nuhnkuh muh el etuh lah efuh. Nga nuhnkuh muh mwet nuhkwewa etuh ma nga oraclah ah. Tukun nga fahk nuh sel, el siyuck lah nga puhla fuhkah. Ke sronin muhta, nga tuhng mwemwelihl in tuhlweyuclac ac lah nga etuh muh nga ahksuhpwacrye God.
Prestuhn Lindberg el ikacslah Doctrine ac Covenants na mahtuh se ac siyuck sihk in riti kuhtuh fuhs mahkiyucki ah. Nga riti yohk ma inge:
El suc auliyak liki ma koluk lal eis nuhnak muhnahs, ac Leum El fah tiac sifilpac esam ma koluk lal.
Ke ma inge kom fah etuh fin sie mwet auliyak liki ma koluk lal—el fah taltal koluk ac fuhlwelah ma koluk lal.3
Nga fah tiac muhlkuhnlah isrwacsr in luhngse lal Prestuhn Lindberg ke nga ngwetwack tukun nga riti ah. Ke puhla yohk lal, el fahk nuh sihk lah wo nga in sifilpac ipeis ke kuhfa luhn Leum. Ke nga som liki ohfohs lal ah, nga puhla engan ma tiac kuh in ahkuhtweyucki.
Kain engan inge pa sie sin ma tuhkuh ke auliyak uh. Kahs se auliyak kalmac “in kahlwem kac tok” ac kalmac pac in “eklac.”4 Ke kahs Sweden, kahs sacn pa omvänd, ma kalmac na pa “in ekuhllah.”5 Mwet sihm Kristin se, C. S. Lewis, el suhmuhslah ke enenuh se ac ohiyac se in eklac. El fahk muh auliyak uh weacng “in sifilpac fihliyucki ke inkacnek suwohs. Sie ma koluk kuh in ahksuwohsyeyucklac,” el fahk, “tuh tiac kuh nwe ke kuht kuh in konwacack tahfonglac lasr ac muhtwacwacack sasuc ke pacl sacn fahlac, tiacna ke kuht srihke in muhlkuhnlah.”6 In ekuhllah ohiyacsr ac fohlohk nuh ke “inkacnek suwohs” wi ip yohk luhn auliyak, tuh tiacna nohfohn. Auliyak pwacye weacng pac eklac se luhn insiyacsr ac kena lasr nuh sin God ac in tohllah ma koluk.7 Oacna ahkuhtweyucki ke Ezekiel, in auliyak pa in: “tui liki … koluk … ac oruh ma wo ac suwohs; … folokunla mwe akpwaye, … [ac] moul fal nu ke ma sap su sang moul nu sel.”8
Tuh finne ma inge suhfal in ahkuhtweyac. Tiacna ahkkahlwemye na pwacye kuh se ma oruh auliyak in ma pwacye se uh, kihsac in iwaclah luhn Mwet Lahngo lasr. Auliyak pwacye enenuh in orekmakihn luhlahlfongi ke Leum Jisus Kraist, luhlahlfongi muh El kuh in ekihlkuhtlac, luhlahlfongi muh El kuh in use nuhnak muhnahs nuh sesr, ac luhlahlfongi muh El ac kahsrwe kuht kahingkihn sifilpac tahfonglac uh. Kain luhlahlfongi se inge oruh Iwaclah Lal orekma ke moul lasr. Ke kuht “kahlwem kac tok” ac “eklac” ke kahsruh luhn Leum, kuht kuh in puhla finsrak ke olwelah Lal ac engan ke nuhnak muhnahs. Fuhnuh wacngihn Mwet Lahngo, luhkuhn finsrak ac engan kac uh wacngihnlac, ac auliyak ac eklac ma suhpwacr se in ekuhllah ohiyacsr. Tuh ke orekmakihnyacn luhlahlfongi lasr kacl, kuh ekuhllah ohiyacsr nuh ke kuh ac kena Lal in sang nuhnak muhnahs ke ma koluk.
Prestuhn Boyd K. Packer el ahkpwacyei olwelah in finsrak luhn auliyak ke Epril 2015 ah ke toeni luhlahp sahflah lal. El ahkuhtweyac kuh ke Iwaclah luhn Mwet Lahngo in ahkkweye kuht ke ma nga nuhnkuh muh pa oracniyacn lahlmwetmwet lal ke yac luhmngaul el kuhlwacnsap oacna mwet sap se. Prestuhn Packer el fahk: “Iwaclah uh tiacna likiyac mwe akucl. Ma oreklac kac uh oreklac na … Iwaclah ahkkweyeyucklac, ac ma ahkkweyeyucklac uh ahkkweyeyucklac nwe tok.”9
El oacyacpac fahk:
“Iwaclah sac, ma kuh in molikuhtlac kais sie, tiacna likiyac kihnet uh. Kalmac pa finne meac kuht oruh kuh acn ma kuht som nuh we kuh sikyak fuhkah, kuht fin auliyak na pwacye, [Mwet Lahngo] El olwelah lah El ac iwaclah. Ac ke El iwaclah, ma ingacn ahkfalyeyucklac lah. …
“… Iwaclah sac … kuh in ahknwacsnwacsye ma fohkfohk nuhkwewa finne fuhkah upaciyac kuh lusackah kuh kalweniyuck pacl ekahsr.”10
Kuhiyacn Iwaclah luhn Mwet Lahngo ma ne tok ma pahtpaht ke luhpah ac loaliyac, nuh suwos ac nuh sihk. Tuh tiac kuh in oreklac kuht fin tiac luhngse. Oacna mwet pahluh Lehi el ahkuhtweyac, tukun kuht “lutiyuck fal” in “etuh ma wo liki ma koluk,”11 kuht “sukohsohk in sulwaclah moul sukohsohk ac moul ma pahtpaht, ke Mwet Iwe wo luhn mwet nuhkwewa, kuh in sulwaclah srohoh ac misac.”12 Kuh ke kahs sahyac, auliyak pa sie sulwaclah.
