Kom Tiac Muhkwena ke Orekma uh
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
Ke kom som nuh ke sie kuhlwacnsap luhn pristut nuh ke siena, kom fah liye Leum wi kom orekma.
Tamuhlwel sacok wiyuck, kuht tarilacna lah Leum El pahnglol Elder Ronald A. Rasband, Elder Gary E. Stevenson, ac Elder Dale G. Renlund oacna Mwet Sap luhn Leum Jisus Kraist. Insiacsr, pruhe lasr, ac luhlahlfongi lasr ahkkweyelos.
Kuht etuh ke kuh yohk lalos. Tuh, enenweyuck selos ahkpwacyeiyuck ke pahng lalos an, oacna enenweyuck sesr kwewa, lah Leum El oasr yohrohlos ke orekma Lal. Tikin sasuc se emet el enenuh ahkkweyeyuck se ingacn, oacna ke prist fuhlwact pah se suc eis pahng sasuc se.
Puhlaik se ingacn yohkwelihk ke kowos akihlen lah El pahngon kowos sin mwet kuhlwacnsap Lal uh. Kahs in ahkkweye luhk pa in kahsrwe kowos etuh muh ke kowos oruh ip lowos an, Leum El sang pac kuh Lal nuh ke orekma lowos.
Kuhtwena pahng kuht eis ke tohkohsrahi luhn Leum enenuh ma yohk likina nuhnuhnkuh in mahno lasr kuh kuh lasr sifacna uh. Pahng ingacn enenuh kahsruh sin Leum, ma ac fah tuhkuh. Tikin sasuc se ac fah lotwelah lah ma ingacn pwacye, ac el fah kampare lutlut ke lusen yac pucs fahsruh.
Sie sin grandson nuhtihk uh el oasr inge ofong ke miting se emet lal ke pristut. El akmuhsralah sie tikin lwen ohnkohsr somlah ah. El kuh in kahlwem lah orekma se emet lal ke ma kunacn pristut pa pahselah ahluh in kuhfa luhn Leum Sacnri fahsruh uh. Pruhe luhk tuh elan kuh in akihlen srihpacn pacl se ingacn.
El kuh in nuhnkuh lah orekma lal nuh sin Leum pa in pahselah ahluh in kuhfa luhn Leum an nuh sin mempucr nuh kwewa ke toeni ke kuhfa luhn Leum sacn. Tuhsruhk srihpac luhn Leum tiacna in oruh mwet uh in ipeis ke puhret ac kof muhkwena. Pa in oruh elos in liyacacng olwelah se ma fah kohlohlos fin inkacnek nuh ke moul ma pahtpaht. Ac in oraclah ma inge, Leum El enenuh in sang pacl in nguhn nuh sin mwet se suc tikin el tuh sang ahluh uh nuh se.
Nga liye ma ingacn sikyak ke sie care center ke sie tikin fungyang nuh met in pahsi ahluh an nuh sin sie muhtwacn insucf fasrfasr. El ngwetwacng nuh ke puhret an oacna in arlac ma sacohk uh. Nga tiacna muhlkuhnlah isrwacsr lal ke el ipeis ac na saplakyak in kahlyac insifacn tikin sac, lweksreni fahk, “We, Kuloh nuh sum!”
Tikin sacn oruh na kunohkohn fihsrwacsr lal an. Tuh, Leum El ahkyohkye orekma luhn tikin sac. Ac ahkkahlwemyeyuck muh muhtwacn se ingacn el esam Mwet Lahngo ke el ahkkahlwemye kuloh lal ke kuhlwacnsap luhn tikin sac. El ahkkweyeyuck ke el kuhlwacnsapuh kuhfa luhn Leum nuh sel oruh el kuh in eis Nguhn weluhl. El tiacna muhkahimtacl ke lwen sac lun care center sac. Tikin sac pac tiac muhkwena ke kuhlwacnsap lal uh.
Mwet luti fuhsr se ke Aaronic Pristut uh kuh in tiac etuh, ke el som in luti sie sucu, lah el sie partner yurin Leum ke orekma Lal. Nga srwackna esam fahkwack luhlahlfongi fihsrwacsr luhn sie companion fuhsr forfor luti luhn sucu suc tuhkuh nuh in lohm sesr ah. Nguhn El ahkpwacyei kahs lal. El ac kuh in tiac esam lwen ingacn, tuhsruhk nga esam.
