Fokokoi ke Iwaclah luhn Jisus Kraist
Sel Elder Dallin H. Oaks
Ke U luhn Mwet Sap Singucul Luo uh
Ke srihpen Iwaclah Lal, oasr kuh luhn Mwet Lahngo in sang—in kahsruh—ngal ac ma upac nuh kwewa ke moul in mahno.
Ke moul in mahno lasr uh pwacyena lah sie lwen kuht ac misac ac toasrlah ke ma koluk. Iwaclah luhn Jisus Kraist foskackuhnlah ma pwacyena luo ke moul in mahno inge. Tuhsruhk sahyacn misac ac ma koluk, oasr ma upac puhs sahyac lasr ke kuht tihkuclkucl ke moul suhkawihl uh. Ke srihpen iwaclah se pacna ingacn, Mwet Lahngo El kuh in use nuh sesr kuh kuht enenuh in kuhtanglah ma upac ke moul in mahno uh. Pa ingacn sifac luhk nuh mihsenge uh.
I.
Inkaiyen sramsram ke ma suhmuhslah ke Iwaclah sac ma ke kuhnahoslah mwe kapihr luhn misac luhn Mwet Lahngo ac kweokkihn ma koluk lasr uh. Ke luti lal sihmihsyucklac lun Puk luhn Mormon uh, Alma el luti ma yohk srihpac inge. Tuhsruhk el oacyacpac use mwe etuh kahlwem ke ma suhmuhslah uh lah Mwet Lahngo El oacyacpac puhlakihn ngal ac mas ac muhnahs luhn mwet Lal.
Alma el ahkuhtweyac ip se ke Iwaclah luhn Mwet Lahngo inge: “Ac El fah som, kweok ke kain in waek ac ongaiyac ac mwe sruhf nuhkwewa; ac ohinge tuh kahs uh in ahkpwacyeiyucklac suc fahk lah El fah eis nuh Facl kweok ac mas luhn mwet Lal” (Alma 7:11; liye pac 2 Nephi 9:21).
Nuhnkuh kac! Ke Iwaclah luhn Mwet Lahngo, El kweokkihn “ngal ac ma upac ac mwe sruhf ke kain nuh kwewa.” Oacna Prestuhn Boyd K. Packer el ahkuhtweyac: “Wacngin seomoul Lal. Wacngihn ma koluk El oraclah. Ne ohinge, sie ma orekweni ke ma koluk nuh kwewa, suhpwacr ac ahsor, ngal ac ahkkoluk, mwe ahkkweok nuh kwewa ke nuhnak, puhla, ac mahno etweyuck sin mwet uh—El puhlakihn nohfohn.”1
Efuh El kweokkihn ma upac ke moul in mahno “ke kain nuh kwewa” inge? Alma el ahkuhtweyac: “Ac El fah eis nuh Facl misac, tuh Elan kuh in tuhlahlihk mwe kapihr luhn misac ma kapriyac mwet Lal; ac El fah eis nuh Facl mas lalos, tuh insiacl in sesseslah ke pahkotwen, fal nuh ke mahno lah El ac kahsruh fuhkah mwet Lal fal nuh ke mas lalos” (Alma 7:12).
Nuh ke srihkasrak, Mwet Sap Paul el fahkwack lah ke srihpen Mwet Lahngo “El ku in kasrelos su srifeyuk, mweyen el wi pac srifeyuk ac keok” (Hebrew 2:18). Oacpacna, Prestuhn James E. Faust el luti: “Ke Mwet Lahngo El kweokkihn kuhtwena ma ac ma nuh kwewa ma kuht kuh in puhla kuh sun uh, El kuh in kahsruh mwet muhnahs in eklac fokokoi.”2
Mwet Lahngo lasr El puhlakihn ac kweokkihn fohnlah luhn ma upac ke moul in mahno uh “fal nuh ke mahno uh” Elan muh kuh in etuh “fal nuh ke mahno uh” ohiyac in “kahsruh [suc kalmeyac pa sang kahsrwelah kuh kahsruh nuh sin] mwet lal fal nuh ke muhnahs lalos uh.” El ohinge etuh mwe tihkuclkucl lasr, ahsor lasr, mwe sruhf lasr, ac kweok lasr, tuh El kena puhlakihn ma ingacn nohfohn oacna sie ip yohk srihpac ke Iwaclah Lal. Ac ke srihpen ma inge, Iwaclah Lal sang kuh nuh Sel in kahsrwe kuht—in use nuh sesr kuh in muhtwacnglah ma nuh kwewa.
