Tuh Elos In Esamuhl Pacl Nuh Kwewa

Sel Elder Claudio R. M. Costa

Sin Mwet Itngucul

Nga luhngse lutlut ac nuhnkuh ke moul Lal suc sang ma nuh kwewa nuh sihk ac nuh sesr nohfohn.

Nga luhngse on soko luhn U luhn Tuhlihk Srihsrihkfahk muh:

Sruhmuhn sramsram kacl Jisus Nga luhngse lohng,
Ma nga ac siyuck sel in fahk nuh sihk fin el oasr inge.
Petsac pe innek uh, nsramsram ke meoa uh,
Sramsram kacl Jisus, sruhmuhn kac nuh sihk.1

Nga luhlahlfongi lah sie facsin ke sruhmuhn sramsram kacn Jisus nuh sin tuhlihk nahtuhsr uh ac sucu uh yohk srihpac na pwacye in liyacacng lwen Sahpuht in muhtahl lun lohm sesr uh.

Pwacyena ma inge fah use sie nguhn yohk srihpac nuh in lohm sesr uh ac sang nuh sin sucu lasr uh srihkasrak sin Mwet Lahngo Sifacna.

Nga luhngse in lutlut ac motko ke moul Lal suc sang ma nuh kwewa nuh sihk ac nuh sesr nohfohn.

Nga luhngse riti pohloh kahs ke ma suhmuhslah ke moul suwohswohs Lal, ac tukun ritiyacn ma suhmuhslah sruhmuhn ohiyac sikyak puhlakihnyuck Sel uh, nga kaliyac muhtuhk ac srihke in petsacelah pacl muhtahl inge ma lutiyuc ac ahkkweye nguhnihk.

Kain pacl oacna:

Ke El acnilac nuh infohk uh ac, tukun kuhlamihsyac, mosrwelah muhtuhn mwet kun sac ac fahk nuh sel, “Som, twacnlah ke luhluh in kof Siloam.” Ac mwet sac ahkos na, “ac twacnlah, ac fohlohk tuh liyactweni.” ²
Ke El unwelah muhtwacn se suc mihsen srah ac kahlyac puhlan nuknuk Lal ah, luhlahlfongi lah in Kahlilyac na el ac kwelac na.³
Ke El sikyang nuh sin mwet tuhma lutlut Lal ah, fuhfahsryucsr fin meoa.⁴
Ke El som wi mwet tuhma lutlut ke innek som Emmaus ac ikucslah etwacack lalos nuh ke ma suhmuhslah uh.⁵
Ke El sikyang nuh sin mwet yenuh Macrike ah ac fahk nuh selos in tuhkuh nuh Yorohl ac sang paholos nuh Kacl ac puhla iken osra ke Niacl ac Pahol ah, tuh elos in etuh lah El pa “God luhn Israel, ac God luhn facluh nohfohn, ac [pa] misac ke ma koluk luhn facluh nohfohn.”⁶

Nga engan ke etuh lah oasr ninac pahpah suc sruhmuhn sramsram ke Kraist nuh sin tuhlihk nahtuhlos uh. Nga akihlen ma inge ke nga liye tuhlihk ke Alu uh ke prokracm ke U luhn Tuhlihk Srihsrihk an ac kuhtuh pacl sahyac.

Nga srui ninac pahpah tuhmuhk ah ke lutiyuc ke Kraist. Nga kalweni in liye ohiyac srihkasrak luhn Mwet Lahngo kahsrweyuh ac muhtwacn kiuck uh ke kuht luti tuhlihk nahtuhsr sifacna uh.

Insiuck sesseslah ke engan ke nga liye tuhlihk nuhtihk uh sruhmuhn sramsram kacn Kraist nuh sin tuhlihk nuhtin nuhtihk uh. Ma inge ahkacsmakihnyeyuc ke ma suhmuhslah pahiyuck, sukokyak lun 3 John, sapta1, fuhs 4, suc rit muh, “Wacngihn engan yohk yohk oacna ke nga lohng tuhlihk nuhtihk uh fahsr ke innek pwacye.” Ac efuh tiac tuhlihk nuhtin nuhtihk inge pacna?

Nga srui nuh sin mwet kol lasr uh suc nuhnuh luti kuht ke Kraist, in liyacacng lwen Sahpuht in muhtahl, ac ke ipeis kuhfa luhn Leum ke kais sie Sacnri in ahkfuhlwactye Mwet Lahngo.