Leum El fah sifilpac ahkyohkye kuh luhn sie mukul fuhsr ke el pahngonyuck in eklac sie prist. Pacptais se emet el oraclah an kuh in ma nuh sin sie mwet el tiacna etuh. El kuh in elyah lah el fah tiac fahk kahs pwacye an ac oruh akwuck an suwohs.
Tuhsruhk Leum, suc el mwet kuhlwacnsap Lal, El ac fah ahkyohkye mwe sang lal. Mwet el pacptaiselah an ac sulaclah in som nuh ke inkacnek nuh ke moul ma pahtpaht. Leum El fah oruh ip yohk Lal kac. El oruh nuh sihk sie pacl ah ke tuhlihk mukul se nga pacptaiselah, sronin muhta uh kahklah ke muhtahl, fahk nuh insrwek, “Nga nwacsnwacslah. Nga nwacsnwacslah.”
Ke kom som nuh ke sie kuhlwacnsap luhn pristut nuh ke siena, kom fah liye Leum wi kom orekma. Nga lotwelah ma inge ke sie miting luhn prestuhn ke u luhn elders uh ke sie toeni luhn stek yac somlah ah. Ke toeni sac oasr ine puhs liki 40 liyeyuck ke mukul suc ac eis Melchizedek luhn Pristut.
Stek prestuhn sacn fungme nuh yuruk ac mahmah, “mukul ingacn nohfohn mukul suhkwac alu kuh in elder lac,” Ke lut, nga siyuck sin prestuhn sac lah prokracm fuhkah lal in molwelah mukul inge.
El srihsrsrihsr nuh sin sie mukul fuhsr e tok ke lohm alu sac. El fahk, “Ela ingoh. Inkaiyen mukul inge fohlohkihnyuckme ke srihpen prestuhn ke u luhn elder an.” El oasr ke tahk soko e tok, nuknuk na oacyac, niyacl ahsrwelihk ke kapihn fahluhk mah se lal an oan ye muhtahl na.
Nga siyuck sin stek prestuhn sac in ahkuhtwelyac nuh sihk tukun miting sac. Ke kuht ohsun ah, nga fahk nuh sin mukul fuhsr sacn lah nga lut ke ma el oraclah ah ac siyuck sel lah el oruh fuhkah. El pwacyena tiacna nuhnkuh enenweyuck el in eis opi kac.
Na el kahkahsrihk fahk, “Nga etuh mukul suhkwac alu nuh kwewa ke mura se inge. Inkaiyaclos oasr stosah ukwaclos. Oasr pac stosah ukuhk. Nga ohllah pickup ukuhk uh acn ma elos ohllah ma okwaclos uh. Ke kuhtuh pacl, eltahl kawuckyak.
“Na nga sano nuh ke sie ma tahfonglac ke moul lalos. Kwacna sikyak. Elos fahk nuh sihk kac. Nga lohng ac nga tiac ke tuni ma koluk uh. Na, ke elos fahk, ‘Oasr ma koluk ke moul luhk uh. Enenuh na in oasr ma wo liki ma inge.” Nga fahk nuh selos ma nga sislah uh ac acn elos kuh in sokwack we uh. Kuhtuh pacl uh elos luhlahlfongiyuc, ac ke elos oruh uh, nga usaclos.
Kom kuh in liye lah efuh el arlac suwohs. Ke srihpen el etuh lah el oraclah ip srihsrihk lal ac Leum El ac oruh ma sahyac uh. Leum pa mwet se ma kahlyac insiacn mukul ingacn ke elyah lalos uh. Leum pa mwet se ma sang nuh selos puhla lah oasr sie ma wo liki nuh selos ac finsrak se tuh elos in kuh in sokwack.
Mukul fuhsr se inge— suc—oacna kom—el sie mwet kuhlwacnsap luhn Leum, luhlahlfongi na lah fin el oruh ip srihsrihk lal uh, Leum El fah kahsruh mukul inkacnek nuh lohm ah ac nuh ke engan El muhkwena kuh in sang nuh selos. Mukul se inge etuh lah Leum El pahnglol oacna prestuhn ke u luhn elders uh ke srihpen el oruh ip lal.
