Liyacacng Masap uh
Sel Prestuhn Thomas S. Monson
El suc orwekuhtlac ac suc luhngse kuht etuh na pwacye luhpan enenuh lasr in moulkihn moul lasr uh fal in eis mwe engan yohk kuh emet uh.
Tamuhlwel sacohk wiyuck, fuhkah wolacnaiyac in sifil wi kowos inge. Kuht moklweyuck ke ekuh se inge ke kahs ma kuht lohng tari. Nga pruhe tuh nga fah kolyuck pac ke ma ngwac fahk uh.
Pweng luhk nuh suwos ofong uh ac arlac suwohs. Pa ma se inge: liyacacng masap uh.
Masap luhn God uh tiac utuckuh in ahkfohsye kuhtyak kuh eklac ma okahrkahr ke engan lasr uh. Ma siena kac pa pwacye. El suc orwekuhtlac ac suc luhngse kuht etuh na pwacye luhpan enenuh lasr in moulkihn moul lasr uh fal in eis mwe engan yohk kuh emet uh. El use nuh sesr mwe kol ma, kuht fin ukwe, fah kol kuht sef nuh ke fuhfahsryucsr in mahno kwacna sensen se inge. Kuht esam kahs ke soko on in alu etweyuck “Liyacacng masap uh! Ke ma inge oasr sef; ke ma inge oasr mihs.”1
Pahpah tuhmasr Lucng El luhngse kuht fal in fahk: Kowos in tiac kikiacp; kowos in tiac pihsrapasr; kowos in tiac kosro; kowos in luhngse mwet tuhlan lowos oacna kom luhngse kom sifacna; ac som na.2 Kuht etuh masap uh. El kahlwem kac lah ke kuht liyacacng masap uh, moul lasr fah engani, yohk kalmeyaci, ac fihsrwacsr uh. Ma upac ac elyah lasr uh fah fihsrwacsr in muhtwacnglah, ac kuht fah eis mwe insewowo uliyucklac Lal uh. Tuhsruhk ke El use nuh sesr sap ac masap uh, El oacyacpac lwelah kuht in sulaclah in lah ac eis kuh in tohllah. Sulaclah lasr ke ohinge inge fah nuhnuhnkuh fuhfahsryucsr lasr uh.
Nga luhlahlfongi lah kais sie sesr oasr finsrak yohk ke moul ma pahtpaht uh ye muhtuhn Pahpah tuhmasr Lucng ac Wen Nahtuhl, Jisus Kraist. Yohk srihpac na pwacye, ohinge, nuh sesr in oraclah sulaclah ke moul lasr nohfohn ma ac kol kuht nuh ke finsrak se inge. Kuht etuh, tuhsruhk, mwet lokoalok el insacnweacng kuht in kuf. El ac u lal uh oasrasr ke orekma lalos in kuhnahoslah kena suwohswohs lasr uh. Elos ahollah sie ma koluk yohk ac paht nuh ke molwelah ma pahtpaht lasr kuht fin te oasrasr ke nuhnak ac kuh lasr in ahkfahsryelah finsrak lasr. Mwet Sap Peter el sensenkackihn kuht: “Kowos in ngusrik ac tawi! Devil, mwet lokoalok lowos, el forfor oana soko lion ngutngut, sukok mwet elan kangla.”3
Ne ohinge wacngihn pacl ke moul lasr uh ke kuht tiac kuh in srihfeyuck uh, mukul fuhsr uh oasr ke matwac se ke kom kuh in srihfeyuck. Yac in mwet fuhsr inge kwacna yac luhn tahlahp, ke puhla uh finne kom suhfallac nuh kac, ke srihke in eye wi un matwom, ac ke srihke in welah. Kom ac kuh in srihkeyuck in ahksrihkye ohiyac lom an ac in ukwe mwet an in kuh in eisyuck sin mwet suc kom kena in kawuck nuh se uh. Nuhnak muhnahs oruh in fokoko, ac in acsmak ke kuhtwena ma kuh in eslah liki kom mwe insewowo luhn ma pahtpaht uh. Sulaclah kom oraclah inge ac ingena uh ac yohk srihpac ne tok ma pahtpaht.
