Kahs Wolacna luhn God
Sel Elder Francisco J. Viñas
Ke Mwet Itngucul
Kahs wo luhn God ma kuht akacsruhi mihsenge ahkkahlwemye nuh sesr enenuh nuh ke auliyak kalweniyuck ke moul lasr uh kuht in muh kuh in liyacacng mokleyuck luhn Nguhn Muhtahl.
Puhslac sesr suc tuhkweni in wi ke toeni se inge tuhkuh “in lohng kahs wolacna luhn God, ahok, kahs ma unwelah nguhna kihnetuh” (Jacob 2:8). Kahs se ingacn kuh in konweyuckyak lun ma suhmuhslah ac ke mwe sramsram sin mwet kol lasr, ac use nuh sesr finsrak ac ahkkweyeyuck lun lohsr ke mwe kweok.
Ke fuhfahsryucsr in moul lasr, kuht etwaclah muh engan in facluh se inge suhfal, tuh ke Jisus Kraist fal engan lasr (liye D&C 101:36). El ac fah acse nuh sesr kuh kuht in tiac kweokkihn kuhtwena mwe kweok sahyacn ma ingacn sesseslah ke engan in Kraist (liye Alma 31:38).
Insiyacsr kuh in sesseslah ke mwe ahsor ke kuht liye mwet luhngseyuck se kweokkihn ongaiyac luhn mas na yohk se.
Misac luhn sie mwet suc kuht luhngse kuh in oruh in wacngihn koano in nguhnasr.
Ke kuhtuh sin tuhlihk nahtuhsr forlah liki inkacnek luhn wosasuc, kuht kuh in puhla mwacta ac insiyac suhfal ke ohiyacn moul ma pahtpaht lalos.
Finsrak se in eis sie pahyuck celestial ac in oraclah sie sucu ke moul se inge kuh in muhtwacwacack wacngihnlac ke fahsr in pacl.
Ahkkoluk sin elos suc oasr kunac lalos in luhngse kuht oraclah kihnet luhlahp in moul lasr.
Kosro luhn mukul tuhma kuh muhtwacn kiyac kuh in kuhnaoslah pahyuck se muh kuht finsrak ah ma pahtpaht.
Ma inge ac pucs mwe kweok sahyac ma ip nuh ke puhlan pacl in srihkeyuck inge kwacna oruh kuht in siyuck sesr sifacna kihsensiyuck sacn pacna ma Mwet Pahluh Joseph Smith el siyuck ke el siyuck layac God (Liye D&C 121:1).
Ke pacl upac ingacn in moul lasr, kahs wolacna luhn God ma unwelah nguhna kihnet uh use kahs in ahkkuh nuh in insiyacsr a nuhnak lasr:
Nguhnasr kuh in mihslac; ma upac ac mwe kweok lasr ac fah ma ke kihtin pacl na.
Na, kuht fin muhtweng wo, God El fah ahkfuhlwactye kuht inkuhsrao (liye D&C 121:7–8).
Kahs wolacna luhn God nwacklah nguhnasr ke finsrak, etwaclah muh elos suc moul suwohs inmahsrlon pacl upac ac fah eis opi wo liki in tohkohsrahi inkuhsrao ac lah tukun pacl upac pucspucs tuhkuh mwe insewowo (liye D&C 121:7–8).
Kahs wolacna luhn God, oacna sramsramkihnyuck sin mwet pahluh, use nuh sesr ma pwacye ke sili ma pahtpaht lasr, ma ahkpwacyeiyuck ke luhlahlfongi lasr nuh ke olwelah muhtahl ma utuckuh ke srihpen kuhlwacnsap oaru lasr ke ma pwacye uh, ac fah ahkinsewowoye kuht ac sucu lasr (liye Orson F. Whitney, ke Conference Report, Eprel 1929, 110).
Ac oacyacpac use nuh sesr ma pwacye lah, tukun kuht moulkihn sie moul suwohs, ac fah tiacna tuhlac kuhtwena mwe insewowo ke tiacna oruh ma uh fin tiacna utuckuh nuh sesr pacl uh in oruh. Kuht fin moul suwohs nwe ke kuht misac, kuht ac fah eis mwe insewowo nuh kwewa, ahkfuhlwactyeyuck, ac wolacna ma oacna sie mukul kuh muhtwacn suc oasr pacl wowo ingacn lalos in eis. (Liye The Teachings of Lorenzo Snow, oreklac sel Clyde J. Williams [1984], 138.)
