In sie Srihkasrak ac sie Kahlwem
Sel Prestuhn Thomas S. Monson
Ke kuht ukwe srihkasrak luhn Mwet Lahngo, ac fah oasr pacl wowo lar in sie kahlwem nuh ke moul luhn mwet sahyac uh.
Tamuhlwel ac tahmtahel, fuhkah wolacnaiyac in sifilpac wi kowos. Ke kowos etuh uh, ke kuht tuhkweni ke Eprel ah me, kuht arlac ahsor ke wacngihnlac luhn Mwet Sap sacohk tolu wiyacsr suc misac:Prestuhn Boyd K. Packer, Elder L. Tom Perry, ac Elder Richard G. Scott. Elos fohlohklac nuh lohm inkuhsrao selos. Kuht ahsrweloslac. Fuhkah luhpan tarilacna lasr ke srihkasrak lalos ke kain luhngse luhn Kraist ac ke luti moklweyuck elos fihliyac nuh sesr nohfohn uh.
Kuht tahfwelah sie painyuck ke luhngse nuh sin Mwet Sap sasuc emet uh, Elder Ronald A. Rasband, Elder Gary E. Stevenson, ac Elder Dale G. Renlund. Pa inge mukul kihsackuhnlah nuh ke orekma luhn Leum. Elos fal na pwacye in ahkfalye acn yohk srihpac ma elos pahngonyuck nuh kac uh.
Tuhfahna, ke nga riti ac motko ma suhmuhslah uh, luo sin pohloh kahs uh oan na in nuhnak luhk uh. Kwewana etweyuck sesr. Ma se met an ma ke Luti fin Ohl uh: “Ouinge, kowos sang kalem lowos in tolak ye mutun mwet uh, tuh elos in ku in liye orekma wo lowos, ac kaksakin Papa tomowos su inkusrao.”1Ma suhmuhslah ahkluo pa ma sie ma tuhkuh nuh in nuhnak luhk ke nga motko kalmeyacn ma se met an: Ma ke Lwacta lal Mwet Sap Paul nuh sel Timothy: “Kom in mwe srikasrak nu selos su lulalfongi, in kahs, in ouiyen moul, in lungse, in lulalfongi ac in moul nasnas.”2
Nga luhlahlfongi lah ma suhmuhslah ahkluo sacn ahkuhtweyac, ke ip yohk, ohiyac kuht kuh in oraclah wo emet. Kuht eklac srihkasrak luhn mwet luhlahlfongi ke moulkihn wosasuc luhn Jisus Kraist ke kahs, ke sramsram, ke luhngse muhtahl, ke nguhn, ke luhlahlfongi, ac ke nwacsnwacs. Ke kuht oruh ohinge, kahlwem lasr uh kahlmwelihk nuh sin mwet sahyac uh in liye.
Kais sie sesr tuhkuh nuh facluh ituckyang nuh se Kahlwem luhn Kraist. Ke kuht ukwe srihkasrak luhn Mwet Lahngo ac moul oacna El moul uh ac ke El luti, kahlwem sacn fah tayak in kuht ac fah srihkasrak nuh sin mwet sahyac uh in ukwe.
Lwacta lal Mwet Sap Paul tahkuhnlah ohiyac ohnkohsr luhn sie mwet luhlahlfongi, ohiyac ma fah lwelah kahlwem lasr uh in sahromrom. Lwelah kuht in sramsramkihn kais sie.