Kuht sukohsohk—ac kuhtuh pacl uh sulwaclah—ma siena. Kuhtuh sulwaclah uh sahp tiacna puhla koluk na pwacye, tuh kuh in kutongkuhtlac in auli pwacye ac pwacnwacng tulokihnkuhti liki sukyacn auliyak pwacye. Kain oacna, kuht ac sahp sang mwacta nuh sin mwet sahyac. Oacna tuhlihk mukul matwac singucul luo se fin acn Göteborg ah, nga kuh in sang mwacta nuh sel Steffan. El pa us firecracker luhlahp sac ac mactsis ah nuh lohm sacnri ah. Tuhsruhk in sang mwacta nuh sin mwet sahyac, finne luhman pwacye, lwelah kuht sifacna in macnsiskihn ohiyacsr. In oruh ohinge, kuht luhmweyac mukwikwi lasr nuh sin mwet sahyac. Ke ma kunacsr totoyang nuh sin mwet sahyac uh, kuht srihkkihn enenuh se lasr ac kuhiyacsr in sifacna mukwikwi. Ma inge oruh kuht in mwet ma koflah sifacna kahsruh likina mwet sukohsohk suc kuh in sifacna orekma.13
Siepacna sulwaclah ma tulokihnyac auliyak uh pa in srihkkihn tahfonglac lasr. Ke ma sikyak fin acn Göteborg ah, wacngihn mwet ngalyak, wacngihn ma kuhnausyucklac, ac toeni ah srwackna fahlac. Sahp fihsrwacsr in fahk lah wacngihn srihpac in auliyak. Tuhsruhk in srihkkihn tahfonglac lasr, finne wacngihn ma koluk sa tuhkuh, eislah kena se in eklac. Kain in nuhnak inge tulokihnkuhti in liye lah tahfonglac lasr ac ma koluk lasr uh kuh in ekuhllah ma nwe tohk ma pahtpaht.
Sie pac ohiyac in nuhnkuh muh ma koluk lasr uh tiacna yohk srihpac ke srihpen God El nuh luhngse na kuht finne meac kuht oruh. Fihsrwacsr in srihfeyuck in luhlahlfongi ma Nehor mwet kikiacp sac luti mwet Zarahemla ah: “Lah mwet nuhkwewa enenuh in moliyucklac ke lwen sahflah, ac tuh elos tiac enenuh in sahngweng kuh rarrar, … ac, ke sahflahiyac uh, mwet nuhkwewa enenuh na in moul ma pahtpaht.”14 Tuhsruhk nuhnak kuhtasrihk se inge ma suhtuhuh se. Pwacye lah God El luhngse kuht. Tuhsruhk tuh, ma kuht oruh yohk srihpac nuh Sel ac nuh sesr. El use mwe kolyuck kahlwem lah kuht ac mukwikwi fuhkah. Kuht pahngon ma inge masap. Kaksak lal ac moul ma pahtpaht lasr wiwi na mukwikwi lasr, weacng kena lasr in suk ke puhsisacl auliyak pwacye.15
Oacyacpac, kuht fuhlwelah auliyak pwacye ke kuht sulwaclah in fahsr luhkwel God ac masap Lal. Ke sahflah, luhkuhn kuhfa luhn Leum tiac ma muhtahl se, fuhnuh tiacna yohk srihpac lah folin firecracker ah wakre toeni in kuhfa luhn Leum sac fin acn Göteborg. Kuht enenuh in sensenkihn srihkkihnyacn ma koluk uh ke kuht kuhnaoslah kuh fihliyac nuh sahyac kuh luhn God ke masap Lal. Auliyak pwacye uh enenuh akihlenyac muhtahliyen Mwet Lahngo ac ma pwacyeiyacn orekma ke lwen-sahflah Lal uh.
