Deureng me a Osobelel Chedaol el tekoi er a reng
Se el sekum e a odalm er a klengar er kid a ngara uldasou er a mo suobel el Jesus Kristo me a ebangkelio er Ngii, e kid a sebeched el mo melechesuar a deureng el diak el ior er a ike el ngii a mla duubech—me a lechub e ng diak el bol duubech—er a klengar er kid.
Betik er a renguk el rodam me a rodos, chelechal sils e ng soak el mo mesaod er a osisechakl el ngii a klou a ultutelel el kirel a osebelel a chedaol el tekoi er a reng. Tia el osisechakl a lmuut el kmal mo klou a ulutelel sel lorael mo betok a meklou el kerior me a ongeblad el meliuekl er kid.
A ika a uriul el klebesei, meng diak el kired el mo mechas a rengud alsekum e a ulaoch a mo mekedmokl. A recheldellir a reprofet, el uldimukl er ngii a Isaia, Paulus, Nephi, me a Mormon, a milesa el kmo a kengaol el taem a mei,el sils er kid e a beluulechad el rokir a mo ngara rau el reng me a nglemuu, el rechad a “di mo tir el oubeltik el reng er tir, … el diak a meral beltikelreng, … oubeltikelreng aikel soal a reng el klou er a oubeltikelreng er a Dios,”e betok a mo mesiungel a Diabelong el ngii a meruul a cherarou el tekoi. E uaisei, kau me ngak “oldechelakl … er a remengeteklel a ilkolk er tial el beluulechad, [me a ] dirrek el chedaol klengit er a ngar er bab el basio.”
Ma le uaisei el klautok er a bek el beluu a mengal mo klou,el mekngit el terorist a mo oumekemad er a ulekidakl, me a urebetel a rokui el uldimukl er a siobai me a amt a mo betok, ngera mo sebechel ngosukid? Ngera sebechel mo ngosukii a tang me a ta er kid er a ikel ringel me a meklou el ongarm er a delengchokl er a ikal uriul el klebesei?
A profet el Lehi a ulsisechakl er a osisechakl el kirel a osebelel a chedaol tekoi er a reng. Kot, melbedebek er a teletael el dilubech el mo er ngii: Ngii a mlutaut el olisechakl a klemerang er a Jerusalem e a Rubak a mla melekoi er ngii el mo mechei a rokui el kloklel e chemiis ngii me a telungalek er ngii el mo er a chereomel. Ngii a mla kiei er a tento e mle suobel er a kall el ngii a lebetik er a omerollel el mo er a diak el lodengelii el basio, e ngii a milsterir a reteru el ngelekel sechal, Laman me a Lemuel, el kautok el kirel a osisecheklel a Rubak me a dirrek el okeuad er a rodam er tir er a Nephi me a Sam.
Bleketakl, el Lehi a mle medengei a cherarou, sebekreng, rektel a reng, ringel, tord, me a klengitelreng. E ng di, ngii a mle mesisiich el millekoi e dimlak el omai er a rengul kirel a osisechakl el mlucholt el okiu a Rubak: “Rechad a uaisei, me bo el nguu a deureng.” Mom beberrous! A ike el rokui el tekoi el ngii a sebechel el ouchais el kirel a teletelel me a moktek er a klengar er kid er tia el klechad, ngii a ngileltii a tekoi eldeurreng!
A klengar a mui er a betok el cheliseksikd me a ulebongel el rael, ringel me a ongarm er a rokui el tekoi. Kid el rokui a ngar ngii a techelled el mla ngara taem er a sebekreng, ngasech el reng, me a klengitelreng a mo oremelid. E ng di kid tia el ngar tiang el nga er a deurreng?
Choi! A nger a omeleklel a choi! E ng di mekerang sei e sebechel tekoi? E ngera se el kmal kired el rullii el mo nguu a deurreng el Demad er a Babeluades a obang el kired?