Sahpuht uh ac kuhfa luhn Leum eklac mwe engankihnyuck se lac ke kuht lutlutkihn sramsram kacn Kraist. Ke kuht oruh uh, kuht oakiyac ohiyac wowo ma muhsahi luhlahlfongi ac fahkwack luhlahlfongi lasr ac in liyacacng pac sucu lasr uh.

Wik ekahsr somlah ah, ke sifil luti pweng lal Prestuhn Russell M. Nelson utuckuh ke toeni luhlahp sahflah sac, ac ke nga motko ke lwen Sahpuht, nga puhlakihn srui yohk ke mwe insewowo ac wo ohiyac in kuh in ipeis kuhfa luhn Leum. Nuh sihk ma na muhtahl, pacl na sacohk se luhn nguhn. Nga arlac engankihn toeni ke kuhfa luhn Leum uh.

Ke motko, nga lutlutkihn ahkwoyac mwe insewowo ke puhret ac kof uh. Nga riti ac nuhnkuh loal ke pruhe uh ac akwuck ke kuhfa luhn Leum uh. Nga muhtwacwacack in esam ke nuhnahk luhk ac insiuck ma sikyak kac ah ma kuhpahsri nuh ke kuhfa luhn Leum.

Ke sie ohiyen nuhnkuh loal, nga nuhnkuh ke lwen sac, lwen se emet ke kuhfwen flao tiac pulohl, ke El, in topuk siyuck luhn mwet tuhma lutlut Lal’ lah oyac yen in ahkoo Kuhfwen Ahluhkwelah, in tohpohkohlos, fahk, “Som nuh in siti nuhs in mwet se, ac fahk nuh sel, Mwet Lahngo El fahk muh, Pacl luhk fototo; Nga e oruh kuhfwen ahluhkwelah wi mwet tuhma lutlut luhk ke lohm sum..”⁷

Nga srihke in petsacelah in nuhnak luhk uh mwet tuhma lutlut ah moul mongo ac ahkoo ahkwoya tepuh in Weluhl mongo ke lwen na ohi sac: sie tepuh luhn mwet 13, El ac mwet tuhma lutlut 12 Lal, suc ma El luhngse ah.

Nga tuhng ke nga petsacelah Kraist weluhlos mongo ah, ke El fahk, “Pwayena Nga fahk nuh suwos lah, sie suwos fah lahfwekihnyuclac.”⁸

Nga nuhnkuh ke suhpwacrlac luhn mwet tuhma lutlut uh ke siyuck Sel ah, “ Leum, kuh nga?”⁹

Ac ke Judas el siyuck Sel siyuck sac pacna ah, El topuk ange, “Kom fahk lah na.”¹⁰

Nga kuhna in petsacelah paho suc ahkweyeyucklac, unweyucklac, kuhi, ac ahkinsewowoyeyuck, kuhnsaclihk puhret uh ke Jisus El fahk, “Ipeis, mongo; pa inge monuk.” ¹¹

Na El eis sie kuhp nwekyucklac ke wain ac sang kuloh ac sang kuhp sac nuh selos, fahk, “Nuhmlah nohfohn; tuh pa inge srah luhk ke olweacng sasuc, suc ma kahklah ke mwet pucspucs ke nuhnak muhnahs luhn ma koluk uh.”¹²

Ke nuhnak luhk uh nga nuhnkuh ke mwet tuhma lutlut uh kais sie ac liyacack ke muhtahlos elyah lalos ke Mwet Lahngo, suc elos luhngse yohk. Oacna in luhman nga weluhlos muhta, tusrwaci nohfohn. Nga puhlakihn waek na upac ke insiuck, sesseslah ke ahsor ac toasr ke ma el fah puhlakihn keik.

Nguhnihk sesseslah ke sie kena yohk in eklac moul wo. Ke auliyak ac ahsor, nga finsrak tuh in kuh in srihke ac tulokihnyac kahklah kahklac luhn finne tul ekahsr ke srah Kacl fin acn Gethsemane.

Nga tuh nuhnkuh ke kuhfa luhn Leum kuht eis wik nuh kwewa in esam Kacl. Ke kuht oruh uh, nga motko ke kais sie kahs ke ahkinsewowoyeyacn puhret ac kof. Nga nuhnkuh loal ke kahs kac uh “ac in Esamuhl pacl nuhkwewa” ke ahkinsewowoyeyacn puhret, ac “tuh elos in esamuhl” ke ahkinsewowoyeyacn kof uh.¹³

Nga nuhnkuh loal ke kalmeyac in Esamuhl pacl nuh kwewa.