Ac oasr pacl ke kuhlwacnsap lom uh ke ac wacngihn muhtwacta wo ac kuh in oreklac ke prestuhn ke u fuhsr luhn elders uh. Pa ingacn pacl se kom fah enenuh in luhlahlfongi na ke Leum, etuh lah kom fah oruh ip lom ke orekma uh, pahngon kom ke mwet kuhlwacnsap pakpucki Lal uh. In oasr luhlahlfongi ke pahng sin mwet kuhlwacnsap luhn Leum el yohk srihpac ke kuhlwacnsap ke misineri luhn pahpah mahtuh na mahtuh tuhmuhk Henry Eyring.
El pacptaislac ke Mahs 11, 1855, fin acn St. Louis, Missiouri. Erastus Snow el akmuhsraellah nuh ke ohfohs luhn prist se tohkohyang na. Prestuhn ke Stek luhn St. Louis, John H. Hart, el pahnglol in kuhlwacnsapuh sie misin nuh ke Cherokee Nation ke Ohktohpa 6.1 El akmuhsralah sie elder ke Ohktohpa 11. El kahsruhsr ke ohsr soko som nuh ke Cherokee Misin ke Ohktohpa 24 . El yac 20 ac mwet luhlahlfongi sasuc se ke lusen mahlwem itkohsr.
Fin kuhtwena mwet sruok pristut oasr srihpac se la in puhla suhfal kuh tiac ahkolah, pa Henry Eyring. Srihpac se fanna el kuh in oruh pa eis puhlaik in som pa ma el etuh ke insiacl muh God El pahnglol ke mwet kuhlwacnsap pakpucki. Pa kahsruh ke puhlaik lal. Ma ingacn pa kahsruh ke puhlaik in kampare, finne meac kunohkohn ke pristut uh.
Tukun Elder Eyring el kuhlwacnsap ke yac na upac tolu ac tukun misac luhn prestuhn ke misin sac, Henry el sollac ac akmuhsralah in prestuhn ke misin ke sie miting orek ke Ohktohpa 6, 1858. El tiac etuh ac lut oacna sie tikin kuh in oruh. El suhmuhslah, “Nga tiacna pahngon ngwac pahngokyuck nuh ke ohfohs ke kunohkohn sacn tuhsruhk ke srihpen pa kena luhn tahmtahel uh nga engan in eis, puhla pacna muhnahs yohk ac suhpah.”2
Prestuhn Eyring se ingena sac som nuh Cherokee, Creek, ac Choctaw Nation ke 1859. Ke kuh lal, Leum El “sang”, ke Henry el suhmuhslah, “sie nempuh nuh ke alu uh.” El oakiyac pracns luo tuhsruhk akihlen lah “suhpuhs mwet oaru in ahkkweye ma inge.”3
Yac se tohkoh, Henry el sun ma upac se ma mwet kol fin acn uh inmahsrlon mwet uh suc el kuhlwacnsapuh elos tilac insese ke misineri Luhlahlfongi ke Lwen-sahflah elos on oruh orekma lalos. Ke el motko ke meac el ac fah oruh, el esamwack kahs kolyuck sin misin prestuhn se emet lal fahk muh el in tahfwelah misin lal nuh ke 1859.4
Ke Ohktohpa ke yac sacn, Henry el suhmuhslah nuh sel Prestuhn Brigham Young ke kolyuck, tuhsruhk el tiacna eis top nuh ke kihsen siyuck lal an. Henry el suhmuhslah, “Tiacna kuh in lohng kuhtwena ma sin Prestuhnsi ke Alu uh, nga pahngon inen Leum ke pruhe, siyuck in ahkkahlwemye nuh sihk ac kena nuh ke muhta paht luhk kuh som nuh Zion.”
El kalweni: “Mwemwe se ten inge oreklac sihk in tohpohklah pruhe luhk uh. Nga mwemwe muh nga tui [Salt Lake] City ac sana som nuh ke ohfohs lal [Prestuhn Brigham] Young ah, ma nga sokuhlwack we. Nga fahk nuh sel: ‘[Prestuhn] Young nga tuhkuh liki misin luhk uh, nga tuhkuh ke sulaclah na luhk, tuhsruhk fin oasr ma koluk ke ma inge, nga kena in fohlohk ac ahksahfyelah misin luhk uh.’ [Ke mwemwe ah mwet pahluh] el topuk: ‘Kom muhta paht tari, wona.’”