Ke ritiyuck in Sie Corinth: “Pukanten kain in kas fin faclu.”4 Kuht rauniyucklac ke puhsra pahtokyuck uh, puhsra ahkmuhnahs uh, puhsra isrucnyuck, puhsra suhmaht uh, ac puhsra ahkfohs uh. Nga kuh in fahk lah puhsra inge yohklac. Nga kai kowos in tiac lohacng nuh kac ac in moklweyuckyak sahyac ke puhsra srihsrihk sacn ma fah kol kom nuh ke sef. Esam lah sie mwet ma oasr wal la ac fihliyac pahol fin sifom tukun kom pacptaislac, ahkkweyeyucklac nuh ke sie mempucr ke Alu uh ac fahk, “Eis Nguhn Muhtahl.”5 Ikucslah insiyom, finne nguhnum, nuh ke puhsra yohk srihpac se ma fahkwack ma pwacye uh. Oacna ke mwet pahluh Isaiah el olwelah ah, “Kowos ac lohng pusral … , fahk, ‘Pa inge inkanek uh. Fahsr na kac.’”6 Nga finsrak tuh kuht in ahkolah na, tuh kuht kuh in lohng puhsra ahkkweye, kolyuck inge ma ac oruh kuht in sef na.
Lihnguhn nuh ke masap uh ikucslah inkacnek nuh ke ma nga pahngon ahkkweok ke lwen lasr uh. Ma ingacn weacng ahkkweok ke sukohsohk, ahkkweok ke petsac koluk, ahkkweok ke ono kuh, ahkkweok ke moul in mahno, ac ahkkweok ke sisi tuhlihk, in fahklah kuhtuh pac. Ma suhmuhslah uh fahk nuh sesr tuh setuhn el “oraclah [pwelucng] ma inge nohfohn.”7 Kuht etuh lah el pa pahpah tuhmwacn ma kikiacp nuh kwewa, ac el srihke in kiacpwelah ac ahklohsryelah mwet uh.”8
Nga ngihsre suwos in kahingkihn kuhtwena ma ac fah eiskomlac liki engan lom inge ke moul in mahno ac moul ma pahtpaht ke facluh se fahsruh uh. Ke kuhtasrihk ac kikiacp inge, setuhn el fah kol kom nuh ke acn upac lom nuh ke kuhnausyucklac kom fin lwelah elan oruh nuh sum. Kom fah kuh in muhsrwelac met liki kom kuh in akihlen lah wacngihn inkacnek in tulokihnyac. Kom ac lohng pweng luhn setuhn. El suhlallacl in pahng: Pacl se na inge tiac elyah; mwet nuh kwewa oruh pac; nimet mere; pacl in eklac; tiac kuh in ahkngalye oacna sie; moul lom ma lom in moulkihn. Setuhn el etwekuht, ac el etuh mwe sruhf ma fah upac nuh sesr in ngwet liki uh. Yac fal tuh kuht in karihngihn lwen nuh kwewa in kuh in kahingkihn kain kikiacp ac mwe sruhf uh.
Puhlaik yohk fah enenweyuck ke kuht luhlahlfongi na ac pwacyena inmahsrlon mwe pahtok ma yohkwelihk na ac mwe pihrihk suhlallacl ma raunikuhtlac ac ma ekuhllah ma pwacye uh, kuhnahoslah ma wo ac fas, ac srihke in ahollah ma oreklac mwet uh etuh facluh. Fin masap uh sihmlac nuh sin mwet uh, na in ahollah ke puhla kuh kafucrmacn kuh sin kuhtwena ma sahyac ma ac fal nuh sin mwet uh. Masap uh, tuhsruhk, utuckuh sin God. Orekmakihn sulaclah lasr, kuht kuh in sislah nuh sahyac. Kuht koflah, ekuhloslac, oacna ke kuht koflah ekuhllah mwactan ma tuhkuh ke seahkos ac kuhnahoslah uh.
Lwelah kuht in akihlen lah engan yohk lasr ke moul se inge fah tuhkuh ke kuht ukwe masap luhn God uh ac ahkos sap Lal uh! Nga luhngse kahs sukokyak lun Isaiah sapta 32, fuhs 17 uh: “Ke sripen mwet nukewa ac oru ma suwohs, ac fah oasr misla ac wangin sensen nwe tok.” Kain mihs sacn, kain ahkkweye sacn kuh in tuhkuh muhkwena ke suwohswohs.
Kuht tiac kuh in sifacna lwelah ma srihsrihk ke sukohsohk ke mukwikwi ke ma koluk. Kuht tiac kuh in sifacna lwelah in luhlahlfongi lah kuht kuh in wi “kihtin pacl na” ke seahkostwen masap luhn God uh, tuh ma koluk uh kuh in leumi kuht liki ma ac ngal na pwacye uh in ahksukohsohkye kuhtlac sifacna. Pahlah ma kuh in tuhkuh ke ono kuh, mwe nihmnihm, petsac koluk, ac kosro uh pwacye ac apkuhran na in upac in kuhnausyucklac sahyacn tikuclkucl yohk ac kahsruh yohk.