Nga fahklah kwewana ohiyac luo emet ah—in sie srihkasrak ke kahs ac ke sramsram. Kahs kuht orekmakihn uh kuh in sruhk ac mokle, kuh elos kuh in ahkkolukye ac ahksrihkye. Ke facluh mihsenge uh oasr ma yohk ke kahskahs sowac ma oacna kuht in rauniyucklac kac yen nuh kwewa. Arlac upac in kahingkihn lohngyac inen Diety orekmakihnyuck ma na wacngihn ac te ma se. Fahk koluk uh oacna in eklac sie ip na fal ke tifi uh, petsac uh, puk uh, ac on uh. Fihsrwacsr orweyac ke fahk koluk ac kahs kasrkuhsrak inge. Kuht enenuh in sramsram nuh sin mwet sahyac uh ke luhngse ac ahkfuhlwact, liyacacng kahs lasr in nwacsnwacs pacl nuh kwewa ac kahingkihn kahs kuh fahk ma ac ahkngalye kuh ahkkolukye. Kuht enenuh in ukwe srihkasrak luhn Mwet Lahngo, suc sramsram ke mwesahs ac kuhlwacng ke luti Lal nohfohn.
Ohiyac tohkoh fwack sel Paul ke luhngse muhtahl, ma ahkuhtweyucki oacna luhngse nwacsnwacs luhn Kraist.3 Yohk luhlahlfongi luhk lah oasr mwet kuh in mokle mwet suc muhkahimtacl, mwet suc mas, ac mwet suc puhla sahngweng. Oasr pacl wowo lasr in kahsrwelos ac ahkkweyaclos. Mwet Lahngo El use finsrak nuh sin mwet wacngihn finsrak la ac kuh nuh sin mwet muhnahs. El onwelah mwet mas; El oruh mwet ul in fahsr, mwet kun in liye, ac mwet sohlohng in lohng. Ke luti Lal nohfohn El kahsruh ke luhngse muhtahl nuh sin kuhtwena mwet enenuh. Ke kuht ukwe srihkasrak Lal, kuht fah ahkinsewowoye moul uh, weacng lasr sifacna.
Tohkoh, kuht enenuh in srihkasrak wo ke nguhn. Nuh sihk kalmeyacn ma ingacn pa kuht in kampare ke moul lasr in kuhlwacng, tarilacna, nuhnak muhnahs, ac enganwack. Ohiyac inge fah use nuh sesr sie nguhn ma fah mokle moul luhn mwet rauni kuhtlac uh. Nga eis pacl wowo ke moul luhk uh in wi mwet pucspucs suc oasr la kain nguhn se inge. Kuht puhlakihn sie puhla yohk srihpac ke kuht weluhlos uh, sie puhla ma oruh kuht in kena weluhlos ac in ukwe srihkasrak lalos uh. Elos sruhmuhn Kahlwem luhn Kraist ac kahsrwe kuht puhla luhngse Lal nuh sesr.
In sruhmuhn kahlwem sacn ma tuhkuh ke sie mwet nwacsnwacs ac luhngse uh akihlenyac sin mwet sahyac uh, nga akacsruhi yuruwos sie puhlakihn yac ekahsr somlah ah.
Ke pacl sacn, mwet kol luhn Alu uh ohsun yurin mwet wal fin acn Jerusalem in oraclah sie inseselac nuh ke acn ma Church Center luhn Alu uh ac muhsahyak we. In kuh in eis lwelah enenuh uh, Alu uh inseselac lah wacngihn forfor tongtong fah orek sin mempucr uh suc ac muhta ke center sacn. Tukun inseselac ingacn oreklac ah, sie sin mwet wal Israel, suc etweyuck wo ke Alu uh ac mempucr la uh, fahk lah el etuh lah Alu uh fah ahkfuhlwactye inseselac ke wacngihn forfor tongtong uh. “Tuhsruhk,” el fahk, kalmeyackihn nuh sin tuhlihk lutlut suc fah wi we an, “meac kuht ac oruh ke kahlwem ke muhtahlos uh?”4 Lwelah kahlwem yohk srihpac se ingacn in srweyac lun insiyacsr lwen nuh kwewa, tuh kuh in akihlen ac luhngkihnyuck sin mwet sahyac uh.
