Muhtwacn Suwohs
Muhtwacn suwohs inge pa mwet tuhma lutlut infulwen Mwet Lahngo Jisus Kraist ac oasr finsrak la ke olwelah ke kihsac in iwaclah Lal.
Tahmtahel sacohk wiyuck, kuht luhngse kowos na pwacye ac kuloh nuh suwohs ke lung kuhlwacng ac engan lowos in lohng puhsren suli luhn Prestuhnsi Se Met nuh suwos ac #IWasAStranger kwacfweacng lowos. Nuhnak muhnahs kampare in pruhe, porongo nuh ke mahmah luhn Nguhn, ac orekma nuh ke moklweyuck kom eis.
Lah nga forfor ke acn luhk sifacna kuh nuh fin facluh, tiac ma sasuc se fin mwet se siyuck, “Kuh kom esamyuc?” Mweyen nga arulacna suhfas, nga enenuh in fahk lah nga suhkwac esam ine uh. Tuhsruhktuh, nga esam wo luhngse pwacye Pahpah Lucng El lwelah nga in puhla ke nga ohsun nuh sin acn ac wen sacohk Nahtuhl uh.
Nga tuhfahna eis pacl wowo luhk in muhtwacta yurin muhtwacn sacohk suc ma oasr nien kaclpous uh. Ke kuht wihlkacs nuh selos, sie sin muhtwacn sacohk inge el fahk, “Tahmtahel Burton, nuhnakmuhnahs nimet muhlkihnkuhtlac.” Nga finsrak tuh el ac elos ma ke in esamyuck elos in puhla lah nga tiacna muhlkuhnuhloslac ke nga ac sruhmuhn kuhtuh nuhnak luhk nuh suwos.
Kuhtuh Muhtwacn Wo ke Pacl luhn Mwet Lahngo: Akwucki ke Mwet Lahngo Jisus Kraist
Tahmtahel wiyacsr ke acn pucspucs uh ahkkahlwemye atacn luhlahlfongi luhn mwet tuhma lutlut ma kuht oacyacpac srihke nuh kac. “Wuhlweacng Sasuc uh sruhmuhn ke muhtwacn [suwohs], etweyuck ine ac tiac etweyuck ine, suc oruh luhlahlfongi ke Jisus Kraist [ac ke Iwaclah Lal], lotwelah ac moulkihn mwe luti Lal, ac fahkwack ke luti, ma usrnguck, ac fuhlwactlacna Lal. Muhtwacn inge eklac mwe srihkasrak nuh ke mwet tuhma lutlut wowo ac mwet lohoh sacohk ke orekma luhn molwelah.”1
Nuhnkuh sramsram ke puk lal Luke inge. Sramsram se emet sikyak ke pacl Mwet Lahngo El oruh luti lal:
“Kutu pacl tok … [Jesus] el fufahsryesr in siti srisrik ac siti lulap in fahkak Pweng ke Tokosrai lun God. Mwet singoul luo ah welul,
“Ac oayapa kutu mutan, … (Mary su pangpang Magdalene), … ac Joanna … , ac Susanna—wi mutan pus pac saya su sang ma lalos sifacna in kasrel Jesus.”2
Sramsram se tok an sikyak tukun Moulyak Lal:
“Kuhtuh sin muhtwacn … elos toang na som nu ke kulyuk sac;
“… Tuh tia ku in konauk manol. Elos foloko ac fahklah elos … liye sie aruruma ke lipufan, su fahk nu seltalmu el sifil moul.”3
Nga tuh riti ac ahliki ma oacna atac tiac wo ke “muhtwacn suwohs” inge pacl puhs met, tuhsruhk ke nga motko ahkwoyac, kahs ingacn oacna in ahtu liki sra puk an. Nuhnkuh kahs ma kalmac an oacna kahs se inge suwohs ma kuhpahsr nuh sin muhtwacn suwohs: “in luhlahlfongi,” “nuhnak wo,” “sifacna luhlahlfongi,” “fokoko,” “fas,” “pwacye,” ac “luhlahlfongiyuck.”4
Ke nga nuhnkuh ke kahs kuh inge, nga esamwack luo sin muhtwacn suwohs ke Wuhlweacng Sasuc suc fahkwack testimoni na wo, yohk luhlahlfongi, fokoko, ac pwacye ke Mwet Lahngo. Elos ne, oacna kuht, muhtwacn suhfas, tuhsruhk mwe lohoh lalos arlac oa.