Eliza R. Snow, ongeru el meredel er a General President er a Cheldebechel er a Rolengeseu, a miles kid a mesisiich el nger. Le ng mle uchul a mle mesisiich el llach er a odikel er a Missouri, el ngii a tilobed er a taem er a kmal mle mekngit el kelekolt er a 1838, ngii me a rebebil er a re Santo a mle muri el chemiis er tia el beluu er a taem er tia el kelekolt. A ta er a klebesei, e a telungalek er a Eliza a kiliei er a ta el kekerei el blai el ngii a le kiliei er ngii a remlodik el re Santo. Betok el usbechellel a ika el kerrekar el mo olbidel me a dirrek el mlo idungel el olsiu a ngau er tirke el mle oiak uchei, mle betok a metetoech er a delongelel a kerrekar el sebechel a katuu el melemiakl el ngmoech er a chelsel. Ng kmal mle meringel el kelekolt, me a kelir a mlo medecherech er a kelekolt.
Se ikid el kesus e a rebekordel el okai el chad a mle kaiuseked er a chelsel tia el kekerei el blai, el di mle lluich el sak (6.1 meters square) a klungel. Betok a dilengchokl me a redilchor el ta el kesus el melasm el mengeald er tir. A ngar rikl, a cheldebechel er a rubak a mle ta el kesus el le keldibel el meliuekl er a osiu el ngau, el bebil a mengitakl a chelitakl er a ikelesia me a rebebil a melul a mekelekolt el boteto. Eliza a milluches: “Ng diak a ta el klaumondai el mlorenges—rokui a di mle mui er a deureng, okiu a mlo ues el teletael, a rediak lodengelekemam el chad a mo omdasu el uase aki chad el merael a bek el beluu el osiik a omilil me a ungil tekoi er a reng el diak kim chelechad er a mla modik.”
A omelechesel a Eliza el kirel se el kmal mle omek skareter, e omeksaik el klebesei a kmal mle mengasireng el oureng el kirel a ngar medad. Ngii a uluuchais: “Mle ta er a kmal mle ungil el klebesei. E ng diak a ngodech e ng kmal di re santo a sebechir el ungil a rengrir er a temel a kerior el uai tiang.”
Tia kid! Re Santo a sebechir el ungil a rengrir er a ngidi el teletael el duubech. Ng sebeched el mo melechesuar a deureng se el mekngit a sils er kid, mekngit el sandei, me a lechub e ng mekngit el rrak!
Betik er a renguk el rodam me a rodos, a deureng el domelechesuar a kekerei a ngerchelel el kirel aike el teletael el dubech er a klengar er kid me a rokui el tekoi el kid a omdalm a klengar er kid er ngii.
Sel el sekum kid a mdalm a klengar er kid er a uldasou er a mo suobel er a Dios, el President Thomas S. Monson a dirk ulisechakl er kid, me a Jesus Kristo me a ebangkelio er Ngii, e kid a sebeched el mo melechesuar er a deureng el diak el ior er a ike el ngii a mla dubech—me a diak el boldubech—er a chelsel a klengar er kid. A deureng e mengai er a dirrek e le Ngii a uchul. Ngii a uchul a rokui el deureng. Ke de melechesuar er a temel a Kurismas se el dongitakl, “Deureng el mo er a beluulechad, le Rubak a mla mei.” E dirrek el sebeched el melechesiu er ngii er tia el rokir el rrak. Mo er a Uriul-klebesei el Santo, Jesus Kristo a ngii a deureng!
Sei a uchul e a re misionari er kid a chemoit a blirir e mo olisechakl er a ebangkelio er Ngii. A moktek er tir a diak el omdois er a idisir a rechad er a Ikelesia. Ng bai, re misionari a olsisechakl e melecholb el mo nguu a deureng el mo er a rechad er a beluulechad!