Inge, yohk srihpac in kahlwem lah kuhtuh mwe kweok ac ma upac kuh in tuhkuh nuh in moul lasr kuht fin tiac auliyak na pwacye ke ma koluk lasr. Prestuhn Marion G. Romney el luti: “Mwe kweok ac ma upac luhn mwet fin facluh se inge sikyak ke srihpen elos tiac auliyak kuh ahkwoye ma koluk lalos. … Oacna ke mwe kweok ac mwe ahsor sikyak ke srihpen ma koluk, mwe engan sikyak ke srihpen nuhnakmuhnahs luhn ma koluk” (ke Conference Report, Eprel 1959, 11).
Kuh efuh in tiac auliyak oruh in sikyak mwe kweok ac ongaiyac?
Sie sin kuhtuh top pa tuh oasr sie kalyei akwucki ac sie masap suwohs ituckyang, ma tuh sang inse ahsor (Alma 42:18; see also verse 16). Mwet Pahluh Joseph Smith el luti lah kuht pa mwet suc ac fah nuhnuhnkwekuht sifacna ac lah mwe kweok luhn ohiyacn suhfal in nuhnak lasr pa ac oruh ma inge in sikyak oacna sie inluhluh in e ac yot fol (liye Teachings of Presidents of the Church: Joseph Smith [2007], 224).
Kuht fin srihke ahkwoye nuhnak lasr uh ke kuht srihke in ahkmwesahsye kuht sifacna ke srihpen ma koluk lasr (liye Alma 42:30) kuh srihke in okanlah ma inge, ma se muhkwefanna kuht ac oruh pa ahkkolukye Nguhn (liye D&C 121:37) ac oruh in pahtlac auliyak lasr. Kain in kahsruh inge, sahyacn ma ke kihtin pacl, ac fah pwacyena sang ongaiyac ac mwe ahsor yohk liki met ah nuh in moul lasr uh ac fah oruh in wacngihnlac pacl lasr in eis nuhnakmuhnahs ke ma koluk lasr.
Ke kain in mwe kweok inge, kahs wolacna luhn God oacyacpac use ahkkuh ac finsrak; fahk nuh sesr muh oasr kahsruh liki ngal ma tuhkuh ke srihpen ma koluk. Kahsruh inge tuhkuh sin kihsac in iwaclah luhn Jisus Kraist ac muhtwacwacack orekma kuht fin luhlahlfongi in El, auliyak, ac ahkos masap Lal.
Yohk srihpac kuht in akihlen lah oacna ke nuhnakmuhnahs luhn ma koluk, auliyak ahkfahsryeyuck ke puhlan pacl ac tiac sikyak ke pacl sefanna uh. Enenweyuck oaru ke kais sie ip la uh.
Sie srihkasrak, ke kuht ipeis ke kuhfa luhn Leum, kuht ahkkahlwemye nuh sin Leum lah kuht ac esamuhl pacl nuh kwewa ac ahkos masap Lal. Pa inge mwe ahkkahlwemye luhn insiyac pwacye lasr.
Pacl se kuht muhtwacwacack in esamuhl ac ahkos masap Lal lwen nuh kwewa—ac tiac ke lwen Sabbath muhkwena—pa pacl se ma nuhnakmuhnahs ke ma koluk lasr muhtwacwacack ahkfahsryeyuck ac olwelah Lal in muh Nguhn Lal in oasr yohrohsr muhtwacwacack in ahkpwacyeiyuck.
Fin wacngihn ahkostwen suwohs in wi ma luhngse lasr, ma se ma tuhkuh ke srihpen nuhnakmuhnahs kuh in tiac paht wacngihnlac ac fototoyang luhn Nguhn muhtwacwacack in loeslac liki kuht. Kuht ac apkuhran orek ma koluk luhn ahkfuhlwactyacl ke inngoasrohsr tuhsruhk insiyacsr loes luhkwel (liye 2 Nephi 27:25).
In wi ahkkweyeyuck, kahs wolacna luhn God sensenkackihn kuht lah ohiyacn orekma inge in eis nuhnakmuhnahs ke ma koluk lasr kuh in kauli ke kuht srwemlah ke ma koluk luhn facluh, ac kuh in sifil ikacklah ke luhlahlfongi kuht fin auliyak ke srihpac pwacye ac ahkinsepuhsisaclye kuht sifacna (liye D&C 20:5–6).
Meac kuhtuh sin ma koluk inge ma kuh in ahkkolukye ohiyac se in eis nuhnakmuhnahs ke ma koluk lasr ac wiwi nuh liyacacng lwen Sabbath in ahkmuhtahlye?
