Sulaclah Kahlwem
Sel Elder Vern P. Stanfill
Ke Mwet Itngucul
Kuht enenuh in sulaclah in porongo kahs in kahsruh luhn mwet pahluh, akihlen ac mukwikwi nuh ke mokleyuck luhn nguhn, in ahkostwen nuh ke masap luhn God, ac suk fwackyuck la sifacna.
Tiac pacl loes somlah ah, nga ac muhtwacn kiyuck uh sulaclah lah kuht enenuh in etwaclah yohk na pwacye kahtoiyen acn oan fototo nuh lohm sesr ah fin acn northwest Montana. Kuht sulaclah in pwacskuhl kahsruhsr nuh ke Hiawatha Trail, oreklac nuh ke inkacnek in pwacskuhl ma tuhpallah Rocky Mountains kahto inmahsrlon Montana ac Idaho. Kuht rahrahkihn sie lwen engan yurin kawuck wowo uh, engankihn kahtoiyen na acn sac.
Kuht etuh lah kahsruhsr lasr ke innek ke mael 15 kahto an ac weacng pac sohs luhn trein loeloes fin infahlfahl loal uh ac tuhnuhl loeloes uh fuhluhngyac finohl sraksrak uh. Oruh kuht ahkoe kuhtlac sifacna ke kahlwem kapriyucki nuh ke susu ac pwacskul ukwacsr uh.
Mwet suc oruh tari met liki kuht uh ahkkacsmakihnye kuht lah tuhnuhl ah lohsr ac lah kuht enenuh na pwacye kahlwem fokoko. Ke kuht fahsrweni nuh muhtuhn yot luhlahp ikacklah luhn Taft Tunnel an, sie mwet karihngihn acn sacn el ahkuhtweyac kuhtuh mwe sensen luhn innek soko an, weacng inlaf loal muhtuhn innek an, sinkac sraksrak an, ac lohsr na upac an. Ke semuhtweng, kuht muhtwacwacack kahsruhsr nuh lun tuhnuhl an. Tukun kuht pwacskuhl ke mihnit na ekahsr, lohsr fwackyuck an raunikuhtlac. Kahlwem ma nga us ah suhfal, ac lohsrlohsr uh pacl na sa raunweloslac. Kihtihn pacl ah na, nga muhtwacwacack in puhla elyah, fohsack, ac nuhkanlah.
Nga mwekihn in ahkkahlwemye elyah luhk nuh sin kawuck ac sucu luhk ah. Finne nga sie mwet etuh pwacskuhl, nga ingena puhla oacna ngan sonna kahsruhsr ke soko pwacskuhl. Upac nuh sihk in suwohselihk na ke fohsack luhk uh yohkwaclihk. Sahflahiyac, tukun nga ahkkahlwemye elyah luhk nuh sin mwet wiyuc ah, nga kuh lac in kahsruhsr fototoeni nuh ke kahlwem fokoko luhn sie kawuck. Pwacyena, mwet nuh kwewa ke u sac muhtwacwacack in oraclah sie raun fokoko raunwellah. Ke kuht fototo nuh yohrohl ac muhngnguh ke puhlan pacl nuh ke kahlwem lal ac kahlwem orekweni luhn u sacn, kuht kahsruhsr loali nuh lun lohsrlohsr luhn tuhnuhl uh.
Tukun oacna in ao ekahsr na puhs uh, nga liyacack sie tul in kahlwem. Apkuhran in pacl sacna, nga muhtwacwacack in puhla wolac lah ma nuh kwewa fah wona. Nga kalweni in ahkwot nuh met, luhlahlfongi kwewana ke kawuck luhk ac tul in kahlwem yohkwaclihk sac. Luhlahlfongi luhk uh sana fohlohkoh ke kahlwem sac yohkwaclihk ac upaclah. Met likina sun sahflahiyen tuhnuhl sac, nga tilac enenuh kahsruh luhn kawuck luhk ah. Elyah nuh kwewa wacngihnlac ke kuht pwacskuhl silahklahk nuh ke kahlwem sac. Nga puhla mihs ac ahkkweyeyuck finne met liki kuht kahsruhsr nuh ke kahlwem luhn lututacng sesseslah ke fucsrfucsr ac kahto.
Kuht moul ke sie facluh ma kuht fah puhlakihn ma upac nuh ke luhlahlfongi lasr uh. Kuht kuh in puhla luhlahlfongi lah kuht ahkolah in sun ma upac inge—na tok kuht sokwack lah ahkolah lasr uh suhfallac. Ac oacna ke kawuck luhk uh sensenkackihnyuc ke lohsrlohsr sac, sensenkackihnyuck nuh sesr mihsenge. Puhsrwen mwet pahluh uh kwacfe nuh sesr in ahkoe kuhtlac sifacna ke kahlwem fokoko luhn nguhn uh.