Henry el sihmihs ke journal nahtuhl, “In oruh mwemwe met liki ma ahkpwacyeyucklac na oasr luhlahlfongi luhk in luhlahlfongi, lah ma inge oacyacpac fah ac mwe mwacta muhtwacwacack ke pacl se in ahkolah in muhtwacwacack.”
El tui fin acn Salt Lake City ke Ohkohs 29, 1860, el fahsr na inkaiyacn pacl uh. Lwen tok ah, el utyak nuh lun ohfohs lal Prestuhn Brigham Young ah.5
Henry el ahkuhtweyac puhlakihnyuck uh ke kahs inge: “[Nga] muhtwacta yohrohl [Prestuhn] Young, suc eis [yuc] alrac kuhlwacng. Nga fahk nuh sel, ‘[Prestuhn] Young nga tuhkuh sahyacn suhpweyuck, fin nga oruh ma koluk, nga kena in fohlohk ac ahksahfyelah misin luhk uh.’ [Brigham Young] el topuk: ‘Wona, kuht sanwe kom na.”
Henry el ahkuhtweyac engan lal, fahk, “Tuh mwemwe luck uh oreklac na pwacye.”6
Engan lal an tuhkuh ke sie ahkkweyeyucklac lah Leum El weluhl orekma ac karuhnganuhlwacng. El lotwelah ma pwacye nuh sesr nuh kwewa uh—lah mwet kuhlwacnsap luhn Leum mokleyuck ine tuh kena luhn Leum. Ac Henry Eyring el ahkkweyelah ma nga etuh uh pac: lah mwet pahluh, ke prestuhn luhn pristut, mokleyuck sin God in liyacacng ac karihngihn mwet kuhlwacnsap luhn Leum.
Finne meac kunohkohn lowos ke pristut, oasr pacl se kom ac puhla lah Pahpah Lucng El tiacna akihlen kom. Kom kuh in pruhe in etuh lah El fah, ac ke kena suwohs in oruh oacna sie ma El siyuck kom in oruh, kom fah eis sie top.
Pahpah Lucng El fah lwelah kom in puhla lah El etwekom, lah El luhngkihn kuhlwacnsap lom uh, ac lah kom eklac suwohswohs ke painyuck sin Leum kom kena lohng na pwacye uh: “Kom mwet kuhlwacnsap wo ac oaru. Wona orekma lom. Kom oaru in liyacacng ma puh, inge nga ac fah sot tuh kom in karihngihn ma pucspucs. Fahsruh ac wiyuc engankihn mwe insewowo luhk.”7
Pa mwe pruhe luhk tuh mwet sruok pristut nuh kwewa fah saplaklac ke luhlahlfongi in kuhlwacnsapuh nguhna nuh kwewa suc ma kunacl uh. God El fah sang pac kuh Lal nuh ke orekma luhn mwet kuhlwacnsap Lal. Insiacn mwet uh fah mokleyuckyak in oraclah sulaclah ma fah usacloslac fin inkacnek luhn wosasuc nuh ke engan ac liki ahsor uh.
Mwe pruhe pac luhk tuh mwet sruok pristut nuh kwewa fah puhla luhngse ac karihngihn wowo luhn Pahpah Lucng, luhn Mwet Lahngo, ac luhn mwet pahluh luhn God ke pahng lal ke pristut uh.
Nga usot mwe loh sacohk luhk lah kuht wi kuhlwacnsap luhn Leum Jisus Kraist suc sifil moulyak. Nga fahkwack lah El pahngon kom ac nga nuh ke kuhlwacnsap Lal ke El etuh kuhiyacsr ac kahsruh enenweyuck sesr. El ac fah ahkinsewowoye orekma lasr yohk liki kena lasr ke kuht sang kuhiyacsr ke kuhlwacnsap Lal. Nga fahkwack lah mwet pahluh luhn God, suc pa prestuhn luhn pristut nuhkwewa fin facluh, el moklweyuck sin God.
Nga tarilacna ke srihkasrak luhn mwet sruok pristut luhlahlfongi acn nuh kwewa uh. Pahpah Lucng ac Mwet Lahngo tarilacna lah kom oruh ip lom an. Elos etwekom ac luhngse kom. Ke inen Jisus Kraist, amen.