Kuht Oasr Inge in Kuhlwacnsuhpuh sie Srihpac Suwohswohs
Sel Carol F. McConkie
Mwet Kahsruh Se Meet ke U luhn Prestuhn Luhlahp luhn Muhtwacn Fuhsr
Nga finsrak tuh kuht in sulaclah in kuhlwacnsap ke sie srihpac suwohswohs in ekihn aholyacn mwet tuhtahf luhn Leum Lasr Jisus Kraist.
Nga srui lah kuht kuh in tuhkweni wi muhtwacn luhlahlfongi oacna Lisa, suc ma nwacsnwacs insiyac, suc ma luhngse Leum ac Kuhlwacnsuhpwacl, finne elos oasr inmahsrlon ma upac. Sramsram lal Lisa el ahkacsmakihnyeyuc lah kuht enenuh in luhngse sie sin sie ac in liye kahto luhn nguhnin kais sie. Mwet Lahngo el luti lah nguhn uh el yohk srihpac nuh ye Muhtahl. 1 Lah kuht fuhsr kuh mahtuh; Oacna sie matwac ma kuht oasr kac, kais sie sesr “saok sik.” 2 El luhngse kuht. Kuht muhtwacn nuhtin God. Kuht tahmtahel in Zion. Oasr srihpac yohk lasr, ac oasr orekma wolacna ma kais sie sesr enenuh in oruh.
Ke summer ah nga muhtwacta nuh yurin sie ninac kahto fuhsr suc ma oasr muhtwacn nahtuh. El akacsruhi ke puhla lal lah enenuh in oasr srihpac luhn muhtwacn fuhsr nahtuhsr, in oasr ma suc ma in kahsrwelos in puhla yohk srihpac lalos. El etuh lah kuht ac muh sokwack yohk srihpaciyacsr kais sie kuh kawihl lasr ke kuht mukwikwi fal nuh ke srihpac muhtahl lasr ke moul se inge. Choir askuh meet uh onkackihn soko on ma luti ke srihpac se lasr inge. Ke sikeng ac ma upac, finne ke sahngweng ke kuht sun mwe ahktoasr, oasr inse puhlaik lasr. Kuht otwelah tari in oruh ip kunacsr. Kuht tuhkuh in kuhlwacnsuhpuh srihpac suwohswohs se inge.3 Tahmtahel wiyuck, ke srihpac se inge, kuht yohk srihpac. Enenweyuck kuht.
Srihpac suwohswohs se ma kuht kuhlwacnsuhpuh inge pa srihpac luhn Kraist. Pa orekma luhn molwelah uh.4 Leum el luti lah orekma ac wolacna Lal pa in oruh in sikyak moul kawihl ac moul ma pahtpaht luhn mwet uh. 5 Ke srihpacsr Jisus Kraist el kweok, kahk srah ke mahnol kwewa, ac ke luhngse suwohs el acse moul lal. Srihpac lal pa pweng wo, pa pweng engan ke El tuhkuh nuh facluh, finne Jisus, in misac ke facluh, ac in lihppihsacack ma koluk luhn facluh, ac in ahkmuhtahlye facluh, ac in ahknwacsnwacsyelah liki ma sesuwohs kwewa; lah ke el mwet nuhkwewa kuh in moullac.6 Mwet Lahngo lasr el akihlenyac ac kol inkacnek lasr. 7 Nga ahkpwacyeye lah fin kuht ukwe srihkasrak Lal, luhngse God, ac kuhlwacnsuhpuh sie sin sie ke kuhlwacng ac pahkotwen, kuht ac tulac ke nwacsnwacs, wacngihn mwacta ye muhtuhn God ke lwen sahflah. 8 Kuht sulaclah in kuhlwacnsuhpuh Leum ke srihpac suwohs Lal tuh kuht in eklac ma sefanna yurin Pahpah ac Wen. 9
Mwet pahluh Mormon el lihksreni fahkwack, “Tuh oasr orekma se lasr in oruh ke kuht muhta ke mahno luhn infohk uh, tuh kuht in kuh in kuhtanglah mwet lokoalok luhn suwohswohs nuhkwewa, ac in monglac nguhnasr ke tohkohsrahi luhn God.” 10 Mwet kol luhn Alu ac payonir meet ah fahsrwacng nuh meet ke puhlaik ac luhlahlfongi fokoko in tulohkohnwack fohlohkyak luhn wosasuc ac in muhsahi tempuhl suc ma akwuck muhtahl nuh ke moul ma pahtpaht kuh in ahkfahsryeyuck. Payonir in lwen inge, kalmac kom ac nga, kuht oacyacpac fahsrwacng nuh meet ke luhlahlfongi, in orekma ke imac in grape luhn Leum nuh ke molwelah luhn nguhnin mwet uh. 11 Ac, ke Prestuhn Gordon B. Hinckley el luti, “Fuhkah oaskaiyen pacl fahsruh uh ke God Kuhlwacna el ac tahfwelah orekma wolacna Lal … ke kuhlwacnsap kuhlwacng luhn elos suc insiyaclos sesseslah ke luhngse nuh sin Mwet in Molwelah luhn facluh se inge. 12 Kuht wi tahmtahel fokoko wiyacsr ke pacl somlah ah, in pacl inge, ac fihl tok uh ke orekma luhn molwelah!