In sie srihkasrak ke luhlahlfongi kalmeyac pa kuht luhlahlfongi Leum ac ke kahs Lal. Kalmeyac pa oasr sesr ac lah kuht ahkkweye luhlahlfongi ma ac fah kol nuhnak lasr ac mukwikwi lasr uh. Luhlahlfongi lasr ke Leum Jisus Kraist ac ke Pahpah tuhmasr Lucng fah mokle ma nuh kwewa kuht oruh uh. Infulwacn nuhkanlah ke matwacsr, fohsack ke nuhnak, ac tihkuclkucl ke moul lwen nuh kwewa, sie luhlahlfongi fokoko ac eklac sie kawuck nuh ke moul lasr. Esam lah luhlahlfongi ac suhlahlahlfongi tiac kuh in oasr ke nuhnak sefanna ke pacl sefanna, tuh sie fah ahksahfyelah ma se sahyac ah. Nga kalweni ma sruhmuhn kalweniyuck nuh sesr uh—lah in kuh in eis ac in liyacacng luhlahlfongi kuht enenuh uh, yohk srihpac kuht in rit ac lutlutkihn ac motko ma suhmuhslah uh. Sramsram yurin Pahpah tuhmasr Lucng ke pruhe el yohk srihpac. Kuht tiac kuh in sislah ma inge, ke srihpen mwet lokoalok ac mwet ukwacl uh tiac fuhlweack in suk mwe muhnahs lasr, sie ma tulokihn ke luhlahlfongi lasr. Leum El fahk lah kuht enenuh in oaru in suk, pruhe lwen nuh kwewa, ac in luhlahlfongi, ac na ma nuh kwewa fah tuhkweni orekma nuh ke ma wo lasr.5
Sahflah, kuht ac nwacsnwacs, suc kalmeyac lah kuht nwacsnwacs in mahno, nuhnak, ac nguhn. Kuht etuh lah mahnosr pa sie tempuhl, enenuh in orek wo ke efahl ac ahkfuhlwact. Nuhnak lasr uh enenuh in sesseslah ke nuhnak moklweyuck ac wo ac kahingkihn ma ma ac ahkfohkfohkyelah. In kuh in eis Nguhn Muhtahl oacna mwe atolyuck lasr, kuht enenuh in suwohs. Tamuhlwel ac tahmtahel, nwacsnwacs uh fah use nuh sesr mihs ke nuhnak ac fah fal nuh sesr in eis olwelah luhn Mwet Lahngo. El fahk, “Insewowo elos su nasnas insialos; tuh elos fah liye God.”6
Ke kuht ahkpwacyei in srihkasrak luhn mwet luhlahlfongi ke kahs, ke sramsram, ke luhngse muhtahl, ke nguhn, ac ke nwacsnwacs, kuht fah fal nuh ke kahlwem nuh facluh.
Nga ke fahk nuh suwos nohfohn, ac yohkna nuh suwos mwet fuhsr an, lah ke facluh som loesalah liki ip yohk ac kolyuck utuckuh nuh sesr sin sie Pahpah Lucng luhngse uh, kuht fah pihsrlac liki un mwet uh ke srihpen kuht siena. Kuht fah pihsrlac ke srihpen kuht nuknuk wowo. Kuht fah siena ke srihpen kuht tiac orekmakihn kahskahs koluk ac ke srihpen kuht tiac ipeis ma ma koluk nuh in mahnosr uh. Kuht fah siena ke srihpen kuht kahingkihn fahk in ahksruhksruhk ac srihkkihn uh. Kuht fah siena ke kuht sulaclah in tiac nwacklah nuhnak lasr uh ke sulaclah ke media uh ma suhfal ac tiac wo ac ma fah oruh nguhn in som liki lohm sesr ac moul lasr uh. Pwacyena kuht fah pihsrlac ke kuht oraclah sulaclah ke moul kawihl—sulaclah ma wi ip ac ohiyac yohk luhn wosasuc uh. Ma ingacn ma oruh kuht in siena liki facluh oacyacpac use nuh sesr kahlwem sacn ac nguhn sacn ma fah tohlwack ke sie facluh yohkwelihk lohsr kac.