Esam ke muhtwacn se ke luhf in kof sac suc suli mwet sahyac in tuhkuh ac liye ma el lotwelah sin Mwet Lahngo ah? El fahkwack ke mwe lohoh suwohs lal ke atacn sie kihsensiyuck: “Ya acna tia el pa Christ?”5Testimoni ac puhsren suli lal arlac fokoko oruh “mwet pucspucs … wi pac luhlahlfongi ke srihpen fahkak lal.”6
Tukun misac luhn tamuhlwel wiyacl, Lazarus, Martha, mwet tuhma lutlut sacohk ac kawuck lal Leum, fahkwack ke puhla ac nuhnak loal lal, “Leum, kom funu oasr inge mukul se wiuk inge lukun tia misa!” Nuhnkuh ke luhlahlfongi lal ke el tahfwelah in fahk, “Tusruktu nga etuh, lah finne inge pacna, nga etu lah God El ac sot nu sum kutena ma kom siyuk sel.” El tahfwelah fahk, “Nga lulalfongi lah kom pa Christ, Wen nutin God, el su God El wulela kac mu ac tuku nu faclu.”7
Kuht lotwelah sin tahmtahel inge lah muhtwacn suwohs uh pa mwet tuhma lutlut akwucki ke Mwet Lahngo Jisus Kraist ac oasr finsrak lalos ke olwelah ke iwac in kihsaclah Lal.
Muhtwacn Suwohs Karuhnganwacng Olwelah ke Fohlohkyak sac: Insese in Kihsackuhnlah
In pacl met ah, muhtwacn suwohs uh elos kihsackuhnuhloslac ke elos fahkwack ac moulkihn mwe luti luhn Jisus. Muhtwacn suwohs ke muhtwacwacackiyacn fohlohkyak se inge oruh oacpacna. Drusilla Hendricks ac sucu lal elos wi inmahsrlolos, suc ekihn mwet eklac sasuc, kweok ke pacl se ma kalyeiyuck Mwet Luhlahlfongi fin acn Clay County Missouri. Mukul tuhmwacl kweokkihn ul luhn mahno ke Mweun ke Infacl Crooked. El muhkwelacna ke karihngihnyacn mukul tuhmwacl ac sucu lal ah.
“Ke sie pacl na upac, ke lihsr mongo nwacn sucu ah, el esam lah puhsra se fahk nuh sel, ‘Mongfihsrwacsr, mweyen Leum el ac fah usot.’”
Ke tuhlihk mukul se nahtuhl enenweyuck in volunteer nuh ke Mormon Battalion, muhtwacwacackiyac ah Drusilla el sruhnga ac puhla upac ke pruhe nuh sin Pahpah Lucng nekena “oacna in sie puhsra fahk nuh sel, ‘Kuh kom tiac luhngse wolacna fuhlwact emet?’ El topuk, ‘Ahok,’ ac puhsra sac tahfwelah, ‘Kom nuhnkuh muh kom ac eis fuhkah sahyacn kom in oraclah kihsac ma yohk emet uh?’”8
Kuht lotwelah sin muhtwacn suwohs inge lah karuhnganwacng olwelah oacna mwet tuhma lutlut uh enenuh kena lasr in kihsackuhnlah.
Muhtwacn Suwohs Mihsenge: Esam ac Ahkolah in Ahkfuhlwactye Fohlohkoh Lal
Nga sruhmuhn ke muhtwacn suwohs in lwen luhn Mwet Lahngo ac ke muhtwacwacackiyacn Fohlohkyak luhn wosasuc se inge, tuhsruhk fuhkah srihkasrak ke ohiyacn mwet tuhma lutlut ac testimoni luhn muhtwacn suwohs in lwen lasr uh?