Di ua se er a Osobel a lodars a budech el ngii a “engelakl er a rokui el klaumedengei,” Ngii a dirrek el odars a klisichel, klungel, me a idisel a deureng el ngii a toketekii a uldesuel a chad me a klemedengei er ngii er a klechad. Ua tia el okesiu, ng diak el sal ko er a kmal meringel er kid a mo melechesuar a deureng se el sekum e a ngelekem a chuarm er a diak el sebechel el mukar el tereter, me a lechub e ke mo diak moureor, me a lechub e a bechim a mo oumulak er kau. El uaisei el se ikid a deureng el loldars er ngii a Osobel. A deureng er Ngii a diak el mengodech, ngii a mo mesubed a rengud el kmo a “cherreued a mo uaisei e ng di di kekedeb el taem” e ngii a mo klengeltengat el me er kid.
Mekera, e kid, a sebeched el mo nguu se el deureng? Ng sebeched el omuchel el “omes er a Jesus el ngii a milluches e ulebongel er a klaumerang er kid” “er a rokui el uldasou.” E kid a mo blechoel el mereng a Sulel er a chelsel a nglunguched e dirrek el oltirakl a telbiil el kid a riruul lobengkel Ngii me a Demad er Babeluades. Se el Osebeled a meral el mo merang el me er kid e se el de olengit er a deureng er Ngii el bo el le beskid, e a deureng er kid a mo klou.
Deureng a mesisiich, e a omdalm er a deureng a mo nguu a klisichel a Dios el me er a chelsel a klengar er kid. El ua ngara chelsel a rokui el tekoi, a Jesus Kristo a ngii a kot el klou el okesiu, “el ngii el mlo er a deureng a milkedmokl er medal el outekangel el chuarm er a kerus.” Bo momdasu er rsei! A di ta el rolel el Ngii a mo outekangel el chuarm er a kmal meringel el teletael el ngii a mla er tia el beluulechad, a Osebeled di mle uldalm er a deureng!
E ngera mle deureng el ngii a mle keldmokl el ngar er Medal? Bleketakl el uldimukl er ngii a deureng er a omelikiid, omekungil, me a omelisiich er kid; ng deureng er a mo mengkad a kengterir tirke el rokui el mo ouuchel a rengrir er a kengterir; deureng el mo uchul e ng mo sebechel el kau me ngak a mo lmuut el mo remei—beches e klikiid—el mo kiei lobengkel a rechad er a blid me a telungalek er kid er a babeluades.
Alsekum e ke de di uldalm er a deureng el ngii a mei er kid, me a lechub e ng tirke el betik a rengud er tir, ngera sebeched el mo mesisiich er ngii el ngii a ko er a chetituokel, meringel, demedakt, diak el tabesul, me a lechub e ng di beot el diak el sebeched el remuul?
Ta el chedam el ngara chelsel a chedaol el diak el beleketakl el teletael a ulemdalm er a deureng er a mla mo klikiid e melemalt lobengkela Rubak—deureng er a mla mo mededaes er a klengit el reng er a klengit me a rur—me a deureng er a oba a budech el uldasu. Tia el uldalm a milsa a klisichel meng mlo bleketakl el ouchais er a bechil me a bishop er ngii el kirel a mekngit el blekerdelel er a omes el deleboes me a dirrek el diak el melemalt lomeruul er a chebchiielel. Ngii er chelechang a oureor el obengkel a bishop el melai a counsel el mo meruul e melasm el mo er sel el tku er bab el sebechel el muut el mo nguu a klaumerang er a bechil.
A ta el ngeasek el redil a ulemdalm er a deureng el mo klikiid er a tekoi er a cheliuaiu el ngii a mo ngosukii el mo diak el bo el ua resechelil el ngii a mengeroid er ngii er a ike el ngii a omeruul el mengetikaik,e ng di kengaol er a chedaol tekoi er a reng, me a teletael.