Kwacna upac in siena ac in lain ma kuht luhlahlfongi uh. Fihsracsr in sahngweng ke ma mwet sahyac uh kuh in nuhnkuh kuh fahk uh. Kahs in ahkkweye lal Psalm: “Leum God El kalem luk ac lango luk; su nga ac fah sangeng se? Leum God El pot ku nu ke moul luk, su nga fah sangeng se?”7Ke kuht oruh Kraist Elan infulwacn moul lasr uh, sahngweng lasr uh fah ayaollac ke puhlaik ke muhngnguh lasr uh.
Moul uh tiac suwohs nuh sesr, ac ke pacl mwe sruhf ac ma upac uh kuht sun kuh in arlac upaclaclac, oruh kahlwem lasr uh lohsrlohsr. Tuhsruhk, ke kahsruh sin Pahpah tuhmasr Lucng, wi kahsruh luhn mwet sahyac uh, kuht kuh in sifil eis kahlwem se ma tohlwack inkacnek lasr sifacna sifilpacna ac sang kahlwem mwet sahyac uh enenuh.
In sruhmuhn, ngwac akacsruhi yuruwos kahs emtucng ke soko poem pahiyuck nga riti pacl se emet yac ekahsr somlah ah:
Nga ohsun nuh sin sie mwet sac ke fong
Ma lahm uh tui in kahlwem.
Nga tui ac lwelah elan ahkosack
Lahm lal uh ke ma luhk ah.
Sie eng upac muhtwacwacack tok kuhtuh
Ac osrokwack acn uh.
Ac ke eng uh tui
Lahm luhk uh kunlac.
Tuhsruhk mwet sac fohlohkuh—
Lahm nahtuhl ah srwackna fihrihr!
El sruok fihrihr sacohk
Ac kahlwem luhk uh!8
Tamuhlwel ac tahmtahel wiyuck, pacl wowo lasr in srihkasrak raunikuhtlac kais sie lwen, finne meac sik nuh sesr sifacna uh. Ke kuht ukwe srihkasrak luhn Mwet Lahngo, ac fah oasr pacl wowo lasr in kahlwem nuh ke moul luhn mwet sahyac uh, finne elos mwet ke sucu lasr sifacna ac kawuck uh, mwet wi kuht orekma, mwet aetuhi na, ac mwet sac uh.
Nuh suwos kais sie, nga fahk lah kowos wen ac acn nuhtin Pahpah tuhmasr Lucng. Kowos tuhkuh liki ye Muhtahl in moul ke facluh se inge ke sie puhlan pacl, in srihke luhngse luhn Mwet Lahngo ac luti ac puhlaik in sang kahlwem lowos in tohlwack mwet nuh kwewa in liye. Ke moul in mahno lowos uh sahflah, kom fin oraclah ip lom uh, ac ma lowos pa mwe insewowo wolacna ke fohlohk muhta Yohrohl ma pahtpaht.
Fuhkah woiyacn kahs luhn Mwet Lahngo: “Nga kalem lun faclu. Kutena mwet su fahsr tukuk fah oasr kalem lun moul yorol, ac el fah tiana fahsr in lohsr.”9Kacl nga fahkwack luhlahlfongi. El pa Mwet Lahngo ac Mwet in Molwelah lasr, Mwet Iwe lasr yurin Pahpah. El pa Srihkasrak lasr ac kuh lasr. El pa kahlwem ma tohlwack lohsr uh.”10Nga finsrak tuh mwet nuh kwewa ma lohng ke nga sramsram uh fah olwelah in Ukwacl, pwacyena eklac sie kahlwem sahromrom nuh facluh, pa mwe pruhe luhk ke ine muhtahl Lal, finne Leum Jisus Kraist, amen.