Oracniyacn Sucu luhn God
God Pahpah El kena tuhlihk Nahtuhl in sulpac fohlohk nuh lohm ah, in sucu ac in wolacna.
Tamuhlwel ac tahmtahel sacohk wiyuck, nga engankihn pacl wowo se in wi kowos ke muhtwacwackiyacn tuhkweni ke toeni luhlahp se inge. Nga pain kowos ke luhngse luhk.
Jacnuhruhl Kanfracns nuh pacl wowo se in oracni Mwet Luhlahlfongi ke Lwen-sahflah uh. Loeslac pacl ke kuht kuh in fahsrweni na pwacye ke acn sefanna, tuhsruhktuh Leum El use inkacnek nuh ke mwe insewowo luhn jacnuhruhl kanfracns in som sun kais sie suwos kuhtwena acn kowos oasr we an. Finne wolacna in liye fahsrweniyacn Mwet Luhlahlfongi ke Conference Center luhlahp se inge, kuht suc tuyak ke acn in sramsram uh kuh in liye ke nuhnak lasr mwet million suc fahsrweni yohrohsr fin facluh nohfohn in liye ac lohng kanfracns uh. Puhs suwos fahsrweni yurin sucu lowos an; kuhtuh suwos sahp fahsrweni yurin mwet kawuck kuh mwet mempucr sahyac ke Alu uh.
Kuhtwena acn kowos oasr we an ac kuhtwena atac kowos lohng puhsrwek, nuhnak muhnahs etuh lah finne kowos tiac oasr yohrohsr inge, kuht kuh in puhla muh kowos oasr yohrohsr ke nguhn. Kuht finsrak kowos nohfohn ac fah puhla ma sefanna yohrohsr—lah kowos ac fah puhla kuh luhn nguhn ma tuhkuh ke pacl mwet luhlahlfongi fahsr fahsrweni ke inen Jisus Kraist.
Nga puhla sin nguhn in sramsram nuh suwos mihsenge ke sie kain in fahsrweni sahyac. Kain in fahsrweni se inge tiac sikyak ke mahlwem ohnkohsr muhkwena, oacna jacnuhruhl kanfracns uh oruh. Tuhsruhk, ma se inge ma sikyak kalweniyuck ke Fohlohkyak luhn Alu uh emet ah, ac ma inge salkweyuckyak ke yac tohkoh an. Nga sramsram ke fahsrweniyacn sucu luhn God.
In ahkuhtweyac fahsrweni se inge, sahp wo in muhtwacwacack met liki kuht isuslac, met liki ma Pwacpuhl pahngon “matawauk” se (Genesis 1:1). Ke pacl sacn, kuht muhtana yurin Pahpah Inkuhsrao oacna tuhlihk nguhn Nahtuhl. Ma inge pwacye nuh sin mwet nuh kwewa ma muhta fin facluh uh.
Kom in kahlwem wo, ine “tamuhlwel” ac “tahmtahel” tiacna pain kuhlwacng kuh kahs in luhngse nuh sesr. Ma inge pa kahs sruhmuhnyuck ke ma pwacye ma pahtpaht: God El pa Pahpah pwacye tuhmwacn mwet nuh kwewa; kais sie sesr ip ke sucu ma pahtpaht Lal. Mweyen El luhngse kuht ke luhngse luhn sie Pahpah suwohswohs, El kena kuht in kampare ac oruh kuht in oacna El. El ahkkweyelah plwacn se ma kuht in tuhkuh nuh facluh, ke sucu, ac puhlakihn ma in ahkoekuhtlac in fohlohk nuh Yohrohl ac moul oacna El moul.
Ip ma infulwac ke plwacn se inge pa olwelah se lah Jisus Kraist El fah sang El sifacna ke sie kihsackuhnlah, in molikuhtlac liki ma koluk ac misac. Kunohkohn lasr ke plwacn se ingen pa in eis kihsackuhnlah Luhn Mwet Lahngo ke ahkos masap ac akwuck luhn wosasuc an. Kowos ac nga tuh eis plwacn se inge. Na pwacye, kuht enganwack kac, finne ac kalmeyac pa kuht ac som liki ye muhtuhn Pahpah tuhmasr ac muhlkuhnlah ma kuht tuh puhlakihn ke kuht oasr Yohrohl ah.