Sahyacn na orek excuse, lwelah kuht in sulwaclah auliyak uh. Sin auliyak uh, kuht kuh in acsmaklac, oacna wen tuhlac se ke puhpuhlyuck soko ah,16 ac motko ke yohk srihpaciyacn ma pahtpaht ke sulwaclah lasr. Ke kuht kahlwem ke kuhpahsr se inmahsrlon engan ma pahtpaht lasr, kuht tiac srihke in auliyak pwacye muhkwena tuhsruhk kuht oacyacpac oruh wo liki met ah. Ke kuht srihfeyuck, kuht kuh pacna in siyuck sesr sifacna, ke kahs lal William Shakespeare:
Faskah nga fuhnuh eis ma se nga suk kac?
Sie mwemwe, sie momong, sie puhla srihsrihk luhn engan ma kahinglac.
Suc moli mwe pwacr ke minuht se in tuhng ke wik fohn se,
Kuh kuhkwackihn moul ma pahtphat in eis mwe ahkpwacr?17
Fin wacngihnlac kuh in liye ma pahtpaht lasr uh ke srihpen mwe ahkpwacr, kuht kuh in sulwaclah in auliyak. Ke srihpen Iwaclah luhn Jisus Kraist, oasr pacl ahkluo lasr. Ke srihkasrak inge, kuht kuh in ahollah mwe ahkpwacr se kuht tuh moli ke ohiyac tiac wo se ke pacl se emet ac sifilpac eis finsrak luhn ma pahtpaht uh. Oacna Mwet Lahngo El ahkuhtweyac, Leum suc Mwet Molwelah lasr El kweokkihn misac ke mahno ac puhla ngal luhn mwet nuhkwewa in muh mwet nuhkwewa kuh in auliyak ac tuhkuh nuh Yohrohl.18
Jisus Kraist El kuh in nuhnak muhnahs ke srihpen El molwelah molin ma koluk lasr uh.19
Mwet Molwelah lasr El sulwaclah in nuhnak muhnahs ke srihpen pahkotwen, luhng kuhlwacng, ac luhngse fuhlwactlacna Lal.
Mwet Lahngo lasr El kena nuhnak muhnahs mweyen pa inge sie sin ohiyac muhtahl Lal.
Ac, ke El oacna Shepherd Wo se uh, El engan ke kuht sulaclah in auliyak.20
Finne ke kuht puhla auli na pwacye ke mukwikwi lasr uh,21 ke kuht sulwaclah in auliyak, kuht suli Mwet Lahngo nuh ke moul lasr ingena. Oacna mwet pahluh Amulek el luti, “Kowos in tuhkuh ac tiac sifilpac ahkkwekweye insiowos; tuh liye, pa inge pacl ac lwen in molwelah lowos; ac ke ma inge, kowos fin auliyak ac tiac ahkkwekweye insiowos, kihtin mihsenge fah plwacn wolacna luhn molwelah fah utuckoht nuh suwos.”22 Kuht kuh in puhla auli na pwacye ke mukwikwi lasr uh ac, ke pacl sacn pacna, puhla engan in eis kahsruh luhn Mwet Lahngo.
Ma pwacye se lah kuht kuh in auliyak pa pweng wowo ke wosasuc uh!23 Mwacta uh kuh in “iyucklac.”24 Kuht kuh in sesseslah ke engan yohk, eis nuhnak muhnahs ke ma koluk lasr, ac eis “mihslac ke nuhnak.”25 Kuht kuh in sukohsohklac liki puhla ahsor ac mwe kapihr luhn ma koluk uh. Kuht kuh in sesseslah ke kahlwem wolacna luhn God ac “tilac kweok.”26 Auliyak uh tiac ma kuh se muhkwena tuhsruhk mwe engan se pac ke srihpen Mwet Lahngo lasr. Nga srwackna esam puhla ma nga puhla ke ohfohs luhn pracns prestuhn sac tukun ma sikyak ke firecracker sac. Nga etuh lah nga eis nuhnak muhnahs. Puhla luhn mwacta luhk wacngihnlac, ahsor luhk sruhkyuckyak, ac insiyuck puhla muhlahlahlac.
Tamuhlwel ac tahmtahel, ke kuht ahksahfyelah toeni se inge, nga suli kowos in puhla engan liki met ah ke moul lowos an: engan in etuh lah Iwaclah luhn Jisus Kraist ma na pwacye se; engan ke kuh luhn Mwet Lahngo, inse puhsisacl, ac kena in auliyak; ac engan in sulwaclah auliyak. Lwelah kuht in ukwe kolyuck in “ke engan … nihm ke kof nwacsnwacs in molwelah.”27 Lwelah kuht sulwaclah in auliyak, fahsr liki ma koluk lasr, ac ekuhllah insiacsr ac kena lasr in ukwe Mwet Lahngo lasr. Nga fahkwack lah pwacye El moul. Nga mwet loh se ac kalweni in eis luhng kuhlwacng, pahkotwen, ac luhngse fuhlwactlacna Lal. Nga pruhe tuh mwe insese wowo luhn molwelah ke Iwaclah Lal kuh in ma lowos ingena—ac sifilpac ingelacna ne tok ke moul lowos,28 ke orek oacna nuh sihk. Ke inen Jisus Kraist, amen.