Inge El Ninac Kiyom
Sel Elder Jeffrey R. Holland
Ke U luhn Mwet Sap Singucul Luo uh
Wacngihn luhngse ke moul in mahno uh fototoeni nuh ke atacn luhngse suwohs luhn Jisus Kraist likina luhngse yohk luhn sie ninac oaru nuh sin tuhlihk nahtuhl.
Lwelah ngan wi kowos nuh kwewa in paenuhl Elder Ronald A. Rasband, Elder Gary E. Stevenson, ac Elder Dale G. Renlund ac muhtwacn kiaclos nuh ke wi wowo elos kuh in nuhnkuh emet uh.
Palye ke Iwaclah luhn Mwet Lahngo, Isaiah el suhmuhslah, “A el mutangla keok su fal in orek nu sesr, Ac waiok su ac ma lasr.”1 Sie araruhma usrnguck ke lwen-sahflah uh ahkkahlwemye lah Jisus lac tuhkuh nuh facluh in kuhtanglah ma koluk luhn facluh.”2 Kwewana ma suhmuhslah ke pacl met ah ac ingena fahkwack lah El molweloslac, kuhtanguhloslac, ac usacloslac nohfohn nuh ke pacl met ah.”3 Sie on in alu luhngseyuck wi kuht ngihsre in “lohng puhsrwen Mwet Utuck Pweng wolacna se lom ah!”4
Fungyang, muhtweng, us, uslah. Ma inge pa kahs fokoko, finsrak ahkuhtweyac Kraist. Elos tahfwelah kahsruh ac finsrak nuh ke mukwikwi sef ke acn ma kuht oasr kac nuh ke acn ma kuht enenuh in oasr we—tuhsruhk koflah som sahyacn kahsruh. Kahs inge kalmeyaclos pac pa toasr, tikuclkucl, ac ullac—kahs fal yohk in ahkuhtweyac misin luhn El suc, ke luhpah koflah ahkuhtweyucki, sruhk kuhtyak ke kuht puhtatlac, us kuht nuh met ke kuh uh wacngihnlac, us kuhtlac sef nuh lohm ah ke in sef oacna in loesalah. “Pahpah tuhmuhk El suhpweyucme,” El fahk, “tuh Nga in kuh in srihpsrihpyak fin sahksin soko; … tuh ke Nga srihpsrihpyak ohinge … ohinge mwet uh ac srihpsrihpyak … nuh … sihk.”5
Tuhsruhk yac kom kuh in lohng ke kahs se inge siepacna ukweyacn mwet uh ke kahs ma kuht orekmakihn oacna puhlakihn ac somlac kac,us ac sruhk,orekma ac uslah? Oacna ke Jisus El fahk nuh sel John ke pacl se na mukwikwi in Iwaclah sac ac sikyak, oruh El fahk nuh sesr nohfohn, “Inge El Ninac Kiom!”6
Mihsenge nga fahkwack ke acn in sramsram se inge ma fwackyuck inge met ah: lah wacngihn luhngse ke moul in mahno uh fototoeni nuh ke atacn luhngse suwohs luhn Jisus Kraist likina luhngse yohk luhn sie ninac oaru nuh sin tuhlihk nahtuhl. Ke Isaiah, ahkuhtwelyac Mwet Lahngo, kena in ahkuhtweyac luhngse luhn Jehovah, el fahk atacn luhngse luhn ninac se. “Ku sie mutan ku in mulkunla tulik natul?” el siyuck. El fahk lah nuhnak se inge lahlfon, tuh tena lahlfon ke nuhnkuh lah Kraist Elan fah muhlkihnkuhtlac.7
Kain in luhngse fokoko se inge “mongfihsrwacsr, ac kuhlwacng, … tiac suk kacl sifacna, … tuhsruhk … tu na kuh ke ma nuhkwewa, luhlahlfongi ma nuhkwewa, finsrak ke ma nuhkwewa, muhtweng ke ma nuhkwewa.”8 Ma ahkkweye kac nohfohn uh, kain luhlahlfongi sacn “tiac wacngihnlac.”9 “Eol uh ac inging uh ku in mokuklac,” Jehovah el fahk, “ac lungse luk nu sum fah tiana safla.”10 Ninac kiyacsr uh fahk pac.