Oacpacna, kuht kuh in puhla mwekihn, tiac wo, kuh fohsack ke nguhn ke kuht puhlakihn sie ma upac nuh ke luhlahlfongi lasr uh. Inkaiyacn pacl uh, kuhiyen ac luhpan puhla inge fah wiwina ohiyac lasr nuh kac uh. Kuht fin tiac oruh kuhtwena ma, lahfuh, insefuhlwact, ac sahflahiyac uh forlah liki ma pwacye uh kuh in eiskuhtlac liki kahlwem sac.
Nga lotwelah kuhtuh lesin yohk srihpac ke ma nga puhlakihn lun tuhnuhl sac. Nga fah akacsruhi kuhtuhna selos.
Ma se met, finne fuhkah upaciyen lohsrlohsr ke tahfuhluo uh, kuht sulaclah luhpahkah ac lusaciyac kuht lwelah ma ingacn in mokle kuht. Kuht enenuh in esam luhpan luhngse luhn Pahpah Lucng ac Wen Nahtuhl nuh sesr. Elos fah tiac siskuhtlac, Elos fah tiac pac lwelah kuht in kuhtangyucklac kuht fin suk ke kahsruh Lalos. Esam puhla lal Peter ke noa upac ke Luhluh Galilee ah. Ke Peter el puhla lohsrlohsr mihsrihsr raunwellah ah, el sana akihlenwack ma enenuh lal ac sulaclah ke pacl sac na in pahng ke kahsruh. El tiacna kihsen siyuckkihn kuh luhn Mwet Lahngo in molwellah; el ana pahng ac fahk, “Leum, moliyula.”1
Ke moul lasr uh, po ahsrweyucklac luhn Mwet Lahngo kuh in ma ke ohiyen kahsruh sin sie kawuck luhlahlfongiyuck, mwet kol, kuh sie pahpah ninac luhngse. Ke kuht tihkuclkucl yen lohsrlohsr uh, wacngihn ma koluk kac in muhngnguh kihtin pacl ke kahlwem luhn mwet suc luhngse kuht ac inse pwacye in kahsrwe kuht uh.
Ke kuht nuhnkuh ahkwoyac uh, efuh kuh kuht enenuh in lohng puhsra wacngihn muhta, sesuwohs luhn mwet lun lohm luhlahp ac mwesahs ke pacl lasr uh ac ngwetngwetlucngi nguhsr luhn mwet suc luhngse kuht na pwacye uh? Mwet ahlohloh inge suc kwacna oasr uh elos kena in kuhnahoslah likina in ahkyohkye ac in isrucn likina in ahkkweye. Kahs in isrucn lalos uh kuh in tilyang nuh in moul lasr, kwacna ke orekmakihnyacn mwe sahrom koluk ke kihtin na pacl ma oreklac suwohs ac in oacyac in kuhnahoslah moul lasr. Yac kom nuhnkuh tuh wona in fihliyac ohiyen moul ma pahtpaht lasr uh in poun mwet sahyac uh? Yac kom nuhnkuh tuh wo in eis ahkkweyeyuck yurin mwet suc wacngihn kahlwem la in sang kuh suc sahp oasr mukwikwi lukmac lalos ma okanyucklac liki kuht uh? Mwet tiac etweyuck inge, fin utuckuh nuh sesr ke suwohs, fah tiacna lwelahyuck finne nuh ke ipin pacl lasr uh, tuhsruhk ke srihpen elos oasr ke social media uh, wihklac liki ma etweyuck pwacye, elos eis wal luhlahlfongiyuck tiac fal nuh kac.
Sulaclah lasr in porongo mwet suc isrucn ma muhtahl uh fah srikuhtlac liki kahlwem in moullac ac molwelah luhn Mwet Lahngo. John el suhmuhslah: “Jesus el sifilpa kaskas nu sin mwet Pharisee ac fahk, ’Nga kalem lun faclu. Kutena mwet su fahsr tukuk fah oasr kalem lun moul yorol, ac el fah tiana fahsr in lohsr.’”2 Esam, mwet suc luhngse kuht na pwacye uh kuh in kahsrwe kuht muhsahi luhlahlfongi lasr uh.
Oacna ke nga mwekihnlac lun tuhnuhl uh, kuht kuh in puhla mwekihn in siyuck ke kahsruh ke kuht tahfuhluo. Sahp kuht pa mwet ma mwet sahyac uh suk ke kuh, ac ingena kuht enenuh kahsruh. Ke kuht akihlen lah kahlwem ac ahkkweye ma Mwet Lahngo El kuh in use nuh sesr uh arlac sacohklaclac in sislah ke insefuhlwact, na mwet kol mokleyuck luhn Alu uh, pahpah ninac, ac kawuck luhlahlfongiyuck uh kuh in kahsruh. Elos sano ac ahkolah in kahsrwe kuht in eis ahkpwacye luhn nguhn ma ac fah ahkoekuhtlac lain ma upac ke luhlahlfongi uh.