Kuhtuh sin mwe srihkasrak pa pahtlac ke toeni in kuhfa luhn Leum ac wacngihn srihpac wo; tuhkuh, ac tiac sifacna tuni ohiyacn moul lasr met liki, in ipeis ke puhret ac nihm ke cup tiacna nwacsnwacs (liye 1 Corinth 11:28); ac tuhkuh sahyacna ahkkahlwemye ma koluk lasr met ac siyuck sin God El in nuhnak muhnahs nuh sesr.
Mwe srihkasrak sahyac: tiacna ohiyacn muhtahl ke kuht orekmakihn ma electronic nahtuhsr, som liki toeni sac tukun na kuht ipeis ke kuhfa luhn Leum, ac wi mwe sritacl in lohm sesr ma tiacna fal nuh ke lwen muhtahl sacn.
Meac sie sin srihpac uh ma kuht, etuh ke ma inge kwewa, kwacna tahfonglac in liyacacng lwen Sabbath in ahkmuhtahlye?
Ke puk luhn Isaiah, kuht kuh in konwacack top se lah, finne kuhpahsr nuh ke Sabbath, ac oacyacpac ma nuh ke masap sahyac ma kuht enenuh in ahkos. “Kowos fin oru len Sabbath in sie len mutal, ac tia ukwe lungse lowos sifacna ke len sac” (liye Isaiah 58:13).
Kahs yohk srihpac pa “forlah … liki ukwe luhngse lowos sifacna,” kuh in kahs sahyac, ukwe luhngse luhn God. Inkaiyacn pacl, luhngse lasr—oreklac sin kena, ac luhngse luhn mwet suc luhngse ma luhn facluh—lain luhngse luhn God. Mwet pahluh Brigham Young el luti lah “ke ma luhngse, kena, ac puhla luhn mwet se suwohswohs nuh sin God ac masap lal, mwet sacn ahkmuhtahlyeyuck. Pa ma nuh ke luhngse luhk in som nuh ke kena luhn God, ma ac fah kolyuc nuh ke ma wo nuh kwewa, ac ahkinsewowoyeyuc ke moul kawihl ac moul ma pahtpaht” (ke Deseret News, Septempuh 7, 1854, 1).
Kahs wolacna luhn God suli kuht in orekmakihn kuh luhn Iwaclah in moul lasr ac in sifacna fohlohkyang nuh ke luhngse Lal—ac tiac nuh ke luhngse luhn devil ac ke mahno—oruh kuht, ke luhng kuhlwacng Lal, moliyucklac (liye 2 Nephi 10:24–25).
Kahs wolacna luhn God ma kuht akacsruhi mihsenge ahkkahlwemye nuh sesr enenuh se luhn auliyak pacl nuh kwewa in moul lasr kuht in srukyac kahsruh luhn Nguhn Muhtahl ke pacl na loes.
Oasr luhn Nguhn yohrohsr ac fah oruh kuht in mwet wo liki met ah. El ac fah mahmahi mihs ac engan nuh ke nguhnasr; El fah eislah liki insiyacsr kena in orek ma koluk, sruhnga, rahpkuh, ac ma koluk nuh kwewa; ac fohnlah luhn kena lasr fah in oruh ma wo, orek ma suwohswohs, ac muhsaheack tohkohsrahi luhn God (liye Teachings: Joseph Smith, 98).
Ke kahsruh luhn Nguhn Muhtahl, kuht ac tiac ahkkolukyeyuck, ac kuht ac tiac ahkkolukye mwet sahyac uh; kuht ac engan liki met ah, ac nuhnak lasr fah nwacsnwacs liki met ah. Yohkwelihk luhngse lasr nuh sin mwet sahyac. Kuht ac kena yohk liki met ah in nuhnak muhnahs ac akacsruhi mwe engan nuh selos raunikuhtlac.
Kuht ac puhla tarilacna in liye oraclah wo luhn mwet sahyac uh, ac kuht ac suk ke ma wo ke mwet sahyac uh.
Pruhe luhk tuh kuht in puhlakihn engan se ma tuhkuh ke kuht srihke in moul suwohs ac tuh Nguhn Muhtahl El in kuh in oasr yohrohsr ke kuht auliyak pacl nuh kwewa ac ke srihpac pwacye. Kuht ac ekihn mwet wo liki met ah, ac sucu lasr fah ahkinsewowoyeyuck. Ke ip yohk srihpac inge, nga fahkwack luhlahlfongi luhk ke ine muhtahl luhn Jisus Kraist, amen.