Kom liye, tiac ke srihpen elos us kuht muhkwena, tuhsruhk elos kalweni in kahsrwe kuht. Tiac ke utuck ke pacl pihtuctuc uh muhkwena tuhsruhk us ke pacl loeloes ma oraclah in ninac uh sie mukwikwi na upac. Pwacye lah, oasr inse muhsahllah orek, tuhsruhk inkaiyacn ninac uh etuh ke kahlwem, puhla se lah ma inge pa sie luhlahlfongi muhtahl ke kain ma fuhlwact nuh kwewa. Kuh in sahngweng ke akihlenwack sacn,, yohkna sin ninac pahpah fuhsr an, kuh in arlac upac.
Sie ninac wolacna fuhsr tuhfahna suhmuhslah lwacta se nuh sihk: “Fuhkah tuh sie mwet kuh in luhngse sie tuhlihk arlac loal tuh oruh kom kena in fuhlweack sie ip yohk ke sukohsohk lom nuh kac uh? Luhngse ke moul in mahno uh kuh in fokoko fuhkah tuh kom sifacna eis nuh sum sifacna kunohkohn, fihsrwacsr in muhnahslah, wakre, ac inse muhsahllah ac sifil fohlohk nuh ke ma pacna met ah? Kain luhngse luhn mahno fuhkah kuh in oruh kom puhla, ke pacl se oasr tuhlihk nuhtum uh, lah moul uh tilac, ma lom sifacna ne tok? Luhngse luhn ninac uh enenuh in wolacna. Wacngihn ahkuhtweyac sahyac nuh kac. Ma ninac uh oruh pa sie ip yohk srihpac ke orekma luhn Kraist. In etuh ma ingacn enenuh in fal in fahk nuh sesr ma sikyak ke kain luhngse ma fah kuhtuh pacl uh koflah muhtwengyucklac ac kuhtuh pacl uh usrnguck, pacl pucspucs nuh ke sef ac molwelah luhn tuhlihk nuh kwewa fin facluh, kuhtc kuh [pac] in fahk wi Jisus, ‘[Pahpah!] Nga aksafyela orekma ma kom ase nu sik in oru.’11 ”
Ke kahtoiyacn lwacta sac oan in nuhnak lasr uh, lwelah nga in akacsruhi tolu puhlakihn ahkkahlwemye moklweyuck fuhlwact luhn ninac uh, nga liye ke luti luhk ke na wik ekahsr tari ah:
Sramsram se emet luhk uh sie mwe sensekackihn, ahkacsmakihnye kuht lah tiac kuhiyen ninac pahpah nuh kwewa oasr sahflah la ke sramsram ke puk uh, tuh tiac sana. Kapihn mwe acsmakihn ke eklac luhk yurin sie kawuck wowo ke yac 50 suc misac sahyac liki Alu se inge ke el etuh muh pwacye uh. Finne fuhkah luhpan srihke luhk in ahkkweyacl, oacna ngan koflah sang mihs nuh sel. Sahflahiyac ah el ahksuwohsye nuh sihk. “Jeff,” el fahk, “finne fuhkah kweokiyac nuh sihk in tu ye muhtuhn God, nga koflahna nuhnkuh nuhnak ke in tu ye muhtuhn ninac kiyuck ah. Wosasuc uh ac tuhlihk nahtuhl uh yohk srihpac na pwacye nuh sel. Nga etuh lah nga ahksuhpwacryacllah, ac nuhnak ingacn ahksuhpwacryeyuclac pac.
