God El Pa Ikwik ke Oak uh.
By Elder M. Russell Ballard
Ke U luhn Mwet Sap Singucul Luo
Masap ac olweacng uh ma pwacye ac mwe luti sacohklacna ma oasr ke Oak Mahtuh luhn Zion, yen ma God pa ikwik kac uh.
Ke toeni luhlahp ke Ohktohpa tari ah, nga suli mwet lohng ah in ukwe kahs in kahsruh lal Brigham Young in muhta ke Oak Mahtuh luhn Zion, suc pa Alu luhn Jisus Kraist luhn Mwet Luhlahlfongi lal ke Lwen-sahflah, ac in sruokyacna kewa ke paholos.1 Ke pacl sac na, nga engan in etuh lah kuhtuh sin sucu luhk ah ac mwet sahyac elos tuh porongo ac siyuck sihk, “Maclun oak mahtuh soko ngwacn kuht in sruokyac uh?” Nga ahkacsmakihnyacltahl ke ma Prestuhn Young el fahk ah: “Kuht muhta ke soko oak mahtuh luhn Zion. … [God] El pa ikwik uh, ac muhta na insac. … Elac sulwaclah ac kol. Mwet fin fokoko keluhlahlfongi ke God lalos, tiac kuhnahoslah wuhlwelah lalos nuhsin God lalos, El ac suwohs ke kol kuht uh.”2
Kahlwem lah, Pahpah tuhmasr Inkuhsrao ac Leum Jisus Kraist Elos tuh ahkoelah Oak Mahtuh luhn Zion ke ma pwacye ma pahtpaht in kahlwem ac fihsrwacsr in muh kahsrwe kuht muhtwacnglah pohlkuhlak luhn inkof uh ke moul luhn mwet sukawihl . Pa inge kuhtuh.
Alu luhn Jisus Kraist nuh kolyuck na e ngi me sin mwet pahluh ac mwet sap moul. Finne elos mwet sukawihl ac orwaclah tahfonglac, mwet kuhlwacnsap luhn Leum elos moklweyuck in kahsrwekuht in sensenkihn mwe kahsrwe ma sensen nuh ke moul luhn nguhn ac in kahsruh kuht in fahsr sef ke moul nuh ke acn sahflah lasr, inkuhsrao.
Apkuhran in yac 40 ma nga orekma fototo nuh yohrohlos, nga nuh sifacna mwet loh ke kwewana pihrihkyuck srihk ac fwackyuck yohk moklwe mwet pahluh ac mwet sap, Mwet Kol Luhlahp sahyac, ac mwet kol ke u srihsrihk uh. Finne elos sesuwohs ac orwaclah tahfonglac, mukul ac muhtwacn wowo inge elos insacnweacng suwohs in kol orekma luhn Leum nuh met oacna kolyuck Sel.
Ac kom in etuh ma se inge: Leum El kol Alu Lal sin mwet pahluh ac mwet sap moul. Pa inge ohiyac se ma El oruh orekma Lal pacl nuh kwewa. Pwacyena, Mwet Lahngo El luti, “Pwacyena pwacyena nga fahk nuh suwos: el su insewowo in eisacl suc nga supwacoht, el oacyacpac eisyuc.”3 Kuht tiac kuh in srwaclihk Kraist liki mwet kuhlwacnsap Lal. Fuhnuh wacngihn mwet Sap Lal met ah, ac wacngihn ma sihmlac sin mwet suc sifacna lohoh ke mwe luti puhs Lal, orekma Lal facluh, kweok Lal ke Imac Gethsemane, ac misac Lal ke sahkseng ah. Fin wacngihn mwe fahkwack lalos, ac wacngihn na etuh lasr ke kuclyuck lal ac ke Moulyak lal.
El sapkihn nuh sin Mwet Sap met ah:
“Ke ma inge kowos som nu yurin mwet in mutunfacl nukewa fin faclu, ac oru tuh elos in mwet tuhmuhk lutlut: baptaiselos ke Inen Papa, Wen, ac Ngun Mutal:
“Ac luti nu selos in akos ma nukewa nga sapkin nu suwos.”4
Kunohkohn se inge ahksasucyeyuck ke lwen lasr uh ke Leum El pahnglol Joseph Smith elan fohlohkohnwack Alu uh, ke Mwet Sap akmuhsraiyucklac in fahkwelihk wosasuc Lal ke pacl se sahflah met liki El fah sifil fohlohkoh.
