2010–2019
Sie Nguhsr nuh sin Tahmtahel Wiyuck uh
October 2015
15:33

Sie Nguhsr nuh sin Tahmtahel Wiyuck uh

Sel Prestuhn Russell M. Nelson

Prestuhn ke U luhn Mwet Sap Singucul Luo uh

Kuht enenuh kuh lowos, eklac lowos, misaclah lowos, kuh lowos in kol, lahlmwetmwet lowos, ac puhsrwewos.

Pain kowos Elders Rasband, Stevenson, ac Renlund, kuht, Tamuhlwel wiowos uh, pain kowos nuh ke U luhn Mwet Sap Singucul Luo uh. Kuht kuloh nuh sin God ke fahkwack ma El sang nuh sin mwet pahluh Lal, Prestuhn Thomas S Monson.

Tamuhlwel ac tahmtahel, ke kuht ohsun ke toeni luhlahp ke mahlwem ohnkohsr somlah ah, wacngihn sesr motko eklac ma e tuhkuh ma kuh in ollah insien Alu se nohfohn. Elder L.  Tom Perry el oraclah sie pweng na fokoko ke kunohkohn koflah na ayaollac lah tuh pahyuck ac sucu uh oasr lun plwacn luhn Leum. Kuht lut na pwacye ke lwen na ekahsr tohkoh ah, kuht etwacack lah cancer se in pacl na sa pa e esacllah liki kuht uh.

Finne kuh in mahno lal Prestuhn Boyd  K. Packer ah muhnahslah na, el ahkwot in “motlacni na” ke orekma luhn Leum. El muhnahslah ke Eprel tari ah, tuh el kampare na in fahkwack mwe lohoh lal ke el srwack momong uh. Na, lwen na 34 somlah ah tukun misac lal Elder Perry ah, Prestuhn Packer el oacyacpac som wacngihnlac liki kuht.

Kuht ahsrwellah Elder G. Scott ke toeni luhlahp se tari ah, tuhsruhk kuht nuhnkuh ke mwe lohoh fokoko luhn Mwet Lahngo el fahkwack ke toeni pucspucs met ah. Ac kena lwen 12 tari ah, Elder Scott el pahngonyuck nuh lohm ah ac sifil weluhl Jeanene muhtwacn kiacl.

Nga eis pacl wowo in wi Tamuhlwel inge nohfohn ke lwen sahflah lalos uh, weacng mempucr wi mempucr ke sucu lal Prestuhn Packer ac sucu fototo lal Elder Scott ah met likina misac lalos ah. Upac nuh sihk na pwacye in luhlahlfongi lah kawuck na sacohk tolu inge, mwet kuhlwacnsap wolacna luhn Leum inge, wacngihnlac. Nga ahsrweloslac yohk liki na nga in fahk uh.

Ke nga nuhnkuh ke ma tiac motkoeyuck uh sikyak inge, sie sin ohiyac ma oan na sihk uh ma nga tuni ke ma inge uh pa muhtwacn kiaclos ma moul uh. Oan na in nuhnak luhk uh pa luhman mihsiyacl Tahmtahel Donna Smith Packer ac Tahmtahel Barbara Dayton Perry ke sisken mwe oan kiacn mukul tuhmwaclos ah, muhtwacn luo uh kwewana sesseslah ke luhngse, pwacye, ac luhlahlfongi nwacsnwacs.

Ke Tahmtahel Packer el muhta sisken mukul tuhmwacl an ke ao sahflah lal an, el suhpwaclihk mihs sacn ma ahluhkwelah etwacack nuh kwewa.1Tuh el akihlen lah kawuck sacohk sahflah se lal ke apkuhran in yac 70 ac sana som, el ahkkahlwemye ohiyacn mihs luhn sie muhtwacn sesseslah ke luhlahlfongi. Oacna in lipufacn se pa el, oacna ke el oan ke petsac se kaclos ke kihsaclah luhn Brigham City Tempuhl e Utah ah.

