Fuhlweack Insiacsr nuh sin God
Sel Neill F. Marriott
Mwet in Kahsruh Ahk Luo ke Prestuhnsi Luhlahp luhn Muhtwacn Fuhsr
Ke kuht fihlikuhtyang sifacna nuh sin Nguhn, kuht lotwelah ohiyac luhn God ac puhla luhngse Lal.
Elder Dallin H. Oaks, ke toeni luhlahp ke Eprel ah, sramsramkihn ke mwe enenuh se in “eklac moul lasr sifacna.”1 Nga kena fahk muh sifacna eklac uh muhtwacwacack ke ayaol luhn insiac—finne fuhkah moul lowos kuh acn kowos isuslac we uh.
Nga tuhkuh ke sie ipin acn yohk Macrike s, ac ke nga fuhsr ah kahs ke on in alu mahtuh luhn Protestant uh lutiyuc ke inse pwacye luhn mwet tuhma lutlut uh—insiac eklac se. Nuhnkuh ke kahs in on inge, suc arulacna sacohk nuh sihk:
Ohiyac Sifacna Lom in Oruh, Leum!
Ohiyac Sifacna Lom in Oruh!
Kom Mwet Orek Ahluh ke Kle;
Nga oacpacna fohk kle.
Orweyuclac ac oruh in
Fal nuh ke luhngse Lom,
Ngwac tuhpan kom,
nga in etuh luhngse Lom.2
Kuht oruh fuhkah, inpacl inge, oacna mwet kahfofo uh, in etuh luhngse luhn Leum? Kuht oruh fuhkah ohiyac luhn Leum in oacna ohiyacsr. Nga luhlahlfongi muh kuht muhtwacack ke kuht lutlut Kacl ac pruhe nuh ke mwe kahlwem. Ke yohkwelihk luhlahlfongi lasr in El, kuht ikacslah insiacsr, suk in oruh luhngse Lal, ac tuhpan top ma ac fah kahsrwe kuht in kahlwem.
Eklac luhn insiyuck sifacna muhtwacwacack ke, oacna sie tuhlihk matwac yac 12 [singucul-luo], nga muhtwacwacack suk ke God. Sahyacna ke nga tuh fahkwack kahs ke Pruhe luhn Leum,3 nga tiac arlac etuh in pruhe. Nga esam ke nga tuh sikuckmuhtuhnte, finsrak tuh nga in puhla luhngse Lal, ac siyuck, “Kuh Kom piyac, Pahpah Inkuhsrao? Nga etuh lah Kom oasr, tuh piyac?” Ke matwac fuhsr luhk, nga tuh siyuck. Oasr kihtin na mwe ahkkahlwemyeyuck ke pwacyeiyacn Jisus Kraist, tuh Pahpah Inkuhsrao El lwelah nga in suk ac tuhpan ke lusen yac 10 [singucul].
Ke yac 1970 [sie yucfoko itngucul], ke misinacri elos lutiyuc ke plwacn in molwelah luhn Pahpah ac ke Iwaclah luhn Jisus Kraist, tuhpan luhk ah sahflah. Nga eis ma pwacye ingacn ac nga pacptaislac.
Ke mwe etuh se inge ke pahkomuhta ac kuh luhn Leum, mukul tuhmuhk, tuhlihk nuhtihk, ac nga sulaclah pohloh kahs luhn sucu inge: “Ac fah wona ma nuhkwewa.” Tuh kuht ac kuh in fahk kahs ingacn nuh sin sie sin sie ke ma upac yohk tuhkuh ah ac wacngihn topukyac lah fuhkah?
Ke tuhlihk muhtwacn nahtuhsr matwac yac 21 [longoul sie], suc engan ac nwacsnwacs, tuh kauli ke ma na upac se tukun ongaiyac ke bicycle soko, sucu lasr uh fahk, “Ac fah wona ma nuhkwewa.” Ke nga tuh wi oaksohk ah som liki misin lasr fin acn Brazil nuh fin acn Indianapolis, Indiana, in weluhl, nga luhlahlfongi yohk ke kahs luhn sucu lasr uh. Tuhsruhk, ke tuhlihk muhtwacn sacohk nahtuhsr el tuh misac ah fahsr nuh facl luhn nguhn, fuhkah kuht in angwetwacni ac sulpac fahk, “Ac fah wona ma nuhkwewa”?