Nuh sihk kalmac pa:

In esam ke moul Lal met liki facluh, ke facl kahto se inge oreklac Sel.¹⁴
In esam isuslac puhsisacl Lal ac ke el oan in manger sac fin acn Bethlehem in Judea.¹⁵
Ac kel srihk na yac 12 matwac, El luti ac sramsram nuh sin mwet luti ke ma suhmuhslah in tempuhl ah.¹⁶
In esam ke El som kuhflah in lukmac nuh yen mwesis se in ahkoo kuhlwacnsap Lal nuh facluh.¹⁷
Ac ke El eklac ye muhtuhn mwet tuhma lutlut Lal an ah.¹⁸
Ac in esam ke El oakiyac kuhfa luhn Leum ke kuhfwen ahluhkwelah .¹⁹
Ac som nuhke imac Gethsemane ac kweok lacna ke ma koluk, waek, ma suhfal, mas tuh kahklah Kacl yen nuhkwewa ke mahnol.²⁰
In esam ke, tukun kweok na yohk ac waek, ne ke yen Gethsemane, El lahfwekihnyucklac ke kiss se sin sie mwet tuhma lutlut suc El pahngon sie kawuck.²¹
Ac ke El utucklac nuh yorohl Pilate ac Herod in nuhnuhnkweyuck.²²
Ac ke El isrucnyuck, puohpoh, acniyuck, srihngihlyuck, ac ahkkweokyeyuck wi sucl sucl soko suc aclihk Mahnol uh.²³
Ac ke twefuroh in kohkul uh fakfucki fin Sihfacl ah.²⁴
In esam lah El sihfacna us sahkseng soko Lal nuh Golgotha ac El patpucti ke sahkseng soko we, kweok ke waek nuhkwewa luhn mahno ac nguhn.²⁵
Ac ke sahkseng soko ah, Insiacl sesseslah ke pahkotwen, El ngwetwacng liyaclos suc Sruhpuhsruhlwack ah ac muhtahl nuh inkuhsrao siyuck ke nuhnak muhnahs, “Pahpah, nuhnak muhnahs nuh selos; tuh elos tiac etuh ma elos oruh uh.”²⁶
In esam ke El, etuh lah El ahkpwacyei kunohkohn Lal in molwelah mwet nuhkwewa, fuhlweack Nguhnal nuh in pacon Pahpah Tuhmal, Pahpah tuhmasr.²⁷
In esam ke Sifil Moulyak Lal, suc in ahkkweye moulyak lasr sifacna ac kuh se tuh in moul Yohrohl ne tok ma pahtpaht, wiwina sulaclah lasr uh.²⁸

In weacng pac, nuhnkuh loal ke pruhe ke kuhfa luhn Leum ac kahs ohi ac yohk kalmeyac ke pruhe sacn, fuhkah wolacnaiyac in ipeis olwelah, ke ahkinsewowoyeyacn kuhfa luhn Leum, tuh ke kuht Esamuhl pacl nuhkwewa, tuh Nguhn Lal fah wi kuht pacl nuhkwewa.²⁹

Nga luhlahlfongi tuh pacl luhn Leum El oruh fal nuh ke pacl in fwackyuck nuh sesr. Nga arlac kahlwem kac yohk ke lutlutkihn Ecclesiastes 3:1, 6, suc riti muh:

“Nuh ke ma nuhkwewa oasr pacl la, ac sie pacl luhn srihpac nuh kwewa ye kuhsrao: …

“Sie pacl in eis, ac sie pacl in kuf; sie pacl in liyacacng, ac sie pacl in sislah.”

Kuhfa luhn Leum el oacyacpac sie pacl luhn Pahpah Lucng in luti kuht ke Iwaclah luhn Wen Kuloh Nahtuhl—Mwet Lahngo lasr,Jisus Kraist—ac nuh sesr in eis fwackyuck kac. Pa sie p acl in “tongtong, ac e tuhfah ikacklah nuh suwos,”³⁰ in ngihsre ac eis etwacack se inge. Pac lasr in efahllah siyuck sin God ke mwe etwacack inge. Ac fin kuht oruh, nga arlac luhIahlfongi lah kuht fah eis mwe etwacack se inge, suc ma ac fah ahkinsewowoye moul lasr na yohk.

Nga luhngse Sahpuht, kuhfa luhn Leum, ac kalmeyac. Nga luhngse Mwet Lahngo ke nguhnihk nohfohn. Ke inen Jisus Kraist, amen.