Ingena, nga etuh na pwacye lah ke misac lal an, ninac kiyacl an eis kawuck se luhk ingacn ke paho ikack, luhngse uh; pa ingacn ma pahpah ninac uh oruh uh. Tuhsruhk ip sensenkackihnyuck ke sramsram soko inge pa tuhlihk sacn kuh in ahkngalye insiacn ninac kiaclos an. Inge pac kuht liye siepac lainyac ke ma wolacna. Nga tiac enenuh in ahkacsmakihnye kuht lah Jisus El misac ke sie inse muhsahllah, sie mwet muhnahs ac ullac ke usyen ma koluk luhn facluh. Oruh ke kuhtwena pacl in mwe sruhf uh, lwelah kuht in “liye ninac [kiacsr] uh” oacpacna Mwet Lahngo lasr ac eslah luhkwelos kwewa ahsor ke ma koluk lasr uh.
Ahkluo, ngwac sramsram ke sie mukul fuhsr suc utyak nuh ke sie misin field arlac suwohs, tuhsruhk ke sulaclah lal sifacna sa fohlohklac nuh lohm ah ke luhngse mukul oacna el ac kuhtuh ma upac el puhlakihn ke ma ingacn. El srwackna suwohswohs, tuhsruhk luhlahlfongi lal uh nuhkanyucklac, ma toasr ke puhla lal uh kapwack liki met ah, ac kweok ke nguhn uh yohkwelihk liki met ah. Puhla lal uh ekyek ke ngal, fohsack, ahngyahng, ac muhkahimtacl.
Misin prestuhn, stek prestuhn, ac pisap lal ah eis ao puhs suk ac tuhng ac ahkinsewowoyacl ke elos kahsrwel, tuhsruhk yohkiyacn kweok lal ke nguhn uh ma na nuh sel sifacna oruh el sruokyacna kuhtuh ip ma el sruhnga elos in etuh uh. Pahpah luhngse se ke sramsram soko inge sang nohfohn nguhnal in kahsruh tuhlihk se inge, tuhsruhk kahfofo luhn orekma lal ah kwacna oruh tuh fong lohsr loeloes ma ma tikuclkucl sikyak luhn nguhn uh kuhtangyucklac sin tuhlihk mukul se inge ac ninac kiyacl an. Lwen ac fong, pacl se emet ke wik uh, na ke mahlwem eklac nuh ke yac uh, elos tuhkweni suk onweyac. Ke puhlan pacl ke kasrkuhsrak ingacn (yohkna lal tuhsruhk kuhtuh pacl uh ninac sacn) ac sahngweng wacngihn sahflahiyac (yohkna ninac sacn tuhsruhk kuhtuh pacl uh el), ninac sacn fahkwack luhlahlfongi lal nuh sin tuhlihk mukul sacn ke kuh luhn God, ke Alu Lal tuhsruhk yohkna ke luhngse Lal nuh sin tuhlihk se inge. Ke pacna pacl sacn ninac sacn fahkwack luhngse wo, ac ma pahtpaht nuh sel pac. In oracni kwewa ip yohk srihpac na pwacye ke oasr na lal an—wosasuc luhn Jisus Kraist ac sucu lal an—el kalweni in fahk pruhe fokoko lal ah. El lalo ac tuhng ac tuhng ac lalo pac, na lohng na, ac lohng na ke wen se nahtuhl an kalweni in fahk nuh sel ke ohiyac suhfal yohk el puhla uh. Ohinge ninac sacn ahkkweyacl—sifilpac—ke pacl se inge tiac ma nuh ke mahlwem yuc. Pacl se inge el nuhnkuh lah kahsrwel orekma ke ma upac luhn nguhn lal an fah orek ma pahtpaht.