Ma upac se nuh sin mwet facluh pacl nuh kwewa in eis mwet pahluh ac mwet sap moul uh, tuhsruhk enenweyuck se na in kuh in kahlwem na pwacye ke Iwaclah ac mwe luti luhn Jisus Kraist ac in eis nohfohnna mwe insewowo luhn pristut ma oasr yohrohlos suc El pahngon.
Puhslac mwet nuhnkuh muh mwet kol ac mempucrs ke Alu uh enenuh in wacngihn ma koluk la kuh in nwacsnwacs. Elos muhlkuhnlah muh luhng kuhlwacng luhn Leum uh fal in oruh orekma Lal sin mwet sukawihl. Mwet kol lasr uh elos kampare tuhsruhk kuhtuh pacl uh kuht tahfonglac. Ma inge tiac orek muhkwena ke kuhpahsr ke Alu, oacna ke orek ke kuhpahsr inmahsrlon kawuck, mwet tuhlan, ac mwet orekma ac inmahsrlon sie mukul muhtwacn pahyuck ac in sucu uh pac.
Fihsrwacsr in akilen mwe muhnahs luhn mwet sahyac. Finne ohinge, kuht tahfonglac na pwacye in muhta tuni ma tahfonglac luhn mwet sahyac uh kuht tiac akihlen poun God orekma in mwet ingacn El pahngon ingacn.
Lohacng nuh ke ma Leum El pihrihky mwet kol sulohsohllah Lal ac ohiyac ma El moklwe Mwet Luhlahlfongi in oruh ma usrnguck ac wolacna finne elos sesuwohs uh pa sie ohiyac ma kuht kuh in sruokyacna nuh ke wosasuc luhn Jisus Kraist ac muhta sef ke Oak Mahtuh luhn Zion.
Ma pwacye se ahkluo an pa mwe luti ke plwacn in molwelah. Sin Mwet Pahluh Joseph Smith, God El sang Puk luhn Mormon, Doctrine and Covenants, ac mwe luti puhs pacnuh sin Alu uh. Ma inge oasr ke etwacack ke plwacn in molwelah uh, suc pa macp se ke acn kuht muhta we tuhkuh, srihpacsr nuh facluh, ac lah kuht ac som nuh oyac ke kuht misac uh. Plwacn sac oacyacpac use nuh sesr etwacack ma siena, ac ma pahtpaht lah kuht tuhlihk nguhn nuhtin God. Ke kuht kahlwem lah suc Pahpah tuhmasr Inkuhsrao ac lah meac kuhpahsr lasr nuh Sel ac nuh sin Wen Kuloh Nahtuhl, Jisus Kraist, kuht fah insese nuh ke masap Lalos ac orwaclah olwelah lasr yohrohlos kuht in kuh in fohlohk nuh Yohrohlos ma pahtpaht.
Pacl nuh kwewa nga sruok sie tuhlihk tuhfahna isuslac, nga muhtwacwacack motko: “Yac kom an, tuhlihk srihsrihk? Yac kom ac eklac nuh ke ke srihpen Iwaclah luhn Kraist?
Kuht siyuck kain in kihsensiyuck in sifacna motko ke mwet se kuht luhngse misac: “Elos oasr oyac? Meac elos liye kuh puhla? Kuh moul uh kalweni-yuck? Fuhkah ohiyacn kuhpahsr sacohk met lasr ke facl luhn nguhnin mwet misac?”
Ke facl sac, sucu lasr ah oasr tuhlihk muhtwacn luo nuhtin nuhtihk, Sara ac Emily, oacyacpac sie tuhlihk mukul nuhtin nuhtihk, Nathan. Ke misac luhn kais sie tuhlihk inge, kuht sucu uh sruokyac kuh na ke ma pwacye luhn wosasuc ke pahosr kwewa. Kihsensiyuck lasr uh toplac ke mihs ac ahkkuh ke srihpen Iwaclah luhn Mwet Lahngo. Kuht finne ahsrwelah tuhlihk nuhtin nahtuhsr inge, kuht etuh lah elos moul, ac kuht etuh lah kuht fah sifilpac liyacltahl. Kuht tarilacna ke kahlwem se inge ke ma luhn nguhn ke pacl upac luhn sucu uh ac lasr sifacna.