Prestuhn ac Tahmtahel Packer e ke Brigham City Utah Tempuhl ah

Nga liye pacna kain luhngse se ingacn ac luhlahlfongi tuhkuh sel Tahmtahel Perry uh. Oaru lal nuh sin kwewana mukul tuhmwacl an ac Leum arlac kahlwem, ac mokleyuc na upac.

Elder and Tahmtahel Perry

Ke ao sahflah yurin mukul tuhmwaclos an ac ahkwot ne mihsenge, muhtwacn fokoko inge ahkkahlwemye kuh ac puhlaik ma muhtwacn liyacacng-olwelah pacl nuh kwewa uh ahkkahlwemye uh.2Ac upac in srihkeyucki mokleyuck luhn kain muhtwacn inge, tiac ke sucu uh muhkwena tuhsruhk ke Alu luhn Leum,ke ekihnyacn muhtwacn pahyuck, ninac, ac ninac mahtuh; oacna tahmtahel ac aunts; oacna mwet luti ac mwet kol; ac yohkna oacna mwet srihkasrak ac mwet karihngihn fokoko ke luhlahlfongi uh.3

Ma inge nuh pwacye na ke fihl in wosasuc nuh kwewa e ke lwen lal Adam ac Eve ah. Tuhsruhk muhtwacn ke fihl se inge siena liki kuhtwena muhtwacn sahyac uh ke srihpen fihl se inge siena liki kuhtwena ma sahyac uh.4Siena se inge use kwewana pacl wowo ac kunohkohn uh.

Petsac kacl Prestuhn Kimball

Yac tolngoul ohnkohsr somlah ah, ke 1979, Prestuhn Spencer  W. Kimball el oraclah sie palye na yohk ke ma sikyak ma muhtwacn liyacacng olwelah uh kuh in oruh ke pacl fahsruh ke Alu luhn Leum. El palye: “Yohk kapwack luhlahp ma ac tuhkuh nuh ke Alu uh ke lwen sahflah uh fah tuhkuh ke srihpen puhs sin muhtwacn wowo fin facluh uh … fah tuhkuh nuh ke Alu uh ke luhpah luhlahp uh. Ma inge fah sikyak nuh ke pacl se ma muhtwacn ke Alu uh ahkkahlwemye suwohswohs ac fihsrwacsr in kahlwem ke moul lalos ac nuh ke pacl se muhtwacn ke Alu uh liyeyuck siena ac ohi—ke inkacnek na engan—likina muhtwacn fin facluh uh.”5

Tahmtahel sacohk wiyuck, kowos mwet yohk srihpac lasr ke pacl sahflah se inge, lwen suc ma Prestuhn Kimball el tuh liye ah pa lwen mihsenge uh. Kowos pa muhtwacn el tuh liye ah! Wo, kahlwem, luhngse, etwacack, puhlaik, wo pihngac kuh ohi, luhlahlfongi, ac moul suwohsowhs lowos uh fah use muhtwacn wowo fin facluh uh, wi sucu lalos an, nuh ke Alu uh ke pihsac na luhlahp! 6

Kuht, tamuhlwel wiyowos, enenuh kuh lowos, eklac lowos, muhngnguh lowos, kuh lowos in kol, lahlmwetmwet lowos, ac puhsrwewos. Tohkohsrahi luhn God tiacna ac koflah fohnlah sahyacn muhtwacn suc oraclah olwelah muhtahl uh ac na liyaclosyang, muhtwacn suc kuh in sramsram ke kuh ac wal luhn God!7

Prestuhn Packer el fahkwack:

“Kuht enenuh muhtwacn suc akwucki ac muhtwacn ma kuh in oaki. Kuht enenuh muhtwacn ma yohk kuh la suc kuh in plwacnwelah ac kol ac karihngihn; muhtwacn suc kuh in luti, muhtwacn suc ma kuh in kahslah sramsram. …

“Kuht enenuh muhtwacn ma oasr mwe sang ke etuh nuhnak in akihlen suc kuh in liye ohiyac luhn facluh ac konwacack elos mwet ma, sahp ne eye tuh, pa suhloal kuh sisensen.” 8