Kuht tiacna suhpweyuckme nuh inge ke wacngihn etuh la. Kais sie sesr eis mwe sang ke ipin kahlwem luhn God, pahngpahng “Kahlwem luhn Kraist,” in kahsrwe kuht in etuh inmahsrlon ma wo ac ma koluk, pwacye ac stuhuh. Pa oruh mwet ma finne srihklac moulkihnyac kuh wacngihn etweyac ke plwacn luhn Pahpah kuh in srwackna puhla, ke insiaclos, lah oasr ma kuht oruh ma wo ac suwohs ac ma sahyac uh tiac.
Puhla lasr ke ma pwacye ac ma stuhuh yohkwelihk ke kuht karihngihn tuhlihk nahtuhsr. Ke insiyacn pahpah ninac nuh kwewa oasr kena in luti tuhlihk nahtuhl ma wowo. Pa inge ip usrnguck ke plwacn luhn Pahpah inkuhsrao. El kena tuhlihk Nahtuhl in tuhkuh nuh facluh, ukwe atac ma pahtpaht ke sucu luhn inkuhsrao. Sucu uh pa ip fihsrwacsr oreklac luhn tohkohsrahi ma pahtpaht, ac na El oruh ma inge nuh ke ip fihsrwacsr se met fin facluh. Finne sucu facluh loes liki in suwohswohs, elos sang nuh sin tuhlihk nuhtin God finsrak wowo emet in painyuck nuh ke facluh ke kain in luhngse fin facluh sefanna ma apkuhran in oacna sie nuh ke ma kuht puhlakihn inkuhsrao—luhngse luhn pahpah ninac. Sucu uh oacyacpac pa atac wo emet in karihngihn ac akacsruhi ma wo ac ip pwacye ma kuh in kol kuht in fohlohk nuh ye muhtuhn God.
Arlac suhpuhs tuhlihk nuhtin God fah eis ke moul se inge kahlwem nohfohn ke plwacn luhn God, oacyacpac kuh in eis akwuck luhn pristut ac wuhlweacng ma oruh kuh in iwaclah luhn Mwet Lahngo orekmakihnyuck ke fohnlah la ke moul lasr. Finne pahpah ninac wowo uh kuh in moulkihn luhlahlfongi nuh ke kahlwem lalos tuhsruhktuh soenna lohng kacn Jisus Kraist ac Iwaclah Lal kuh in suliyuck in pacptaislac ke Inel. Ma inge pwacye nuh ke puhs liki million sin tamuhlwel ac tahmtahel wiyacsr ke ma mahtuh luhn facluh.
Kuhtin mwet uh fah nuhnkuh lah ma inge tiac fal. Sahp elos kuh in nuhnkuh muh ma inge mwe loh ma wacngihn plwacn kac, wacngihn enenuh nuh ke molwelah—puhla na lah sie God suwohs, luhngse El tiac kuh in oraclah plwacn se nuh sin kuhtuh sin kuhtuhna tuhlihk Nahtuhl uh. Sahp mwet sahyac fah nuhnkuh lah God El sulwaclah na met liki facluh uh lah suc tuhlihk Nahtuhl El ac molwelah ac sang wosasuc nuh selos, ac mwet nuh kwewa sahyac suc soenna lohng wosasuc uh pa mwet ma tiacna “suleyucklac.”
Tuhsruhk kom ac nga etuh, mweyen ma pwacye ma fohlohkyak sel Mwet Pahluh Joseph Smith, lah plwacn luhng God luhngse ac suwohs yohk liki ma ingacn. Pahpah tuhmasr Inkuhsrao El kena yohk in oracni ac ahkinsewowoye sucu Lal nohfohn. Finne El etuh lah tiac elos nohfohn ac sulwaclah in fahsrweni, plwacn Lal sang nuh sin kais sie tuhlihk Nahtuhl pacl wowo se in insese kuh lahfwekihn suli Lal. Ac sucu uh pa insiacn plwacn se inge.
Yac siofok somlah ah, mwet pahluh Malachi el fahk lah ke sie lwen ac tuhkuh, God El fah suhpwacllah Elijah in “akwoye inmahsrlon papa uh ac tulik uh” (Malachi 4:6).