A chad el ngii a dirk mle oridii a omengull er a bechil el mo er ngii e ulsiseb er a ngasech el reng el outoketok er a rengelekel a uldalm er a deureng el mo oba Chedaol Reng el bo el blechoel kldemel.Tia el uldalm a mlo klisichel el mo nguu a sel el chad er a rengul el mo mecherei, el ngii a ble el blechoel el dimlak el olekebai er ngii, e loruul aike el kirel mo mengodech.
A kmal kmeed er ngak el kim dak e loureor a kmal dirk uluuchais er ngak el kirel a klechad er ngii er a ngara mong el kmal mle mui er a betok e longarm. E ng dilul kmo, “Ak mla mesuub el ngara ongarm e lobang a deureng. A ikel ongarm el mla mer ngak a di mlo diak lokiu a deureng er a Kristo.”
Ngera sebeched el kau me ngak a outekangel el mo mesisiich er ngii, alsekum e ke de uldalm er a deureng el ngii a “ngar er medad” ? Ngera el ouuchel a reng er a klengit a mo sebechel? Ngera el chelitechut a mo klisiich? ? Ngera el klikiid a mo klengeltengat? Ngera el tord, me a cherarou, a mo obult el mo klungioled? E ngera el meringel el ngesou el mo er a Rubak a sebeched el rullii?
Se el de blak a rengud el uldalm er a Osobel e oltirakl er a Okesiul el ngii a uldalm er a deureng, e ng kired el mo mengeroid er kid er a ikel el ngii a mo meleb a deureng er kid. Bo molebedebek er a Korihor, ngke el diak el oumerang er a-Kristo? Melekoi a betok el diak el klemerang el kirel a Osobel, Korihor a mlo er a basio ma ta er a basio el mo lmuut er se er a bo er a medal a ngar er bab el prist el uleker er ngii: “Ngera me ke mo merael el melekoi a diak el klemerang el teletelel a Rubak? Ngera me ke olsisechakl er tirka el chad el kmo ng bai mo diak a Kristo, el mo meleb er a deureng er a rengrir?”
Ngi di el ngerang el mo omtok er a Kristo me a lechub e ng Osisecheklel a mo meleb er a deureng er kid. Tia uldimukl er ngii a klaumedengei er a chad, el kmal muut el obdois er a online me a dirrek el ngara blogosphere, el ngii a kmal di ua se el rirellii a Korihor.
Alsekum e ke domes er a beluulechad e oltirakl er a formula er ngii el kirel a deureng, e ng diak a rolel bo dodengelii a deureng. A rediak el melemalt a mo melechesuar a ngi di el cherengela omelechesuar el reng me a bedengel a chad, e ng di te diak a bo el lolechesuar a deureng! A deureng a sengk el mo er a re oumerang. Ngii a sengk el mei el okiu a mera el melasm el mo kiei er a melemalt el klengar, el uaise el osisecheklel a Jesus Kristo.
Ngii a ulsisechakl er kid el mo oba deurreng. Se el dengiltii a Demad er a Babeluades el mo Dios er kid e se el sebeched el melechesuar er a Tngakireng er a Osobel el oureor er a chelsel a klengar er kid, e ke de mo mui er a deureng. Bek el taem el dongedmokl er a rebechid e omekrael er a rengeleked, bek el taem el dousubes er a ta er a chad e dolengit a klausubes, e ng sebeched el melechesuar a deureng.
Bek el sils el kau me Ngak a mo melilt el mo oltirakl a llach er a celestial, bek el sils el doltirakl a chedaol telbiil e olengeseu er a rebebil el mo meruul a osisiu, e a deureng a bo dobang.
Bom momtab a ika el tekingel a Psalmist: “Ak mla nguu a Rubak el mo blechoel el ngar medak: e le ngii a ngar er a katur el chimak, Ngak a diak bok mesmesim. … Nga er a [Medal] a cherrengelel a deurreng.” El tia el osisechakl a lluches er a chelsel a rengud, bek el sils a sebechel mo sils er a deurreng me a ungil chais. Ak olecholt er a klaumerang er ngak loba ngklel a Jesus Kristo, amen.