Mihsenge, lwelah nga in sang fahk pac lah kuht enenuh muhtwacn suc maetuh in oraclah ma yohk srihpac uh in sikyak ke luhlahlfongi lalos ac puhlaik in tu kuh ke m,a wo ac sucu ke sie facl maslah ke ma koluk. Kuht enenuh muhtwacn suc kwacfweacng in karuhnganwacng tuhlihk nuhtin God ke inkacnek olwelah nuh ke ma pahtpaht; muhtwacn suc etuh ohiyac in eis fwackyuck la sifacna, suc kahlwem ke kuh ac mihs ke mwe sang muhtahl tempuhl; muhtwacn suc etuh ohiyacn pahngon kuh inkuhsrao in karihngihn ac ahkkweye tuhlihk ac sucu uh; muhtwacn suc tiac sahngweng in luti.

Ke moul luhk nohfohn, nga ahkinsewowoyeyuck sin kain muhtwacn inge. Muhtwacn sacohk kiyuck, Dantzel, el muhtwacn se na. Nga fah arlac tarilacna pacl nuh kwewa ke ma mokleyuck in ekuhllah moul luhk el oruh nuh sihk ke ip nuh kwewa ke moul luhk uhnuhkwewa, weacng kuhiyen mukwikwi luhk ke laslas ke at luhkuh.

Yac luhmngaul alkosr somlah ah siyuckyuck sihk in oruh laslas se ke sie tuhlihk muhtwacn srihsrihk, mas na upac ke kuh mihsen at. Tamuhlwel mahtuh se wiyacl ah tuhfahna misac ke atac sac pacna. Pahpah ninac kiacl an ngihsre ke kahsruh. Nga tiac arlac wo nuhnkuck kac tuhsruhk olwelah in oruh kuhiyuck nuh kwewa in molwelah moul lal an. Ne ke kuhiyuck uh kwewa, tuhlihk sac misac. Tohkoh, pahpah ninac sacn pacna use siepacna tuhlihk muhtwacn nuh yuruk, mahlwem 16 matwac pacl sac, oacyacpac isuslac ke sie heart koluk. Sifilpac na, ke nguhsr lalos uh, nga oraclah laslas se . Ahwowo se inge misac pac. Misac ahsor ahktolu se luhn sucu se inge fortweyucwi na pwacye.

Nga som nuh lohm ah ahsor na upac. Nga sisyuwi lun lohm sesr ah in falfuhl uh ac tuhng fong fohn. Dantzel el muhtana siskuck, lohng ke nga kalweni in fahk lah ngwac fah tiac sifil oruh siepac laslas ke at uh. Na, ke ao 5:00 ke lututacng ah, Dantzel el ngwetma nuh sihk ac siyuck ke luhngse, “Kom tari ke tuhng uh? Koacl nuknukyang. Fohlohklac nuh ke orekma lom ah. Som orekma! Kom enenuh in sifilpac lutlut yohk. Kom fin tui ingena, mwet sahyac uh fah kweoklacna in lotwelah ma kom etuh tari uh.”

We, fuhkah luhpan enenuh luhk ke etuh, puhlaik, ac luhngse luhn muhtwacn kiyuck ah an! Nga fohlohklac in orekma ac sifilpac lutlut. Fuhnuh te ke pahtok mokleyuck lal Dantzel ah, luhkuhn nga tiac oruh open-heart surgery uh ac fah tiac ahkolah in oruh operation ke 1972 ah in molwelah moul lal Prestuhn Spencer  W. Kimball ah.9

Tahmtahel, yac kowos akihlen lusac ac acn kowos mokleack uh ke kowos sramsramkihn ma ma tuhkuh ke insiac ac nuhnak lowos uh oacna ke kolyuck sin Nguhn uh? Sie stek prestuhn na wowo el fahk nuh sihk ke sie miting luhn stek council ma elos akuhkuhin ke sie ma upac na yohk. Ke sie pacl ah, el akihlen lah stek prestuhn ke U luhn Tuhlihk Srihsrihk an tiacna sramsram, oruh el siyuck sel fin oasr nuhnak lal. “Ac, ahok oasr,” el fahk ac na muhtwacwacack in akacsruhi sie nuhnak ma ekuhllah fahsr luhn miting na fohn sacn. Stek prestuhn sac kalweni, “Ke el sramsram ah, Nguhn fahkwack nuh sihk lah el sang puhsra nuh ke fwackyuck kuht suk ke miting sac uh.”