Palye se inge yohk srihpac na pwacye oruh Mwet Lahngo El sruhmuhn kac ke El ohsun nuh sin mwet Macrike tukun Sifil Moulyak Lal (liye 3 Nephi 25:5–6). Ac ke lihpufacn Moroni el muhtwacta yohrohl mwet pahluh Joseph Smith, el oacyacpac fahk palye se kacl Elijah ac insiyac, pahpah, ac tuhlihk uh (liye Joseph Smith—History 1:36–39).
Mihsenge pa Eprel 1. Ke lwen luo fahsruh, Eprel 3, mahkiyac yac 181 ke lwen se palye lal Malachi ahkfalyeyucklac. Ke lwen se ingacn, Elijah el tuh tuhkuh, ac sang nuh sel Joseph Smith kuh luhn pristut in siliyucki sucu ne tok ma pahtpaht (liye D&C 110:13–16).
Ke lwen se ingacn nuh ke ingena, kena se in lutlut ke sramsram mahtuh luhn sucu lihksreni na kapwack. Ke atac in kap, mwet uh kena riti ke mwet mahtuh lalos yohk likina kena se in riti na. Library ke sramsram mahtuh, u kac, ac technology uh yohkwelihk fin facluh in kahsruh ke kena yohk se inge. Kuh luhn internet in ahkyohkye aetuhilac uh oruh sucu uh in tuhkweni orekma in oruh sukok ke ma mahtuh luhn sucu ke muhiyac ac woiyac ma tiac kuh in oreklac pacl met ah.
Kuh efuh ma nohfohn inge sikyak? Ke wacngihn kahs wo liki, kuht pahngon ma se inge “nguhnin Elijah.” Kuht kuh in pahngpahng pac ma inge “ahkfalyacn mwe palye se.” Nga fahkwack testimoni luhk lah pwacye Elijah el tuh tuhkuh. Insiyacn tuhlihk uh–insiyom ac insiyuck–ma forlah nuh sin pahpah tuhmwacsr, mwet mahtuh lasr. Puhla luhngse yohk kowos puhla ke mwet mahtuh lowos wi ahkfalyacn mwe palye se ingacn. Ma inge oasr ke insiacn puhla lom lah suc kom an. Tuhsruhktuh ma inge yohk liki DNA kom eis sin pahpah ac ninac kiyom an.
Nuh ke srihkasrak, ke kowos ukwe moklweyuck luhn nguhn in etwaclah ke sramsram mahtuh luhn sucu lom an, sahp kom ac konwacack lah mwet mahtuh lom an sahp wi kom ke ma oacna atacn motom kuh luhngse lom ke puk kuh talan lom in on. Ma inge kuh in yohk srihpac kuh wo in etuh kac. Tuhsruhk fin orekma lom tui ke ma inge, kom ac puhla lah oasr ma se wacngihn. Ma inge sikyak mweyen in oracni ac kapsrwacni sucu luhn God enenuh ma puhs liki in puhla na wo. Ma inge enenuh wuhlweacng muhtahl ma oreklac ke kuhpahsr nuh ke akwuck luhn pristut.
Puhslac sin mwet mahtuh lom uh tiac eis akwuck ingacn. Tuhsruhk ke woiyacn God, kowos eis. Ac God El etuh lah kowos ac puhla fototoeni nuh sin mwet mahtuh lom ke luhngse ac lah kowos ac eis technology enenweyuck in konwaclosyak. El oacyacpac etuh lah kowos fah moul ke pacl se ma fihsrwacsr in som nuh ke tempuhl, ma akwuck uh kuh in sikyak, yohk liki kuhtwena pacl sahyac fin facluh. Ac El etuh lah El kuh in luhlahlfongi kowos in ahkfahsrye orekma se inge ke mwet mahtuh lowos an.
Pwacyena, kuht nohfohn oasr kunohkohn kahfo ac yohk srihpac lasr ma enenuh lohacng ac pacl lasr. Kuht nohfohn konwacack ip ke ma Leum El kena kuht in oruh ke kuhiyacsr. Wo ohiyac, Leum El use nuh sesr inkacnek wo in eis kuh ac puhla wowo ke kuhlwacnsap lasr, weacng lutlut ke sramsram mahtuh luhn sucu. Kuht eis kuh in oruh in oruh ma El siyuck ke luhlahlfongi lasr ma Mwet Lahngo El use wacngihn masap “sahyacn El fah ahkolah sie inkacnek nuh [sesr] tuh [kuht] in kuh in oraclah ma suc El sapkihn nuh selos” (1 Nephi 3:7).