Sie pac ki pwacye yohk ke Alu uh pa lah Pahpah Lucng El orwacllah Adam ac Eve nuh ke srihpac yohk se. Pa inge ma kunaclos—ac, ohinge, ma kunacn tuhlihk nahtuhlos—in orwaclah mahno luhn tuhlihk nguhn nuhtin God tuh elos in kuh in moul. Ke atac se inge, Pahpah Lucng El suhpwacma tuhlihk nguhn Nahtuhl nuh facluh in luti ac in kapwack ke ma orek ke moul facluh. Mweyen El luhngse tuhlihk Nahtuhl, God El suhpwacma mwet utuck pweng inkuhsrao me ac mwet sap in lotwelos ke kunohkohn yohk Lal Jisus Kraist in Mwet Lahngo lasr.
Ke yac puhs, mwet pahluh elos ahkfalye ma kunaclos ke elos sensenkackihn mwet ke ma sensen ma elos ac tuh fah sun. Oasr ma kunacn Mwet Sap luhn Leum in topang, sensenkackihn, ac tahfwelah in kahsrwelos suc suk top nuh ke kihsensiyuck luhn moul.
Yac longoul somlah, Prestuhnsi Se Met ac U luhn Mwet Sap Singucul Luo elos ahkfahsrye “Sucu uh: Sie Mwe Fahkwack nuh fin Facluh.” Ke pwepuh moklweyuck sacn, kuht ahksahfye ke kahs inge: “Sensenkackihnyuck nuh sesr lah sie mwet suc kuhnahoslah olwelah in tiac kosro, suc ahkkolukye nuh sin muhtwacn kiyac kuh mukul tuhma kuh tuhlihk nahtuhlos, kuh suc tiac ahkfalye ma kunacl nuh sin sucu fah sie lwen tu nuhnuhnkweyuck ye muhtuhn God. Oacyacpac, sensenkihnyuck nuh sesr lah fahsrwelihk luhn sucu uh e oruh kais sie, mura se, ac muhtuhn facl se in puhlakihn ohiyac koluk oacna fwackyuck sin mwet pahluh met ac mwet pahluh mihsenge uh.5
Ke Mwet Sap uh, kuht sifilpac ahkpwacyei mwe sensen se inge mihsenge. Nuhnak muhnahs esam lah masap ac olweacng uh ma pwacye ac mwe luti sacohklacna ma oasr ke Oak Mahtuh luhn Zion, yen God pa ikwik ke oak uh.
Sie pac mwe luti yohk srihpac ma kuht enenuh in sruok nuh kac uh pa in liyacacng lwen Sahpuht. Ac kahsrwe kuht in nwacsnwacs liki ma facluh, use monglac luhn mahno, ac ahksasucye nguhnin kais sie sesr ke alu nuh sin Pahpah ac Wen Sacnri nuh kwewa.6 Ke kuht engankihn lwen Sahpuht, pa inge sie mwe akucl se ke luhngse lasr nuh Selos.7
Ke ipin orekma lasr in oruh lwen Sahpuht in mwe ahkengan se, kuht tuh siyuck sin mwet kol ke acn nuh kwewa ac sin mempucr ke Alu uh in esam lah toeni luhn kuhfa luhn Leum ma luhn Leum ac enenuh in ma na ke mwe luti. Pacl in akwuck luhn kuhfa luhn Leum pa pacl se kuht ac ahksasucye olweacng lasr ac sifilpac ahkpwacyei luhngse lasr nuh sin Mwet Lahngo ac esam kihsac Lal ac Iwaclah Lal.
Kain nguhnin alu se inge enenuh in nwacklah toeni in lalo ac fahkwack luhlahlfongi lasr ke mahlwem nuh kwewa. Toeni se ke kuhfa se luhn Leum inge ma nuh sin mempucr in fahkwack tarilacna, luhngse, ac kuloh lalos nuh sin Pahpah Tuhmasr Inkuhsrao, Jisus Kraist, ac wosasuc fohlohkihnyuckyak ac in fahkwack mwe lohoh sifacna ke ma inge. Toeni ke lalo ac fahkwack luhlahlfongi uh sie pacl in fahkwack kuhtuh nuhnak pihrihkyuck ac fahkwack luhlahlfongi pwacye la. Tiac pacl in oruh sie sramsram loes se.