Tahmtahel sacohk wiyuck, oacna sie kunohkohn lowos an, finne fuhkah ohiyac lowos uh, kuht enenuh atac lowos, nuhnak lowos, ac mokleyuck lowos uh. Kuht enenuh kowos in sramsram lihksrweni ac sramsram ke ward ac stek council uh. Kuht enenuh kais sie tahmtahel ma pahyuck tari in sramsram oacna “sie u inkahsruh ac fohnlahluhn u” 10 ke kom tuhkweni yurin mukul tuhmowos in kol sucu lowos. Pahyuck kuh lolacp, oasr yurin tahmtahel uh kuh sifacna ac nuhnak wowo ma kowos eis oacna mwe sang sin God. Kuht kohflah in etahin mokleyuck wowo lowos.

Kuht etuh lah mukwikwi sahflah ke ma oreklac nuh kwewa ah pa oreklac luhn muhtwacn se!11Kuht enenuh kuhiyowos!

Koase lain Alu uh, mwe luti kac uh, ac ohiyen moul lasr uh ac yohkwaclihk. Ke srihpen ma inge, kuht enenuh muhtwacn suc oasr kahlwem fokoko la ke mwe luti luhn Kraist ac suc fah orekmakihn kahlwem ingacn in luti ac kahsruh in lain ma koluk luhn fihl se uh.12 Kuht enenuh muhtwacn suc kuh in akihlen kuhtasrihk ke ohiyac nuh kwewa uh. Kuht enenuh muhtwacn suc etuh ohiyac in eis kuh ma God El sang nuh sin mwet liyacacng olwelah uh ac suc ahkkahlwemye luhlahlfongi lalos ke kuh ac luhngse muhtahl. Kuht enenuh muhtwacn suc puhlaik ac ohiyac lal If Ninac kiacsr uh.

Tahmtahel sacohk wiyuck, wacngihn ma yohk srihpac nuh ke moul ma pahtpaht lom an likina eklac lom sifacna uh. Muhtwacn suc eklac, ac liyacacng olwelah—ac nga sramsram pac ke muhtwacn sacohk wiyuck Wendy—suc moul suwohswohs fah pihsrlac yohkwaclihk ke sie facluh koluklac ac suc fah pwacyena liyeyuck oacna ma siena ac sielacna ke inkacnek engan emet uh.

Oruh mihsenge nga ngihsre yurin tahmtahel wiyuck ke Alu luhn Jisus Kraist luhn Mwet Luhlahlfongi ke Lwen-sahflah uh in tuyak nuh met! Eis acn suwohs ac enenuh lowos lun lohm suwos, lun mura lowos, ac lun tohkohsrahi luhn God—yohk likina kowos oruh met ah. Nga ngihsre kowos in ahkfalye kahs in pahluh lal Prestuhn Kimball ah. Ac nga olwelah nuh suwos ke inen Jisus Kraist lah ke kowos oruh ohinge, Nguhn Muhtahk fah ahkyohkye mokleyuck lowos ke inkacnek na usrnguck.

Nga fahkwack luhlahlfongi ke ma pwacye luhn Leum Jisus Kraist ac kuh in molwelah, iwaclah, ac kuh in ahkmuhtahlye Lal. Ac in sie Mwet Sap Lal, nga fahk kuloh nuh suwos, tahmtahel sacohk wiyuck, ac ahkinsewowoye kowos in tuyak ke lusowos nohfohn, in ahkfalye luhpan oraclah lowos an, ke kuht tuhkweni fahsr ke orekma muhtahl se inge. Tuhkweni kuht fah kahsruh ahkolah facluh nuh ke Tuhkuh Ahkluo luhn Leum. Ke ma inge nga fahkwack, oacna tamuhlwel wiyowos, ke inen Jisus Kraist, amen.