II.
Ke luti lal Alma ke sapta itkohsr ah pa ma kahlwem emet ke ma suhmuhslah nuh kwewa ke kuh yohk srihpac ke Iwaclah sac, pa oacyacpac lutiyuck ke ma suhmuhslah muhtahl uh.
Ke muhtwacwacackiyen luti Lal ah, Jisus El ahkuhtweyac lah El suhpweyuckme “in aksukosokye mwet su muta in keok” (Luke 4:18). Pwacpuhl kwacna fahk nuh sesr ke onweyacn mwet Lal “kain mas puspis lalos” (Luke 5:15; 7:12). Puk luhn Mormon suhmuhslah lah El onwelah mwet “suc kweok ke kuhtwena ohiyac” (3 Nephi 17:9). Wosasuc lal Matthew ahkuhtweyac lah Jisus el ahkkweyelah mwet uh tuh “in akpwayeye kas ma mwet palu Isaiah el tuh fahk, ‘El sifacna eisla munas lasr, ac usla kain in mas nukewa ma oan yorosr” (Matthew 8:17).
Isaiah el luti lah Messiah El kuh in us “keok” ac “waiok” lasr uh (Isaiah 53:4). Isaiah el oacyacpac luti ke ahkfokoko Lal nuh sesr: “Nimet sangeng-nga wi kowos! Nga God lowos-nimet lela kutena ma in aksangengye kowos” (Isaiah 41:10).
Ohinge, kuht onkihn:
Nimet sahngweng; tuh nga wi kom,
Ke srihpen Nga pa God lom ac fah srwackna kahsrwe kom.
Ngwac ahkfokokoye kom, kahsrwe kom, ac oruh kom in tu na, …
Sruokyacna ke paho suwohswohs, fokoko luhk.3
Sramsram ke kuhtuh sin ma upac ke moul in mahno lal sifacna, Mwet Sap Paul el suhmuhslah, “Oasr ku luk in oru ma nukewa ke ku su Christ el ase nu sik” (Philippi 4:13).
Ac na kuht liye lah ke srihpen Iwaclah Lal, oasr kuh luhn Mwet Lahngo in sang—in kahsruh—kweok ac ma upac nuh kwewa ke moul in mahno. Kuhtuh pacl uh kuh Lal uh onwelah muhnahs uh, tuhsruhk ma suhmuhslah uh ac puhlakihnyuck lasr uh luti kuht lah kuhtuh pacl uh El sang kuh kahsruh ke use kuh nuh sesr in muhtwacnglah muhnahs lasr uh.4
III.
Meac kweok ac ma upac ac muhnahs ke moul in mahno inge ma Mwet Lahngo lasr El puhlakihn ac kweokkihn ah?
Kuht puhla kweok ac ma upac ac muhnahs uh ke pacl se kuh sie pacna. Sahyacn ma kuht puhlakihn ke srihpen ma koluk lasr uh, moul suhkawihl uh sesseslah ke tihkuclkucl, ahsor, ac kweok.
Kuht ac mwet suc kuht luhngse uh kweokkihn mas uh. Ke kuhtuh pacl uh kais sie sesr oacyacpac puhlakihn ngal ke kihneta upac kuh ke ma upac sahyac luhn mahno ac insifac uh. Kuht nohfohn tuhkweni kweokkihn ac ahsor ke misac luhn mwet kuht luhngse. Kuht nohfohn puhlakihn suhfallac ke ma kunacsr sifacna uh, kuhpahsr luhn sucu lasr, kuh orekma lasr uh.
Ke sie mukul ac muhtwacn kiac kuh sie tuhlihk sruhnga ma kuht etuh muh pwacye uh ac tuhlac liki innek suwohswohs uh, kuht puhlakihn ngal upac uh yohkna, oacna ke pahpah tuhmwacn wen suhnuhntac se ke puhpuhlyuck esamyucki soko lal Jisus ah (liye Luke 15:11–32).
Oacna ke Psalm el ahkkahlwemye: “Mwet wo elos keok ke mwe ongoiya pus, tusruk Leum God El molelosla liki ma nukewa” (Psalm 34:19).