Ke orekma se luhk ingena nuh Asia ah, nga sifilpac fwefwelac sin muhtwacn suwohs puhkantwen suc nga ohsun nuh se. Yohkna nga fwefwelac sin fihl se met ke mempucr fin acn India, Malaysia, ac Indonesia, suc kwacfweacng in moulkihn facsin luhn wosasuc in lohm selos, kuhtuh pacl uh yohk kihsac lalos ke srihpen moulkihn wosasuc el tiac akohnohki nuh ke facsin luhn sucu ac acn lalos. Fihl puhs ke muhtwacn suwohs fin acn Hong Kong ac Taiwan tahfwelah in ahkinsewowoye moul luhn sucu lalos, mempucr ke Alu uh, ac acn lalos ke elos oakiyac moul lalos ke Mwet Lahngo ac insese in kihsackuhnuhloslac in karuhnganwacng olwelah uh. Kain in muhtwacn suwohs inge oasr ke Alu uh.
Sie muhtwacn suwohs suc ma ahkinsewowoye moul luhk ke yac puhs el lain mas na upac se ke yac 15 ma ahkmuhnahsye, ahkupacye, ac upaclah ma pahngpahng inclusion body myositis. El ne muhtana ke wheelchair, el kwacfweacng in srui ac oruh ma el enenuh elan oruh: lis se ke ma el kuh in oruh, kain se nuh ke nga kuh in momong, nga kuh in ukumyac, nga kuh in pruhe, ac nga kuh in puhla luhngse luhn Mwet Lahngo luhk. El fahkwack ke mwe lohoh suwohs lal ke Kraist apkuhran in lwen nuhkwewa nuh sin sucu ac kawuck lal.
Nga tuhfahna in lohng sramsram se kacl Jenny. El sie misineri fohlohk suc pahpah ac ninac kiyacl ah fahsrwelihk ke el oruh misin lal. El sruhmuhn nuhnak lal ke fohlohk nuh lohm sel ah lah “ahksahngweng[yacl] nuh ke misac.” Tuhsruhk ke sahflahiyacn misin lal nuh Italy, ke el muhtwacta nuh ke lohm sin misin prestuhn ke elac fohlohk nuh lohm sel ah nuh United States, ac sie muhtwacn suwohs, muhtwacn kiyacl misin prestuhn ah, kahsrwel kahkahsrihk ke kawi aunsifacl.
Yac ekahsr tohkoh, sie pac muhtwacn suwohs, Terry—prestuhn luhn Rilif Sosaiti ke stek sacn ac mwet tuhma lutlut luhn Jisus Kraist—ahkinsewowoye moul lal Jenny ke pahngpahng el in sie prestuhn luhn Rilif Sosaiti ke ward sacn. Ke pacl sacn, Jenny el kampare elan srukyac sie tikri nuh ke taktuh. Terry el tiac ekihn muhkwena elan mwet luti se lal Jenny nuh ke mwet kol, tuhsruhk el weluhl muhta lun lohm ono ah ke ao singucul ke konweyuckyak lah Jenny el mas leukemia. Terry el muhtwacta nuh lohm ono ah ac wucnuhl Jenny nuh ke appointment lal. Jenny el fahk, “Nga muh pacl ekahsr nga wohtlah ke stosah okwacl ah.”
Finne el mas, Jenny el tahfwelah elan kuhlwacnsap ke oaru ke el ekihn prestuhn luhn Rilif Sosaiti ke wohrt sac. Ke pacl upac na pwacye nuh sel uh, el taclofon ac suhpweyuck tacks ac email in pet kiyacl, ac el suli muhtwacn ke alu in tuhkuh liyacl. El suhpweyuck cart ac lwacta fototo nuh sin mwet, el luhngse tahmtahel wiyacl ke yen loesalah. Ke wohrt lal siyuck ke sie petsac kacl ac kaunsuclucr wiyacl nuh ke sramsram mahtuh luhn wohrt lal, pa inge ma elos eis. Ke srihpen Jenny el pa muhtwacn suwohs se, el suli mwet nuhkwewa in akacsruhi ma toasr luhn kais sie, wi pac ma toasr lal sifacna.