Mwe kahsruh

  1. Liye Philippi 4:7.

  2. Ma inge weacng sronin muhta uh—in liyacacng masap in tuhng yurin mwet suc kuht luhngse ke elos srolah liki moul se inge (see Doctrine and Covenants 42:45).

  3. Liye mokleyuck lal Rebekah nuh sel Isaac ac wen nahtuhlos Jacob ke Genesis 27:46; 28:1–4.

  4. Liye Joseph Fielding Smith, Answers to Gospel Questions, comp. Joseph Fielding Smith Jr., 5 vols. (1957–66), 4:166. Akihlen: Fihl nuh kwewa met ah srihkasrakuh ke pola kuh u srihsrihk fin facluh ac kuhnausyucklac kuh tuloki ke forlah lalos liki ma pwacye.In oakah we se inge, fihl se inge fah tiac srihkasrakuh nuhke pohloh acn kuh puhlan pacl. Ac fah nwacklah facluh ac kapsrwacni ke Tuhkuh Ahkluo luhn Leum.

  5. Teachings of Presidents of the Church: Spencer W. Kimball (2006), 222–23.

  6. Ke nga isuslac ah, suhpuhs liki mempucr 600,000 ke Alu uh. Mihsenge puhs liki miliacn 15 kac. Pihsac se ingacn fah kalweni na in yohkwelihk.

  7. Prestuhn Joseph Fielding Smith el fahk nuh sin tahmtahel ke Rilif Sosaiti uh, “Kowos kuh in sramsram ke wal, ke srihpen Leum El fihliyac wal uh feiwos.” El oacyacpac fahk lah Rilif Sosaiti uh “ituckyang nuh sel kuh ac wal in oruh ma yohk puhkantwen uh. Orekma ma elos oruh uh oreklac ke wal wolacna” (“Relief Society—an Aid to the Priesthood,” Relief Society Magazine, Jan. 1959, 4, 5). Fahk inge fwacklac pac sel Elder Dallin  H. Oaks ke sie sramsram ke toeni, “The Keys and Authority of the Priesthood,” Liahona, Mei 2014, 51.

  8. Boyd  K. Packer, “The Relief Society,” Ensign,, Nov. 1978, 8; liye pac M.  Russell Ballard, Counseling with Our Councils: Learning to Minister Together in the Church and in the Family (1997), 93.

  9. Liye Spencer J. Condie, Russell M. Nelson: Pahpah se, Mwet Laslas se, Mwet Sap se (2003), 146, 153–56. Mwe kahsruh: Ke 1964 President Kimball el akmuhsrayeyuc in sie prestuhn ke stek ac ahkinsewowoyeyuc fahk muh misac uh fah srihkeni ke srihpen insacnweacng in orekma luhk ke laslas luhn at.Tiac wihnna etuh lah yac oalkosr tohkoh, nga e oruh laslas kacl Prestuhn Kimball ma wi ayaollac luhn ip muhnahs ke at lal ah.

  10. “Ke kuht sramssram ke pahyuck uh, sruhluhn sie u insese lac uh, lwelah kuht in fahk ke pahyuck uh muh sie u na fohn.Kuht tiac ke muhtwacn ke Alu uh in uin oalngak se kuh wacngihn suhnuhn u uh ke kunac ma pahtpaht an!Nuhnak muhnahs wi ekihn in kihteacfohnohs u” (Spencer W. Kimball, “Privileges and Responsibilities of Sisters,” Ensign, Nov. 1978, 106).

  11. “Srihpac nuhkwewa luhn facluh ac ma nuhkwewa luhn facluh fah wacngihn srihpac fin tiac ke muhtwacn uh” (Russell M. Nelson, “Lutlut Sel If,” Ensign, Nov. 1987, 87). “If pa sahflahiyacn orekma luhn God ah, pa sahflahiyacn kuh usrnguck luhn ma nuhkwewa ma sikyak ah” (Gordon B. Hinckley, “Muhtwacn in Moul Lasr uh,” Liahona, Nov. 2004, 83).

  12. Liye Russell M. Nelson, “Children of the Covenant,” Ensign, May 1995, 33