Ohinge, on in alu lasr uh nein ma pwacye inge: “Wacngihn ahsor luhn facluh ma inkuhsrao koflah onwelah.”5 Ma onwekuhtlac uh pa Mwet Lahngo ac Iwaclah Lal.
Mwet fuhsr uh puhla tiac enenweyuck arlac yohk ke mwet oacna uh kena welah ke kuhpahsr ac mukwikwi engan ac nuhnkuh in esacloslac. Nuhnak suhfal ke u ac kain mwet uh oraclah kain in sruhnga ahkngal sahyac uh pac, nuh sin mwet fuhsr ac mwet mahtuhyak. Moul uh oasr ma upac puhs la, ma oacna wacngihn orekma la kuh ma upac sahyac ke plwacn lasr uh.
Nga srwackna sramsram ke muhnahs luhn mahno ma tiac oreklac ke ma koluk lasr uh. Kuhtuh mwet uh isuslac ke suhkahpahs luhn mahno ac nuhnak ma oruh kweok luhn kais sie nuh selos ac tihkuclkucl nuh selos suc luhngse ac karuhnganuhlos uh. Nuh sin mwet puhs, mwe muhnahs ke nuhnak yohk uh upac pacna kuh suhkahpahs na upac se. Siepac ma upac kweok pa ohiyac luhn mwet lolacp. Mwet suc kweokkihn ohiyac se inge enenuh in esam lah Mwet Lahngo El puhlakihn kain ngal se inge pac ac lah, ke Iwaclah Lal, El sang kuh in ahkwoye.
Kuhtuh mwet suhkahpahs uh koluk na upac nuh ke moul in mahno ac nguhn uh likina mwe pahlah uh. Kuhtuh ma inge, ma oacna mwe pahlah nuh ke petsac koluk kuh ono kuh uh, kuh in oraclah elah koluk na upac. Finne ke ma ingacn auliyak kac uh, mwe pahlah uh ac oan na. Sruokyac suhkahpahs se ingacn kuh pac in isyucklac ke kuh fokoko oasr sin Mwet Lahngo uh. Oacyacpac ma upac yohk puhlakihnyuck sin mwet suhpweyucklac nuh nein kaul ke ma koluk uh. Sie lwacta na inge fahkwack nuh ke kuh ma kuh in tuhkuh finne ke sie kain ohiyac ingacn: “Nga etuh lah Mwet Lahngo lasr El fahsr ke motonoac uh, ac nga kwacna puhla luhngse luhn Kraist lun pihsinkac luhn nien kaul uh.”6
Nga luhngse fahkwack luhlahlfongi luhn mwet suhmuhslah poet ac kawuck lasr Emma Lou Thayne. Ke kahs kuht ingena onkihn ke soko on in alu, el suhmuhslah:
Acn oyac ngwac ngwet nuh kac ke mihs?
Piyac acn in ahkkweye luhk
Ke kahsruh sahyac uh tui in oruh nga puhla fohnlah?
Ke oruh sie at muhsahllah, foloyak, kuh sruhnga,
Nga sifacna isyuclac,
Suk ke nguhn luhk?
Piyac, ke ngal luhk uh kapwack,
Piyac, ke nga oruh ma inge,
Piyac, ke nga enenuh in etuh, acn in kahsruhsr nuh we?
Piyac mokleyuck mihs se in ahmihsye kasrkuhsrak luhk?
Suc, suc kuh in etuh?
Mwet Lahngo muhkwena. 7
IV.
Suc kuh in kahsrweyucklac ac ahkfokokoyeyucklac ke Iwaclah luhn Jisus Kraist? Alma el luti lah Mwet Lahngo El fah eis nuh Facl “kweok ac mas luhn mwet Lal ” ac “kahsruh mwet lal ” (Alma 7:11–12; ahkuhtweyac wo ituckyang). Suc “mwet lal” ke olwelah se inge? Yac mwet moul in mahno—nohfohn suc engankihn ma pwacye luhn sifil moulyak ke Iwaclah sac? Kuh ma nuh sin mwet suc kuhlwacnsap sollac muhkwena fal ke akwuck ac olwelah uh?