Met liki kuht isuslac, kuht insese nuh ke plwacn lal Pahpah Lucng suc “ma sang tuhlihk nahtuhl in eis mahno ac srah ac in puhlakihn ohiyac fin facluh in ahkwot nuh ke wolacna ac in eis akihlenyacn oreklac lalos uh ma som nuh ke moul ma pahtpaht.” 13 Nuh ke olwelah ke moul se meet ah, Elder John A. Widtsoe el ahkuhtweyac: “Kuht insese, in pacl sacna, in tiac mwet lahngo lasr sifacna tuh … in mwet lahngo luhn sucu luhn mwet nohfohn. Kuht ilyak in sie sin sie nuh sin Leum. Ahkfahsryeyacn plwacn sac eklac tiac orekma luhn Pahpah, ac Mwet Lahngo muhkwena a ma pac lasr. Mwet srihk emet, mwet puhsisacl emet, ilyak nuh ke sie sin sie yurin God Kuhlwacna in ahkfahsryelah srihpac luhn plwacn in molwelah ma pahtpaht.” 14
Inge ke moul se inge kuht sifilpac olwelah in kuhlwacnsuhpuh Mwet Lahngo ke orekma luhn molwelah. Ke kuht wi oruh akwuck muhtahl luhn pristut, kuht olwelah lah kuht ac muhtwacwacack ke kuhlwacnsap luhn God ke insiyacsr, kuhiyacsr, nuhnak lasr, ac fokokoiyacsr. 15 Kuht eis Nguhn Muhtahl ac suk kohkoh Lal in kol srihke lasr. Righteousness emanates out to the world when we understand what God wants us to do and then we do it.
Nga etuh sie tuhlihk srihsrihk suc fahk nuh sin kawuck lal suc tu ke sie nien pas, “Wei! Kom enenuh na in tuhkuh wiyuc alu ac lutlut kacl Jisus!”
Nga liye muhtwacn ke kuhlahs ke U luhn Muhtwacn Fuhsr tuhkweni asrihkpolac ac isaclosyang tuh elos in kahsruh sie sin sie ac plwacni sie inkacnek wo in kahsruh sie muhtwacn fuhsr suc ma upac in kuhtanglah mwe muhnahs lal.
Nga liye ninac fuhsr ma sang kwewa pacl lalos, talan lalos, ac kuhiyaclos in luti ac moulkihn mwe luti luhn wosasuc tuh tuhlihk nahtuhlos, oacna wen nahtuhl Helaman, in tuyak ke puhlaik ac pwacye in pacl elyah, mwe sruhf, ac ma upac.
Sahp mwe ahkpuhsisacl se emet nuh sihk pa in lohng sie muhtwacn lolacp suc fahkwack ke insiyacl ke fahkwack luhlahlfongi pwacye lah orekma yohk srihpac se emet kuht kuh in oruh pa in ahkolah nuh ke macruht ac sucu. Finne el tiac puhlakihn ohinge, el etuh lah sucu pa yohk srihpac emet ke orekma luhn molwelah, “Plwacn luhn God nuh ke moul ma pahtpaht uh oruh sucu uh in kahlwem kac lah e fah sifilpac sikyak tukun kuht misac uh.”16 Kuht ahkfuhlwactye plwacn luhn Pahpah ac kaksakihn God ke kuht ahkkweye ac tahpuhk kuhpahsr ingoh ke olwelah sasuc ac ma pahtpaht luhn pahyuck. Kuht sulaclah in moulkihn moul nwacsnwacs ac suwohs fin pacl wo tuhkuh, kuht ahkolah in oruh ac liyacacng olwelah muhtahl in lohm sin Leum.
Kuht nohfohn puhlakihn pacl ac ekyek luhn puhlan pacl in moul lasr. Tuh lah kuht oasr in lutlut, orekma, ke u, ac yohkna in lohm sesr, kuht pa mwet in orekma luhn Leum ac kuht oasr ke ao in orekma Lal.