Tukun misac lal Georgia, kuht puhlakihn mwe kweok na upac, upaclaclac nuh sesr, ac srwackpacna ne mihsenge oasr mwe kweok yohk lasr, tuh kuht luhlahlfongi ke mwe etuh se muh wacngihn mwet misac na pwacye. Finne fuhkah mwe kweok lasr ke pacl se ma mahnol Georgia monglac, oasr luhlahlfongi lasr muh el som moul oacna nguhna se, ac kuht luhlahlfongi muh kuht ac fah muhta yohrohl ma pahtpaht kuht fin liyacacng wuhlweacng lasr ke tempuhl. Luhlahlfongi ke Mwet in Molwelah lasr ac Sifilpac Moulyak Lal, luhlahlfongi ke kuh luhn pristut Lal, ac luhlahlfongi ke akucl ma pahtpaht lwelah kuh in fahk pohloh kahs lasr ke kuh.
Prestuhn Gordon B. Hinckley el fahk: “Kom fin sang kuhiyom, ac fah wona ma nuhkwewa. Fihliyac luhlahlfongi lom in God. … El fah tiac siskuhtlac.”4
Pohloh kahs in sucu lasr uh tiacna fahk muh, “Ac fah wona ma nuhkwewa ingena ” Ac sramsram ke finsrak lasr ke ma sikyak ma pahtpaht uh—tiacna ke ma sikyak ingena uh. Ma suhmuhslah uh fahk nuh sesr kuht in suk ke oaru, pruhe pacl nuhkwewa, ac luhlahlfongi ac ma nuhkwewa ac fah orekma wo nuh sesr.5 Kalmac ke ma inge kwewa tiacna c fah ma wo, tuh nuh sin mwet puhsisacl ac luhlahlfongi—ma wo ac ma koluk— tuhkweni orekma ke wo, ac pacl in sikyak uh ma ke pacl luhn Leum. Kuht tuhpanuhl, kuhtuh pacl uh oacna Job ke mwe kweok lal, etuh muh God El “losya kihnet suc El kihnet kac: Pahol fin kantekomi, na paol ac sifil pacna akkeyekomla.”6 Sie inse puhsisacl eis ma upac uh ac pacl in tuhpan uh ke pacl in ahkkweyeyuck se ingacn in tuhkuh.
Ke kuht fihlikuhtyang sifacna nuh sin Nguhn, kuht lotwelah ohiyac luhn God ac puhla luhngse Lal. Ke pacl in kuhfa luhn Leum, suc nga pahngon acrt luhn lwen Sahpuht, nga tuh konwacack lah tukun pruhe ke nuhnak muhnahs luhn ma koluk, ac ma wo in siyuck sin Pahpah Inkuhsrao, “’Kuh oasr kuhtuh pac?” Ke kuht insepuhsisacl ac mihs, nuhnak lasr uh kuh in kolyuckylac nuh ke sie pac ma kuht enenuh in ekuhllah—sie ma uh ma tulohkohnwack kuh lasr in eis kolyuck luhn nguhn kuh finne mwe ahkkuh ac kahsruh.
Mwe srihkasrak se, sahp oasr mwe sruhnga se insiyuck lain mwet se. Ke nga tuh siyuck fin oasr kuhtuh pac ma nga enenuh in auliyak kac, ma “lukmac” sacn tuhkuh suwohs nuh ke nuhnak luhk uh. Ma pwacye uh, Nguhn Muhtahl El mahmahi, “Kom siyuck na pwacye fin oasr kuhtuh pac, ac pa inge. Mwe sruhnga lom ahkmuhnahsye ohiyom ac ahkkolukye kuhiyom ke ma wo luhnkawuck lom. Kom kuh in fuhlweack ma inge.” Oh, upac orekma inge—sahp kuht puhla muh oasr srihpac kuht in puhla mwe sruhnga sacn—tuh fuhlwelahnuh ke ohiyac luhn Leum muhkwefanna kol kowoslac nuh ke mwe engan ma pahtpaht.