Tuhlihk srihsrihk uh enenuh in pracktis fahkwack luhlahlfongi lalos ke Primary ac yurin pahpah ninac kiyaclos ke ekuh luhn sucu ne ke elos kahlwem ke srihpac yohk in fahkwack luhlahlfongi la.
Insacnweacng yohk ke pacl inge in oruh lwen Sahpuht in sie lwen na engan pa sie ma sikyak ke srihpen fwackyuck sin Leum sin mwet kol luhn Alu uh. Mempucr ke ward kaunsucl an enenuh in kahsruh pisaprik ke kuhtuh wik met liki toeni an in liye on ac sifac ma tuh suleyucklac nuh ke kais sie sacrament miting.
Kais sie sesr ahkinsewowoyeyuck ke lwen Sahpuht uh ke kuht sesseslah ke luhngse lasr nuh sin Leum ke lohm sesr ac ke alu ah. Ke tuhlihk nahtuhsr lutiyuck ke ohiyac luhn Leum, elos etwaclah puhla ac mukwikwi fal nuh ke Nguhn Lal. Kuht kwewa ac kena wi ke kais sie Sacnri in ipeis ke kuhfa luhn Leum ke elos puhla Nguhn luhn Leum. Ac mwet nuh kwewa, fuhsr ac mahtuh, suc oasr ma toasr lalos fah puhla tahpuhk luhn nguhn ac mihs ma tuhkuh ke kuht kihsackuhnlah lwen Sahpuht in motko yohk ke Pahpah Lucng ac Leum Jisus Kraist.
Tarilacna, Kraist el oasr pacl nuh kwewa, sano ac kena kahsrwe kuht ke kuht kena auliyak ac tuhkuh nuh yohrohl.
Inge, ke kuht motko muhkwena ke kuhtuh ma pwacye inge ma oasr in Oak Mahtuh luhn Zion, lwelah kuht in muhta na kac ac esam lah, ke kalmac na pwacye, soko oak el mwe wiwac soko, ac srihpen mwe wiwac soko pa in wucn kuht nuh ke acn se sahyac.
Acn sahflah luhn oak okwacsr uh pa mwe insewowo nuhkwewa luhn wosasuc, tohkohsrahi luhn inkuhsrao, wolacna celestial, ac ye muhtuhn God!
Plwacn luhn God uh oreklac tari. El pa ikwik uh, ac oak wolacna ac kuhlwacna okwacl uh wucn kuht nuh ke molwelah ac moul ma pahtpaht. Esam lah kuht tiac kuh in sun acn we kuht fin srolah liki oak uh ac srihke sifacna kofkof na nuh we.
Moul ma pahtpaht pa finsrak ke fuhfahsryucsr in moul se inge, ac wacngihn mwet ac sun finsrak sacn fin tiac ke wosasuc luhn Jisus Kraist—Iwaclah Lal, akwuck, ac mwe kol ma konweyuckyak ke Alu uh.
Alu uh pa acn ma kuht etwaclah orekma luhn God ac eis luhng kuhlwacng luhn Leum Jisus Kraist ma molikuhtlac. Pa ke Alu ma kuht orwaclah insacnweacng ac olweacng ke sucu ma pahtpaht ma oruh kuht in kuh in eis moul ma pahtpaht. Pa Alu uh, suc sruok kuh luhn pristut, ma fah wucn kuht ke ohiyac upac in moul uh.
Lwelah kuht in srui ke Oak Mahtuh kahto Okwacsr Zion, mweyen fin wacngihn kuht tuhlac, muhkwena ac wacngihn kuh lasr, pahtpaht na a e wacngihn mwe ikwik kuh mwe kal, moklweyuck ke eng ac noa luhn kuh luhn mwet koluklacna.
Sruokyac na, tamuhlwel ac tahmtahel, ac som nuh met ke oak wolacna se inge, Alu luhn Jisus Kraist luhn Mwet Luhlahlfongi lal ke Lwen-sahflah, ac kuht fah sun acn sahflah lasr. Pa inge luhlahlfongi luhk ac pruhe kacsr kwewa ke inen El suc kol Oak Mahtuh Zion, finne Leum ac Mwet Lahngo lasr, Jisus Kraist, amen.