Tuhsruhk ke luhng kuhlwacng luhn God, orekma lal sifacna, ac kahsruh luhn mwet kol ke Alu, kawuck, sucu, ac mwet orekma, ninac se inge el liye tuhlihk mukul se nahtuhl an fohlohk nuh lohm ah ke acn uliyuck. Ke pahkomuhta kuht akihlen lah kain mwe insewowo inge tiacna, kuh soenna, sikyak nuh sin pahpah ninac nuh kwewa suc kweokkihn kain in ma puhs ke ohiyacn tuhlihk nahtuhlos uh, ac luhngse luhn mukul se inge nuh sin mukul sahyac uh tiacna eklac—wacngihn mwet pahngon muh ac sikyak. Tuhsruhk kais kuhtuhna fahsr, insiyacl eklac.
El muhtwacwacack sifil wi alu. El sulaclah in ipeis ke kuhfa luhn Leum ke kena yohk ac suwohs. El sifilpac eis sie pwepuh in lwelah nuh tempuhl ac eis sie pahng in kuhlwacnsap oacna sie mwet luti luhn seminary ke lututacng, ma el oraclah arlac wo. Ac ingena, tukun yac limekohsr, lal an, ke nguhsr lal sifacna ac ke kahsruh yohk luhn Alu uh, sifil oruh sie misin in ahksahfyelah kuhlwacnsap lal nuh sin Leum. Nga tuhng yohk likina nga kuh in fahk ke srihpen puhlaik, orekma suwohs, ac nuhnak luhn mukul fuhsr se inge in ahkfahsryelah elyah lal ac liyacacng luhlahlfongi lal. El etuh lah el sowe moul ke ma puhs, tuhsruhk el etuh lah el sowe moul yohk nuh sin mwet luo ma kuhlwacnsap oacna sie Mesaia, mwet luo ma muhtwacnguhllah ac usacllah—Mwet Lahngo lal, Leum Jisus Kraist, ac ninac fokoko, yohk luhlahlfongi la na pwacye se.
Sahflah, ma inge ma ke sifil kihsaclah luhn Mexico City Tempuhl wik na tolu somlah ah. Oasr ingacn weluhl Prestuhn Henry B. Eyring ma kuht liyacack kawuck sacohk se lasr Lisa Tuttle Pieper el tu ke kuhlwacnsap in kihsaclah moklweyuck sac. Tuhsruhk upac nuh sel in tu ke srihpen ke sie paho an el sruok tuhlihk muhtwacn kahto suhkahpahs na upac se nahtuhl, Dora, wi tuhlihk sahyac el srihke in karihngihn ke lacpo lacyot suhkahpahslac lal Dora an oruh ma inge srihkeyucki tuhsruhk tuhlihk muhtwacn sacohk yohk se nuhtin God an kuh in furok sie acnkihsucf fasrfasr ac, ke fahk ma el sifacna kahlwem, kuh in wowoyak, “Hosana, hosana, hosana nuh sin God ac Lahm.”12
Nuh sin ninac nuh kwewa kiyacsr acn nuh kwewa, pacl somlah, ingena, kuh pacl fahsruh, ngwac fahk “Kuloh nuh suwos ke oswelah tuhlihk, tuhfahloslac, lotwelos, ac ke ahkkahlwemye luhngse suwohs luhn Kraist. Nuh sel Ninac Eve, nuh sel Sarah, Rebekah, ac Rachel, nuh sel Mary fin acn Nazareth, ac nuh sin sie Ninac Inkuhsrao, nga fahk, Kuloh nuh suwos ke kunohkohn yohk srihpac in ahkfalye srihpac luhn ma pahtpaht uh.” Nuh sin ninac nuh kwewa ke ohiyac nuh kwewa weacng elos suc tikuclkucl, ngwac fahk, “Kom in mihslac. Luhlahlfongi God ac kowos sifacna. Kowos oruh wo liki kowos nuhnkuh uh. Kowos pa mwet molwelah luhn Finohl Zion,13 ac oacna Mwet Kol se kom ukwe ah, luhngse lowos tiacna tui.’14 ” Nga koflah sang yohk liki ma ingacn nuh sin oacna sie. Ke inen Jisus Kraist, amen.