Ke el sie muhtwacn suwohswohs, Jenny el fahkwack: “Kuht tiac oasr inge in molwelah mwet sahyac muhkwena a kuht in sifacna molikuhtlac. Ac molwelah sacn tuhkuh ke kuht sie sin sie nuh sin Jisus Kraist, ke kahlwem ke pahkotwen Lal ac Iwaclah Lal ac puhla in luhngse Lal nuh sin muhtwacn ke Alu uh. Ma inge sikyak ke ohiyac na srihsrihk pa nuh ke kawiyac sifen mwet se; suhpwaclah sie lwacta fototo an ke kahs in ahkkuh, kahlwem, ac pweng in fwackyuck luhn finsrak ac pahkotwen; kuh lwelah muhtwacn uh in kahsrwekuht.”9
Tahmtahel, ke lusrongyuck kuht, tahfuh luo, ahkmuhnahsyeyuck, koluk, ahsor, kuh upaclaclac, nga finsrak tuh kuht in eis puhsren suli luhn Leum in nihm ke kof in moul oacna ke muhtwacn suwohs ke luhf in kof sac, ac suli mwet sahyac in oruh ke kuht fahkwack lohoh suwohs lasr: “Yac acnu tia el pa Christ?”
Ke moul uh suhpwacr, oacna nuh sel Martha ke tamuhlwel wiyacl misac—ke kuht puhlakihn ahsor luhn muhkahimtacl, tiac kuh in orek fahko, misac luhn mwet lasr, tiac eis pacl wowo la in puhlakihn pahyuck ac sucu, sucu ma pahpah ninac fahsrwelihk, suhpwacr ma wacngihn kutongyac, maskihn mahno kuh insifac, mwe tikuclkucl upac, elyah, pahlah ke orekmakihn ma suhfal nuh ke mahno, upac luhn inkacnek in sacn, ac kain in ma puhkantwen sahyac—nga finsrak kuht in esamuhl Martha ac mwe lohoh suwohs “Tusruktu nga etuh … [ac] Nga lulalfongi lah kom pa Christ, Wen nutin God.”
Lwelah kuht in esam muhtwacn suwohswohs puhkantwen ma sruhnga sislah Mwet Lahngo sacohk lasr ke pacl el puhlakihn waiyok upac ke El kweok fin sahkseng ac tuhsruhk ao ekahsr tohkoh elos eis mwe insewowo in inmahsrlon kuhtuh mwet lohoh in liye Sifil Moulyak wolacna Lal. Lwelah kuht in fototo nuh Sel ke pruhe ac lutlut ke ma suhmuhslah. Lwelah kuht in ahkfototoye kuht nuh Sel ke ahkolah nuh ke ac ipeis ke akucl muhtahl ke kihsac in Iwaclah Lal ke wik nuh kwewa ke pacl luhn akwuck nuh ke sackracmacn ac ke kuht liyacacng olwelah ke kuht kuhlwacnsuhpuh mwet sahyac ke pacl elos enenuh kahsruh. Sahp pa ingacn pacl se ma kuht ac wi inmahsrlon muhtwacn suwohs, mwet tuhma lutlut luhn Jisus Kraist, suc ac fah ahkfuhlwactye wolacna Lal ke El ac sifil fohlohk uh.
Tahmtahel, nga fahkwack ke Pahpah ac Ninac luhngse tuhmasr inkuhsrao; ke Mwet Lahngo lasr, Jisus Kraist; ac ke Iwaclah wacngihn sahflahiyac Lal ke srihpacsr. Nga etuh Mwet Pahluh Joseph Smith el na sollac na met in ekihn mwet pahluh nuh ke Fohlohkyak se inge. Nga etuh Puk luhn Mormon el pwacye ac luhngasyucklac ke kuh luhn God. Kuht ahkinsewowoyeyuck ke sie mwet pahluh moul ke lwen lasr uh, Prestuhn Thomas S. Monson. Oasr luhlahlfongi luhk ke ma suwohs inge! Ke inen Jisus Kraist, Amen.
Mwe kahsruh: Ke Eprel 1, 2017, Tahmtahel Burton el fihlfihllac ke Prestuhn Luhlahp luhn Rilif Sosaiti uh.