Nga etuh ma inge pwacye ke puhlakihn luhk. Yac puhs somlah ah, ke sie mwet lutlut ke university, nga ohsun nuh sin mukul se suc orekma ke sie company luhlahp emet ma oraclah computer. Ma inge sikyak ke muhtwacwacyacn computer, ac tuh sikyak tuh company se lal ah suhpwacllah in kuhkwackihn computer nuh sin Alu luhn Jisus Kraist luhn Mwet Luhlahlfongi ke Lwen-sahflah uh.
Ke ma nga kuh in puhla, mwet moli se inge wacngihn alu in luhlahlfongi. Tuhsruhk el fahk ke lut ac fwefwelac, “Ke alu se inge elos oruh ma elos pahngpahng ‘genealogy,’ sokwack inen mwet ma misac, srihke in konwacack mwet mahtuh lalos. Mwet uh, muhtwacn uh yohkna, kahsruhsrsruhsr inmahsrlon filing cabinet nuh ke filing cabinet, suk pwepuh srihsrihk ke koanon mwe etuh.” Nga fin esam suwohs, el fahk lah muhtwacn an falke fahluhk tennis elos in muh kuh in kahsruhsr muhi likina. Mukul sac tahfwelah in fahk, “Ke nga liye yohkiyacn orekma elos srihke in oruh ah, nga tuh akihlen lah nga konwacack srihpen oreklac luhn computer uh.”
Na, el pwacye kuhtuh. Computer uh ac sie ip yohk srihpac nuh ke orekma pacl fahsruh ke sramsram mahtuh ke sucu—tuhsruhk tiac computer ma el kuhkwackihn ah. Sie mwet kol moklweyuck ke Alu uh sulwaclah in tiac moli muhkwena computer nahtuhl an. Tuhsruhk Alu uh enenuh in sano nuh ke technology ke pacl sacn soenna luhmweyucklac kac. Tuhsruhk nga etwaclah ke yac sacn me lah technology wo emet uh tiac kuh in wo liki fwackyuck inkuhsrao me uh, oacna kain se ma mwet kol luhn Alu se tuh eis uh. Pa inge orekma luhn nguhn, ac Leum El kol ma inge ke Nguhn Muhtahl Lal.
Kuhtuh wik tari ah, nga orekma ke sramsram mahtuh luhn sucu luhk yurin mwet kahsruh se siskuck ac siepac oasr ke tacluhfon ah. Ke screen ke computer sac oan ye muhtuhk oasr sie ma upac yohk likina kuh luhk in ahkwoyelah. Nga liye ine luo, suhpweyuckme nuh sihk ke kuh luhn technology, ke mwet suc sahp sano in eis akwuck luhn tempuhl. Ine inge tiac oacna sie, tuhsruhk oasr srihpac se muh sahp elos pa mwet sefanna. Orekma luhk ah pa in konwacack ma pwacye kac uh.
Nga siyuck sin mwet kahsruh luo inge in fahk nuh sihk. Eltahl fahk, “Moh, kom enenuh in sulwaclah.” Ac elos etuh suwohs lah nga ac konwacack ma pwacye uh. Computer se, ke kuh yohk ac etuh la, oruh nga ahkinsewowoyeyuck in ngwetngwet ke ine luo inge ke screen sac, nuhnkuh ke mwe etuh ma oasr, suk lutlut sahyac, pruhe insiuck, ac konwacack ma pwacye. Ke nga pruhe ah, nga etuh na pwacye ma ngan oruh—oacna ke nga enenuh ke pacl sahyac ke nga enenuh in luhlahlfongi ke kahsruh inkuhsrao me in topuk ma upac se.
Kuht ac tiac etuh ma usrnguck ma God El mokle mwet in oraclah in kahsruh orekma Lal in oracni sucu Lal. Tuhsruhktuh kuhtwena ma technology sasuc ma ac fah tuhkuh, orekmakihnyacn ma inge enenuh orekmakihnyacn Nguhn ke mwet oacna kowos ac nga. Ma inge tiac enenuh in mwe lut nuh sesr. Pwacyena, ma inge pa tuhlihk mukul ac muhtwacn sacohk nuhtin God. El ac suhpwacma kuhtwena mwe kahsruh ma enenweyuck in sang nuh selos kuh in fohlohk nuh Yohrohl.