Ke pacl fal ac kais kuhtuh, kuht eis ahkkweyeyuck kuhlacna ac kolyuck Lal—sahp kol kuht in som nuh tempuhl pacl pucs kuh lihksrweni lutlut ke Iwaclah luhn Mwet Lahngo, kuh sramsram nuh sin kawuck se, pisap se, mwet in kahsruh se, kuh taktuh se. Onweyacn insiyacsr muhtwacwacack ke kuht fihlikuhtyang nuh siel ac kaksakihn God.
Kaksak pwacye muhtwacwacack ke inse pwacye ye muhtuhn Pahpah ac Wen. Mac ohiyacn insiacsr mihsenge? In siena luhmah, in oruh in oasr inse pwacye ahkwoyeyuck luhlahlfongi se, se ma kuht mwet uh enenuh inge in muhsahellah ye muhtuhn Leum. “Ac kowos fah sang ke sie mwe kihsac nuh Sihk ke insiowos kwewaac nguhnuwos kwewa,”7 Leum El fahk. Ma sikyak ke kuht kihsackuhnlah insiacsr, kuh luhngse lasr, nuh sin Leum pa kuht eis mwe kolyuck luhn nguhn ma enenweyuck.
Ke yohkwelihk luhn etwacack luhn pahkomuhta ac luhng kuhlwacng luhn Leum, kuht akihlen muh insiacsr muhtwacwacack sikyak ke kuloh. Na kuht saplaklac nuh Sel, kena in tuhkweni yurin Wen Kuloh Sefanna nuhtin God. Ke inse pwacye kuht saplaklac ac tuhkweni inge, kuht eis finsrak sasuc ac kolyuck sasuc sin Nguhn Muhtahl.
Nga tuh upackihn in fuhlwelah kena suhkawihl se in oruh ke ma innek, kwacna akihlenyac muh ohiyac luhk arulacna muhnahs, suhkahsruhp, suhfal nuh ke ohiyac luhn Jisus Kraist. “Ohiyac Lal pa inkacnek soko ma kol nuh ke mwe engan ke moul se inge ac moul ma pahtpaht ke facl se fahsruh uh.”8 Kuh kuht kuh in luhngse Jisus Kraist ac ohiyac Lal yohk liki kuht luhngse kuht sifacna ac kena lasr sifacna?
Kuhtuh sin mwet kwacna nuhnkuh muh elos puhtatlac tari pacl puhkantwen uh ac puhla muhnahs in kuh in ekuhllah orekma koluk kuh luhngse luhn facluh ke insiaclos. Tuhsruhk, oacna mwet wuhlweacng luhn Israel, kuht tiac kuh in sifacna eklac fin kuht tiac sifilpac srihke. Kuht fin insepuhsisacl na pwacye nuh sin God, El eis kuht ke ohiyacsr—ac oruh kuht in wo likina kuht kuh in nuhnkuh kac. Mwet lahlmwetmwet se Robert L. Millet el sihmihs ke “kena suwohs se in ahkwoyelah,” fal nuh ke “pwacyeiyacn [nguhn lal] ac ke Jisus Kraist kuht ac fah orwaclah.”9 Ke kain ahkkahlwemyeyuck inge, kuht kuh in fahk pwacyena nuh sin Pahpah Inkuhsrao:
Luhlahlfongi el suc karinginyuc,
Nga etuh el luhngse nga,
Nga fah oruh ma kom kena kac ke inse nwacsnwacs::
Nga ekla oacna kom luhngse.10
Ke kuht sang insiacs kwewanuh sin Jisus Kraist, El eis mwe kihsac lasr. El eiskuht fohlohk. Finne fuhkah ma upac, kihnetuh, ac ma lainyuck kuht tuh kweokkihn, pahkomuhta ac ahkwoye Lal fokoko liki ma nuhkwewa. Tuhkweni na pwacye yurin Mwet Lahngo, kuht kuh in puhlaik fahk, “Ac fah wona ma nuhkwewa.” Ke inen Jisus Kraist, amen.