Fin kuhtwena suwos lwelah ma koluk nuh in moul lowos an, nga ahkkweye kowos lah oasr acn in fohlohk. Mukwikwi kac an pahngpahng auliyak. Finne inkacnek uh upac, molwelah ma pahtpaht lom uh wiwina oruh sacn. Meac kuh in yohk srihpac liki kuh lowos uh? Nga ngihsre kowos in nuhnkuh inge ac ingena in eis step fal inge nuh ke auliyak fohnlah uh. Ke kowos sa oraclah uh, kowos ac sa in kuh in puhlakihn mihs ac tiac okahrkahr ac mwe ahkkweye sruhmuhnyuck sel Isaiah ah.
Pacl fototo se somlah ah nga lohng fahkwack luhlahlfongi luhn sie muhtwacn suc, wi mukul tuhmwacl ah, tuhlac liki inkacnek nuh yen sef uh, kuhnahoslah masap uh ac, ke ma sikyak, apkuhran na kuhnahoslah sucu se lalos ah. Ke kais sie selos kuh in liye lac ke kuhtasrihk luhn pahlah ac akihlen luhpan suhpwacr ke moul lalos uh oruh uh, oacyacpac luhpan elos ahkngalye mwet elos luhngse uh, elos muhtwacwacack in eklac. Mukwikwi ke auliyak uh puhla suhmuhi ac pwacye, ke kuhtuh pacl uh, kweok, tuhsruhk ke kahsruh luhn mwet kol luhn pristut uh, wi kahsruh sin sucu ac sin kawuck wowo uh, elos fohlohklac wolac.
Nga akacsruhi yuruwos sie ip ke fahkwack luhlahlfongi luhn tahmtahel se inge ke kuh in onwelah ke auliyak: “Mwet se ac oruh fuhkah in sie sin sip tuhlac uh ac sruokyucki ke [ma koluk], nuh ke mihs ac engan kuht puhla ingena uh? Ma ingacn sikyak fuhkah? Top an … pa ke srihpen sie wosasuc suwohs, sie Wen suwohs ac kihsaclah Lal nuh sihk. … Acn ma oasr lohsr uh, oasr kahlwem we ingena. Acn ma oasr ahsor ac ngal, oasr engan ac finsrak we. Kuht ahkinsewowoyeyuck na upac ke eklac ma kuh in tuhkuh muhkwena ke auliyak oreklac oasr ke Iwaclah luhn Jisus Kraist uh.
Mwet Lahngo lasr El misac in sang nuh sum ac nga mwe sang ke mwe insewowo sacn. Sahyacn ma pwacye lah inkacnek uh upac, olwelah sac pwacye. Leum el fahk nuh sin mwet suc auliyak:
“Kowos tuhn srusrala ke ma koluk lowos, tusrukta nga fah oulkowosla in fasrfasr oana snow.”9
“Ac nga fah tia sifil esam [elos].”10
Ke moul lasr nohfohn uh kuht fah enenuh in ahkfokokoye fahkwack luhlahlfongi lasr uh ke lutlutkihn ma suhmuhslah ac ke pruhe ac ke motko ma pwacye ke wosasuc luhn Jisus Kraist. Ke ac yoki fokoko uh, fahkwack luhlahlfongi lasr ke wosasuc, ke Mwet Lahngo, ac ke Pahpah tuhmasr Lucng fah mokle ma nuh kwewa kuht oruh uh.
Nga fahkwack luhlahlfongi lah kuht nohfohn wen sacohk nuhtin Pahpah tuhmasr Lucng, suhpweyuckme nuh facluh ke lwen ac pacl se inge ke sie srihpac, ac utuckuh pristut luhn God tuh kuht in kuhlwacnsapuh mwet sahyac uh ac oruh orekma luhn God inge fin facluh. Sapkihnyuck nuh sesr in moulkihn moul lasr uh tuh kuht in nwacsnwacs na in sruokyacna pristut sacn.
Tamuhlwel wiyuck, lwelah kuht in liyacacng masap uh! Ma wolacna ac usrnguck uh ac ahkoeyucklac nuh sesr kuht fin oruh. Lwelah ma inge in mwe insewowo lasr, nga pruhe ke inen Jisus Kraist, Mwet Lahngo ac Molwelah lasr, amen.