Kahs mwet uh oasr kalmeyac puhkantwen la ke ma suhmuhslah uh. Kalmeyac fal se emet nuh ke luti ma Mwet Lahngo El fah kahsruh “mwet lal” pa kalmac Alma el orekmakihn ke el tok luti lah “God El nuhnkuh mwet nuhkwewa, ke oacna sie acn elos oasr we” (Alma 26:37). Pa ingacn pac ma lipufacn sac fahk ke el ahkkahlwemye isuslac luhn tuhlihk Jisus: “Nga us pweng wo nu suwos, su ac fah arulana akenganye mwet nukewa” (Luke 2:10).
Ke srihpen puhlakihnyen iwaclah ke moul in mahno Lal uh, Mwet Lahngo El kuh in ahkkweye, onwelah, ac ahfokokoye mukul ac muhtwacn nohfohn acn nuh kwewa, tuhsruhk nga luhlahlfongi lah El fah oruh muhkwena nuh sin mwet suc Sokuhl ac siyuck ke kahsruh Lal. Mwet Sap James el luti: “Akpusiselye kowos sifacna ye mutun Leum, ac El fah akfulwatye kowos” (James 4:10).). Kuht nwacsnwacs in eis mwe insewowo ingacn ke kuht luhlahlfongi in El ac pruhe nuh ke kahsruh Lal.
Oasr mwet miliacn suc sahngweng sin God suc pruhe nuh sin God in sruhkyuckyak liki ma upac lalos. Mwet Lahngo lasr El fahkwack lah El fani nuh ten liki ma nuh kwewa (liye D&C 88:6). Ke Elder Neal A. Maxwell el luti, “In ‘fani nuh ten liki ma nuh kwewa,’ El etuh, suwohswohs ac sifacna, ke inkacnek nuh kwewa lah mwet uh ac kweok.”8 Kuht kuh pac in fahk lah in fani nuh ten liki nuh kwewa, El fihliyucki suwohs in sruhkkuht ac use nuh sesr kuh kuht enenuh in muhtwacnglah ma upac lasr uh. Kuht enenuh in siyuck muhkwena.
Pacl puhs ke fwackyuck in pacl inge, Leum El ahkkahlwemye, “Kom fin siyuck Sel kom fah eis; kom fin tongtong ac fah ikacklah nuh sum (nuh ke srihkasrak, D&C 6:5; 11:5; liye pac Matthew 7:7). Pwacyena, ke srihpen luhngse nuh kwewa Lalos uh, Pahpah tuhmasr Lucng ac Wen Sacohk Nahtuhl, Jisus Kraist, lohng ac topuk fal pruhe luhn mwet nuh kwewa suc suk ke luhlahlfongi. Oacna ke Mwet Sap Paul el suhmuhslah, “Kut filiya finsrak lasr in God moul, su Mwet Lango nu sin mwet e nukewa, ac yokna nu selos su lulalfongi” (Sie Timothy 4:10).
Nga etuh lah ma inge pwacye. Iwaclah luhn Mwet Lahngo oruh yohk liki in ahkpwacyeye nuh sesr ke moul kawihl ke sie sifil moulyak luhn mwet nuh kwewa ac sang pacl wowo nuh sesr in nwacnsnwacslah ac pacptaislac. Iwaclah Lal oacyacpac use nuh sesr pacl wowo in pahng nuh Sel suc puhlakihn ma nuh kwewa ke muhnahs in mahno lasr in onwekuhtlac ac use nuh sesr kuh in us ma toasr ke moul in mahno uh. El etuh kweok lasr, ac El oasr in kahsrwe kuht. Oacna mwet Samaria wowo, ke El suk kuhtyak kihnetuh pe innek uh, El fah puhnlah kihnet kacsr uh ac karihngihn kuht (liye Luke 10:34). Kuh in onwelah ac ahkfokokoye ke Iwaclah luhn Jisus Kraist ma nuh sesr nohfohn suc fah siyuck kac uh. Nga fahkwack ke ma ingacn ac nga oacyacpac fahkwack ke Mwet Lahngo lasr, suc oruh ma nuh kwewa kuh facluh uh.
Sie lwen ma toasr nuh kwewa ke moul in mahno inge fah wacngihnlac ac fah wacngihn kweok (liye Fwackyuck 21:4). Nga pruhe tuh kuht nuh kwewa fah kahlwem ke finsrak ac kuh ke Iwaclah luhn Mwet Lahngo lasr; pwacyeiyen moul kawihl, pacl wowo nuh ke moul ma pahtaht, eisyacn kuh ma kuht kuh in eis kuht fin siyuck na, ke inen Jisus Kraist, amen.