Ahkluo, kuht enenuh in luhlahlfongi Leum in kuh in ahkyohkye kuh luhn nguhn ma oasr in kuht sifacna. Kuht koflahna muhngnguh kahlwem luhn mwet sahyac uh ma pahtpaht. Nga etuh lah lohsrlohsr lun tuhnuhl uh fah tiac paht nga fin pwacskuhl na sisken kawuck luhk uh ac ke acn sef luhn u uh. Tuhsruhk kena luhk pa in kuh in sifacna fahsr nuh met ke pacl se nga kuh in liye kahlwem sac. Leum el luti kuht lah kuht fin fototo nuh sel, el fah fototo nuh sesr. Kuht fin oaru in sokuhl, kuht fah sokuhlwack. Kuht fin siyuck, kuht fah eis, kuht fin tongtong ac fah ikacklah nuh sesr.3 Kuht enenuh in mukwilac, etuh tuh Leum El fah ahkfalye olwelah Lal in sruhkkuhtyak liki lohsrlohsr uh kuht fin fototo nuh Yohrohl. Setuhn, tuhsruhk, el fah srihke in oruh kuht in nuhnkuh tuh kuht soenna puhla mokleyuck luhn Nguhn ac lah ac fah fihsrwacsr in tui tilac srihke.
Prestuhn Dieter F. Uchtdorf el fahk nuh sesr in “lahfuh mwe lahfuh lom met liki kom lahfuh luhlahlfongi lom.”4 Ke ward luhk ah, sie mukul fuhsr tuhfahna fahk muh, “Oasr ma nga puhla ma tiacna kuh in ahkuhtweyucki ke kuhtwena ohiyac sahyacn ma ingacn ma sin God me.” Ma inge pa orekma pwacye luhn nguhn.
Ke kuht sun kihsensiyuck kuh srihfeyuck in tahfuh luo, kuht enenuh in esam mwe insewowo luhn nguhn ac puhla ma tilyang nuh insiacsr ac moul lasr uh ke pacl somlah ah ac fihliyac luhlahlfongi lasr ke Pahpah Lucng ac Wen Nahtuhl, Jisus Kraist. Ahkacsmakihnyeyuck nga ke kahs in kahsruh utuckuh lun soko on in alu fihsrwacsr: “Kuht lahlahlfongi Leum wolana [tuh] kuht etuh ke Leum pacl somla met.”5 In ngwetngwet lucngi ac srihkkihn puhlakihnyuck luhn nguhn pacl somlah ah fah ahkloesye kuht liki God.
Suk lasr nuh ke kahlwem uh fah ahkyohkyeyuck ke kena lasr in akihlen ke ac kahlmwelihk ke moul lasr uh. Ma suhmuhslah in pacl inge uh ahkuhtweyac kahlwem ac sang sie olwelah nuh sin mwet suc eis uh: Ma suc tuhkuh sin God pa kahlwem, ac mwet suc eis kahlwem ac kalweni ke God ac eis kahlwem yohk. Kahlwem se inge ac kahlwemi likina met ah nuh ke lwen wowo se (liye D&C 50:24).6 Oacna ke kuht fin srwackna pwacskuhl nuh ke kahlwem sac, ke kuht lihksrweni, mokleyuck Lal fah use luhlahlfongi, nuhnak kuh, ahkkweye, ac—yohk liki nuh kwewa—kuh in etuh lah El moul.
Ahktolu, wacngihn lohsr arlac toasr, arlac koluk, kuh arlac upac ac koflahna kuhtangyucklac ke kahlwem. Elder Neil L. Andersen el tuhfahna luti: “Ke ma koluk uh yohkwaclihk fin facluh, oasr sie kuh ke nguhn in ahkfalye nuh sin mwet suwohswohs. Ke facluh fuhlwelah pwelucng luhn nguhn la uh, Leum El ahkolah inkacnek soko nuh sin mwet suc Sokol, sang nuh selos mwe ahkpwacye yohk, ahkkweye yohk, ac luhlahlfongi yohk ke kolyuck luhn nguhn elos fuhfahsryucsr kac uh. Mwe sang luhn Nguhn Muhtahl eklac sie kahlwem na sahromrom ke faht kahlmwelihk uh.7
Tamuhlwel ac tahmtahel, kuht tiacna fihliyucki muhkwena in mokleyuckyak ke finsrak ac eklac nuh kwewa ke ohiyacn facluh, tuhsruhk oasr kuh lasr in sulaclah luhlahlfongi sahyacn tahfuhluo. In kuh in eis kuh ke nguhn in ahkfalye se inge ma uliyuck, kuht enenuh in sulaclah in lohng kahs in kahsruh luhn mwet pahluh, akihlen ac mukwikwi nuh ke mokleyuck luhn nguhn, ahkostwen nuh ke masap luhn God, ac suk ke fwackyuck nuh sesr sifacna. Kuht enenuh in sulaclah. Lwelah kuht in sulaclah kahlwem luhn Mwet Lahngo. Ke inen Jisus Kraist, amen.