Ke yac tuhfahna somlah ah, mwet fuhsr ke Alu uh tohpohklah nguhn lal Elijah ke ohiyac na wo se. Puhs selos ingena sruokyac pwepuh nuh tempuhl sifacna lalos in utyak nuh ke pacl pucspucs. Acn pacptais ke tempuhl an kahfofo liki met ah; kuhtuh tempuhl enenuh in eklac pacl lalos in muh kahsruh ke puhsiyacn mwet fuhsr ma wi tempuhl.
Met arlac suhpuhs tuhsruhk lwelah nuh sin mwet fuhsr in use inen mwet mahtuh lalos nuh ke tempuhl an. Ingena ma inge sikyak pacl nuh kwewa, ac puhs pacl ma mwet fuhsr inge pa sifacna konwacack mwet mahtuh inge.
In weacng ma inge, mwet fuhsr puhkantwen konwacack lah sin sang pacl lalos in oruh sukok ke ma mahtuh luhn sucu ac orekma luhn tempuhl ahkkweye luhlahlfongi lalos ke plwacn in molwelah. Ma inge fah ahkyohkye kolyuck luhn Nguhn ke moul lalos ac ahksrihkyelah kuh luhn mwet lokoalok sac. Ma inge kahsrwelos in puhla fototo nuh yurin sucu lalos ac fototo nuh yurin Leum Jisus Kraist. Elos etwaclah lah orekma se inge tiac molwelah mwet misac muhkwena; ma inge molikuhtlac nuh kwewa (liye D&C 128:18).
Mwet fuhsr an etwaclah wo yohk srihpaciyacn ma inge; na ingena pahpah ninac kiaclos uh enenuh in wi pac. Ingena oasr mwet pucspucs suc insese in pacptaislac ke facluh luhn nguhn mweyen orekma ma oreklac sin mwet fuhsr tari, ac elos sano nuh ke akwuck sahyac ma mwet mahtuh muhkwena kuh in oruh lun tempuhl ke facluh se inge. Orekma in oracni sucu Luhn Pahpah Inkuhsrao tiacna orekma luhn mwet fuhsr muhkwena, ac tiacna orekma luhn mwet mahtuh muhkwena. Pa orekma luhn mwet nuh kwewa. Kuht nuh kwewa pa mwet in oracni.
Pa inge orekma luhn fihl lasr, ma Mwet Sap Paul el pahngon “wolacna luhn ohiyacn pacl uh,” ke el fahk lah God El fah “eisani ma orekla nukewa nu sie, ke ma inkusrao ac fin faclu, ac Christ pa ac leumi ma inge.” (Ephesus 1:10). Ma inge kuh in sikyak ke orekma in iwaclah luhn Wen nuhtin God, Jisus Kraist. Ke srihpacl, mempucr ke sucu lasr, “muta lowsla, a inge ke kowos kupasryang nu sin Christ Jesus, kowos muta apkuhran, ke sripen srahn Christ. Tuh Christ sifacna pa akmisye inmahsrlosr ke el orani mwet Jew in ma sefannala” (Ephesus 2:13–14). Kowos puhla na ma inge, oacna nga puhla, ke kowos puhlakihn sie yohkwelihk luhn luhngse ke kowos liyacack sie petsac luhn mwet mahtuh lowos. Kowos puhlakihn ke tempuhl ke ine ma oasr ke pwepuh ah oacna in yohk srihpac likina ine se, ac kowos tiac kuh in lain puhla se ma mwet se inge etwekom ac puhla luhngse lom.
Nga fahkwack lah God Pahpah El kena tuhlihk Nahtuhl in sulpac fohlohk nuh lohm ah, in sucu ac in wolacna. Mwet Lahngo El moul. El kol ac ahkinsewowoye orekma se inge, ac El liyacacng ac kol kuht. El tarilacna nuh suwos ke kuhlwacnsap luhlahlfongi lowos in oracni sucu luhn Pahpah Tuhmwacl, ac nga olwelah nuh suwos kahsruh moklweyuck ma kowos suk ac enenuh uh. Ke inen Jisus Kraist, amen.