Ke orekma luhn molwelah, wacngihn acn in aorekmai, ahkkoluk, kuh anuhnuhnkuhi. Tiac ma ke matwac, suhmaht, kuh pwengpweng. Orekma muhtahl se inge el ma nuh ke muhsahiyuck luhn sie inse muhsahllah, sie nguhn welac, ac kena in orekmakihn mwe sang muhtahl ac talan usrnguck lasr in oruh orekma luhn Leum ke inkacnek Lal. Pa puhsisacl se ma mokle kuht in puhtati ac fahk, “O Papa, … tia ou lungse luk, a in ou lungse lom.”17
Ke kuh luhn Leum, kuht “kuh in oruh ma nuhkwewa.” 18 Kuht tahfwelah in suk kolyuck Lal ke pruhe, ke ma suhmuhslah, ac ke kohkoh luhn Nguhn Muhtahl. Sie muhtwacn suc utuckyang sie kunohkohn na toasr, suhmuhslah, “Kuhtuh pacl uh nga nuhnkuh lah oacna muhtwacn wiyacsr emet ke Alu uh tiac, oacna kuht, elongwack sifaclos fin ilul lalos ke fong ac pruhe, ‘Oacna sie ma ac sikyak lutu, Kom kuh in kahsrweyuc in muhtwacnglah?’” Na el sihmihs, “Sie mwe insewowo pa sie sin sie lasr ac kuht kuh in tahpuhk sie sin sie ke ma inge kwewa!” 19 Lah meac ngac kuht sun, lah kuht fahsr ke inkacnek nuh ke molwelah, kuht tuhkweni nuh sie ke olwelah lasr nuh sin Mwet Lahngo. Kuht tahpuhk sie sin sie ke orekma Lal.
Ke kuhtuh pacl tari ac, kom acna riti kacl Sister Ella Hoskins, suc ke matwac 100 (siofok) tuh pahng el in kahsruh muhtwacn fuhsr ke ward lal ke Personal Progress lalos.20 Na yac luo tohkoh, ke el yac 102 (siofok luo), Sister Hoskins el eis opi ke Young Women Recognition lal. Muhtwacn fuhsr, ward sac ac U luhn Muhtwacn Fuhsr ac u luhn prestuhn ke Rilif Sosaiti ke stek sac, ac mwet ke sucu lal fahsrweni nuh sie ac ahkfuhlwactye oraclah lal. Elyah luhn matwac, u, ac pahyuck tiac yohk srihpac ke kuhlwacnsap pwacye uh. Muhtwacn fuhsr ahkkahlwemye luhpan srui lalos nuh sel Sister Hoskins, nuh ke luti lal, ac ke srihkasrak suwohswohs lal. Elos ke oacna el. Tohkoh, nga siyuck sel Sister Hoskins, “Kuh kom oraclah fuhkah?”
El suhlahklahk na topukyuclac, “Nga auliyak lwen nuh kwewa.”
Sin sie muhtwacn efahl, suc sesseslah ke Nguhn luhn Leum tuh fin sroal tolyuckyak ke kahlwem pwacye, nga ahkacsmakihnyeyuck in kahlwem ke wolacna luhn muhtahl in tu yurin Mwet Lahngo, ac in ahkinsewowoye mwet sahyac, kuht enenuh in nwacsnwacs. Nwacsnwacs in kuh in oasr ke luhng luhn Kraist ke kuht sislah ma lusrohngtwen ac sulaclah in luhngse God ke kuh, nuhnak, ac fokoko. 21 Mwet Sap Paul el luti, “Kaing liki … koluk lun mwet fusr … fahsr tukun suwoswos, lulalfongi, lungse, ac misla, weluhlos su pang nu sin Leum ke inse nasnas.” 22 Wacngihn sie suc fas. Kuht nohfohn tahfonglac. Tuh kuht auliyak kuht in muh wolac ac “esam in sruokyacna [inen Kriast] se ma kwacna sihmlac ke [insiyacsr].” 23 Ke kuht kuhlwacnsap ke inen Leum, ke inse nwacsnwacs, kuht ahkkahlwemye luhngse luhn Mwet Lahngo ac sang nuh sin mwet sahyac in liye lah inkuhsrao uh fuhkah.
Nga finsrak tuh kuht in sulaclah in kuhlwacnsap ke sie srihpac suwohswohs in ekihn aholyacn mwet tuhtahf luhn Leum Lasr Jisus Kraist. Lwelah kuht in tuhkweni tuyak ac in “onkihn soko on ke insiyacsr in fahsr nuh met, moulkihn wosasuc, luhngse Leum, ac muhsahi tohkohsrahi [Lal].” 24 Nga fahkwack lah ke orekma wolacna se inge, kuht ac etuh ke luhngse pwacye luhn God. Kuht ac eis engan pwacye ac eis wolacna nuhkwewa ma pahtpaht. Ke ine muhtahl luhn Jisus Kraist, amen.